Ndlela Leyi Lunghiselelo Ra Dyondzo Ya Buku Ya Vandlha Ri Hi Pfunaka Ha Yona
1. Xana minhlangano ya hina ya ntlhanu ya vhiki ni vhiki yi hi pfuna njhani?
1 Wun’wana ni wun’wana wa minhlangano ya hina ya ntlhanu vhiki ni vhiki wu fambisiwa hi ndlela ya wona kasi ni xikongomelo xa wona xi hambanile. Kambe hinkwayo ka yona i ya nkoka hikuva yi hi pfuna leswaku ‘hi khathalelana leswaku hi khutazana erirhandzwini ni le mintirhweni leyinene.’ (Hev. 10:24, 25) Hi tihi tin’wana ta tindlela to hlawuleka leti lunghiselelo ra Dyondzo ya Buku ya Vandlha ri hi pfunaka ha tona?
2. Hi byihi vuyelo bya ku hlangana hi ri ntlawa lowutsongo eka dyondzo ya buku?
2 Mpfuno Wa Leswaku Hi Endla Nhluvuko Hi Tlhelo Ra Moya: Nhlayo ya vanhu lava vaka kona eka dyondzo ya buku i yitsongo ngopfu eka ya lava vaka kona eminhlanganweni leyin’wana ya vandlha. Leswi swi endla leswaku swi olova ku endla vunghana lebyi nga ta hi pfuna hi tlhelo ra moya. (Swiv. 18:24) Xana u endle matshalatshala yo tiva un’wana ni un’wana eka ntlawa wa n’wina wa dyondzo ya buku, kumbexana u kombela ha un’we leswaku a tirha na wena nsimu? Lunghiselelo ra dyondzo ya buku ri tlhela ri endla leswaku mulanguteri wa yona a tiva swiyimo swo hlawuleka swa un’wana ni un’wana la nga entlaweni wolowo ni ku n’wi khutaza hi ku kongoma.—Swiv. 27:23.
3. Xana lunghiselelo ra dyondzo ya buku ri hi pfuna njhani emhakeni yo hlamula ni le mhakeni ya leswaku swichudeni swa Bibele swi kota ku va kona?
3 Xana u tshama u rhamba swichudeni swa wena leswaku swi famba na wena eka dyondzo ya buku? Lava tsakelaka kambe va kanakanaka ku ya eminhlanganweni leyikulu va nga ha titwa va ntshunxekile ku ya eka nhlangano lowutsongo, ngopfu-ngopfu leswi ku hlanganiwaka emutini wa munhu. Vunghana lebyi nga kona byi endla leswaku vana swin’we ni lava ha ku sungulaka ku hlanganyela va kota ku hlamula. Tanihi leswi ntlawa wu nga wutsongo, hi kota ku hlamula ko tala ni ku dzunisa Yehovha.—Ps. 111:1.
4. Lunghiselelo ra dyondzo ya buku ri nga ha va rinene hi tindlela tihi?
4 Hi ntolovelo dyondzo ya buku yi khomeriwa etindhawini leti vahuweleri hinkwavo va kotaka ku ti fikelela. Hambileswi swi nga kotekiki leswaku un’wana ni un’wana a averiwa eka ntlawa lowu nga ekusuhi ni kaya rakwe, kambe mpfhuka wo ya eka dyondzo ya buku leyi hi averiweke eka yona wu nga ha va wu komile ku tlula wa ku ya eminhlanganweni leyin’wana ya vandlha. Laha dyondzo ya buku yi khomeriwaka kona ku nga ha khomeriwa ni nhlangano wa nsimu.
5. Xana mufambisi wa dyondzo ya buku a nga hi pfuna njhani emhakeni ya nsimu?
5 Ku Pfuna Ka Yona eMhakeni Ya Nsimu: Mufambisi wa dyondzo ya buku u tsakela ku pfuna un’wana ni un’wana leswaku a tiphina hi ku tirha nsimu nkarhi na nkarhi naswona a kuma ni mihandzu. Hikwalaho, u tikarhatela ku tirha ni un’wana ni un’wana la nga entlaweni wakwe, a n’wi pfuna hi tindlela to hambana-hambana to chumayela. Loko ku ri ni ndlela yo karhi leyi u vonaka yi ku tikela ensin’wini, yo tanihi ku endla maendzo yo vuyela, tivisa mufambisi wa dyondzo ya buku leyi u hlanganyelaka eka yona. Kumbexana a nga hlela leswaku u tirha ni muhuweleri la nga ni ntokoto loyi a nga entlaweni wa n’wina wa dyondzo ya buku. Vuswikoti bya wena byo dyondzisa lava u dyondzaka na vona Bibele byi ta ya byi antswa loko u yingiserisisa tindlela letinene leti mufambisi wa dyondzo ya buku a dyondzisaka kahle ha tona.—1 Kor. 4:17.
6. Ha yini hi fanele hi lava ku vuyeriwa swinene hi lunghiselelo ra dyondzo ya buku?
6 Hakunene, lunghiselelo ra Dyondzo ya Buku ya Vandlha i ra nkoka! Lunghiselelo leri, leri humaka eka Yehovha ri hi pfuna leswaku hi nga holi emoyeni eminkarhini leyi yo tika leyi hi hanyaka eka yona.—Ps. 26:12.