Xana U Hoxa Xandla Eka Xiviko Lexi Pakanisaka Xa Ntirho Wa Nsimu?
1 EBibeleni ku vulavuriwa hi timhaka to tala leti katsaka tinhlayo, leti hi pfunaka ku vona leswi a swi endleka. Hi xikombiso, Gidiyoni u hlule govela ra Vamidiyani a ri ni vavanuna va 300 ntsena. (Vaav. 7:7) Ntsumi ya Yehovha yi dlaye masocha ya Vaasiriya ya 185 000. (2 Tih. 19:35) Hi Pentekosta ya 33 C.E., ku khuvuriwe vanhu va kwalomu ka 3 000, naswona endzhakunyana ka kwalaho, nhlayo ya vapfumeri yi tlakukile yi ya fika kwalomu ka 5 000. (Mint. 2:41; 4:4) Timhaka leti ti kombisa leswaku malandza ya Xikwembu ya khale ma ringete hi matimba ku endla xiviko lexi heleleke ni lexi pakanisaka.
2 Nhlengeletano ya Yehovha namuntlha yi hi khutaza ku vika ntirho wa hina wa nsimu n’hweti na n’hweti. Loko hi fambisana ni lunghiselelo leri hi ku tshembeka, hi ta hoxa xandla eku kongomisiweni lokunene ka ntirho wo chumayela. Swiviko swi nga kombisa leswaku ku ni mhaka yo karhi leyi lavaka ku khathaleriwa entirhweni wa nsimu kumbe leswaku ku laveka vatirhi lava engetelekeke endhawini yo karhi. Evandlheni, swiviko swa ntirho wa nsimu swi pfuna vakulu ku vona leswaku i vamani lava nga kotaka ku ndlandlamuxa vutirheli bya vona kun’we ni lava va lavaka mpfuno. Swiviko swa nhluvuko lowu nga kona entirhweni wo chumayela mahungu ya Mfumo swi khutaza vamakwerhu hinkwavo va Vakreste. Xana u endla leswi languteriweke eka wena leswaku u hoxa xandla eka xiviko lexi pakanisaka xa ntirho wa nsimu?
3 Vutihlamuleri Bya Wena: Loko n’hweti yi hela, xana swa ku tikela ku tsundzuka leswaku u tirhise ku yini ensin’wini? Loko swi ri tano, ha yini nkarhi na nkarhi u nga swi tsali ehansi leswi u swi endleke ensin’wini? Van’wana va tirhisa khalendara kumbe dayari. Van’wana va famba ni xiphephana lexintshwa xa xiviko xa ntirho wa nsimu. Loko n’hweti yi hela, hatlisa u yisa xiviko xa wena eka mulanguteri wa dyondzo ya buku. Loko u rivele ku siya xiviko xa wena, hatlisa u tivisa mulanguteri wa dyondzo ya buku ematshan’weni yo rindzela yena leswaku a ku vutisa ha xona. Ku vika ntirho wa wena hi rixaladza swi kombisa leswaku u xixima lunghiselelo ra Yehovha naswona u anakanyela vamakwerhu lava averiweke ku hlengeleta swiviko ni ku hlanganisa ntirho wa vandlha.—Luka 16:10.
4 Vutihlamuleri Bya Mulanguteri Wa Dyondzo Ya Buku: Tanihi murisi la xalamukeke, mulanguteri wa dyondzo ya buku u tshama a xalamukele ntirho wa ntlawa wakwe n’hweti hinkwayo. (Swiv. 27:23) Wa swi tiva loko muhuweleri ha un’we a hlanganyela nkarhi na nkarhi ni loko a tsakela ntirho wa nsimu, naswona u hatla a pfuna lava nga hlanganyelangiki n’hweti hinkwayo. Hakanyingi leswi lavekaka i ku khutaza vanhu vo tano, ku va nyika xiringanyeto ni ku va rhamba leswaku va famba na yena entirhweni wa nsimu.
5 Loko n’hweti yi hela, mulanguteri wa dyondzo ya buku u kumisisa loko swirho hinkwaswo swa ntlawa swi hetisise vutihlamuleri bya swona bya ku vika ntirho leswaku matsalana a ta rhumela xiviko lexi pakanisaka xa vandlha ehofisini ya rhavi ku nga si hundza siku ra vutsevu ra n’hweti leyi landzelaka. Loko n’hweti yi ya eku heleni, swi nga va swinene leswaku a tsundzuxa ntlawa ni ku endla leswaku swiphephana swo vikela eka swona swi kumeka laha dyondzo ya buku yi khomeriwaka kona. Loko ku ri ni lava talaka ku rivala ku vika ntirho wa vona, a nga va tsundzuxa hi ndlela leyi lavekaka a tlhela a va khutaza.
6 Ku siya swiviko swa hina swa ntirho wa nsimu hi ku hatlisa swi endla leswaku ku va ni xiviko lexi pakanisaka, lexi kombaka leswi endliweke ensin’wini. Xana u ta endla leswi languteriweke eka wena hi ku hatla u vika ntirho wa wena n’hweti na n’hweti?