Xana U Nga Va Phayona Ra Nkarhinyana?
1. Ha yini nkarhi wa Xitsundzuxo wu ri nkarhi lowunene wo ndlandlamuxa vutirheli bya hina?
1 Nkarhi wa Xitsundzuxo i nkarhi lowunene wo ndlandlamuxa vutirheli bya hina. I nkarhi lowu hi vonaka rirhandzu lerikulu leri Yehovha a hi kombeke rona ro nyikela hi N’wana wakwe tanihi nkutsulo. (Yoh. 3:16) Leswi swi endla leswaku timbilu ta hina ti va ni ku navela ku byela van’wana hi Yehovha ni leswi a hi endleleke swona. (Esa. 12:4, 5; Luka 6:45) Nakambe i nkarhi lowu hi tsakelaka tsima ro hlawuleka ro rhamba vanhu va le nsin’wini ni lava hi va toloveleke leswaku va va na hina eXitsundzuxweni. Endzhaku ka sweswo, hi endla matshalatshala yo hlakulela ku tsakela ka vanhu lava veke kona eXitsundzuxweni. Xana u ta ndlandlamuxa vutirheli bya wena hi ku teka vuphayona bya nkarhinyana hi March, April kumbe May?
2. I yini leswi endlaka leswaku n’hweti ya March, yi va n’hweti ya kahle yo teka vuphayona bya nkarhinyana?
2 Endla Leswaku N’hweti Ya March Yi Va Yo Hlawuleka: March yi ta va n’hweti ya kahle yo teka vuphayona bya nkarhinyana. Lava endlaka xikombelo xo phayona va ta hlawula ku tirha 30 kumbe 50 wa tiawara. Loko mulanguteri wa xifundzha a endzela vandlha ra n’wina hi March, lava nga teka vuphayona bya nkarhinyana va ta va ni lunghelo ro va eka nhlangano hinkwawo lowu a nga ta va na wona ni maphayona ya nkarhi hinkwawo ni yo hlawuleka. Tsima ro rhambela vanhu eXitsundzuxweni lexi nga ta va hi Ravumbirhi, March 26, 2013, ri engeteriwile loko ri pimanisiwa ni malembe lama nga hundza naswona ri ta sungula hi March 1. Tlhandlakambirhi, March yi ni mahelo-vhiki ya ntlhanu. Hikwalaho, swi ta va swinene ku hlela swiyimo swa wena eku endleni leswaku n’hweti leyi yi va yo hlawuleka swinene elembeni.
3. Hi nga ma endla njhani malunghiselelo yo ndlandlamuxa vutirheli bya hina?
3 Namba U Hlela: Sweswi i nkarhi wo kambisisa xiyimiso xa wena kutani u vona leswaku i yini leswi u nga swi endlaka leswaku u kota ku phayona. I swa nkoka leswaku ndyangu wu khomisana, hikwalaho, hi nkarhi wa Dyondzo ya Ndyangu ya ni madyambu, bulani hi tipakani ta n’wina ta ndyangu ivi mi endla xiyimiso. (Swiv. 15:22) Loko ku ri leswaku a wu nge swi koti ku va phayona ra nkarhinyana, u nga heli matimba. Xana u nga hlela xiyimiso xa wena leswaku u heta nkarhi wo lehanyana hi masiku lawa u nga ta huma nsimu ha wona? Xana u nga swi kota ku huma nsimu masiku lama engetelekeke evhikini?
4. Hi byihi vuyelo lebyi hi nga ta va na byona loko hi ndlandlamuxa vutirheli bya hina hi March, April na May?
4 Loko hi ri karhi hi ndlandlamuxa vutirheli bya hina hi March, April na May, ntsako wa hina wo tirhela Yehovha ni vanhu van’wana wu ta andza naswona hi ta eneriseka. (Yoh. 4:34; Mint. 20:35) Xa nkoka ngopfu swinene, matshalatshala ya hina yo rhangisa swilaveko swa van’wana ma ta tsakisa Yehovha.—Swiv. 27:11.