Byela Van’wana Hi Ta “Ku Vonakala Ka Misava”
1. Hi kwihi ku vonakala lokukulu loku profetiweke eRitweni ra Xikwembu, naswona hi xihi xiendlakalo lexi kokelaka vanhu eku vonakaleni loku hi ndlela yo hlawuleka?
1 Yehovha u tirhise muprofeta Esaya leswaku a profeta a ku: “Vanhu lava a va famba emunyameni va vone ku vonakala lokukulu. Loko ku ri lava tshamaka etikweni ra ndzhuti lowukulu, ku vonakala ku va voningerile.” (Esa. 9:2) Ku ‘vonakala koloko lokukulu’ ku vonake eka leswi N’wana wa Xikwembu, Yesu Kreste a swi endleke. Ntirho lowu a wu endleke loko a ha ri la misaveni ni mikateko leyi veke kona hikwalaho ka xitlhavelo xa yena, swi antswise vutomi bya lava a va ri emunyameni hi tlhelo ra moya. Ku vonakala ko tano ku laveka ngopfu eka vanhu lava hanyaka eminkarhini leyi ya munyama. Xilalelo xa Hosi xi hi pfulela ndlela yo hlawuleka leswaku hi koka vanhu va ta eku ‘vonakaleni ka misava.’ (Yoh. 8:12) N’wexemu, vanhu va timiliyoni va kombise leswaku va ni ripfumelo hi ku hlanganyela na hina eku yingiseni ka xileriso xa Yesu lexi nge: “Tshamani mi ri karhi mi endla leswi leswaku mi ndzi tsundzuka.” (Luka 22:19) Leswi nkhuvo wa Xitsundzuxo xa nan’waka wu tshinelaka, xana hi nga endla njhani leswaku hi hoxa xandla entirhweni wo vitana vanhu leswaku va ta eku vonakaleni loku Yehovha a lavaka leswaku hi ku vangamisa?—Filp. 2:15.
2. Hi nga endla njhani leswaku hi tlangela gandzelo ra nkutsulo, naswona byi ta va byihi vuyelo bya sweswo?
2 Endla Vanhu Leswaku Va Tsakela Swi Huma eMbilwini: Nkarhi wa Xitsundzuxo, i nkarhi wa kahle wa leswaku vanhu va anakanyisisa hi rirhandzu lerikulu leri Yehovha na Yesu va ri kombiseke, hi ku va kutsula hi gandzelo ra nkutsulo. (Yoh. 3:16; 2 Kor. 5:14, 15) A swi kanakanisi leswaku ku anakanyisisa koloko ku ta endla leswaku hi ya hi xi tlangela hi mbilu hinkwayo xiendlakalo lexi xo kwetsima. Vanhu hinkwavo va Xikwembu va fanele va tinyika nkarhi wo hlaya tindzimana to hlawuleka eBibeleni leti vulavulaka hi nkarhi lowu wa Xitsundzuxo va tlhela va anakanyisisa ha tona, hilaha ti longoloxiweke hakona eka xibukwana lexi nge Ku Kambisisa Matsalwa Siku Ni Siku. Ku anakanyisisa hi timfanelo ta Yehovha leti nga pimanisiwiki na nchumu, leti paluxiweke hi ndlela yo hlamarisa swinene loko a humesa nkutsulo swi endla leswaku hi tinyungubyisa hi Xikwembu xa hina. Ku anakanyisisa hi leswi nkutsulo wu vulaka swona eka hina swi endla leswaku hi rhandza Yehovha ni N’wana wa yena hi timbilu ta hina hinkwato swi tlhela swi hi susumetela ku hisekela ku endla ku rhandza ka Xikwembu.—Gal. 2:20.
