April—Nkarhi Wa Ku ‘Tirha Hi Matimba Ni Wa Ku Tikarhata’

¹ Mavhiki lama rhangelaka Xitsundzuxo ma va nkarhi wa leswaku vanhu va Yehovha va anakanyisisa. Lowu i nkarhi wa ku anakanya hi leswi rifu ra Kreste ri swi hetisiseke ni ku anakanyisisa hi ntshembo lowu Xikwembu xi hi nyikeke wona, lowu hi wu kumeke hikwalaho ka ngati ya Yesu leyi halatiweke. Loko u ri karhi u ehleketa hi siku ra April 19 n’wexemu, xana u tsundzuka yini? Xana wa ha swi vona swikandza leswi u swi voneke madyambu wolawo? vumoya lebyinene ni lebyi akaka hi nkarhi wa Xitsundzuxo? bulo leri dzikeke ra Bibele ni swikhongelo leswi endliweke hi mbilu hinkwayo? Kumbexana u tiendlele xiboho xa ku ku kombisa swinene leswaku u tlangela rirhandzu leri Yehovha na Yesu va ku kombiseke rona. Xana ku anakanyisisa ko tano ku ku khumba njhani sweswi?

² Swi le rivaleni leswaku vanhu va Yehovha va kombisa ku tlangela ka vona hi swiendlo swo tala. (Kol. 3:15, 17) Hi kombise hi ku kongoma leswaku ha ma tlangela malunghiselelo ya Yehovha ya ku ponisa hi ku tirha swi nyawula evutirhelini bya hina bya Vukreste, hi April n’wexemu. Ku ve ni magidi ya lava veke maphayona ya nkarhinyana, naswona va tlule nhlohlorhi ya nkarhi lowu hundzeke eAfrika Dzonga hi tiphesente ta 27. Matiko man’wana lama welaka ehansi ka rhavi ra Afrika Dzonga na wona ma fikelele tinhlohlorhi letintshwa ta maphayona ya nkarhinyana. Matshalatshala ya wona ku katsa ni ya vahuweleri lavan’wana hinkwavo va Mfumo ma endle leswaku hi fikelela nhlohlorhi leyintshwa ya tiawara, ku fambisiwa ka timagazini ni maendzo yo vuyela. Hi tsake ngopfu loko hi vona ku sunguriwa tidyondzo letintshwa ta Bibele, ku tlhela ku ta vanhu vo tala eXitsundzuxweni!

³ Kunene, leswi ntshembo wa hina wu nga wa xiviri, wu hi susumetela ku endla swo karhi. Swi hi laha muapostola Pawulo a tsaleke hakona a ku: “Hikwalaho hi tirha hi matimba naswona ha tikarhata, hikuva hi veke ntshembo wa hina eka Xikwembu lexi hanyaka, lexi nga Muponisi wa vanhu va mixaka hinkwayo, ngopfu-ngopfu wa lava tshembekaka.”—1 Tim. 4:10.

⁴ Eka nguva leyi ya Xitsundzuxo, xana u ta kombisa hi ndlela yihi leswaku u ni ripfumelo emalunghiselelweni ya Yehovha ya vutomi? Hi April n’wexemu hi vone nhlayo ya le henhla swinene ya vahuweleri va Mfumo leyi nga si tshamaka yi fikeleriwa eAfrika Dzonga. Xana hi nga tlula nhlayo leyi hi April nan’waka? Hi nga swi kota ku endla tano. Kambe muhuweleri un’wana ni un’wana la khuvuriweke ni la nga khuvuriwangiki u fanele ku hoxa xandla. Vo tala lavantshwa na vona va nga faneleka leswaku va hoxa xandla. Xisweswo, loko u ri karhi u tirha hi matimba hi April nan’waka, anakanya hi tindlela leti ha tona u nga kondletelaka van’wana, ku katsa ni lava va ha ku sungulaka ku hlanganyela ni lava nga riki na ntokoto wo ya kwihi, leswaku va hlanganyela na wena.

