Xana Hi Nga Endla April 2000 Yi Va N’hweti Yo Hlawuleka Ku Tlula Hinkwato?
1 Hi Ravunharhu nimadyambu, hi April 19, ku ta va ku ri siku-nkulu ra lembe ra hina ra ntirho. Hi siku rero, endzhaku ka loko dyambu ri perile emisaveni hinkwayo, vandlha rin’wana ni rin’wana ni ntlawa wun’wana ni wun’wana wa Timbhoni ta Yehovha, wu ta tlangela Xitsundzuxo xa rifu ra Kreste. Ku nga khathariseki leswi nkarhi wu fambisaka xiswona endhawini ya ka hina, ku tlangela gandzelo ra nkutsulo wa Yesu Kreste ku ta va xiendlakalo-nkulu xa lembe. Siku ra Xitsundzuxo ri kombisiwile eka n’hweti ya April, eka “Khalendara Ya Swa Le Tilweni Ya April 2000,” leyi nga eka tluka 6 ra xiengetelo lexi.
2 N’hweti hinkwayo ya April yi hi nyika nkarhi lowunene wa ku va hi kombisa hi moya-xiviri hinkwawo leswaku hi tlangela tintswalo ta Yehovha leti nga faneriwiki leti a hi kombiseke tona hi gandzelo ra N’wana wakwe. Hi ndlela yihi? Muapostola Pawulo u tsarile: “Rirhandzu leri Kreste a nga na rona ra hi susumeta, hikuva leswi hi swona leswi hi swi avanyiseke, leswaku munhu un’we u fele hinkwavo; xisweswo hinkwavo va file; naswona u fele hinkwavo leswaku lava va hanyaka va nga ha tihanyeli, kambe va hanyela loyi a va feleke a tlhela a pfuxiwa.” (2 Kor. 5:14, 15) Ina, hi April hi nga kombisa leswaku a ha ha tihanyeli kambe hi hanyela loyi a hi feleke, a hi endleni n’hweti leyi yi va yo hlawuleka ku tlula hinkwato tanihi vatirheli va Mfumo!
3 Nghenela Vuphayona Bya Nkarhinyana Hi April: Muapostola Pawulo u hi vekele xikombiso lexinene loko a ku: “Moya-xiviri wa mina a ndzi wu teki wu ri wa nkoka eka mina, onge hi loko wu ri lowu rhandzekaka eka mina, loko ntsena ndzo heta pfhumba ni vutirheli lebyi ndzi byi amukeleke bya Hosi Yesu, bya ku nyikela vumbhoni bya rixaladza hi mahungu lamanene ya musa lowu nga faneriwiki wa Xikwembu.” (Mint. 20:24) Na hina hi ni lunghelo ra ku nyikela vumbhoni bya rixaladza hi Yehovha Xikwembu. Hi xikongomelo lexi, hi tsakela leswaku n’hweti ya April yi va n’hweti yo hlawuleka swinene hi ku nghenela vuphayona bya nkarhinyana!
4 Leswi yi nga ni mahelo-vhiki lama heleleke ya ntlhanu, April 2000 yi ta va n’hweti ya risima leyi vo tala va nga kotaka ku phayona ha yona. Hi April 1990, loko Afrika Dzonga ri fikelele nhlohlorhi leyikulu eka hinkwato ya maphayona ya nkarhinyana, vahuweleri va 9 562, ku nga tiphesente ta 19 ta vahuweleri va hina hinkwavo, a va ri maphayona. Emalembeni mambirhi lama landzeleke, nhlayo leyi heleleke ya vahuweleri lava vikeke hi April 1999, yi engeteleke hi tiphesente to tlula 32. Leswi swi vula leswaku hi nga swi kota ku hundza nhlohlorhi ya n’wexemu ya maphayona ya nkarhinyana. Ku engetela kwalaho, leswi tiawara leti lavekaka se ti hungutiweke, vutirheli lebyi se byi pfulekele vo tala evandlheni leswaku va byi nghenela. Muhuweleri un’wana ni un’wana loyi a khuvuriweke, u fanele a anakanyisisa hi xikhongelo ku vona loko a ta swi kota ku nghenela vuphayona bya nkarhinyana hi April.
