Bokisi Ra Swivutiso

◼ Muhuweleri la nga khuvuriwangiki u fanele a pfumeleriwa ku khuvuriwa loko se a ri ni nkarhi wo tanihi kwihi a ri karhi a ya eminhlanganweni ni le nsin’wini?

Ku khuvuriwa i goza ra nkoka swinene leri munhu a faneleke a ri teka. Xisweswo, loko munhu a nga si pfumeleriwa leswaku a khuvuriwa, u fanele a va ni vutivi lebyi kongomeke hi leswi Xikwembu xi swi languteleke eka yena. Ku engetela kwalaho, u fanele se a kombise ku tinyiketela ka yena hi ku hanya hi milawu ya Xikwembu.

Vakreste va lerisiwa leswaku va nga fularheli ku hlengeletana ka vona, hikwalaho, muhuweleri la nga khuvuriwangiki u fanele a kombisa ku hisekela ka yena ku va kona eminhlanganweni ya vandlha. (Hev. 10:24, 25) Nakambe hi ntolovelo u fanele a katseka hi ku hlamula. A nga ha va se a tsarisile eka Xikolo xa Vutirheli bya le Tilweni, hambileswi swi nga bohiki.

Ku engetela kwalaho, tanihi leswi Vakreste va lerisiweke ku chumayela mahungu lamanene ni ku endla vadyondzisiwa, muhuweleri la nga khuvuriwangiki u fanele a va kona nkarhi na nkarhi ensin’wini a nga si khuvuriwa. (Mat. 24:14; 28:19, 20) Xana u fanele a ri muhuweleri tin’hweti tingani a nga si khuvuriwa? Kahle-kahle, u fanele a nyikiwa nkarhi lowu eneleke leswaku a kombisa ku tinyiketela ka yena leswaku a va kona ensin’wini nkarhi na nkarhi hi ku hiseka n’hweti yin’wana ni yin’wana. (Ps. 78:37) Kambe, a swi bohi leswaku ku va nkarhi wo leha ku sukela loko a ve muhuweleri ku fikela loko a fanelekela ku khuvuriwa, kumbexana ku nga va tin’hweti ti nga ri tingani. Xana u fanele a vika tiawara tingani? A nga fanelanga a tikiseriwa. Vakulu va fanele va xiya xiyimo xa muhuweleri un’wana ni un’wana kutani va n’wi anakanyela ni ku ringanisela.—Luka 21:1-4.

Vakulu (kumbe malandza ya vutirheli emavandlheni lama nga ni vakulu vatsongo) lava hlanganaka ni muhuweleri loyi a lavaka ku khuvuriwa va fanele va tsundzuka leswaku vanhu a va fani naswona va fanele va avanyisa hi ndlela leyinene leswaku wa faneleka ku khuvuriwa kumbe a nga faneleki. Va fanele va langutela leswaku a swi navela hi mbilu hinkwayo leswaku a va un’wana wa Timbhoni ta Yehovha ni ku kombisa ku tlangela ka yena lunghelo ra ku hlanganyela ni nhlengeletano ya Yehovha ni ku va kona ensin’wini. Vakulu va swi twisisa leswaku a nga si kula hi tlhelo ra moya kumbe leswaku a nga si va ni ntokolo lowu nga ni vahuweleri lava khuvuriweke. Loko vakulu va vona leswaku muhuweleri a nga faneleki ku khuvuriwa, hi musa va fanele va n’wi byela xiboho xa vona lexi sekeriweke eMatsalweni ni ku n’wi pfuna leswaku a kuma mpfuno hi tlhelo ra moya.