Tshama U Ri Kona eNtirhweni Wa Nsimu

¹ Xana ha ma teka magoza lama tiyeke yo hlanganyela entirhweni wa nsimu nkarhi na nkarhi? Xana ha swi hisekela ku yisa xiviko xa hina xa ntirho wa nsimu eHolweni ya Mfumo n’hweti na n’hweti? I nchumu lowu hinkwerhu ka hina hi faneleke hi lwela ku wu endla, hi nga tshiki n’hweti yi hela hi nga vulavulanga nikatsongo hi ripfumelo ra hina.​​—⁠⁠Rhom. 10:​9, 10.

² Mavandlha yo tala swa ha ma nonon’hwela ku endla leswaku vahuweleri va vika ntirho wa vona hi ku hatlisa eku heleni ka n’hweti yin’wana ni yin’wana. Eka papila ra hina ra August 15, 1992, hi hlamusele mavandlha hinkwawo hi mukhuva lowunene wo tamela swiviko swa ntirho wa nsimu. Hi lava ku ku pfuna hi ku phindha tin’wana ta tinhla leti. Muhuweleri hi yexe u ni lunghelo ni ndzhwalo wo hoxa xiviko xakwe xa ntirho wa nsimu ebokisini ro hlawuleka leri tsariweke “Swiviko Swa Ntirho Wa Nsimu” leri faneleke ri va kona eka Holo yin’wana ni yin’wana ya Mfumo. Xana ma ha tirhisa nkongomiso lowu ku sukela enkarhini wolowo? Loko swi ri tano, ha mi nkhensa. Kambe ku vuriwa yini loko u rivale ku yisa xiviko xa wena hi nkarhi?

³ Eku sunguleni ka n’hweti yin’wana ni yin’wana, matsalana wa vandlha u fanele a nyika mufambisi un’wana ni un’wana wa dyondzo ya buku, mavito ya vahuweleri lava nga vikangiki eka ntlawa wakwe. Mufambisi wa dyondzo ya buku u fanele a ya eka vanhu volavo hi ku hatlisa ivi a kuma swiviko leswi nga kumiwangiki ivi a swi nyika matsalana. Lunghiselelo leri ri fanele ku endliwa n’hweti na n’hweti ku tiyisekisa leswaku hinkwaswo swiviko leswi hlwelaka swa kumiwa ivi swi rhumeriwa eka Sosayiti. Kutani swiviko leswi swi hlweleke swi ta nghenisiwa eka xiviko xa n’hweti leyi taka. Leswi swi vula leswaku muhuweleri un’wana ni un’wana loyi a hlwelaka ku vika u ta hlayiwa tanihi vahuweleri vambirhi n’hweti leyi tlhandlamaka. Hi ndlela leyi muhuweleri u ta vika nkarhi hinkwawo. Mi nga tshuki mi hlanganisa mintirho ya tin’hweti timbirhi eka xiviko xin’we kambe nkarhi hinkwawo tsalani eka xiviko lexi hambaneke n’hweti na n’hweti.

⁴ Xana hi nga fambisana njhani ni lunghiselelo leri loko hi ta va hi nga ri kona eku heleni ka n’hweti? Kumbexana hi nga ha hoxa swiviko swa hina ebokisini hi nga si famba kumbe hi rhumela swiviko swa hina swa ntirho wa nsimu eka matsalana wa vandlha. Leswi swi fanele swi endliwa ka ha ri ni nkarhi leswaku swi katsiwa ni xiviko xa vandlha xa n’hweti na n’hweti, lexi matsalana a xi hlanganisaka ivi a xi rhumela eka Sosayiti swi ya fika hi siku ra vutsevu eka n’hweti yin’wana ni yin’wana.

⁵ Ematshan’weni yo huma nkarhi na nkarhi hina vini, hi fanele hi xalamukela ku pfuna van’wana va hlanganyela nkarhi na nkarhi evutirhelini bya nsimu. (Flp. 2:⁠4) Xana hi nga swi endlisa ku yini leswi? Hi nga ha swi kota ku rhamba vahuweleri lava nga khuvuriwangiki lava va ha ku sungulaka evutirhelini, leswaku va tirha na hina. Ku va ni xiyimiso xa ntirho lexi tiyeke swi ta pfuna ku endla ntiyiso wu dzika etimbilwini.

⁶ Tshama u ri kona entirhweni wa nsimu. Yisa xiviko xa wena xa ntirho wa nsimu n’hweti na n’hweti hi ku tshembeka. Pfuna van’wana ku hlanganyela entirhweni nkarhi na nkarhi. ‘Rhandza nhlengeletano hinkwayo ya vamakwerhu.’​​—⁠⁠1 Pet. 2:⁠17.