⁵ Ku Pfuna Van’wana Leswaku Va Tlhela Va Ya Emahlweni Ni Ntirho Wa Vona: Loko u tiva vo karhi lava se ku hundzeke n’hweti kumbe timbirhi va nga si ya ensin’wini, kumbexana u nga va khutaza ni ku va rhamba leswaku va hlanganyela na wena entirhweni wa nsimu. Loko van’wana va horile evandlheni, vakulu va ta endla matshalatshala yo hlawuleka ya ku va endzela va va khutaza ku tlhela va huma nsimu hi April.

⁶ Hinkwerhu hi fanele ku hambeta hi kombela moya wa Yehovha leswaku wu hi tiyisa entirhweni wa yena. (Luka 11:13) I yini lexi hi faneleke ku xi endla leswaku hi amukela moya wolowo? Hi fanele ku hlaya Rito ra Xikwembu leri huhuteriweke. (2 Tim. 3:16, 17) Nakambe hi fanele ku ‘yingisa leswi moya wu swi byelaka mavandlha,’ hi ku va kona eminhlanganweni hinkwayo ya ntlhanu vhiki rin’wana ni rin’wana. (Nhlav. 3:6) Lowu i nkarhi lowunene wa ku pfuna lava tsandzekaka ku va kona minkarhi hinkwayo ni lava holeke leswaku va antswisa mikhuva ya vona ya ku dyondza ni ku hambeta va va kona eminhlanganweni. (Ps. 50:23) Loko hi ri karhi hi endla tano hi fanele ku xalamukela vumoya bya hina. Nilokoswiritano, ka ha ri ni leswi kayivelaka.

⁷ Muapostola Petro u vule leswaku Xikwembu xi nyika moya wa xona wo kwetsima eka “lava xi yingisaka tanihi mufumi.” (Mint. 5:32) Ku yingisa koloko ku katsa ku yingisa xileriso xa ku “chumayela evanhwini ni ku nyikela vumbhoni bya rixaladza.” (Mint. 1:8; 10:42) Xisweswo, hambileswi hi wu lavaka moya wa Xikwembu leswaku wu hi nyika xivindzi xa ku chumayela, i ntiyiso leswaku leswi hi sungulaka ku kombisa ku navela ku tsakisa Yehovha, u ya emahlweni a hi pfuna. Hi nga tshuki hi wu langutela ehansi nkoka wolowo wa ku sungula ku tiyimisela ku yingisa swi suka embilwini!

⁸ Ku Pfuna Vantshwa: Vatswari, xana loko mi langutile vana va n’wina va swi tsakela ku bula ni van’wana hi ntiyiso? Xana va famba na n’wina ensin’wini? Xana mahanyelo ya vona i manene? Loko swi ri tano, ma ha yimele yini? Vonanani ni un’wana wa xirho xa Komiti ya Ntirho ya Vandlha, leswaku a ta vona loko n’wana wa n’wina a fanelekela ku va muhuweleri hi April nan’waka. (Vona buku leyi nge Vutirheli Bya Hina, tluka 100.) Tsundzuka leswaku n’wana wa wena a nga hoxa xandla swinene eku dzunisiweni ka Yehovha hi nguva leyi ya Xitsundzuxo.—Mat. 21:15, 16.

⁹ Manana la nga Mukreste eGeorgia, le U.S.A., minkarhi hinkwayo a a khutaza n’wana wa yena wa nhwanyana ku vulavula ni van’wana hi Yehovha. N’wexemu, loko xinhwanyetana lexi xi ri ensin’wini ni mana wa xona, xi fambise broxara leyi nge Leswi Xi Swi Languteke eka wanuna un’wana, kutani hi ku komisa xi hlamusela leswi yi swi tameleke. U xi vutise a ku: “U ni malembe mangani hi vukhale?” Xi te: “Ndzi ni malembe ya nkombo.” Wanuna loyi u sale a tikhome nomu loko a vona leswaku a xi tilumalumi loko xi vulavula. A a fanele ku hlamala hikuva u kulele entiyisweni kambe loko a sungula ku tlhariha u wu tshikile. Ku nga ri khale, wanuna loyi, nkatakwe ni n’wana wa yena wa nhwanyana a va fambiseriwa dyondzo ya Bibele.

