Dzunisani Yehovha “Masiku Hinkwawo”

¹ Pisalema 145:2 yi na xitshembiso lexi Hosi Davhida a xi tshembiseke Yehovha: “Nḍi ta ku v̌onga hi masiku hikwawo, nḍi ḍunisa v̌ito ra wena hi mikari le’yi nga heriki.” Na hina hi na xivangelo xo dzunisa ni ku vonga Tata wa hina wa le tilweni! Xana hi nga xi tekelela njhani xikombiso xa Davhida xa ku tlakusa vuhosi bya Yehovha “masiku hikwawo”?

² A Hi Tateni Timbilu Ta Hina Hi Ku Tlangela Yehovha: Dyondzo ya nkarhi na nkarhi ya Rito ra Xikwembu yi dzikisa ku tlangela ka hina leswi Yehovha a hi endleleke swona, na leswi a hi endlelaka swona, ni leswi a nga ta hi endlela swona. Loko ku tlangela ka hina mintirho ya yena leyo hlamarisa ku ri karhi ku engeteleka, hi ta tikuma hi ri karhi hi phuphuma mayelana ni vunene bya yena. (Ps. 145:7) Hi ta hisekela ku dzunisa Yehovha nkarhi hinkwawo lowu faneleke.

³ Dzunisani Yehovha Emabulwini Ya Siku Na Siku: Loko hi burisana ni vaakelani va hina, vadyondzi-kulorhi, vatirhi-kulorhi ni van’wana lava hi vonanaka na vona siku na siku, hi nga ha kuma minkarhi yo avelana ntshembo wa hina na vona. Muakelani a nga ha phofula ku karhateka ka yena hi vugevenga endhawini ya ka vona; mudyondzi-kuloni a nga ha vilela mayelana ni swidzidzirisi kumbe ku tikhoma loko biha; mutirhi-kuloni a nga ha boxa vonelo ra yena mayelana ni mhaka ya politiki. Hi nga kombetela eka misinya ya milawu ni switshembiso leswi nga eRitweni ra Xikwembu leswi kombaka ndlela leyi faneleke yo yi teka sweswi ni murhi wa swiphiqo leswi eku heteleleni. Marito yo tano lama vuriweke hi “nkari lowu fanekelaka” ma nga va nkateko!—Swiv. 15:23.

⁴ Vulavula Hi Yehovha Nkarhi Hinkwawo: Munhu la n’wi tlangelaka swinene Yehovha u lava ku avelana mahungu lamanene ni van’wana vo tala hilaha swi kotekaka ha kona. (Ps. 40:8-10) Emhakeni leyi hi fanele hi tivutisa, ‘Xana ndzi endla hinkwaswo leswi swiyimo swa mina swi ndzi pfumelelaka ku swi endla?’ Vo tala va kume leswaku hi ku endla mindzulamiso leyinene, va swi kotile ku va maphayona ya nkarhi hinkwawo. Loko swiyimo swa sweswi swi nga hi pfumeleli ku va maphayona ya nkarhi hinkwawo, xana hi nga tsarisa tanihi maphayona ya nkarhinyana? Leswi nguva ya Xitsundzuxo leyi taka wu nga nkarhi wa ntirho lowu engetelekeke, tin’hweti ta March na April ti ta va nkarhi wa kahle wo engetela ntirho wa hina hi vuphayona bya nkarhinyana.

⁵ Pfuna Lavantshwa Leswaku Va Hlanganyela Na Hina Eku Dzuniseni Yehovha: Nkhuvo wa Xitsundzuxo xa rifu ra Yesu nkarhi hinkwawo wu hi tsundzuxa hi swivangelo swo nkhensa Yehovha ni ku dzunisa vito ra Yena. Ngopfu-ngopfu lowu hi wona nkarhi lowunene wo khutaza swichudeni swa hina swa Bibele leswaku swi hlanganyela na hina ku ya vulavula erivaleni hi vuhosi bya Yehovha. Swi khutaze ku anakanyisisa hi vuenti malunghana ni leswi tsariweke eka tindzimana 7-9 eka matluka 173-5 ebukwini leyi nge Vutivi Lebyi Yisaka eVuton’wini Lebyi Nga Heriki. Loko va faneleka, a va na xivangelo xo aleriwa ku chumayela hikwalaho ka leswi va nga riki na ntokoto. Vahuweleri lava nga ni vuswikoti va nga va komba ndlela leyi ntirho wo chumayela hi Mfumo wu endlisiwaka xiswona. Loko lavantshwa va nga va na xivindzi xo vulavula hi mahungu lamanene, va nga tiyiseka leswaku Yehovha u ta va pfuna.—Mint. 4:31; 1 Tes. 2:2.

⁶ Ha vuyeriwa hi laha ku nga heriki kun’we ni van’wana loko hi lava ku dzunisa Yehovha masiku hinkwawo.