Langutelo Ra Bibele
Xana Vakreste Va Fanele Va Chumayela Van’wana?
KUMBEXANA hi ku ya hi ndhavuko wa ka n’wina, a wu fanelanga u vulavula hi vukhongeri loko u nga ri ekaya ra ka n’wina kumbe ekerekeni. Hikwalaho ka sweswo, u nga ha nyangatseka loko munhu un’wana a ta ekaya ka n’wina a ta vulavula hi Bibele mi nga n’wi rhambanga. Vanhu van’wana va ve ni langutelo leri hikwalaho ka mintirho yo homboloka ya matimu ya vukhongeri, leyi a swi vonaka onge xikongomelo xa yona i ku ponisa vanhu.
Matimu ya matiko yo tala ma hi byela hi ku hundzuriwa ka vunyingi bya vanhu, va nga hundzuki hi ku rhandza Kreste, kambe va hundzuka hi ku chava ku dlawa. Vanhu vo tala va balekile, va siya makaya ni matiko ya ka vona hambi ku ri ku funya buwa—van’wana va hisiwe emhandzini—ematshan’weni ya ku joyina vukhongeri bya vanhu lava va va xanisaka.
Matsalwa lama huhuteriweke ya Bibele, a ma ku seketeli ku sindzisiwa ka vanhu leswaku va hundzuka. Kutani, xana sweswo swi vula leswaku a wu nge va byeli van’wana hi tidyondzo ta vukhongeri bya wena? Bibele ya hlamula.
Ku Va Ni Mfanelo Yo Dyondzisa
Xo sungula, xiya xikombiso lexi vekiweke hi Yesu Kreste. A a ri mudyondzisi la nga ni vutshila, loyi a fikeleleke timbilu ta vayingiseri va yena. (Yohane 13:13, 15) Eka Dyondzo ya yena ya le Ntshaveni, tidyondzo takwe a ti olova naswona leswi a a swi dyondzisa a swi ri ni matimba. Leswi swi endle leswaku vayingiseri va yena va “hlamarisiwa hi ndlela yakwe yo dyondzisa; hikuva a a va dyondzisa kukota munhu la nga ni vulawuri.” (Matewu 7:28, 29) Endzhaku ka malembe ya 2 000, vanhu vo tala va ha pfuneka loko va kambisisa tidyondzo ta yena. Loko a kandziyisa langutelo leri, Profesa Hans Dieter Betz u vule leswaku “Dyondzo ya le Ntshaveni yi fike eka Vayuda ni le ka Vakreste, hambi ku ri eka valungu.”
Loko Yesu a ri ekusuhi ni ku tlhandlukela etilweni, u nyike xileriso lexi tiyisekiseke leswaku endzhaku ka rifu rakwe, ntirho wo dyondzisa lowu a wu sunguleke wu ta ya emahlweni naswona wu ta andza. (Yohane 14:12) U lerise vadyondzisiwa va yena leswaku va ya eka vanhu va matiko hinkwawo, va “va dyondzisa ku hlayisa swilo hinkwaswo” leswi a va leriseke swona. Yesu u xi veke erivaleni xikongomelo-nkulu xa ntirho lowu, u tlhele a ku: “Hikokwalaho fambani mi ya endla . . . vadyondzisiwa.”—Matewu 28:19, 20; Mintirho 1:8.
Nakambe, anakanya hi xikombiso xa muapostola Pawulo. Endzhaku ka loko a hundzuke Mukreste, a swi n’wi khomisanga tingana ku byela van’wana hi ta ripfumelo ra yena lerintshwa. (Mintirho 9:17-19, 22) A ku ri ntolovelo wa Pawulo ku dyondzisa emasinagogeni ni ku seketela “hi tinhlamuselo leswaku a swi fanela leswaku Kreste a xaniseka ni ku pfuka eka lava feke.” Hi vutshila, u ‘kanerisane na vona hi Matsalwa’ leswaku a kota ku “khorwisa Vayuda ni Magriki.” Hi ku ya hi buku yin’wana, rito ra Xigriki leri nge “khorwisa” ri vula “ku hundzula mianakanyo hi ku kanerisana ni munhu kumbe hi ku kambisisa tindlela letinene ta mahanyelo.” Hikwalaho ka ndlela leyi Pawulo a kanerisaneke ha yona ni vanhu, u ‘khorwise ntshungu lowukulu kutani a wu hambukisela eka mavonelo man’wana.’—Mintirho 15:3; 17:1-4, 17; 18:4; 19:26.