¹⁰ Vantshwa vo tala se i vahuweleri naswona ha tsaka swonghasi ku tirha na vona ensin’wini. Vantshwa lava va nga khutaza ni van’wana lava nga tintangha ta vona. Kambe April i n’hweti leyi fanelekeke eka ndyangu ha wun’we leswaku wu tiyisa xiboho xa wona ni ku aka vumoya bya wona, hi ku tirha swin’we entirhweni wo kwetsima. Tinhloko ta mindyangu ti fanele ku rhangela emhakeni leyi.—Swiv. 24:27.

¹¹ Ku Pfuna Lavantshwa: Ku vuriwa yini hi lava wa ha ku sungulaka ku dyondza Bibele na vona? Xana na vona va nga hoxa xandla eka matshalatshala yo hlawuleka hi April nan’waka? Kumbexana va kombise ku navela ku byela van’wana hi leswi va swi dyondzaka loko mi ri karhi mi hlaya ndzima 2, ndzimana 22 kumbe ndzima 11, ndzimana 14 ebukwini leyi nge Vutivi. Loko mi ri kusuhi ni ku chaputa buku, lunghiselela ku n’wi vekela mhaka leyi erivaleni loko mi hlanganisa ndzima 18, ndzimana 8 leyi nge: ‘Swi nga ha endleka leswaku u hisekela ku byela maxaka ya wena, vanghana va wena ni van’wana hi leswi u swi dyondzaka. Entiyisweni, swi nga ha endleka se u swi endlile sweswo, hi laha Yesu a byeleke van’wana mahungu lamanene hi xitshuketa ha kona. (Luka 10:38, 39; Yoh. 4:6-15) Na wena u nga tirha swinene.’ Xana vanhu lava u dyondzaka na vona va nga endla tano?

¹² Xana xichudeni xa wena xa pfumela eRitweni ra Xikwembu? Xana a xi ri karhi xi hanya hi misinya ya milawu ya Bibele? Xana vutomi bya xona bya pfumelelana ni mimpimanyeto ya Xikwembu? Xana xi va kona eminhlanganweni ya vandlha? Xana xa swi lava ku tirhela Yehovha Xikwembu? Loko swi ri tano, ha yini u nga xi khutazi ku vulavula ni vakulu leswaku va xi kambela va vona loko xi faneleka ku va muhuweleri la nga khuvuriwangiki ivi u tirha na xona hi April? (Vona buku leyi nge Vutirheli Bya Hina, matluka 97-9.) Hi ndlela yoleyo xi nga yi vona ta ha suka ndlela leyi nhlengeletano ya Yehovha yi nga ta xi seketela ha yona eka matshalatshala ya xona ya ku tirhela Yehovha.

¹³ I ntiyiso leswaku swichudeni swin’wana swi endla nhluvuko hi xihatla ku tlula swin’wana. Xisweswo, hi ku pfumelelana ni nkongomiso wa Vutirheli Bya Hina Bya Mfumo bya June 2000, tluka 4, tindzimana 5-6, vo tala va dyondze buku ya vumbirhi ni vanhu lava eku sunguleni va kombiseke ku tsakela kambe va lavaka mpfuno lowu engetelekeke leswaku va hisekela ku hlanganyela. Vanhu lava va timbilu to tshembeka a hi va heleli mbilu leswaku va ta hetelela va ri vadyondzisiwa va Kreste va xiviri, “ku nga khathariseki leswaku hi nkarhi wo koma kumbe hi nkarhi wo leha.” (Mint. 26:29) Kambe, loko nkarhi lowu u dyondzeke ni vanhu vo tano wu ri “nkarhi wo leha,” xana nguva leyi ya Xitsundzuxo yi nga va nkarhi lowunene wa leswaku xichudeni xa wena xi sungula ku kombisa vuenti bya ku tlangela ka xona nkutsulo wa Kreste?