5 Hi ku tirhisa “Khalendara Ya Swa Le Tilweni Ya April 2000” leyi nga eka xiengetelo lexi, hlela xiyimiso xa wena sweswi xa n’hweti leyi taka. Hlawula masiku lawa u nga ta va u ri entirhweni wa nsimu ha wona ivi u hlanganisa tiawara leti hi ku vona ka wena u nga ta ti tirhisa entirhweni wo chumayela hi n’hweti leyi. Hlanganisa ni nkarhi lowu u nga ta wu tirhisa eku nyikeleni ka vumbhoni eka vanhu van’wana hi tindlela leti tolovelekeke ni hi ku nyikela vumbhoni hi xitshuketa. Xana ntsengo lowu u wu kumaka wa endla tiawara ta kwalomu ka 50 leti lavekaka eka maphayona ya nkarhinyana? Loko u vona leswaku tiawara ta wena a ti fiki eka leti lavekaka, xana u nga antswisa xiyimiso xa wena leswaku u xava nkarhi wa ku nghenela vuphayona bya nkarhinyana? Ku laveka kwalomu ka awara yin’we ni 40 wa timinete siku rin’wana ni rin’wana leswaku u fikelela tiawara ta 50 n’hweti leyi.
6 Leswi ku hungutiweke tiawara leti lavekaka eka maphayona ya nkarhi hinkwawo, xana u anakanyisisa hi ku nghenela vutirheli bya nkarhi hinkwawo? Wa ha yimele yini? April i n’hweti leyinene yo sungula ha yona! Loko u anakanya leswaku swi nga ha ku tikela ku fikelela tiawara ta 70 leti lavekaka eka maphayona ya nkarhi hinkwawo, ha yini u nga ngheneli vuphayona bya nkarhinyana hi April ivi u tivekela pakani ya ku fikelela tiawara ta 70? Loko se u swi vonile leswaku u nga swi kota ku ti fikelela, u nga ha navela ku endla xikombelo xa ku nghenela vuphayona bya nkarhi hinkwawo hi ku hatlisa hilaha swi nga kotekaka hakona.—Vona buku leyi nge Vutirheli Bya Hina, matluka 113-14.
7 Vana Muhuweleri Wa Mahungu Lamanene La Hlanganyelaka Hi Xitalo: Hinkwerhu, vahuweleri ni maphayona, rirhandzu ra hina ra xiviri eka Xikwembu ni le ka muakelani, ri hi susumetela ku endla hinkwaswo leswi hi nga swi kotaka entirhweni wa Yehovha hi moya-xiviri wa hina hinkwawo hi ku ya hi swiyimo swa hina. (Luka 10:27) Xisweswo, hi kombisa leswaku “hi tirha hi matimba naswona ha tikarhata, hikuva hi veke ntshembo wa hina eka Xikwembu lexi hanyaka, lexi nga Muponisi wa vanhu va mixaka hinkwayo, ngopfu-ngopfu wa lava tshembekaka.” (1 Tim. 4:10) Hi yona mhaka leyi hi faneleke hi langutela leswaku vahuweleri hinkwavo va va ni xiphemu hi April, un’wana ni un’wana a nga hlanganyela hi xitalo entirhweni wa Mfumo.
8 Hi nga rivali xikhutazo xa Yesu: “Ntshovelo i wukulu, kambe vatirhi a hi vangani. Hikokwalaho, kombelani N’wini wa ntshovelo leswaku a rhumela vatirhi entshovelweni wakwe.” Endzhaku ka loko a ha ku vula marito lawa, Yesu u vitane vaapostola vakwe va 12 ivi a va rhuma entirhweni wo chumayela. (Mat. 9:37, 38; 10:1, 5, 7) Kwalomu ka lembe endzhaku ka sweswo, endzhaku ka loko lava 12 va leteriwile entirhweni wo chumayela, Yesu u “hlawul[e] van’wana va 70 kutani [a] va rhuma,” ivi a va nyika swiletelo leswi fanaka: “Hakunene, ntshovelo i wukulu, . . . Hikokwalaho kombelani N’wini wa ntshovelo leswaku a rhumela vatirhi entshovelweni wa yena.” (Luka 10:1, 2) Buku ya Bibele ya Mintirho yi vika ndlela leyi Yehovha a swi hlamuleke ha yona swikhongelo leswi. Hi Pentekosta ya 33 C.E., nhlayo ya vadyondzisiwa yi engeteleke ku fika kwalomu ka 120. Endzhaku, ku fikeleriwe nhlohlorhi ya 3 000 na 5 000 wa vadyondzisiwa hi ku landzelelana. (Mint. 1:15; 2:41; 4:4) Endzhaku ka sweswo, “nhlayo ya vadyondzisiwa [a] yi ya yi andza ngopfu.” (Mint. 6:7) Hilaha ku fanaka enkarhini wa manguva lawa, hi fanele hi hambeta hi kombela N’wini leswaku hi kuma vachumayeri va Mfumo lava engetelekeke! Hi ku pfumelelana ni swikhongelo swa hina, muhuweleri un’wana ni un’wana u fanele a endla malunghiselelo lama tiyeke ya ku hlanganyela evutirhelini bya nsimu n’hweti yin’wana ni yin’wana.