3. Hi nga wu nkhensa njhani nkhuvo wa Xitsundzuxo?
3 Loko hi ri tlangela hi mbilu hinkwayo lunghiselelo ra Yehovha ro hi ponisa, hi ta khutaza swichudeni swa Bibele, vanhu lava hi endlaka maendzo yo vuyela eka vona, maxaka, vaakelani, vadyondzi-kulorhi, vatirhi-kulorhi ni van’wana leswaku va navela ku va kona enkhubyeni lowu wo hlawuleka wa Xitsundzuxo. (Luka 6:45) Hikwalaho, endla matshalatshala yo hlawuleka yo va rhamba hinkwavo, u va nyika xirhambo xa Xitsundzuxo leswaku xi ta tshama xi ri karhi xi va tsundzuxa. Vahuweleri van’wana va tsala mavito ya hinkwavo lava va talaka ku va rhambela eXitsundzuxweni, kutani va engetela mavito lamantshwa lembe ni lembe, hi ndlela yoleyo a va siyi munhu. Loko hi hlelekile naswona hi tiyimisela ku tsundzuxa hinkwavo lava hi va rhambeke, hi ta va hi nkhensa Yehovha Xikwembu “hikwalaho ka nyiko ya [yena] ya mahala leyi nga hlamuselekiki.”—2 Kor. 9:15.
4. I yini lexi nga hi pfunaka leswaku hi andzisa nkarhi wa hina wo chumayela hi March na hi April?
4 Heta Nkarhi Wo Tala Eku Chumayeleni: Xana u nga engetela nkarhi wo chumayela hi March na hi April? Hi April 1 hi ta tiphina hi ku fambisa timagazini hikuva hi ta va ni Siku ro hlawuleka ra Timagazini. A swi kanakanisi leswaku loko hi lwela ku byela van’wana “mahungu lamanene lama vangamaka malunghana na Kreste,” Xikwembu xi ta hi katekisa. Leswi Yehovha a nga Xihlovo xa ku voningeriwa hinkwako ka moya, u lerise a ku: “Ku vonakala a ku voninge emunyameni.” (2 Kor. 4:4-6) Loko ku ri ni xilaveko, vakulu va ta hlela leswaku ku va ni minhlangano ya ntirho wa nsimu leyi engetelekeke, va tlhela va rhangela entirhweni wo chumayela leswaku ntirho lowu wu endliwa hi xitalo. Leswi swi nga ha katsa ku fambisa timagazini nimixo kumbe ku tirha nsimu ya mabindzu ni ku chumayela hi riqingho nindzhenga kumbe nimadyambu. Leswaku u kota ku andzisa nkarhi wa wena wo chumayela, tivekele pakani ya tiawara leyi u nga yi fikelelaka kutani u tiyimisela ku yi fikelela. Vo tala va nga ha nyika Yehovha leswi va nga swi kotaka hi ku va maphayona ya nkarhinyana.—Kol. 3:23, 24.
5. Hi yihi ndlela leyi vo tala va vuyeriwaka ha yona hikwalaho ka ku hungutiwa ka tiawara ta vuphayona bya nkarhinyana?
5 Xana U Nga Va Phayona Ra Nkarhinyana? Se ku hundze malembe ya nkombo ku sukela loko ku hungutiwe pakani ya tiawara ta vuphayona bya nkarhinyana. Ku hungutiwa loku ku pfune vo tala leswaku va kota ku tiphina hi mikateko ni hi ntsako wa ku va maphayona ya nkarhinyana. Xana u tshama u byi ringeta? Van’wana va tivekele pakani yo phayona lembe rin’wana ni rin’wana. Emavandlheni yo tala, vahuweleri vo tala va va maphayona ya nkarhinyana, kutani yoleyo ku va mhaka leyi nga rivalekiki evandlheni lembe rero. Xana u nga tinyika nkarhi wa ku tiphina hi vuphayona bya nkarhinyana hi nkarhi wa Xitsundzuxo? April yi ta va n’hweti ya kahle yo phayona hikuva yi ni mahelo-vhiki ya ntlhanu.
