Bulo Ro Gimeta Ni Lava Lavaka Ku Khuvuriwa

Hi ntolovelo vanhu va khuvuriwa etinhlengeletanweni ta Timbhoni ta Yehovha. Loko mbulavulo wa nkhuvulo wu hela, xivulavuri xi ta kombela lava yaka eku khuvuriweni leswaku va yima ivi va hlamula swivutiso swimbirhi leswi landzelaka, hi marito lama twalaka kahle:

1. Xana u hundzukile eswidyohweni swa wena, u tinyiketerile eka Yehovha naswona wa tshemba leswaku u ta ku ponisa hi ku tirhisa Yesu Kreste?

2. Xana wa swi twisisa leswaku leswi u khuvuriwaka, u swi kombisa erivaleni leswaku u Mbhoni ya Yehovha leyi kongomisaka hi nhlangano wa Yehovha?

Ku hlamula ka vona hi ina, la twalaka, swi kombisa leswaku lava yaka eku khuvuriweni va swi “vula erivaleni” leswaku va ni ripfumelo eka nkutsulo, ni leswaku va tinyiketele eka Yehovha hilaha ku heleleke. (Rhom. 10:9, 10) Hikwalaho, lava lavaka ku khuvuriwa va fanele va rhanga va anakanyisisa hi swivutiso leswi landzelaka hi xikhongelo, leswaku va ta kota ku swi hlamula hi ku pfumelelana ni leswi va swi pfumelaka.

Xana u tinyiketerile eka Yehovha hi xikhongelo, u n’wi tshembisa ku gandzela yena ntsena ni ku rhangisa ku endla ku rhandza ka yena evuton’wini bya wena?

Xana wa khorwiseka hi ku helela leswaku u lava ku khuvuriwa eka nhlengeletano leyi landzelaka?

Hi yihi ndlela leyi munhu a faneleke a ambala ha yona loko a ya eku khuvuriweni? (1 Tim. 2:9, 10; Yoh. 15:19; Filp. 1:10)

Hi fanele hi ambala “hi xichavo ni mianakanyo yo hluteka” leswaku hi kombisa ku ‘chava ka hina Xikwembu.’ Hikwalaho, lava yaka eku khuvuriweni a va nge ambali swiambalo swo khida hi swona leswi siyaka miri ehandle kumbe swiambalo leswi tsalatsariweke. Va fanele va ambala hi ndlela leyi nga ni xindzhuti ni leyi fambisanaka ni xiendlakalo xexo.

Xana munhu u fanele a tikhoma njhani loko a khuvuriwa? (Luka 3:21, 22)

Ndlela leyi Yesu a khuvuriweke ha yona i xikombiso lexinene eka Vakreste loko va khuvuriwa namuntlha. U teke nkhuvulo wu ri goza leri xiximekaka naswona sweswo u swi kombise hi langutelo rakwe hi xiendlakalo lexi ni hi swiendlo swakwe. Hikwalaho, ndhawu leyi ku nga ta khuvuleriwa eka yona a hi ya ku huhela eka yona, ku hlambela kumbe ku tikhoma hi ndlela yihi na yihi leyi nga ehlisaka xindzhuti xa xiendlakalo lexi; naswona Mukreste la ha ku khuvuriwaka a nga fanelanga a nyanyuka ku tlula mpimo onge hiloko a lo wina sagwadi lerikulu. Hambileswi nkhuvulo wu nga xiendlakalo lexi tsakisaka, kambe ntsako wolowo wu fanele wu kombisiwa hi ndlela leyi xiximekaka.

Xana ku va kona etinhlengeletanweni ta vandlha nkarhi na nkarhi swi ta ku pfuna njhani ku hanya hi ku pfumelelana ni ku tinyiketela ka wena eka Yehovha?

Endzhaku ka loko u khuvuriwile, hikwalaho ka yini swi ta va swa nkoka leswaku u va ni xiyimiso lexinene xa dyondzo ya wena n’wini ni ku va kona nkarhi ni nkarhi ensin’wini?