9 Hi kombela leswaku u yi langutisisa kahle “Khalendara Ya Swa Le Tilweni Ya April 2000.” Tanihi leswi masiku mambirhi yo sungula ya n’hweti leyi ku nga Mugqivela ni Sonto, xana u nga endla malunghiselelo ya ku hlanganyela evutirhelini eka mahelo-vhiki wolawo, leswaku u sungula na yona n’hweti leyi? Mugqivela, April 1, i Siku Ra Hina Ro Hlawuleka raTimagazini. Un’wana ni un’wana wa hina u fanele a tiyimisela ku hlanganyela entirhweni wo fambisa timagazini hi siku leri. Tlhandla-kambirhi xana u nga seketela “Siku ra Timagazini” rin’wana ni rin’wana n’hweti leyi hinkwayo hi ku tirha swin’we ni ntlawa wa Dyondzo ya Buku ya Vandlha lowu u nga eka wona? Swi nga va njhani loko wo heta awara kumbe ku tlula evutirhelini bya nsimu Sonto yin’wana ni yin’wana? Xana u nga hlela ku hlanganyela eku nyikeleni ka vumbhoni ni madyambu? Nakambe u nga rivali ku nyikela vumbhoni hi xitshuketa hi minkarhi leyi ku pfulekelaka loko u ri entirhweni, exikolweni kumbe loko u endla mintirho leyi tolovelekeke ya siku na siku. Fungha masiku lawa ha wona u nga ta heta nkarhi wo karhi entirhweni wa nsimu, wu tsale ekhalendarini nkarhi lowu u wu heteke entirhweni wa nsimu hi n’hweti leyi.
10 April i nkarhi lowunene wa leswaku hinkwavo lava fanelekaka, lava bumabumeriweke hi vakulu leswaku va sungula ku tirha tanihi vahuweleri lava nga khuvuriwangiki. Loko u dyondza Bibele ni munhu un’wana, xana munhu loyi u endle nhluvuko lowu faneleke lerova a nga byela mulanguteri la ungamelaka leswaku u lava ku va muhuweleri wa mahungu lamanene? Loko u ri ni vana lava nga siki khuvuriwaka, xana u burisane na vona vakulu hi nhluvuko wa vona wa moya? Xana lowu a wu nge vi nkarhi lowunene wa leswaku va sungula ku va vahuweleri?—Vona buku leyi nge Vutirheli Bya Hina, matluka 97-100.
11 Eka Matshalatshala ya hina ya ku endla April 2000 yi va n’hweti ya hina yo hlawuleka ku tlula hinkwato, hinkwerhu ka hina hi fanele hi hlanganyela evutirhelini ivi hi tisa swiviko swa hina swa ntirho wa nsimu eku heleni ka n’hweti. (Ringanisa Marka 6:30.) Vahuweleri lavantshwa lava nga siki khuvuriwaka lava hlanganyelaka evutirhelini bya nsimu ro sungula, va fanele va khutaziwa ku vika ntirho wa vona hi nkarhi. Hi ku endla xiphemu xa hina, hi nga hoxa xandla swinene eku endleni ka leswaku xiviko xa April xi va lexinene, naswona ku dzuneka lokukulu ku ta yisiwa evitweni ra Yehovha hi matshalatshala ya hina ya ku nyikela vumbhoni.
12 Tana Ni Van’wana eXitsundzuxweni: Xana a swi nge hi tsakisi ku vona nhlohlorhi leyintshwa ya lava veke kona eXitsundzuxweni xa rifu ra Kreste eka lembe leri ra 2000? Swi ta hi tsakisa! Swi ta vula leswaku vanhu vo tala va ta va va hlengeletanile leswaku va kombisa ku tlangela ka vona rirhandzu lerikulu leri Yehovha Xikwembu na Yesu Kreste va hi kombiseke rona! (Yoh. 3:16; 15:13) Endla malunghiselelo hinkwawo lama faneleke leswaku ku nga vi na nchumu lowu nga ta sivela wena ni ndyangu wa wena leswaku mi va kona eXitsundzuxweni.
