Xiengetelo

Rungula Leri Yaka Eka Vatswari Lava Nga Vakreste:

Tanihi mutswari, u navela ku pfuna vana va wena va risima leswaku va rhandza Yehovha ni ku tinyiketela eka yena. U nga endla yini leswaku u va pfuna va lunghekela ku khuvuriwa? Xana va ta swi lunghekela loko va ri ni malembe mangani leswaku va teka goza leri?

Yesu u lerise valandzeri vakwe a ku: “[Endlani] vanhu va matiko hinkwawo va va vadyondzisiwa, mi va khuvula.” (Mat. 28:19) Hi ku ya hi marito lawa, nchumu lowukulu lowu lavekaka leswaku munhu a khuvuriwa u fanele a va mudyondzisiwa—loyi a nga twisisiki ntsena ni ku tshemba tidyondzo ta Kreste kambe a tlhela a ti landzela hi vukheta. Leswi swi nga ha endliwa ni hi vana.

Vekela vana va wena xikombiso lexinene naswona u va dyondzisa tidyondzo ta Yehovha. (Det. 6:6-9) Leswi swi katsa ku tirhisa rungula leri nga ebukwini leyi nge Tiphine Hi Vutomi Hilaha Ku Nga Heriki! leswaku u va dyondzisa ntiyiso wa xisekelo lowu nga eBibeleni ni ku tlhela u va dyondzisa ndlela yo tirhisa ni ku hanya hi misinya ya milawu leyi nga eBibeleni. Pfuna vana va wena va kota ku hlamusela leswi va pfumelaka eka swona hi marito ya vona. (1 Pet. 3:15) Vutivi ni xikhutazo leswi va swi kumaka eka wena ni le ka dyondzo ya munhu hi yexe, vugandzeri bya ndyangu, tinhlengeletano ta vandlha ni vanghana lavanene swi ta va pfuna leswaku va fanelekela ku khuvuriwa ni ku kuma malunghelo man’wana lama engetelekeke. Va pfune leswaku va tivekela tipakani ta moya.

Swivuriso 20:11 yi ri: “Mufana u tiviwa hi ndlela leyi a hanyaka ha yona loko mintirho yakwe yi tengile naswona yi lulamile.” Hi yihi mintirho yin’wana leyi nga ta kombisa leswaku n’wana, ku nga ha va xifanyetana kumbe xinhwanyetana, se i mudyondzisiwa wa Yesu Kreste naswona xi lunghekele ku khuvuriwa?

N’wana loyi a tikarhatelaka ku faneleka ku khuvuriwa u fanele a yingisa (va-)mutswari wakwe. (Mint. 5:29; Kol. 3:20) Loko Bibele yi vulavula hi Yesu loko a ha ri ni malembe ya 12, yi ri: “A hambeta a tiveka ehansi ka [vatswari vakwe].” (Luka 2:51) I ntiyiso leswaku a wu nge languteli leswaku n’wana wa wena a va loyi a hetisekeke. Kambe n’wana loyi a lavaka ku khuvuriwa u fanele a tikarhatela ku landzelela xikombiso xa Yesu naswona a tiveka hi ku va loyi a titsongahataka eka vatswari vakwe.

U ta tlhela a kombisa leswaku u tsakela ku dyondza ntiyiso lowu nga eBibeleni. (Luka 2:46) Xana n’wana wa wena wa swi lava ku ya etinhlengeletanweni ta vandlha ni ku hoxa xandla eka tona? (Ps. 122:1) Xana u rhandza ku hlaya Bibele nkarhi ni nkarhi ni ku va ni dyondzo yakwe ya munhu hi yexe?—Mat. 4:4.

N’wana loyi a endlaka leswaku a fanelekela ku khuvuriwa u tikarhatela ku rhangisa timhaka ta Mfumo. (Mat. 6:33) Wa byi xiya vutihlamuleri lebyi a nga na byona byo chumayela van’wana. U chumayela hi tindlela to hambana-hambana naswona a nga khomiwi hi tingana ku byela vadyondzisi vakwe ni vadyondzi-kulobye leswaku i Mbhoni ya Yehovha. U yi tekela enhlokweni mimbulavulo leyi a averiweke yona eka nhlangano wa Mahanyelo Ni Ntirho Wo Chumayela.

