Ku Kombisa Rirhandzu eNtsombanweni Wa “Dyondzo Ya Xikwembu”
1 Vamakwerhu va 99 va le Afrika Dzonga lava a va ye eka ntsombano wo hlawuleka wa matiko hinkwawo le Kiev, Ukraine, va vuye ni swiviko swo tsakisa swa ntsombano wolowo lowu nga rivalekiki. Lava khuvuriweke a va ri 7 402, ku nga nhlayo leyikulu swinene ku tlula tin’wana leti tshameke ti va kona, hambi ku tlula ya lava khuvuriweke entsombanweni wa misava hinkwayo le New York hi 1958. Vapfhumba va hlamarisiwe hi rirhandzu ro kufumela leri va kombisiweke rona hi vamakwavo va le Ukraine ni va le Russia. Hambi leswi ririmi a ku ri rihlampfu lerikulu, vamakwerhu va le ka swiyenge swin’wana swa xitediyamu lava vulavulaka Xiukraine ni Xirhaxiya va endzele vapfhumba lava humaka ematikweni man’wana eka swiyenge swa vona swa xitediyamu, emahlweni ka nongonoko, ni loko wu ri karhi wu ya emahlweni ni le ndzhaku ka wona. Va rungulelane mintokoto, va teka swifaniso ni vapfhumba lava endzeke, va tlhela va nyikana tinyiko to tsundzukana ha tona. Mawaku rirhandzu ra vumakwerhu leri va ri kombiseke!
2 Leswi swi fanele ku hi endla hi ehleketa. Hi ta va ni vapfhumba vo tala lava humaka etindhawini to hambana-hambana ta misava eka mintsombano ya hina yo hlawuleka ya matiko hinkwawo leyi nga ta khomiwa eCape Town, eDurban, eJoni ni le Pitori. Xana na hina hi ta va komba rirhandzu ni xinghana lexi fanaka?
3 Naswona se ku hundze malembe yo talanyana hi ri ni ntshunxeko, wa ku va ni mintsombano ya muganga ya tinxaka to hambana-hambana ni tindzimi to hambana-hambana etikweni leri. Hi swi tsakerile ku hlangana kun’we, un’wana ni un’wana a yingisela nongonoko eholweni kumbe exiphen’wini xa xitediyamu laha ririmi ra yena ri vulavuriwaka kona. Kutani hi nkarhi wo wisa, a hi dya swin’we ni ku bula nkarhinyana. Kambe hakanyingi a hi tshama eholweni ya ririmi ra hina ntsena kumbe eka xiphemu xa hina xa xitediyamu. A hi nga tikarhati hi endzela vamakwerhu lava vulavulaka ririmi rin’wana kumbe va rixaka rin’wana. Tinxaka to hambana-hambana ni mintlawa ya tindzimi hakanyingi yi tshama yoxe eka swiyenge swa yona. Xisweswo minkarhi yin’wana a a ho hundzana ntsena emintsombanweni leyi ya Vukreste. Xana hi nga antswisa leswi eka Ntsombano wa “Dyondzo Ya Xikwembu” nan’waka?
4 Hi ta va ni minkarhi leyinene ngopfu entsombanweni wa hina, ngopfu-ngopfu eka mintsombano ya mune ya matiko hinkwawo, ku komba misava leswaku hi vadyondzisiwa va Kreste hakunene hi ku rhandzana ka hina. (Yoh. 13:35) EAfrika Dzonga sweswi, ku ni ku vengana lokukulu exikarhi ka tinxaka ni mintlawa yo hambana. Kutani hi ni nkarhi lowunene entsombanweni wa hina wa ku kombisa leswaku hina a hi tano, ni leswaku a hi xiphemu xa misava.—Yoh. 17:16.
5 Mintsombano leyi ya lembe na lembe i minkarhi ya ku hi pfuna ku tivana kahle. Tivutise, ‘Loko ndzi ri makwerhu la vulavulaka Xizulu, xana ndzi va tiva ku fikela kwihi vamakwerhu lava vulavulaka Xinghezi kumbe Xibunu? Loko ndzi ri makwerhu la vulavulaka Xinghezi, xana ndzi va tiva ku fikela kwihi vamakwerhu vanga lava vulavulaka Xixhosa, Xisuthu kumbe Xipedi?’ Kumbexana u nga ku, ‘Ririmi ra vona a ndzi ri tivi. Xana ndzi nga vulavurisana njhani na vona?’ Vamakwerhu vo tala eAfrika Dzonga va ma tiva marito ma nga ri mangani ya Xinghezi, kambe vamakwerhu vo tala va le Russia ni va le Ukraine a va nga xi tivi Xinghezi nikatsongo. A va fanele ku kombela eka lava a va tivanyana Xinghezi leswaku va va hlamusela leswi vuriwaka. A swi hlamarisa ku vona vapfhumba lava humaka lomu ka hina va vulavula ni vamakwerhu volavo ku nga khathariseki ririmi leri a ri vanga rihlampfu, ngopfu-ngopfu a va tirhisa mavoko.
