Swingheniso Swo Endla Vini Va Miti Va Yingisela
1 Hi xihi xiphemu xa nkoka xa mhaka ya wena ya yindlu na yindlu? Vo tala va hina va ta pfumela leswaku i xingheniso. Loko u nga swi koti ku pfuxa ku tsakela ka n’wini wa muti hi tisekene ta kwalomu ka 30 to sungula, kumbexana ú ta tsema bulo.
2 I tinhla tihi leti u fanele u ti xiya loko u lunghiselela xingheniso lexi humelelaka? Kambisisa mikhuva ni swilaveko swa vanhu lava u talaka ku hlangana na vona. Xana swi tolovelekile ku dya mabulo, kumbexana u ta languteriwa ku nghena emhakeni hi ku hatlisa? Xana ku na mimpatswa yo tala leyintshwa endhawini ya ka n’wina? I yini leswi va swi khathalelaka? Xana vanhu va le kusuhi na n’wina va swi xiya swiphiqo leswi langutanaka ni vanhu hinkwavo?
U nga va endla va yingisela hi ku vula swo fana ni leswi:
◼ “Xewani. Vito ra mina ndzi ————. Ndza karhateka loko ndzi hlaya hi ta vanhu lava sikaka ni lava dlayiwaka etinyimpini. Xana na wena swi tano?” Swivutiso swin’wana leswi swi nga ha pfunaka ku sungula bulo hi leswi: “Hi wihi ntlhantlho wa swiphiqo swa misava?” “Xana u anakanya leswaku u kona munhu loyi a nga susaka swiphiqo namuntlha emisaveni?” “A hi nge mulawuri u na timfanelo to fana ni leti boxiweke eka Esaya 9:6, 7? [Hlaya ivi u hlamusela tsalwa.]”
3 Eka tinsimu tin’wana, vanhu va nga ha kombisa nkhathalelo lowukulu eka makaya ni mindyangu ya vona ku tlula timhaka ta misava hinkwayo to tanihi ku rhula ka misava.
U nga pfuxa ku tsakela hi ku vutisa u ku:
◼ “I vutomi bya muxaka muni lebyi u vonaka byi ta va bya wena ni ndyangu wa wena emalembeni ya khume? Langutelo ra Bibele ra vumundzuku ra khutaza swinene hikuva ri vhumba ku ta ka mulawuri la nga ta fuma hi mimpimanyeto leyi hetisekeke. Xiya leswi Esaya 9:6, 7 yi swi vulaka ha yena.”
4 Xana u tshama endhawini leyi vugevenga ni vuhlayiseki swi nga mhaka ya siku na siku? Van’wana va nga ha ku nyika ndleve loko u tirhisa xingheniso xo sungula ehansi ka “Crime/Safety” eka tluka 10 ra buku leyi nge Reasoning.
U nga ha ku:
◼ “Xewani. Hi vulavurisana ni vanhu hi mhaka ya vuhlayiseki bya munhu hi xiyexe. Ku na vugevenga byo tala exikarhi ka hina, naswona byi khumba vutomi bya hina.” Kutani xivutiso xo tanihi lexi nge, “Hi wihi ntlhantlho wa kona?” kumbe “Xana u anakanya leswaku u kona munhu loyi a nga susaka swiphiqo leswi emisaveni?” kumbe “Ku vuriwa yini loko mulawuri a ri na timfanelo to tanihi leti?” xi nga ha pfuna ku sungula bulo. Kutani u nga ha hlaya Esaya 9:6, 7.
5 Hinkwerhu ka hina, ku katsa ni vantshwa lava nghenaka xikolo, hi nga tirhisa timhaka leti to olova ta tsalwa rin’we. Kahle-kahle, u nga ha tsakela ku ringeta yin’we loko u fambisa timagazini. Xana a wu swi pfumeli leswaku mhaka yo tano ya Matsalwa yi nga va ndlela leyinene yo vona loko muyingiseri wa hina a komba ku tsakela ka xiviri? Ha tiyiseka leswaku vo tala va ta tsakela ku tirhisa timhaka leti hi January, loko va nyikela timagazini ni loko va fambisa nyiko ya nkarhi na nkarhi ya n’hweti.
6 Loko u tirhisa tisekene ta 30 to sungula ta riendzo ra wena hi laha ku humelelaka, hi ku languteka ka wena ni xingheniso xa wena, u nga fikelela pakani ya nkoka yo endla leswaku vini va miti va yingisela.