13 Sweswi i nkarhi wa ku va hi sungula ku rhamba van’wana leswaku va va kona eXitsundzuxweni. Endla nxaxamelo wa vanhu hinkwavo lava u navelaka leswaku va va kona. Hlanganisa ni lava u tshameke u dyondza Bibele na vona, hinkwavo lava u dyondzaka na vona sweswi ni vanhu hinkwavo lava u nga ta endla maendzo yo vuyela eka vona. Eka nxaxamelo lowu, tsala ni vanhu lava u tirhaka na vona, lava u nghenaka na vona xikolo, vaakelani va wena kun’we ni munhu un’wana ni un’wana loyi u tolovelaneke na yena. U nga va rivali vanghana ni maxaka. Endzhaku ka loko u hete ku tsala nxaxamelo lowu, sungula ku endla matshalatshala lama tiyeke ya ku rhamba un’wana ni un’wana wa vona. Va byele leswaku Xitsundzuxo xi ta va rini, ni ndhawu leyi xi nga ta khomeriwa eka yona. Leswi siku ra April 19 ri yaka ri tshinela, tsundzuxa vanhu lava nga eka nxaxamelo wa wena, u nga ha va tsundzuxa hi ku kongoma kumbe hi ku va bela riqingho. Va byele leswaku u ta hundza u va teka mi famba swin’we eXitsundzuxweni eka madyambu lawa xi nga ta khomiwa ha wona.
14 Hi ku pfumelelana ni nkongomiso wa Sosayiti wa nkarhi lowu hundzeke, huvo ya vakulu yi ta endla matshalatshala yo hlawuleka ya ku khutaza vahuweleri hinkwavo lava holeke lava nga ensin’wini ya ka n’wina leswaku va va kona eXitsundzuxweni. (Mat. 18:12-14) Vakulu va fanele va hlaya papila ra Sosayiti ra February 2, 1999. Matsalana wa vandlha u fanele a endla nxaxamelo wa vahuweleri hinkwavo lava holeke, kutani mulanguteri wa ntirho u ta avela vakulu leswaku va va endzela ni ku va rhamba leswaku va va kona eXitsundzuxweni. Kumbexana hi ku hatlisa hilaha swi kotekaka hakona, loko vo endleriwa riendzo ra vurisi leri khutazaka, vahuweleri lava holeke va nga pfuniwa leswaku va tlhela va hiseka evutirhelini bya nsimu ku sukela hi April. Loko va rhambiwa ku famba ni muhuweleri la nga ni ntokoto evutirhelini bya nsimu, swi nga va khutaza swinene.
15 Khutazani Van’wana Leswaku Va Hlanganyela Swinene Hi April! Vakulu, malandza ya vutirheli ni tinhloko ta mindyangu, va fanele va tirhisana swinene leswaku va endla April 2000 yi va n’hweti ya hina yo hlawuleka ku tlula hinkwato. Vakulu va ta tikarhatela ku hlela swilo hinkwaswo, naswona hi vona va nga ta rhangela eka ntirho lowu. (Hev. 13:7) Ku fanele ku endliwa malunghiselelo lama faneleke ya minhlangano ya ntirho wa nsimu exikarhi ka vhiki ni hi mahelo-vhiki. Ku fanele ku endliwa minhlangano yin’wana ya ntirho wa nsimu leyi engetelekeke ya ninhlikanhi ni ya nimadyambu. Swilo leswi hinkwaswo swi fanele ku va swi tsariwe eka xiyimiso lexi hleleriweke ntirho wa April ivi xi namarhetiwa ebodweni ya switiviso. Eka nhlangano wun’wana ni wun’wana wa ntirho wa nsimu, ku fanele ku va ni makwerhu la averiweke ku wu fambisa. Ku fanele ku hleriwa nsimu leyi ringaneke leswaku ntlawa wun’wana ni wun’wana wu va ni nsimu yo chumayela eka yona.
16 Hi April ku ta fambisiwa timagazini ta Xihondzo xo Rindza ni Xalamuka! Leswaku hi endla matshalatshala ya ku sungula tidyondzo ta le kaya ta Bibele, broxara leyi nge Leswi Xi Swi Languteleke, yi ta fambiseriwa vanhu hinkwavo lava kombisaka ku tsakela. Hikwalaho, ku fanele ku va ni mphakelo lowu ringaneke wa timagazini ni tibroxara.