Nakambe u tikarhatela ku tshama a basile emahanyelweni ni ku papalata vanghana vo biha. (Swiv. 13:20; 1 Kor. 15:33) Leswi swi ta vonaka eka vuyimbeleri lebyi a byi hlawulaka, tifilimi, minongonoko ya le ka thelevhixini, mintlangu ya vhidiyo ni ndlela leyi a yi tirhisaka ha yona Internet.

Vo tala va amukele mpfuno lowu va nyikiweke wona hi vatswari va vona, va amukela ntiyiso kutani va fanelekela ku khuvuriwa evuntshweni bya vona. Onge Yehovha a nga ku katekisa loko u ri karhi u pfuna vana va wena leswaku va fikelela goza leri ra nkoka eka vuxaka lebyi va nga na byona na Yehovha.

Rungula Leri Yaka Eka Muhuweleri La Nga Khuvuriwangiki:

I nkateko ku va muhuweleri la nga khuvuriwangiki evandlheni. Wa bumabumeriwa hi nhluvuko lowu u wu endleke loko u ri karhi u tirhela Xikwembu. Hi ku dyondza Rito ra Xikwembu, u kume vutivi lebyi kongomeke naswona byi ku susumetele leswaku u kombisa ripfumelo eka switshembiso swa xona.—Yoh. 17:3; Hev. 11:6.

Swi nga endleka leswaku hi ndlela yo karhi a wu ri eka vukhongeri byin’wana loko u nga si sungula ku dyondza ni Timbhoni ta Yehovha kumbe a wu nga ri eka vukhongeri byo karhi hilaha ku heleleke. Kumbexana a wu endla swilo leswi nga pfumelelaniki ni misinya ya milawu ya Bibele. Kambe sweswi u kombise ripfumelo ra wena hi ku hundzuka, loku vulaka ku tisola hi mbilu hinkwayo eka swidyoho leswi u nga tshama u swi endla, leswi vulaka ku fularhela ndlela leyi u nga tshama u hanya ha yona kutani u tiyimisela ku endla leswi lulameke emahlweni ka Xikwembu.—Mint. 3:19.

Kasi hi hala tlhelo, kumbexana u tive matsalwa yo kwetsima “ku sukela loko wa ha ri ricece.” Kutani u sirheleriwile leswaku u nga weli eka mahanyelo lama nga riki ya Vukreste ni le ka swidyoho leswikulu. (2 Tim. 3:15) U dyondze ku lwisana ni ntshikilelo wa tintangha ni minkucetelo yin’wana leyi yengaka munhu leswaku a endla swilo swo biha emahlweni ka Yehovha. U kombise ripfumelo hi ku yima u tiyile evugandzerini bya ntiyiso ni hi ku byela van’wana leswi u pfumelaka eka swona. U leteriwe ku endla ntirho wa Vukreste. Sweswi u endle xiboho xo tinyiketela leswaku u tirhela Yehovha tanihi muhuweleri la nga khuvuriwangiki.

Ku nga khathariseki leswaku u dyondze hi Yehovha se u kurile kumbe u dyondzisiwe tindlela ta Yehovha ku sukela loko wa ha ri ricece, swi nga endleka leswaku sweswi se u kunguhata ku teka magoza man’wana mambirhi lama kombisaka leswaku u ya emahlweni u kula emoyeni—ku nga ku tinyiketela ni ku khuvuriwa. U tinyiketela eka Yehovha hi ku vulavula na yena hi xikhongelo, u n’wi byela leswaku u endla xiboho xo tinyiketela eka yena ntsena, hilaha ku nga heriki. (Mat. 16:24) Kutani u kombisa ku tinyiketela koloko hi ku khuvuriwa ematini. (Mat. 28:19, 20) Loko se u tinyiketerile naswona u khuvuriwile, u va nandza wa Yehovha Xikwembu la hlawuriweke. Wolowo i nkateko lowukulu!

