Lunghiselelo Ra Dyondzo Ya Buku Ya Bandlha Xiyenge 5: Riendzo Ra Mulanguteri Wa Ntirho
1 Mulanguteri wa ntirho u fanele a va muevhangeli ni mudyondzisi. U endla xiphemu xa nkoka hi ku pfuna bandlha leswaku ri hetisisa vutihlamuleri bya rona byo chumayela ni ku dyondzisa mahungu lamanene ensin’wini leyi averiweke rona. (Marka 13:10) Loko a teka vutihlamuleri bya yena byi ri bya nkoka ni loko un’wana ni un’wana a hlanganyela, vahuweleri va ta engetela vutshila lebyikulu eku nyikeleni ka mahungu lamanene naswona nsimu yi ta hlanganisiwa hi laha ku heleleke swinene.
2 Mulanguteri wa ntirho u talela ngopfu eku khutazeni ka ntirho lowukulu evutirhelini bya nsimu. Leswi ngopfu-ngopfu swi hetisisiwa hi Dyondzo ya Buku ya Bandlha. Hi ntolovelo, mulanguteri wa ntirho u averiwa ku fambisa dyondzo ya buku, kambe kan’we n’hweti yin’wana ni yin’wana mupfuni wa yena a nga ha n’wi siva loko a endzela ntlawa wun’wana.—km 12/81 matl. 1, 8.
3 Ku Lunghiselela Riendzo: Emahlweni ka vhiki ra riendzo leri, mulanguteri wa ntirho u fanele a kambisisa makhadi ya Rhekhodo Ya Muhuweleri Wa Bandlha ya lava hlanganyelaka entlaweni wolowo. Nakambe u fanele a hlela ku hlangana ni mufambisi ivi va pfuxeta ntirho wa vahuweleri lava averiweke entlaweni. Mufambisi a nga ha tivisa mulanguteri wa ntirho swiphiqo swihi na swihi leswi yelanaka ni ntirho kumbe swilaveko leswi swi nga ha vaka swi nga vonaki emakhadini ya rhekhodo. Mufambisi wa dyondzo u fanele a tsundzuxiwa leswaku dyondzo yi ta teka timinete ta 45 ntsena ku pfumelela nkarhi wa nkulumo ya ntirho ya 15 wa timinete hi mulanguteri wa ntirho.
4 Nkulumo leyi yi ta kunguhateriwa ku engetela ku tlangela lokukulu ka vutirheli. Loko vahuweleri va lava mpfuno eka swivumbeko swin’wana swa vutirheli, mulanguteri wa ntirho u fanele a nyikela swiringanyeto leswi tirhaka swo endla nhluvuko. Marito yakwe ma fanele ma va lamanene ni ku khutaza leswaku a nga khomisi van’wana tingana kumbe ku va heta matimba hi tinhlamuselo leti hoxeke. Leswi swi nga onha xikongomelo xa riendzo ra yena. Nkulumo ya yena yi fanele yi khutaza hinkwavo ku endla nhluvuko.
5 Mulanguteri wa ntirho u ringeta ku nyikela nyingiso eka vamakwerhu va xinuna ni va xisati vo tala hi laha xiyimiso xa yena xi pfumelaka ha kona. A nga endla malunghiselelo yo tirha ni vanhu vo hambana-hambana ensin’wini. Loko a ri karhi a tirha ni vahuweleri hi yindlu na yindlu, a nga ha nyikela xiringanyeto xin’we kumbe swimbirhi leswi pfunaka ehenhleni ka tindlela to antswisa timhaka ta vona. Leswi swi fanele swi endliwa hi ku navela ka xiviri ko pfuna ku nga ri hi ku xopaxopa. Nakambe a nga ha tsakela ku famba ni vahuweleri eka maendzo yo vuyela ni tidyondzo ta Bibele. Loko van’wana entlaweni va vonaka va lava mpfuno wa munhu hi xiyexe, a nga ha endla riendzo ra vurisi vhiki rero leswaku a va pfuna. Endzhaku ka sweswo, a nga ha tivisa mufambisi hi swiringanyeto leswi nyikeriweke. Nyingiso lowu wa rirhandzu, wa munhu hi xiyexe wu pfunile swinene eka van’wana lava a va tsanile entirhweni wa vona wa nsimu.
6 Nhlangano Wa Ntirho: Minhlangano ya ntirho wa nsimu vhiki rero yi fanele yi fambisiwa hi mulanguteri wa ntirho. Yi fanele yi sungula hi nkarhi hambi loko ku ri na vatsongo. Nhlangano lowu a wu fanelanga wu leha ku tlula timinete ta 10 ku ya ka 15. Ku kambisisa Tsalwa ra siku na siku a swi bohi. Loko ntlawa wu nga si hangalaka, un’wana ni un’wana u fanele a tiva leswaku u ta tirha kwihi naswona na mani. (1 Vakor. 14:33, 40) Mulanguteri wa ntirho u fanele a khutaza un’wana ni un’wana ku ya entirhweni wa nsimu handle ko dya nkarhi.
7 Maendzo ya nkarhi na nkarhi ya mulanguteri wa ntirho eka mintlawa ya dyondzo ya buku ma nga va nkateko wa xiviri ebandlheni. Loko un’wana ni un’wana wa hina a tirhisana na yena loko a endza, vutirheli bya hina byi ta hleleka ni ku humelela. Ku tlula kwalaho, u ta tsakisiwa hi ntirho wa yena. (Vahev. 13:17) Vanhu lava fanaka ni tinyimpfu va ta hlengeletiwa, naswona hi ta tsaka hi ku tiva leswaku hi hetisise ntirho wa hina wo chumayela eka hinkwavo lava hi yingisaka.—Esa. 61:1, 2; Ezek. 9:11; Yoh. 17:26.