Ku Sindzisa Kumbe Ku Khorwisa —Hi Swihi Leswi Nga Swona?
Manguva lawa, rito leri nge “vuproselita” ri tirhisiwe hi ndlela yo hundzula vanhu hi nkani. Bibele a yi wu seketeli mukhuva wo tano. Ku hambana na sweswo, yi dyondzisa leswaku vanhu va vumbiwe va ri ni lunghelo ra ku tihlawulela ni vutihlamuleri byo hlawula ndlela leyi va lavaka ku hanya ha yona. Leswi swi katsa xiboho lexi va xi endlaka xa ndlela leyi va nga ta gandzela Xikwembu ha yona.—Deteronoma 30:19, 20; Yoxuwa 24:15.
Yesu u xixime lunghelo leri leri humaka eka Xikwembu, hi ku ka a nga tirhisi matimba yakwe yo hlamarisa ni vulawuri, ku sindzisa vanhu leswaku va amukela leswi a swi vulaka. (Yohane 6:66-69) U khumbe timbilu ta vayingiseri vakwe hi ku tirhisa swivangelo leswi twalaka, swikombiso ni swivutiso leswi lavaka mavonelo ya munhu, hinkwaswo leswi a swi endlela ku fikelela timbilu ta vona. (Matewu 13:34; 22:41-46; Luka 10:36) Yesu u dyondzise valandzeri vakwe leswaku va kombisa xichavo lexi fanaka eka van’wana.—Matewu 10:14.
Swi le rivaleni leswaku Pawulo u landzele madyondziselo ya Yesu evutirhelini byakwe. Loko Pawulo a ri karhi a khorwisa vayingiseri va yena hi Matsalwa lama twisisekaka, a a yi xixima mintlhaveko ni mavonelo ya vanhu van’wana. (Mintirho 17:22, 23, 32) A a swi twisisa leswaku ku rhandza Xikwembu na Kreste hi kona ku faneleke ku hi susumetela ku tirhela Muvumbi wa hina hi ku hiseka. (Yohane 3:16; 21:15-17) Kutani, xiboho lexi hi xi endlaka, i xa munhu hi yexe.
Xiboho Xa Munhu Hi Yexe
Loko vanhu lava anakanyaka kahle va endla swiboho leswikulu evuton’wini, swo fana ni ku xava yindlu, ku lava ntirho ni ku kurisa vana, swilo swo tano a va swi weli henhla. Va nga ha endla ndzavisiso hi swilo swo hambana-hambana, kutani va anakanyisisa hi leswi va swi kumaka, naswona va lava mpfuno. Va teka goza ntsena endzhaku ka loko va rhange va ehleketa hi swilo leswi.
Hi fanele hi tinyika nkarhi lowu eneleke naswona hi endla vulavisisi lebyikulu hi nga si endla xiboho xa ndlela leyi hi faneleke ku gandzela Xikwembu ha yona. Xi ta khumba ndlela leyi hi hanyaka ha yona sweswi, naswona xa nkoka ngopfu, xi ta khumba ntshembo wa hina wa vutomi lebyi nga heriki enkarhini lowu taka. Vakreste va lembe-xidzana ro sungula va le Beriya va swi twisise kahle leswi. Hambileswi mahungu lamanene ma tisiweke eka vona hi ku kongoma hi muapostola Pawulo, va hambete va kambisisa Matsalwa hi vurhon’wana siku ni siku, va lava ku tiyiseka leswaku leswi va swi dyondzisiweke a a ku ri ntiyiso. Hikwalaho ka sweswo, “vo tala va vona va ve vapfumeri.”—Mintirho 17:11, 12.
Namuntlha, Timbhoni ta Yehovha ti hambeta ti dyondzisa ni ku endla vadyondzisiwa hilaha Yesu a hleleke hakona. (Matewu 24:14) Ti xixima vanhu van’wana lava nga ni vukhongeri bya vona. Kambe loko swi ta emhakeni ya ku byela vanhu van’wana hi vupfumeri bya tona, ti landzela nkongomiso wa Bibele. Ina, ti tirhisa rungula leri tshembekaka ra Matsalwa, entirhweni lowu ti wu tekaka wu ri lowu ponisaka vutomi bya vanhu.—Yohane 17:3; 1 Timotiya 4:16.