Loko u ri karhi u dyondza Bibele, u nga ha hlangavetana ni mintlhontlho yo hambana-hambana. Tsundzuka leswaku loko Yesu a ha ku khuvuriwa, u ‘yisiwe hi moya emananga leswaku a ya ringiwa hi Diyavulosi.’ (Mat. 4:1) Na wena u nga ha langutela ku langutana ni miringo leyi engetelekeke loko u heta ku khuvuriwa leswaku u va mudyondzisiwa wa Kreste. (Yoh. 15:20) Yi ta ta hi tindlela to hambana-hambana. U nga ha kanetiwa hi swirho swa ndyangu. (Mat. 10:36) U nga ha hlekuriwa hi vadyondzi-kuloni, vatirhi-kuloni ni lava a va ri vanghana va wena. Kambe, minkarhi hinkwayo tsundzuka marito ya Yesu lama kumekaka eka Marka 10:29, 30, lama nge: “Ndzi tiyisile ndzi ri eka n’wina, a ku na munhu la siyeke yindlu kumbe vamakwavo va xinuna kumbe vamakwavo va xisati kumbe manana kumbe tatana kumbe vana kumbe masimu hikwalaho ka mina ni hikwalaho ka mahungu lamanene la nga ta ka a nga kumi hilaha ku phindhiweke ka 100 enkarhini lowu, tindlu ni vamakwavo va xinuna ni vamakwavo va xisati ni vamanana ni vana ni masimu, swin’we ni ku xanisiwa, kutani emafambiselweni lama taka ya swilo a kuma vutomi lebyi nga heriki.” Kutani hambeta u lwela ku va ekusuhi na Yehovha ni ku hanya hi ku pfumelelana ni milawu yakwe yo lulama.

Loko se u lava ku khuvuriwa, byela muhlanganisi wa huvo ya vakulu. Swivutiso leswi nga ta landzela rungula leri, hi swona leswi vakulu va nga ta ku vutisa swona ku vona loko u faneleka ku khuvuriwa. U nga ha sungula ku swi kambisisa u ri wexe loko u ri karhi u endla dyondzo ya wena n’wini ya nkarhi ni nkarhi.

Loko u ri karhi u lunghiselela bulo leri, tinyike nkarhi wo hlaya ni ku anakanyisisa hi Matsalwa lama tshahiweke ni lama kombisiweke. U nga ha tsala tinhla ta wena ebukwini leyi kumbe kun’wana. U nga ha tirhisa tinhla teto naswona u khoma buku ya wena loko vakulu va ri karhi va ku vutisa swivutiso leswi. Loko ku ri ni swivutiso leswi u nga swi twisisiki kahle, u nga chavi ku kombela mpfuno eka loyi a ku dyondzelaka Bibele kumbe eka vakulu.

Loko vakulu va ri karhi va ku vutisa, a swi bohi leswaku u nyikela tinhlamulo to leha kumbe leti rharhanganeke. Nhlamulo yo koma leyi baka nhloko ya mhaka, leyi u yi vulaka hi marito ya wena yi ta va yi ri kahle ngopfu. Eka swivutiso swo tala, swi ta va swinene leswaku u tirhisa tsalwa rin’we kumbe mambirhi ya Bibele lama kombisaka leswaku nhlamulo ya wena yi sekeriwe eMatsalweni.

Loko vakulu va kuma leswaku a wu si va ni vutivi lebyi ringaneke bya tidyondzo ta xisekelo ta Bibele, va ta hlela leswaku u pfuniwa leswaku u kota ku phofula leswi u swi dyondzeke eMatsalweni, swi huma embilwini ya wena, leswaku u ta faneleka ku khuvuriwa enkarhini lowu taka.

[Xitsundzuxo eka vakulu va vandlha: Swiletelo swa ndlela leyi swivutiso swa lava lavaka ku khuvuriwa swi faneleke swi vutisiwa ha yona swi kumeka eka matluka 208-212.]