Wu Nga Ku Hundzi!

KU HUNDZIWA hi yini xana? Hi Ntsombano wa Muganga wa Timbhoni ta Yehovha wa “Varhumiwa Va Ku Rhula Ka Xikwembu” lowu tshinelaka hi xihatla! Etindhawini to tala ntsombano wu ta sungula hi vuyimbeleri hi 9:30 hi Ravuntlhanu nimixo. Endzhaku ko yingisela mimbulavurisano leyi tiyisaka ripfumelo ya nkulumo leyi nge “Ku Yingisela Vahuweleri Lava Hisekaka Va Ku Rhula,” u ta tsakela nkulumo leyi khutazaka leyi nge “I Yini Leswi Xikwembu Xi Swi Languteleke Eka Hina?”

Yinhla-nkulu ya Ravuntlhanu nindzhenga ku ta va nkulumo-nkulu leyi nge “Xiphemu Xa Hina Varhumiwa Va Ku Rhula Ka Xikwembu.” Kutani nkulumo leyi nge “Ku Pfuna Van’wana Va Dyondza Swilaveko Swa Xikwembu” yi ta nyikela swiringanyeto eku dyondziseni ka vanhu lavantshwa. Yona yi ta landzeriwa hi nkulumo ya nxaxamelo leyi nga enkarhini leyi nge “Tivoneleni Mintlhamu Leyi Nga Vonakiki Ya Ku Tihungasa.” Nongonoko wa Ravuntlhanu wu ta gimetiwa hi nkulumo leyi nge “Lwisana Na Diyavulosi—U Nga Pfumeleli Vubihi” ni leyi nge “Ku Seketela Vutshembeki Bya Rito Ra Xikwembu Hi Ku Tshembeka.”

Nongonoko wa Mugqivela nimixo wu ta kandziyisa nkoka wa ntirho wo endla vadyondzisiwa eka nkulumo ya nxaxamelo ya swiphemu swinharhu leyi nge “Varhumiwa Lava Tisaka Mahungu Lamanene Ya Ku Rhula.” Xiyimiso lexi xi ta hela hi tinkulumo leti nge “Ku Nyika Hi Ntsako eNhlengeletanweni Ya Yehovha” ni leyi nge “Vutomi Ni Ku Rhula Hi Ku Tinyiketela Ni Nkhuvulo,” endzhaku ka yona ku ta va ni nkarhi lowu vadyondzisiwa lavantshwa va nga ta khuvuriwa ha wona.

Nkulumo ya Mugqivela nindzhenga leyi nge “Xiya Ndlela Leyi Yehovha A Langutaka Swilo Ha Yona” yi ta hlamula swivutiso swo tanihi leswi nge ‘Xana Vakreste va hlanganyela entirhweni wo avanyisa namuntlha?’ ni leyi nge ‘Hi rihi langutelo ra Bibele malunghana ni nxupulo lowukulu?’ U ta tlhela u tsakela nxaxamelo wa swiphemu swimbirhi lowu tsakisaka mbilu lowu nge “Xikwembu Xa Ku Rhula Xa Ku Khathalela” ngopfu-ngopfu ni nkulumo yo hetelela leyi nge “Landzela Ku Rhula Ka Xikwembu eVuton’wini Bya Ndyangu.”

Nongonoko wa Sonto nimixo wu ta katsa ni tinkulumo ta nxaxamelo leti nga ni swiphemu swinharhu leti nge “Ku Tiva Varhumiwa Lava Fanelekaka” ni nkulumo leyi nge “Ku Yingisela Ni Ku Xixima Rito Ra Xikwembu.” Nongonoko wa nimixo wu ta hela hi drama leyi vatlangi va yona va ambaleke swiambalo swa kona leyi nga ni tidyondzo ta nkoka leti humaka eBibeleni ta mhaka ya Muavanyisi Gidiyoni.

Xiyimiso xo hetelela xa Sonto nindzhenga xi ta va ni nkulumo ya le rivaleni, leyi nge “Ku Rhula Ka Ntiyiso Eku Heteleleni!—Ku Huma Eka Xihlovo Xihi?” Xo hetelela, nkulumo leyi khutazaka leyi nge “Ku Ya eMahlweni Hi Ri Varhumiwa Va Ku Rhula Ka Xikwembu” yi ta pfala ntsombano.

Endla malunghiselelo ka ha ri sweswi leswaku u va kona. Leswaku u kuma ndhawu ya ntsombano leyi nga kusuhi ni laha u tshamaka kona, yana eHolweni ya Mfumo ya Timbhoni ta Yehovha ya le ndhawini ya ka n’wina kumbe u tsalela vakandziyisi va magazini lowu.