¹⁴ Ndlela Yo Swi Pfuna Leswaku Swi Hlanganyela: Hi ku kambisisa ndlela leyi Yesu a leteleke van’wana ha yona, hi dyondza swo tala mayelana ni ndlela yo pfuna vanhu lava fanelekaka leswaku va sungula vutirheli. A nga hlangananga ni ntshungu kutani a wu byela leswaku wu sungula ku vulavula ni van’wana. U rhange hi ku kandziyisa nkoka wa ntirho wa ku chumayela, a khutaza ku tinyiketela kutani a va nyika swilo swinharhu swa xisekelo: mutirhi-kulobye, nsimu leyi va nga ta yi tirha ni rungula leri va nga ta ri vula. (Mat. 9:35-38; 10:5-7; Mar. 6:7; Luka 9:2, 6) Na wena u nga endla hilaha ku fanaka. Ku nga khathariseki leswaku u ta va u pfuna n’wana wa wena, xichudeni lexintshwa kumbe munhu loyi se ku hundzeke tin’hweti a nga viki, swi ta va swinene ku endla matshalatshala yo hlawuleka ya ku fikelela swikongomelo leswi landzelaka.

¹⁵ Kandziyisa Xilaveko: Kandziyisa nkoka wa ntirho wa ku chumayela eka munhu yoloye. Vana ni langutelo lerinene ha wona. Rungula mintokoto leyi kombisaka leswi vandlha ri swi fikelelaka hi vutirheli. Kombisa moya lowu Yesu a wu kombiseke eka Matewu 9:36-38. Khutaza loyi swi tshembisaka leswaku u ta va muhuweleri kumbe loyi a holeke leswaku a khongela hi mhaka ya ku hlanganyela ka yena n’wini evutirhelini, ku katsa ni ku khongelela ku humelela ka ntirho lowu emisaveni hinkwayo.

¹⁶ Khutaza Munhu Yoloye Ku Anakanya Hi Malunghelo Yo Tala Lama Nga Kona Ya Ku Nyikela Vumbhoni: N’wi byele leswaku swi nga koteka ku hlangana ni ntlawa wa dyondzo ya buku leswaku ku yiwa entirhweni wa ku nyikela vumbhoni hi yindlu ni yindlu. N’wi byele leswaku a vulavula ni maxaka, vanghana kumbe vatirhi-kulobye kumbe lava a nghenaka na vona xikolo hi nkarhi wa swakudya swa ninhlikanhi. Loko munhu a famba hi vutleketli bya mani na mani, hakanyingi a nga ha sungula bulo hi ku kombisa ku tsakela vakhandziyi-kulobye. Loko ku ri hina lava tekaka goza ku sungula, hakanyingi swi hi pfulela ndlela ya ku nyikela vumbhoni lebyinene. Entiyisweni ku ni tindlela to tala ta ku hlanganyela ntshembo lowu hi nga na wona ni van’wana “siku ni siku.”—Ps. 96:2, 3.

¹⁷ Hambiswiritano, swi nga va swinene leswaku u tirha swin’we ni muhuweleri lontshwa hi yindlu ni yindlu hi ku hatlisa hilaha swi nga kotekaka hakona. Loko u tivekele pakani ya ku andzisa ntirho wa wena hi April, kombela nandza la khathalelaka nsimu a ku nyika nsimu leyi nga ekusuhi loko yi ri kona. Loko sweswo swo koteka, swi ta ku pfulela malunghelo ya ku yi tirha hi rixaladza. Hi xikombiso, loko u huma ensin’wini kumbe u ya eminhlanganweni kumbe etindhawini tin’wana, u nga ha vona ku ri ni vanhu emutini lowu eku sunguleni a ku nga ri na munhu kumbe laha va nga kombisangiki ku tsakela. Loko swi fanerile, va endzele hi ku komisa hi nkarhi lowu swi nga vaka swinene ha wona. Sweswo swi ta endla leswaku u titwa u fikelele pakani naswona u ta tsakela vutirheli.

¹⁸ Lunghiselela Rungula Leri Tsakisaka: Ku va munhu a lava ku vula rungula ra Mfumo swi hambanile ni ku titwa a ri ni xivindzi xa ku vulavula ni vanhu van’wana, ngopfu-ngopfu loko a ha ri muntshwa kumbe se ku hundze nkarhi wo leha a nga si ya ensin’wini. A hi ku tlanga hi nkarhi ku pfuna vanhu lava ha riki vantshwa ni lava tsaneke leswaku va lunghiselela. Nhlangano wa Ntirho ni minhlangano ya ku lunghiselela ku ya ensin’wini yi nga nyika mavonelo lama pfunaka, kambe ku hava lexi nga sivaka ku lunghiselela ka munhu hi yexe.