6. Hi wahi malunghiselelo yo hlawuleka lama endliweke?
6 Xana vandlha ra ka n’wina ri ta endzeriwa hi mulanguteri wa xifundzha hi March kumbe hi April? U nga va ni lunghelo ro hlawuleka. Hilaha swi tivisiweke hakona enkarhini lowu hundzeke, ku sukela hi lembe ra ntirho ra 2006, hinkwavo lava nga ta va maphayona ya nkarhinyana hi n’hweti leyi ku nga ta va ku endze mulanguteri wa xifundzha va ta va ni lunghelo ro va kona eka xiyenge xo sungula xa nhlangano wa maphayona ya nkarhi hinkwawo vhiki rero. A swi kanakanisi leswaku rungula leri tiyisaka hi tlhelo ra moya enhlanganweni lowu ri ta pfuna maphayona yo tala ya nkarhinyana leswaku ma va maphayona ya nkarhi hinkwawo.
7, 8. (a) I yini lexi nga hi pfunaka leswaku hi kota ku endla xiyimiso xa vuphayona bya nkarhinyana? (b) Xana ku khomisana endyangwini swi nga pfuna njhani naswona ndyangu hinkwawo wu vuyeriwa hi ndlela yihi?
7 Loko u ri karhi u kambisisa xilaveko xa tiawara ta 50 ta vuphayona bya nkarhinyana, vona leswaku hi xihi xiyimiso lexi nga ku pfumelelaka ku tirha tiawara ta 12 hi vhiki u ri eku voningeni ka rivoni ra ntiyiso. Bula ni lava va swi koteke ku endla tano ni van’wana lava tiyimiseleke ku endla tano. Leswi swi ta va tiyisa nhlana leswaku na vona va phayona. Vahuweleri lavakulu ni lavatsongo lava khuvuriweke, lava kunguhateke kahle va kume leswaku a swi tiki ngopfu ku fikelela pakani leyi lavekaka. Yi khongelele mhaka leyi. Kutani, loko swi koteka, endla leswi u tiyimiseleke swona kutani u tiphina hi vuphayona bya nkarhinyana!—Mal. 3:10.
8 Mindyangu yo tala yi kume leswaku loko ndyangu hinkwawo wu khomisana, munhu un’we kumbe vambirhi va nga swi kota ku fikelela pakani leyi. Ndyangu wun’wana wu endle xiboho xa leswaku swirho hinkwaswo swa ntlhanu leswi khuvuriweke swi va maphayona ya nkarhinyana. Vana vambirhi lava a va nga si khuvuriwa va endle matshalatshala yo hlawuleka yo andzisa ntirho wa vona. Xana matshalatshala lawa ma wu vuyerise njhani ndyangu lowu? Wu tsale wu ku: “Hi tiphinile n’hweti yoleyo, a swi kanakanisi leswaku hi tiyise vuxaka bya hina. Hi nkhensa Yehovha hi mikateko leyo tsakisa swonghasi!”
9. Hi nga endla njhani leswaku ku vonakala ka hina ku voninga hi nkarhi lowu wa Xitsundzuxo?
9 Xana matshalatshala ya hina yo hlawuleka hi March na hi April ma ta hi phyuphyisa ma tlhela ma hi tshineta eka Tata wa hina wa le matilweni? Sweswo swi titshege ngopfu hi matshalatshala lawa hi ma endlaka leswaku hi tiyisa rirhandzu ra hina eka Yehovha ni N’wana wa yena kutani hi andzisa nkarhi lowu hi wu hetaka hi ri karhi hi chumayela. Onge ku tiyimisela ka hina ku nga fana ni ka mupisalema la yimbeleleke a ku: “Ndzi ta n’wi dzunisa swinene Yehovha hi nomu wa mina, ndzi ta n’wi dzunisa exikarhi ka vanhu vo tala.” (Ps. 109:30) Yehovha u ta katekisa matshalatshala ya hina hi nkarhi lowu wa Xitsundzuxo. Kutani, onge hi nga endla leswaku ku vonakala lokukulu ku voninga leswaku vanhu vo tala va huma emunyameni va “kuma ku vonakala ka vutomi.”—Yoh. 8:12.