SWILETELO SWA VAKULU VA VANDLHA

Loko muhuweleri la nga khuvuriwangiki a vula leswaku u lava ku khuvuriwa, u fanele a khutaziwa ku swi kambisisa hi vukheta “Swivutiso Swa Lava Lavaka Ku Khuvuriwa” leswi kumekaka eka matluka 185-207 ya buku leyi. U fanele a kombiwa xiyenge lexi nge: “Rungula Ra Muhuweleri La Nga Khuvuriwangiki,” lexi sungulaka eka tluka 182, lexi hlamuselaka ndlela leyi a nga swi lunghiselelaka ha yona swivutiso leswi vakulu va nga ta n’wi vutisa swona. Hilaha swi kombisiweke hakona eka xiyenge xexo, loyi a lavaka ku khuvuriwa a nga ha tirhisa tinhla leti a titsaleleke tona naswona a nga ha pfula buku ya yena loko a ri karhi a vutisiwa. Hambiswiritano, a xi kona xilaveko xa leswaku un’wana a n’wi vutisa swivutiso leswi loko a nga si hlangana ni vakulu.

Un’wana ni un’wana loyi a lavaka ku khuvuriwa u fanele a tivisa muhlanganisi wa huvo ya vakulu. Endzhaku ka loko loyi a lavaka ku khuvuriwa a kume nkarhi wo kambisisa “Swivutiso Swa Lava Lavaka Ku Khuvuriwa,” muhlanganisi wa huvo ya vakulu u ta n’wi vutisa loko a tinyiketerile hi xikhongelo eka Yehovha leswaku a endla ku rhandza ka Yena. Loko a tinyiketerile, muhlanganisi wa huvo ya vakulu u ta hlela leswaku vakulu vambirhi va burisana na yena hi “Swivutiso Swa Lava Lavaka Ku Khuvuriwa.” Nkulu un’we u ta burisana na yena hi xiyenge xin’we kutani lowun’wana a burisana na yena hi lexin’wana. A swi bohi leswaku ku rindziwa ku tivisiwa ka nhlengeletano leyi taka ku ri kona a vutisiwaka swivutiso leswi.

Xiyenge xin’wana ni xin’wana eka leswimbirhi xi nga hlanganisiwa hi nkarhi wa kwalomu ka awara yin’we, hambileswi swi nga hoxangiki ku heta nkarhi wo talanyana loko swi fanerile. Eka xiyenge ha xin’we ku fanele ku pfuriwa ku tlhela ku pfariwa hi xikhongelo. Vakulu a va fanelanga va sindzisiwa ku vutisa swivutiso hi ku hatlisa, naswona muhuweleri la nga si khuvuriwaka a nga fanelanga a sindzisiwa ku hlamula hi ku hatlisa. Vakulu lava averiweke va fanele va rhangisa mhaka ya ku kambela munhu loyi a lavaka ku khuvuriwa eka xiyimiso xa vona.

Hi ntolovelo swa antswa leswaku muhuweleri ha un’we a vutisiwa swivutiso a ri yexe, va nga ri hi ntlawa. Hi ku n’wi vutisa a ri yexe, vakulu va ta kota ku kumisisa kahle ndlela leyi ku twisisa ka yena ku enteke ha yona, va nga kanakani nikatsongo loko swi fanerile leswaku a khuvuriwa. Ku engetela kwalaho, swi endla leswaku loyi a lavaka ku khuvuriwa, a titwa a ntshunxekile loko a vutisiwa a ri yexe. Nuna na nsati va nga vutisiwa va ri vambirhi.

Loko loyi a lavaka ku khuvuriwa ku ri wa xisati, ku fanele ku buriwa na yena endhawini leyi va nga ta voniwa kambe va nga twiwi hi van’wana. Loko swi fanerile leswaku ku va ni munhu un’wana, u fanele a va a ri nkulu kumbe nandza wa vutirheli, swi titshege hi xiyenge lexi kambisisiwaka, hilaha swi kombisiweke hakona eka ndzimana leyi landzelaka.