¹⁹ Xana u nga va pfunisa ku yini lavantshwa leswaku va lunghiselela nsimu? Sungula hi ku va dyondzisa xingheniso xa ku fambisa magazini u xi veka hi ndlela yo olova hi ku komisa! Va byele va anakanya hi swiendlakalo swa mahungu leswi vanhu va karhatekaka ha swona ensin’wni yoleyo kutani u kuma yinhla eka yin’wana ya timagazini ta sweswinyana leyi fambelanaka ni sweswo. Titoloveteni xingheniso xexo swin’we kutani mi xi tirhisa evutirhelini hi ku hatlisa hilaha swi nga kotekaka.

²⁰ Hlakulela Ntshembo Wa Ku Andza Ka Hina Enkarhini Lowu Taka: N’wexemu, nhlayo ya lava veke kona eXitsundzuxweni emisaveni hinkwayo yi tlule timiliyoni ta 14,8. Nhlayo ya vahuweleri lava vikeke yi hundzenyana eka timiliyoni ta tsevu. Leswi swi vula leswaku vanhu va timiliyoni ta 8,8 hi lava va tsakelaka lerova va swi kotile ku va kona eka xiendlakalo lexi xo hlawuleka, laha va yingiseke ku hlamuseriwa ka yin’wana ya tidyondzo letikulu ta Bibele. Va kote ku tiva van’wana va hina hi xiviri, swi nga endleka sweswo swi va tsakisile swinene. Vo tala va vona va vulavula kahle ngopfu ha hina, va hoxa munyikelo wa ntirho wa hina wa misava hinkwayo naswona a va pfumeli loko vanhu van’wana va hi onha vito. Ntlawa lowu lowukulu wa vanhu wu kombisa leswaku swi nga koteka leswaku hi andza enkarhini lowu taka. Xana hi nga endla yini leswaku hi pfuna ntlawa lowu wu endla nhluvuko lowu engetelekeke?

²¹ Vunyingi bya lava va vaka kona eXitsundzuxweni va te hikwalaho ka leswi un’wana wa hina a va rhambeke hi ku kongoma. Hakanyingi, sweswo swi vula leswaku ku ni munhu loyi va n’wi tivaka eka vayingiseri. Loko munhu a tile hikwalaho ka leswi hi n’wi rhambeke, hi ni vutihlamuleri bya ku n’wi endla a titwa a amukelekile ni ku n’wi pfuna leswaku a vuyeriwa hi ku helela enongonokweni. Leswi ku nga ta va ku tele vanhu eholweni, n’wi pfune a kuma ndhawu yo tshama. N’wi lombe Bibele naswona mi yimbelela swin’we ebukwini ya wena ya tinsimu. Hlamula xivutiso xin’wana ni xin’wana lexi a nga ha xi vutisaka. Ku n’wi khathalela ka wena hi musa ku nga ha va goza lerikulu ro hlakulela ku tsakela ka yena. I ntiyiso leswaku hinkwerhu hi byarha vutihlamuleri lebyi—loko hi vona munhu loyi hi nga n’wi tolovelangiki, a hi n’wi amukeleni hi malwandla naswona hi bula na yena leswaku hi ta kota ku n’wi tolovela.

²² Ku va kona eXitsundzuxweni ku nga yi hundzula hilaha ku heleleke ndlela leyi munhu a ehleketaka ha yona. Mhaka ya leswaku u tile enhlanganweni yi nga ha va yi vula leswaku a nga swi kumanga leswi a a ri karhi a swi hlota kun’wana ni leswaku hi ni nchumu wo karhi lowu a vonaka swi fanerile ku wu kambisisa hi vukheta. Nhlamuselo ya lunghiselelo leri hlamarisaka ra nkutsulo yi nga pfula mahlo ya munhu loyi yi ngo na yi xa loko swi ta erirhandzwini lerikulu ra Yehovha. A nga swi vona ta ha suka leswaku hi hambanile ni vanhu van’wana—hi tiyimiserile, hi ni vunakulobye, hi ni rirhandzu naswona ha xixima. Holo ya hina a yi na swona swilo leswi a nga vaka a swi vonile etikerekeni leti nga ni swifaniso ni mihivahivani leyi nga vuliki nchumu. Vanhu lavantshwa va swi vona hi xihatla leswaku vayingiseri lava nga kona i vanhu va swiyimo hinkwaswo swa vutomi ni leswaku a ku tekiwi minhlengo. Swilo leswi swi nga va susumetela ku tlhela va vuya.

