Xivangelo Xa Ku Va Ni Dyondzo Ya Buku Ya Vandlha
1. Xana lunghiselelo ra Dyondzo ya Buku ya Vandlha ri sungurise ku yini?
1 Hi 1895, dyondzo ya buku ya Swichudeni swa Bibele hilaha Timbhoni ta Yehovha a ti vitaniwa hakona enkarhini wolowo, a yi vitaniwa Minhlangano yo Sungula ya Dyondzo ya Bibele. A ku dyondziwa tivholumo ta Millennial Dawn. Hi ku famba ka nkarhi minhlangano leyi yi vitaniwe Minhlangano ya Vaberiya ya Dyondzo ya Bibele. (Mint. 17:11) Hi ntolovelo ntlawa lowutsongo a wu hlengeletana ekaya ro karhi ni madyambu hi nkarhi lowu lungheleke un’wana ni un’wana. Hi yona ndlela leyi lunghiselelo ra Dyondzo ya Buku ya Vandlha ri sunguriseke xiswona.
2. Xana hi nga hoxa njhani xandla leswaku hi ‘khutaza’ van’wana eka ntlawa wa dyondzo ya buku?
2 Xikhutazo Ni Mpfuno: Mintlawa ya dyondzo ya buku yi endliwa yi va yitsongo hi xikongomelo, leswaku lava vaka kona va kuma nkarhi wo tala wo phofula ripfumelo ra vona. Hikwalaho ha “khutazana, un’wana hi ripfumelo ra un’wana.”—Rhom. 1:12.
3, 4. Xana lunghiselelo ra dyondzo ya buku ri hi pfuna njhani leswaku hi hetisisa ntirho wa hina wo chumayela?
3 Loko hi xiya ndlela leyi mulanguteri wa dyondzo ya buku a dyondzisaka ha yona, sweswo swi ta hi pfuna leswaku hi ri “tamela khwatsi rito ra ntiyiso.” (2 Tim. 2:15) Xiya ndlela leyi a ma kandziyisaka ha yona Matsalwa lawa rungula leri dyondziwaka ri sekeriweke eka wona. Loko swi fanerile a nga ha kandziyisa tinhla-nkulu hi ku vutisa swivutiso swo pfuxeta eka buku leyi dyondziwaka, a tirhisa Bibele ntsena. Xikombiso xa yena lexinene xi nga hi pfuna leswaku hi antswisa madyondziselo ya hina loko hi ri ensin’wini.—1 Kor. 11:1.
4 Mulanguteri wa dyondzo u fambisa dyondzo ya buku, a tlhela a rhangela entirhweni wo vula evhangeli. U khomisana ni mulanguteri wa ntirho, eku endleni ka malunghiselelo lama faneleke ya nsimu. Wa yima-yimeka a pfuna hinkwavo lava nga entlaweni wa yena leswaku va hetisisa vutihlamuleri bya vona bya Vukreste bya ku chumayela mahungu lamanene ni ku endla vadyondzisiwa.—Mat. 28:19, 20; 1 Kor. 9:16.
5. Hi wihi mpfuno lowu munhu a wu kumaka eka ntlawa wa dyondzo ya buku?
5 Mulanguteri wa dyondzo ya buku u khathalela vumoya bya un’wana ni un’wana la nga entlaweni wa yena. Sweswo u swi kombisa loko a ri eminhlanganweni ya vandlha niloko a tirha ni van’wana ensin’wini. Nakambe u swi kombisa niloko a endzele vamakwerhu leswaku a ta va khutaza emoyeni. Hinkwavo va fanele va titwa va ntshunxekile ku ya eka yena loko va lava ku pfuniwa hi tlhelo ra moya.—Esa. 32:1, 2.
6. (a) Xana ku hlengeletana hi mintlawa leyitsongo swi va pfune njhani vamakwerhu ematikweni man’wana? (b) Xana wena hi wexe ri ku vuyerise hi ndlela yihi lunghiselelo ra dyondzo ya buku?
6 Tiyisanani: Ematikweni lawa ntirho wa vanhu va Xikwembu wu siveriweke, hakanyingi vamakwerhu va hlengeletana hi mintlawa leyitsongo. Makwerhu un’wana u ri: “Hambileswi ntirho wa hina a wu siveriwile, kambe rini na rini loko swi koteka a hi khoma minhlangano ya hina hi ri khume kumbe 15. Minhlangano a yi hi tiyisa emoyeni loko hi ri eku dyondzeni ka Bibele ni loko hi bula ni vamakwerhu endzhaku ka minhlangano. Loko hi ri karhi hi rungulelana mintokoto a hi swi vona leswaku hinkwerhu hi hlangavetana ni swihinga leswi fanaka.” (1 Pet. 5:9) Na hina a hi tiyisaneni hi ku ri seketela hilaha ku heleleke lunghiselelo ra Dyondzo ya Buku ya Vandlha.—Efe. 4:16.