Xana April Yi Ta Va N’hweti Yo Hlawuleka Eka Wena?

¹ Hakanyingi hi vulavula hi tin’hweti ta March na April tanihi nguva ya Xitsundzuxo. Tanihi leswi nkhuvo wa Xitsundzuxo nkarhi hinkwawo wu vaka kona hi nkarhi lowu wa lembe, vanhu va Yehova va tiyimisele ku engetela ku hlanganyela ka vona evutirhelini bya nsimu.

² Van’wana lava tsarisiweke tanihi maphayona ya nkarhinyana hi March va ta ya emahlweni, va tlhela va joyiniwa hi van’wana entirhweni lowu hi April. Loko u ta va ni xiphemu, u fanele u yisa xikombelo xa wena hi ku hatlisa.

³ Hambi ku ri lava nga swi kotiki ku phayona va nga endla April yi va n’hweti yo hlawuleka hi ku engetela vutirheli bya vona bya nsimu. Hakunene, ntirho i wukulu. Kumbexana vahuweleri ni maphayona ya bandlha va nga rhamba vahuweleri lavantshwa lava nga khuvuriwangiki leswaku va tirha na vona ensin’wini. Matshalatshala lama engetelekeke ma fanele ma endliwa ya ku rhamba vanhu hinkwavo lava tsakelaka va ta eXitsundzuxweni hi April 17.

⁴ Hi ku xalamukela ku amukela vanhu lavantshwa lava vaka kona, u nga ha swi kota ku sungula dyondzo yin’wana ya Bibele. Hi ku katekisiwa hi Yehova eka matshalatshala ya wena lama engetelekeke, vutirheli bya wena byi ta va ni mihandzu naswona April yi ta va n’hweti yo hlawuleka eka wena.—Ps. 34:8; Swiv. 10:22.