²³ Endzhaku ka Xitsundzuxo, ku fanele ku xiyiwa leswaku munhu un’wana ni un’wana la veke kona wa endzeriwa hi xikongomelo xo n’wi pfuna. Loko u rhambe vanhu lavantshwa, u ni vutihlamuleri byo hlawuleka. Va nga si muka, tiyiseka leswaku u va hlamusela hi minhlangano leyin’wana leyi khomeriwaka eHolweni ya Mfumo. Va byele xihloko xa nkulumo leyi landzelaka ya le rivaleni. Va tivise ndhawu laha Dyondzo ya Buku ya Vandlha ya le kusuhi na vona yi khomeriwaka kona ni nkarhi wa kona. Endzhaku, va nyike kopi ya buku leyi nge Ku Lavisisa kutani u va byela leswaku hi vhiki ra April 16 ku ta va ku buriwa hi nhloko-mhaka leyi nge, “[Vukreste]—Xana Yesu A A Ri Ndlela Yo Ya Eka Xikwembu?”

²⁴ Endla lunghiselelo ra ku va endzela emakaya ya vona u ya tidyela mabulo na vona. Tiyiseka leswaku va ni broxara leyi nge Leswi Xi Swi Languteleke ni buku leyi nge Vutivi, leti nga ta va endla va tolovelana ni tidyondzo ta xisekelo ta Bibele. Loko va nga si sungula ku dyondza, kombela ku va fambisela dyondzo ya Bibele. Ringanyeta leswaku va hlaya broxara leyi nge Timbhoni ta Yehovha, leyi swi vekaka erivaleni leswi hi tirhisaka xiswona tanihi nhlengeletano. Va kombele ku hlalela tivhidiyo ta hina to fana ni leyi nge Our Whole Association of Brothers. Endla malunghiselelo ya ku va tivisa eka van’wana evandlheni. Etin’hwetini leti tlhandlamaka, va endzele nkarhi na nkarhi; va rhambe leswaku va va kona eminhlanganweni loko mulanguteri wa xifundzha a endza kumbe loko mi ta va ni nhlengeletano ya xifundzha kumbe siku ra nhlengeletano yo hlawuleka. Va pfulele tindlela ta ku tikombisa va ri “ni mboyamelo lowunene eka vutomi lebyi nga heriki”!—Mint. 13:48.

²⁵ Leswi Vakulu Va Nga Swi Endlaka: Ku humelela ka matshalatshala lamakulu evutirhelini hi April nan’waka ku ta titshega swinene hi vakulu. Loko u ri mufambisi wa dyondzo ya buku, tsala nxaxamelo wa swilo leswi u nga swi endlaka ku pfuna un’wana ni un’wana la hlanganyelaka edyondzweni ya buku leyi u yi fambisaka leswaku a hlanganyela emintirhweni leyi yo hlawuleka. Xana ku ni vantshwa, vanhu lava ha ku sungulaka ku hlanganyela, lava nga humiki minkarhi hinkwayo kumbe lava holeke, lava hlanganyelaka entlaweni lowu u wu fambisaka? Kambela ku vona loko vatswari, maphayona kumbe vahuweleri va teke goza ra ku va pfuna. Va nyike mpfuno hambi wu ri wihi wa munhu hi xiyexe hilaha u nga swi kotaka hakona. Makwerhu un’wana wa xisati loyi a a nga yi humi kahle nsimu ku ringana malembe mambirhi, u tirhe tiawara ta 50 evutirhelini hi April n’wexemu. U pfuniwe hi yini? U vule leswaku u pfuniwe hi riendzo ra vurisi ra vakulu.

