Yehovha U Fanele A Dzunisiwa Swinene
Xilalelo Xa Hosi Xi Ta Tlangeriwa Hi April 16
1 Hi ri langutele hi mahlo-ngati siku ra April 16, 2003. Hi vusiku byebyo hi ta tsundzuka rifu ra Yesu, hi hlanganyela swin’we ni timiliyoni ta vagandzeri-kulorhi va misava hinkwayo eku dzuniseni ka vito ra Yehovha. Swa fanela leswaku hi dzunisa Yehovha hi timbilu hinkwato hikwalaho ka lunghiselelo lerinene ra nkutsulo. Hikwalaho ka rona, u ta nyika vanhu hinkwavo lava n’wi yingisaka mikateko leyi hlamarisaka. Hi hlanganyela ni mupisalema hi mbilu hinkwayo eku huweleleni hi ku: “Yehovha hi lonkulu naswona u fanele a dzunisiwa swinene.”—Ps. 145:3.
2 Lowu i nkarhi wo anakanyisisa hi vunene bya Xikwembu ni ndlela leyi hi nga nkhensaka Yehovha ha yona hikwalaho ko rhumela “N’wana wa [yena] la tswariweke a ri swakwe emisaveni leswaku hi ta kuma vutomi ha yena.” (1 Yoh. 4:9, 10) Ku tlangela Xilalelo xa Hosi hi ndlela leyi faneleke swi hi lemukisa leswaku “Yehovha u ni nsovo ni tintswalo . . . naswona u ni musa lowukulu wa rirhandzu.” (Ps. 145:8) Entiyisweni, nkutsulo i xikombiso lexikulu xa rirhandzu leri Yehovha a nga na rona eka vanhu hinkwavo. (Yoh. 3:16) Loko hi anakanyisisa hi rirhandzu ra Xikwembu ni hi ku tshembeka ka Yesu, hi susumeteleka ku dzunisa Yehovha. Hi ta n’wi dzunisa hilaha ku nga heriki hikwalaho ka rirhandzu lerikulu leri a ri kombiseke hi ku endla leswaku hi va ni ntshembo wo kuma vutomi lebyi nga heriki.—Ps. 145:1, 2.
3 Pfuna Van’wana Leswaku Va Dzunisa Yehovha: Ku tlangela nyiko ya Xikwembu ya risima ya nkutsulo swi hi susumetela ku rhamba van’wana leswaku va hlanganyela na hina eku dzuniseni Yehovha. Mupisalema u huhuteriwe ku tsala a ku: “Va ta vulavula hi vunene bya wena byo tala, naswona va ta huwelela hi ku tsaka hikwalaho ka ku lulama ka wena.” (Ps. 145:7) N’wexemu ntsena, Timbhoni ta Yehovha emisaveni hinkwayo ti hete tiawara to tlula biliyoni entirhweni wo chumayela. Matshalatshala ya tona ma ve ni vuyelo byihi? Hi xiringaniso, vhiki rin’wana ni rin’wana ku khuvuriwe vanhu vo tlula 5 100, va kombisa ku tinyiketela ka vona eka Yehovha. Hikwalaho ka vanhu va 15 597 746 lava veke kona eXitsundzuxweni, lava katsaka vanhu vo tlula 9 wa timiliyoni lava nga si sungulaka ku dzunisa Yehovha tanihi vachumayeri va mahungu lamanene, ku andza ka nhlayo ya vahuweleri ka tshembisa swinene! Tanihi vachumayeri va Mfumo, hi tlangela lunghelo ra hina ro vula mahungu lamanene ni ku hundzula timbilu ta vanhu van’wana leswaku ti amukela Yehovha, N’wana wakwe ni Mfumo.
4 Ndlela leyinene yo khutaza van’wana leswaku va xixima Yehovha i ku va rhamba leswaku va hlanganyela na hina eku tlangeleni ka Xilalelo xa Hosi. Xana u va tsale ehansi hinkwavo lava u lavaka ku va rhamba ni lava va lavaka ku tsundzuxiwa siku ni nkarhi? Xana u va rhambile hinkwavo lava u va tsaleke ehansi? Loko swi nga ri tano, ringeta ku va rhamba hi nkarhi lowu saleke. Va pfune va twisisa xikongomelo xa xitsundzuxo. Exitsundzuxweni, lunghekela ku xeweta vanhu lava endzeke. Va endle va titwa va amukelekile, va tivise eka van’wana ni ku va bumabumela hileswi va koteke ku fika.
5 Ku va kona eXitsundzuxweni swi nga susumetela vanhu lava ha ku sungulaka ku hlanganyela leswaku va endla nhluvuko hi tlhelo ra moya. Xichudeni xa Bibele lexi nga ni ntshikilelo lowu vangiweke hi mhangu, lowu wu xi endlaka xi nga rhandzi ku ya endhawini leyi nga tala vanhu, xi tile eXitsundzuxweni. Loko xi vutisiwa leswaku a wu ri njhani nhlangano, xi te: “A ku ri siku leri hlawulekeke.” Ku sukela kwalaho xi sungule ku ya eminhlanganweni.
6 Endzhaku Ka Xitsundzuxo: Xana ku nga endliwa yini leswaku ku pfuniwa vanhu lava tsakelaka leswaku va va vadzunisi va Yehovha? Vakulu va fanele va xiyisisa vanhu lava sungulaka ku ta eXitsundzuxweni kutani va endla malunghiselelo ya leswaku vahuweleri lava fanelekaka va va endzela hi ku hatlisa leswaku va pfuxeta swilo leswi va swi dyondzeke ni ku swi xiya. Van’wana va nga rhandza ku va ni dyondzo ya le kaya ya Bibele. Va nga tlhela va rhambiwa ku va kona eka minhlangano hinkwayo ya vandlha ya vhiki ni vhiki, tanihi leswi ku ta ka vona nkarhi ni nkarhi ku nga engetelaka vutivi bya vona hi Bibele.
7 Ku endliwa malunghiselelo yo khutaza hinkwavo lava nga hlanganyeliki kahle ni lava holeke leswaku va va kona nkarhi na nkarhi eminhlanganweni. Loko vakulu va ku kombele leswaku u pfuna un’wana loyi a holeke leswaku a tlhela a hlanganyela entirhweni wa nsimu, tiyimisele ku endla tano. Ku kombisa nkhathalelo wo tano eka vamakwerhu swi fambisana ni xikhutazo xa muapostola Pawulo lexi nge: “Loko ntsena hi ri ni nkarhi lowunene wa swona, a hi endleleni hinkwavo leswi nga swinene, kambe ngopfu-ngopfu lava nga swin’we na hina eripfumelweni.”—Gal. 6:10.
8 Onge hinkwerhu ka hina hi nga endla matshalatshala lama hlawulekeke leswaku hi va kona eXitsundzuxweni hi April 16. Hi nga kayeli xiendlakalo lexi xo hlawuleka swinene xa ku dzunisa Yehovha. Ina, a hi dzuniseni Yehovha hikwalaho ka mintirho ya yena leyikulu, sweswi ni hilaha ku nga heriki!—Ps. 145:21.