Ndlela Leyi Valanguteri Va Dyondzo Ya Buku Ya Vandlha Va Kombisaka Nkhathalelo Wa Vona Ha Yona
1 Dyondzo ya Buku ya Vandlha yi kunguhateriwe ku endla “swi koteka leswaku nyingiso lowukulu wa munhu hi xiyexe wu nyikeriwa eka nhluvuko wa munhu un’wana ni un’wana hi tlhelo ra swa moya. . . . Lexi i xikombiso xa tintswalo ta Yehovha ni rirhandzu ra yena hi vanhu va yena.” (om-TS tl. 75; Esa. 40:11) Mulanguteri wa dyondzo ya buku hi yena a nga na vutihlamuleri lebyikulu eku nyikeni ka nkhathalelo wolowo wa xiviri.
2 EDyondzweni Ya Buku Ya Vandlha: Tanihi leswi mintlawa ya tidyondzo ta buku yi tshamaka yi ri yitsongo hi xivangelo lexi twalaka, mulanguteri wa dyondzo ya buku u kota ku swi tiva kahle swirho swa ntlawa wakwe. (Swiv. 27:23) Hakanyingi ku kumeka nkarhi wa ku bula emahlweni kumbe endzhaku ka dyondzo vhiki rin’wana ni rin’wana. Ku ta ku loko n’hweti yi hela a kote ku vulavula ni vanhu hinkwavo entlaweni wakwe. Leswi swi pfuna swirho swa dyondzo ya buku leswaku swi titwa swi ntshunxekile ku ya eka yena loko swi langutane ni miringo kumbe swi lava xikhutazo.—Esa. 32:2.
3 Mulanguteri wa dyondzo ya buku u ringeta ku khutaza hinkwavo lava nga entlaweni wa yena leswaku va hlanganyela hi nkarhi wa dyondzo. Ndlela yin’wana leyi a yi tirhisaka emhakeni leyi i ku fambisa dyondzo hi moya lowunene ni hi musa. (1 Tes. 2:7, 8) U ringeta ku kuma tindlela to endla leswaku hinkwavo va hlanganyela edyondzweni, ku katsa ni vana. Loko van’wana va chava ku hlamula, a nga va pfuna etlhelweni hi ku hlela ka ha ri emahlweni leswaku va hlaya tsalwa kumbe va hlamula xivutiso xa ndzimana yo karhi. Kumbe a nga va komba ndlela ya ku hlamula hi marito ya vona.
4 Loko mupfuni wa mulanguteri wa dyondzo ya buku a ri nandza wa vutirheli, mulanguteri u hlela leswaku nandza loyi wa vutirheli a fambisa dyondzo kan’we eka tin’hweti tin’wana ni tin’wana timbirhi. Sweswo swi pfuna mulanguteri leswaku a vona ndlela leyi mupfuni wakwe a fambisaka dyondzo ha yona kutani a n’wi nyika swiringanyeto leswi pfunaka. Leri i lunghelo lerinene swonghasi ra ku pfuna vamakwerhu leswaku va antswisa madyondziselo ya vona!—Tito 1:9.
5 Evutirhelini Bya Nsimu: Vutihlamuleri byin’wana bya nkoka bya mulanguteri wa dyondzo ya buku ya vandlha i ku rhangela entirhweni wo chumayela. (Tinhl. 27:16, 17) U endla malunghiselelo lama nga ta tirhisiwa hi ntlawa hi nkarhi wo chumayela naswona u lwela ku pfuna ntlawa hinkwawo leswaku wu kuma ntsako evutirhelini bya wona. (Efe. 4:11, 12) Leswaku a endla leswi, u tivekela pakani yo tirha swin’we ni xirho ha xin’we xa ntlawa wakwe entirhweni wa nsimu. Nakambe u pfunana ni mulanguteri wa ntirho eku endleni ka malunghiselelo ya leswaku lava va lavaka ku antswisa swo karhi evutirhelini bya vona va kuma mpfuno eka vahuweleri lava nga ni ntokoto.
6 Tanihi Murisi Wa Rirhandzu: Mulanguteri wa dyondzo ya buku u kombisa nkhathalelo eka lava va kotaka ku hlanganyela nkarhi wutsongo entirhweni wo chumayela, hikwalaho ka swiyimo swa vona. Wa tiyiseka leswaku lava va tsandzekaka hikwalaho ka ku kula kumbe ku lamala ni lava tsandzekaka ku ya ensin’wini swa xinkarhana hikwalaho ka mavabyi lamakulu kumbe ku vaviseka va tiva lunghiselelo leri va pfumelelaka ku vika nkarhi wa ntirho wa nsimu lowu sungulaka eka 15 wa timinete loko va nga swi kotanga ku tirha awara yin’we en’hwetini. (Komiti ya Ntirho ya Vandlha hi yona yi endlaka xiboho xa leswaku i vamani lava fanekelaka lunghiselelo leri.) Nakambe wa khathala hi lava va averiweke entlaweni lava holeke, kutani a ringeta ku va pfuna leswaku va tlhela va huma nsimu swin’we ni vandlha.—Luka 15:4-7.
7 Ha wu tlangela swonghasi nkhathalelo wa rirhandzu lowu kombisiwaka hi valanguteri va dyondzo ya buku! Nkhathalelo lowu va wu kombisaka wu pfuna leswaku “hinkwerhu hi fikelela vun’we eka ripfumelo . . . , hi mpimo wa vukulu lebyi nga bya ku tala ka Kreste.”—Efe. 4:13.