Tirha Ntirho Wa Wena Hi Matimba Hinkwawo
1 Tanihi vadyondzisiwa va Yesu, hi averiwe ku chumayela mahungu lamanene ya Mfumo wa Xikwembu, ni ku endla vadyondzisiwa va Yesu Kreste. (Mt. 24:14; 28:19, 20) Ku hava ntirho wun’wana la misaveni lowu fanaka na wona hi xihatla kumbe nkoka wa wona. Ku khumbeka vutomi bya vanhu va timiliyoni. Hi fanele hi wu endla hi matimba ya hina hinkwawo. Xikhutazo xa Pawulo xi tirha kahle: “Hambi mi endla yini na yini, swi endleni hi matimba hinkwawo onge hi loko mi endlela Yehovha.” (Kol. 3:23, NW) “Matimba hinkwawo” ma hlamuseriwe tanihi ku va ni ku “hiseka lokukulu kumbe ku tinyiketela eka nchumu wun’we.” Xana u endla ntirho wa wena hi matimba hinkwawo?
2 Xana ku tirha hi matimba hinkwawo swi lava leswaku hi endla yini? Yehovha u ringanisa ntirho lowu amukelekaka ni vukhume kumbe xiphemu xa vukhume. (Mal. 3:10) Ematshan’wini yo vula mpimo wo karhi wa mali, vukhume byi yimela nkarhi ni matshalatshala lawa hi ma nyikelaka entirhweni wa Yehovha tanihi xikombiso xa ku n’wi rhandza ka hina ni ku kombisa ku tinyiketela ka hina eka yena. (wTS92 12/1 tl. 15) Ntirho wa hina wu fanele ku kombisa vuento bya ku tinyiketela ka hina ni ku rhandza Yehovha. Munhu loyi a tirhaka hi matimba hinkwawo u susumeteleka ku tirhela Yehovha hi xitalo hi laha swi kotekaka ha kona, hi ku ya hi laha rihanyo ni swiyimo swakwe swi n’wi pfumelelaka ha kona.
3 Pawulo u nkhense Vakreste ‘lava tirhaka hi matimba ni ku tinyiketela’ hikwalaho ka ntshembo. (1 Tim. 4:10) Va vuyeriwa hi mikateko ya Yehovha, leyi ‘yi va fuwisaka.’ (Swiv. 10:22) Ku hambana ni sweswo, lava va nyikaka switsongo kumbe lava pambulaka, a va wu kumi ntsako lowu tisiwaka hi ku nyika. (Mint. 20:35) Loko hi honisa ku tirha hi laha hi nga kotaka ha kona entiyisweni hi tsona Yehovha “v̌ukhume” lebyi n’wi faneleke.—Mal. 3:8.
4 Ku Endla Leswi Hi Nga Swi Kotaka: Loko hi hlanganyela entirhweni wa nsimu ni loko hi yisa xiviko, xana xiviko xa kona i xa ntiyiso? Buku ya hina leyi nge Vutirheli Bya Hina tluka 104, yi ri: “Nkarhi wa wena wa nsimu wu fanele ku sungula loko u sungula ntirho wa wena wo nyikela vumbhoni, wu hela loko u heta riendzo ra wena ro hetelela eka nkarhi wun’wana ni wun’wana wo nyikela vumbhoni. Nkarhi lowu tekiwaka eka swakunwa kumbe swakudya hi nkarhi wa ntirho wa nsimu a wu fanelanga ku hlayiwa.” Ku laveka ku hlela lokunene ni matshalatshala leswaku hi endla ntirho lowukulu hi nkarhi lowu hi nga ensin’wini ha wona.
5 Ku tirha hi matimba ya hina swi vula leswaku hi endla leswi hi nga swi kotaka loko hi ri ensin’wini. Munhu loyi a tirhaka hi matimba hinkwawo a nge chumayeli ntsena hi ku hamba a nyikela vumbhoni hi xitshuketa ematshan’wini yo hlanganyela entirhweni wa yindlu na yindlu. Muhuweleri lontshwa, la nga khuvuriwangiki, la tirhaka hi matimba hinkwawo, a nge chumayeli hi ku sindzisiwa hi vatswari ntsena, kumbe ku ka a nga swi tsakeli ngopfu ku nghena hi yindlu na yindlu kumbe ku vulavula ensin’wini.
6 Pawulo u hi khutaza leswaku hi hambeta hi chivirika leswaku hi nga lolohi. (Hev. 6:11, 12) Swa tsakisa swinene ku kambisisa ntirho wa hina kutani hi nga vi na xivangelo xa ku khomiwa hi tingana—hikuva hi tirhe hi matimba hinkwawo! (2 Tim. 2:15) Ntsako wa hina lowukulu hi ta wu kuma loko hi vona lava hi nga va pfuna va ri exikarhi ka lava poneke nhlomulo lowukulu. Hakunene, Yehovha u fuwisa lava n’wi tirhelaka hi matimba hinkwawo.