Pfuna Lavantshwa Leswaku Va Endla Nhluvuko
1 Hi April 17, 1992, a ku hlengeletane vanhu va kwalomu ka 11,5 wa timiliyoni emisaveni hinkwayo va ta tlangela Xilalelo xa rifu ra Kreste. Leyi a ku ri nhlayo leyi tlulaka nhlayo ya vahuweleri lava hlanganyelaka ni mavandlha ya Timbhoni ta Yehovha, yi yi tlula kambirhi ni hafu. A hi ku tsakisa ka swona ku vona mintshungu yo tano yi khitikanela “e nṭhav̌eni ya Yehova”! (Mik. 4:2) Sweswi ku ni vanhu va kwalomu ka nkombo wa timiliyoni lava tsakelaka vugandzeri bya ntiyiso naswona a va si va vadzunisi va Yehovha va le rivaleni. Entiyisweni, marito ya Yesu lama nge “ntshovelo i wukulu” a ma nga si twisiseka hi ndlela leyi!—Mt. 9:37, 38.
2 En’hwetini ya April, hi ta endla matshalatshala yo hlawuleka yo pfuna hinkwavo lava fanelekaka ku hlanganyela evutirhelini bya nsimu. Loko mufambisi wa Dyondzo ya Buku ya Vandlha, a pfunetiwa hi vahuweleri van’wana lava fanelekaka ni maphayona ya le ntlaweni wakwe, u ta endla xiphemu xa nkoka eka leswi. Pakani ya hina ya tinhla tinharhu i (1) ku hlela dyondzo ya le kaya ya Bibele ni lavantshwa lava vaka kona eka nkulumo ya le rivaleni yo hlawuleka ni le Xitsundzuxweni nan’waka; (2) ku khutaza lava dyondzaka, leswaku va fanelekela ku va vahuweleri lava nga khuvuriwangiki; ni (3) ku engetela ku hlanganyela ka hina evutirhelini bya nsimu.
3 Hinkwerhu hi fanele hi endla matshalatshala yo hlawuleka yo amukela lavantshwa ni ku tolovelana na vona lava vaka kona eka minhlangano ya hina. Hi nga endla yini leswaku hi khutaza vo tala eka vanhu lava va tsakelaka, va va ni dyondzo ya le kaya ya Bibele ya nkarhi na nkarhi?
4 Hi ndzinganyeto, ku fambisiwe tidyondzo ta Bibele ta 53 352 eAfrika Dzonga eka n’hweti yin’wana ni yin’wana ya lembe ra ntirho ra 1992. Vahuweleri va nga ha kombela mufambisi wa dyondzo ya vona ya buku leswaku a famba na vona eka tidyondzo ta Bibele leswaku a tolovelana ni swichudeni. Van’wana va swichudeni leswi swa Bibele swi nga ha endleka va va kona sweswi eminhlanganweni ni ku fanelekela ku hlanganyela entirhweni wa yindlu na yindlu. Xana lavantshwa va veka vumbhoni bya xitshuketa nkarhi na nkarhi? Xana va ti fikelela timfanelo ta ku va vahuweleri lava nga khuvuriwangiki hi laha ti andlariweke ha kona ebukwini leyi nge Vutirheli Bya Hina, matluka 97-9? Loko va faneleka, va hlamusele leswaku va nga sungula njhani entirhweni wa yindlu na yindlu endzhaku ka loko va endliwe vahuweleri lava nga khuvuriwangiki.
5 A hi fanelanga hi tshiketa ku khutazana eka vuxaka bya hina bya Vukreste. (Hev. 10:24, 25) Loko un’wana a tsana evutirhelini, vafambisi va dyondzo ya buku va fanele va endla malunghiselelo lama tiyeke yo n’wi pfuna ni ku n’wi khutaza. Nkarhi wun’wana nchumu lowu lavekaka i ku n’wi rhamba leswaku a famba na hina entirhweni wa nsimu.
6 Ku endla leswaku April yi va n’hweti yo hlawuleka ya ntirho wa nsimu swi ta lava ntirhisano wa hina hinkwerhu. Vurhangeri bya mufambisi wa dyondzo ya buku la hisekaka byi nga antswisa xiyimo loko a pfuna xirho xin’wana ni xin’wana xa ntlawa wakwe leswaku xi hlanganyela hi xitalo evutirhelini. Ku nga ha hleriwa minhlangano yin’wana ya ntirho. Lava dyuhaleke va nga khathaleriwa, ni vantshwa va nga pfuniwa hi tindlela leti humelelaka. Vatswari va fanele va endla leswaku ndyangu hinkwawo wu hlanganyela evutirhelini hi April. Loko hinkwerhu hi tinyikela eka Yehovha enkarhini lowu wa ntshovelo, hi ta kuma minkateko yakwe leyi fuweke.