6 Vamakwerhu va le Russia ni va le Ukraine, lava va nga ni malembe yo tala va nga hlangani ni vamakwavo va Vakreste, a va lava ku hlangana ni vamakwavo lava humaka eka matiko man’wana leswaku va khutazana. Entiyisweni a va nga endzeli vamakwavo leswaku va ta nyikiwa swo karhi, hambi leswi vo tala va vona a va pfumala swilo leswi vonakaka. Ku navela ka vona vunakulobye bya moya hi kona loku endleke ntsombano wa le Kiev wu va ntokoto lowu nga rivalekiki eka lava veke ni lunghelo ra ku va kona. Xana un’wana ni un’wana a nga swi endla pakani ya yena leswaku a tiva ndyangu wun’we kumbe munhu wa ririmi rin’wana kumbe rixaka rin’wana entsombanweni lembe leri? Xin’wana lexi nga pfuna swinene eku pfuxeni ka mabulo a a ku ri leswi un’wana ni un’wana a a vehele beji yakwe. Hikwalaho hi khutaza un’wana ni un’wana leswaku a vehela beji ya yena entsombanweni.
7 Dyondzo yin’wana leyi nga dyondziwaka eka vona i ku tlangela lokukulu loku va ku kombiseke eka swakudya swa moya. A va yimbelela hi timbilu ta vona lerova vuyimbeleri bya vona byi twala xitediyamu hinkwaxo. Naswona vamakwerhu lava va tlangele lunghelo ra ku yimbelela tinsimu ta Mfumo erivaleni, lerova a a va ba mavoko endzhaku ka risimu rin’wana ni rin’wana. Hambi ku ri endzhaku ka xikhongelo xin’wana ni xin’wana a va ba mavoko va kombisa ku tlangela ka vona! Naswona ku phokotela ka vona a ku nga endleriwi ku hetisa nawu; a ku huma embilwini. Xana hina hi nga kombisa ku tlangela lokukulu emintsombanweni ya hina eku heleni ka lembe? Njhani? Xo sungula, hi ku yimbelela tinsimu ta hina to saseka hi matimba ni ku twala, hi dzunisa Yehovha, Xikwembu xa hina. Tinsimu hinkwato leti hi nga ta ti yimbelela ti tsariwile eka xiengetelo xa Vutirheli Bya Hina Bya Mfumo bya October. Tinyikeni nkarhi wa ku titovoloveta tinsimu leti leswaku hi ta yimbelela hi timbilu ta hina entsombanweni.
8 Hi tihi tindlela tin’wana to kombisa ku tlangela ka hina? Hi ku tshama eswitulwini swa hina ni ku yingiserisisa tinkulumo hi nkarhi wa nongonoko. Vapfhumba va matiko mambe lava veke kona entsombanweni wa le Kiev va komberiwe ku tshama eswitulwini swa vona nongonoko hinkwawo, hambi leswi xiphemu lexikulu xa wona a xi nyikeriwa hi Xirhaxiya ni Xiukraine. I tinkulumo ti nga ri tingani ntsena leti nyikeriweke hi swirho swa Huvo leyi Fumaka ni marungula yo huma eka marhavi man’wana leswi a swi nyikeriwa hi Xinghezi. Va tshame eswitulwini swa vona hambi leswi a va ri exitediyamu lexi pfulekeke edyambyini leri hisaka, xisweswo va veke xikombiso lexinene. Xana na hina hi nga endla xiboho lexi tiyeke xa ku tshama eswitulwini swa hina kun’we ni mindyangu yerhu hi nkarhi wa nongonoko? Yehovha u lunghiselele nongonoko wo saseka swinene hi nhlengeletano yakwe. Hi nga tshuki hi hundziwa hi xiphemu ni xin’we xa wona.