Twarisa Ntiyiso Malunghana Na Yesu
1 Vakreste lava totiweke kun’we ni vapfuneti va vona va “ni ntirho wa ku nyikela vumbhoni mayelana na Yesu.” (Nhlav. 12:17) Lexi i xiavelo xa nkoka, tanihi leswi ku ponisiwa ku taka hi vito ra yena ntsena.—Yoh. 17:3; Mint. 4:12.
2 “Ndlela Ni Ntiyiso Ni Vutomi”: Yesu u te: “Hi mina ndlela ni ntiyiso ni vutomi. A nga kona loyi a taka eka Tatana handle ko ta ha mina.” (Yoh. 14:6) Hi nga kota ku vulavula ni Xikwembu hi xikhongelo ni ku va ni vuxaka lebyinene na xona hi ku tirhisa vito ra Yesu ntsena, loyi a nga yena “ndlela.” (Yoh. 15:16) Yesu hi yena “ntiyiso” hileswi vuprofeta ni swifanekiselo leswi nga eMatsalweni ya Xiheveru swi hetisekeke eka yena. (Yoh. 1:17; Kol. 2:16, 17) Kunene, xikongomelo-nkulu xa vuprofeta bya ntiyiso i ku endla leswaku hi twisisa vutihlamuleri bya nkoka lebyi a nga na byona eku hetisiseni ka xikongomelo xa Xikwembu. (Nhlav. 19:10) Ku tlula kwalaho, Yesu i “vutomi.” Leswaku hi kuma nkateko wa vutomi lebyi nga heriki, hinkwerhu hi fanele hi kombisa ripfumelo eka gandzelo ra nkutsulo leri a ri nyikeleke.—Yoh. 3:16, 36; Hev. 2:9.
3 Nhloko Ni Hosi Leyi Fumaka: Nakambe vanhu va fanele va xixima vulawuri lebyikulu lebyi Yehovha a byi nyikeke N’wana wakwe. Yesu u vekiwe ku va Hosi eMfun’weni wa Xikwembu—‘kutani vanhu va fanele va yingisa yena.’ (Gen. 49:10) Ku tlula kwalaho, Yehovha u n’wi veke leswaku a va Nhloko ya vandlha. (Efe. 1:22, 23) Hi fanele hi pfuna swichudeni swa Bibele leswaku swi twisisa ndlela leyi Yesu a kongomisaka vandlha ha yona ni ku tirhisa “hlonga ro tshembeka ni ro tlhariha” leswaku ri ava ‘swakudya swa moya hi nkarhi lowu faneleke.’—Mat. 24:45-47.
4 Muprista Lonkulu La Nga Ni Musa: Leswi Yesu a ringiweke ni ku xaniseka loko a ri munhu wa nyama, ‘wa swi kota ku pfuna lava ringiwaka.’ (Hev. 2:17, 18) A hi ku tsakisa ka swona eka vanhu lava nga hetisekangiki ku dyondza leswaku Yesu wa khathala hi ku tsana ka vona kutani a va kombelela mpfuno! (Rhom. 8:34) Hikwalaho ka gandzelo ra Yesu ni hikwalaho ka ntirho wa yena wa ku va Muprista Lonkulu, hi nga tshinela eka Yehovha “hi ntshunxeko wo vulavula” leswaku hi kuma ku “pfuneka enkarhini wa kona.”—Hev. 4:15, 16.
5 Onge matshalatshala ya hina yo byela van’wana ntiyiso malunghana na Yesu ma nga va susumetela ku n’wi yingisa ni ku n’wi tirhela swin’we na hina.—Yoh. 14:15, 21.