Pfuna Mulanguteri Wa Dyondzo Ya Buku Ya Vandlha Ra Ka N’wina

¹ Hinkwerhu ka hina ha vuyeriwa swinene eka Dyondzo ya Buku ya Vandlha. N’hweti leyi hundzeke hi bule hi ndlela leyi mulanguteri wa Dyondzo ya Buku ya Vandlha a hetisisaka vutihlamuleri bya yena ha yona. Kambe xana hi nga endla yini leswaku hi n’wi pfuna kutani hi kota ku vuyeriwa hi tlhela hi pfuna van’wana?

² Vana Kona Vhiki Rin’wana Ni Rin’wana: Tanihi leswi mintlawa ya dyondzo ya buku yi vaka ni vanhu vatsongo, vukona bya wena i bya nkoka. Swi endle pakani ya wena ku va kona vhiki rin’wana ni rin’wana. U nga pfuna ni hi ku fika hi nkarhi, tanihi leswi sweswo swi endlaka leswaku mulanguteri a kota ku sungula nhlangano hi ndlela leyi hlelekeke.—1 Kor. 14:40.

³ Tinhlamuselo Leti Akaka: Ndlela yin’wana leyi u nga pfunaka ha yona i ku lunghiselela kahle ni ku nyikela tinhlamulo leti akaka. Tinhlamulo leti kongomeke hi tona leti nga tinene, naswona leswi swi khutaza van’wana leswaku va hlamula. Papalata ku hlamusela swilo hinkwaswo leswi nga endzimaneni. Loko ku ri ni yinhla leyi khumbaka mbilu ya wena, seketela nhlamuselo hi ku boxa ndlela leyi u khumbekaka ha yona.—1 Pet. 4:10.

⁴ Loko u ri ni lunghelo ro hlayela ntlawa tindzimana, ringeta ku hlaya hi ndlela leyi hanyaka. Ku hlaya kahle swi endla leswaku dyondzo yi vuyerisa.—1 Tim. 4:13.

⁵ Ku Chumayela Hi Ntlawa: Minhlangano ya ntirho wa nsimu hakanyingi yi khomeriwa etindhawini leti hi khomelaka eka tona dyondzo ya buku, naswona ku seketela ka wena lunghiselelo leri swi ta pfuna mulanguteri loko a ri karhi a kongomisa ntirho wo chumayela. Tiyiseka leswaku u hlanganyela nkarhi na nkarhi entirhweni wa nsimu. Teka lunghiselelo leri tanihi ndlela yo aka vuxaka ni vamakwenu ni ya ku va khutaza.

⁶ Swiviko Swa Ntirho Wa Nsimu: Ku siya swiviko swa ntirho wa nsimu hi xihatla eku heleni ka n’hweti yin’wana ni yin’wana i ndlela yin’wana yo pfuna mulanguteri. Yisa xiviko xa wena eka yena hi ku kongoma. Matsalana u ta teka swiviko swa ntirho wa nsimu leswi hlengeletiweke hi valanguteri va dyondzo ya buku.

⁷ Ku tirhisana ka wena ni mulanguteri wa Dyondzo ya Buku ya Vandlha ku ta tlangeriwa. Ku tlula kwalaho, u ta tiyiseka leswaku Yehovha u ta ‘va ni moya lowu u wu kombisaka.’—Filp. 4:23.