17 Eku heleni ka n’hweti, vafambisi hinkwavo va dyondzo ya buku ya vandlha ni vapfuni va vona va fanele va khutaza un’wana ni un’wana loyi a nga eka ntlawa wa vona leswaku a tisa xiviko xa yena xa ntirho wa nsimu hi ku hatlisa loko n’hweti yi hela. Kumbexana leswi swi nga endliwa hi Sonto, April 30. Loko matsalana a hlanganise xiviko ivi a kuma leswaku vahuweleri van’wana a va tisanga swiviko swa vona, hi musa, a nga va tsundzuxa ku swi tisa ku nga si fika May 6, ku nga wona nkarhi lowu a faneleke a rhumela xiviko xa vandlha eka Sosayiti. A nga ha kombela vafambisi va dyondzo ya buku ya vandlha leswaku va n’wi pfuna hi ku tsundzuxa vahuweleri lava nga vikangiki leswaku va tisa swiviko swa vona.
18 Nguva ya Xitsundzuxo, i nguva ya risima swinene elembeni eka vanhu va Xikwembu. I nguva leyi hinkwerhu hi faneleke hi khomeka entirhweni wa Yehovha. Yi ta va nguva ya risima loko un’wana ni un’wana o hlanganyela hi xitalo tanihi muhuweleri wa mahungu lamanene, ni loko lava nga swi kotaka ku nghenela vuphayona bya nkarhinyana vo endla tano, ni loko ho hisekela ku rhamba van’wana leswaku va va na hina eXitsundzuxweni xa rifu ra Kreste. Hi ku hiseka, a hi khongeleleni mikateko ya Yehovha leyi fuweke loko hi ri karhi hi hisekela ku endla April 2000, yi va n’hweti ya hina yo hlawuleka ku tlula hinkwato, leswaku ku dzuneka ni ku vangama hinkwako ku yisiwa eka Xikwembu!—Hev. 13:15.
[Bokisi leri nga eka tluka 3]
Nhlohlorhi Leyikulu Eka Hinkwato Ya Maphayona Ya Nkarhinyana:
South Africa: 9 562 (April 1990)
Botswana: 160 (April 1993)
Lesotho: 326 (April 1990)
Namibia: 127 (April 1992)
St. Helena: 18 (May 1987)
Swaziland: 213 (April 1992)
[Bokisi leri nga eka tluka 4]
Nhlohlorhi Leyikulu Eka Hinkwato Ya Ntsengo Wa Vahuweleri:
South Africa: 67 069 (August 1999)
Botswana: 1 153 (August 1998)
Lesotho: 2 573 (August 1999)
Namibia: 995 (August 1998)
St. Helena: 160 (November 1997)
Swaziland: 2 029 (August 1999)
[Bokisi leri nga eka tluka 5]
Nhlohlorhi Leyikulu Eka Hinkwato Ya Lava A Va Ri Kona eXitsundzuxweni:
South Africa: 168 903 (1997)
Botswana: 3 535 (1997)
Lesotho: 7 056 (1995)
Namibia: 2 681 (1997)
St. Helena: 354 (1997)
Swaziland: 5 976 (1997)
[Chati leyi nga eka tluka 6]
Khalendara Ya Swa Le Tilweni Ya April 2000
Sonto Musum- Ravumbirhi Ravun Ravumune Ravun Mugqivela
bhunuku harhu tlhanu
1
SIKU RO
HLAWULEKA RA
TIMAGAZINI
2 3 4 5 6 7 8
Siku Ra
Timagazini
9 10 11 12 13 14 15
Marka Marka
14:3-9; 11:12-19
11:1-11 Siku Ra
Timagazini
16 17 18 19 20 21 22
Marka Marka Marka XITSUNDZUXO Siku Ra
11:20– 14:1, 2, 14:12-16; ENDZHAKU Timagazini
12:27, 10, 11; Matewu KA KU
41-44 Matewu 26:17-19 PELA KA
NKULUMO 26:1-5, DYAMBU
YO 14-16 Marka
HLAWULEKA 14:17–
15:1
23 24 25 26 27 28 29
Siku Ra
Timagazini
30
Fambisa
Xiviko
Xa Wena
Xa Ntirho
Wa Nsimu
Fungha masiku yo karhi lawa u nga ta ma heta evutirhelini bya nsimu. Tirhisa khalendara leyi leswaku u tsala nkarhi lowu u wu heteke evutirhelini eka n’hweti leyi.