²⁶ Vakulu ni malandza ya vutirheli va fanele ku tirhisana ku tiyiseka leswaku ku ni nsimu leyi ringaneke, timagazini ni tibuku leswi nga ta tirhisiwa en’hwetini leyi taka. Xana swi nga koteka ku hlela leswaku ku va ni minhlangano leyi engetelekeke ya ntirho wa nsimu? Loko swi ta koteka, endlani leswaku malunghiselelo wolawo yo hlawuleka ma tiviwa. Ku tlula kwalaho, eswikhongelweni swa n’wina swa le rivaleni ni swa le xihundleni, kombelani leswaku Yehovha a katekisa n’hweti ya hina ya ntirho lowu engetelekeke wa Mfumo.—Rhom. 15:30, 31; 2 Tes. 3:1.

²⁷ Hi April n’wexemu evandlheni rin’wana ra le Carolina N’walungu, vakulu va khutaze swinene leswaku ku tirhiwa swi nyawula evutirhelini. Eminhlanganweni vhiki rin’wana ni rin’wana, va kombele vahuweleri ku anakanyisisa hi xikhongelo loko va ta swi kota ku va maphayona ya nkarhinyana. Minkarhi hinkwayo, loko va hlanganile hinkwavo ku katsa ni malandza ya vutirheli, a va hisekela ku vulavula hi ndlela leyi ha yona va nga endlaka n’hweti ya April yi va yo hlawuleka ku tlula rini na rini. Hikwalaho ka sweswo, tiphesente ta 58 ta vahuweleri ku katsa ni vakulu hinkwavo ni malandza ya vutirheli, va phayonile n’hweti yoleyo!

²⁸ Ntsako Lowu Tisiwaka Hi Ku Hlanganyela Hi Xitalo: Hi yihi mikateko leyi tisiwaka hi ku “tirha hi matimba ni ku tikarhata” evutirhelini? (1 Tim. 4:10) Malunghana ni ku hisekela ntirho wa vona wa vandlha hi April n’wexemu, vakulu lava ku buriweke ha vona laha henhla va tsarile: “Hakanyingi vamakwerhu va vulavula hi rirhandzu lerikulu ni vun’we lebyi va byi tsakelaka exikarhi ka vona ku sukela va sungule ku tirha swi twala ensin’wini.”

²⁹ Makwerhu un’wana la ha riki jaha, la pfumalaka xo famba a a navela ku hlanganyela entirhweni lowu wo hlawuleka wa vuphayona hi April n’wexemu. Hikwalaho ko kunguhata kahle ni hi ku pfuniwa hi mana wakwe ni vamakwavo va moya, u ve ni vuyelo lebyinene loko a ri phayona ra nkarhinyana. Xana u titwise ku yini hi sweswo? U te: “I ro sungula evuton’wini bya mina ndzi titwa ndzi tiyile emirini.”

³⁰ A swi kanakanisi leswaku Yehovha u va katekisa hi ndlela leyi fuweke lava ri tekaka ri ri ra risima lunghelo ra vona ra ku vulavula hi vuhosi bya yena. (Ps. 145:11, 12) Loko hi ri karhi hi tsundzuka rifu ra Hosi ya hina, ha swi twisisa leswaku mikateko ya ku tinyiketela ka ku chava Xikwembu yi ta va yi ri ntsandza-vahlayi enkarhini lowu taka. Muapostola Pawulo a a yi langutele hi mahlo-ngati hakelo ya vutomi lebyi nga riki na makumu. Kambe, a a swi tiva leswaku a a nga ta yi langutela a khondle mavoko. U tsarile: “Hikwalaho ka leswi ndzi tirha hi matimba hakunene, ndzi tikarhata hi ku landza matirhelo ya yena naswona matirhelo lawa ma tirha eka mina hi matimba.” (Kol. 1:29) Hi ku tirhisa Yesu, Yehovha u nyike Pawulo matimba ya ku hetisisa vutirheli lebyi ponisaka vutomi naswona A nga endla hilaha ku fanaka eka hina namuntlha. Xana swi ta va tano ha wena hi April nan’waka?

[Bokisi leri nga eka tluka 3]

I Vamani Lava U Nga Va Khutazaka Ku Chumayela Hi April?

N’wana wa wena?

Xichudeni xa Bibele?

Munhu la holeke?