Emavandlheni lama nga ni vakulu vatsongo, malandza ya vutirheli lama nga ni ntokoto ni miehleketo leyi hlutekeke ma nga ha tirhisiwa ku vutisa vanhu lava lavaka ku khuvuriwa swivutiso swa nkhuvulo leswi nga eka “Xiyenge 1−Tidyondzo Ta Vakreste.” I vakulu ntsena lava faneleke va kambisisa “Xiyenge 2−Leswi Languteriweke Eka Vakreste” ni munhu loyi a lavaka ku khuvuriwa. Loko vandlha ri nga ri na nhlayo leyi ringaneke ya vakulu ni malandza ya vutirheli lama nga ni ntokoto, mulanguteri wa muganga a nga ha tivisiwa loko swi ta koteka leswaku vandlha ra le kusuhi ri pfuneta.

Loko loyi a lavaka ku khuvuriwa ku ri n’wana lontsongo, (va-)mutswari wakwe la nga Mbhoni u fanele a va kona loko a vutisiwa swivutiso. Loko (va-)mutswari wakwe a ta tsandzeka ku va kona, ku fanele ku va ni vakulu vambirhi (kumbe nkulu ni nandza wa vutirheli, hi ku ya hi xiyenge lexi kambisisiwaka) eka xiyenge ha xin’we.

Vakulu va fanele va khorwiseka leswaku loyi a lavaka ku khuvuriwa u ti twisisa kahle tidyondzo ta xisekelo ta Bibele. Nakambe, va fanele va tiyiseka leswaku u wu tlangela hi mbilu hinkwayo ntiyiso naswona swa tikomba leswaku wa wu xixima nhlangano wa Yehovha. Loko a nga ti twisisi tidyondzo ta xisekelo ta Bibele, vakulu va ta hlela leswaku a pfuniwa hi ku kongoma leswaku a ta faneleka ku khuvuriwa enkarhini lowu taka. Van’wana va nga ha lava ku nyikiwa nkarhi lowu ringaneke leswaku swi vonaka kahle leswaku va wu rhandza hi mbilu hinkwayo ntirho wa nsimu kumbe leswaku va titsongahata eka nkongomiso wa nhlangano wa Yehovha. Vakulu va fanele va tirhisa vutlhari eka ndlela leyi va wu tirhisaka ha yona nkarhi wa awara kumbe ku tlula, lowu va wu tirhisaka ku vutisa swivutiso swa xiyenge ha xin’we, leswaku va ta vona loko hakunene loyi a lavaka ku khuvuriwa a lunghekele ku teka goza leri ra nkoka. Hambileswi ku nga hetiwaka nkarhi wo tala eka swivutiso swin’wana ivi ku hetiwa nkarhi wutsongo eka swin’wanyana, swivutiso hinkwaswo swi fanele swi vutisiwa.

Vakulu lava averiweke ku vutisa lava lavaka ku khuvuriwa va fanele va hlangana endzhaku ka loko va n’wi vutise xiyenge xa vumbirhi, kutani va vula loko muhuweleri yoloye a faneleka ku khuvuriwa kumbe a nga faneleki. Vakulu va ta anakanya hi ndhavuko, vuswikoti ni swiyimo swin’wana swa munhu ha un’we. Hi tsakela vanhu lava rhandzaka Yehovha hi timbilu ta vona hinkwato ni lava va wu twisisaka kahle ntiyiso wa xisekelo wa le Bibeleni. Hi mpfuno wa n’wina wa rirhandzu, lava lavaka ku khuvuriwa va ta va va swi lunghekerile ku endla ntirho wa vona wa nkoka wo chumayela mahungu lamanene.

Endzhaku ka sweswo, nkulu un’we kumbe vambirhi lava a va n’wi vutisa swivutiso va fanele va hlangana na yena va n’wi byela loko a faneleka ku khuvuriwa kumbe a nga faneleki. Loko a faneleka, vakulu va fanele va pfuxeta na yena rungula leri nga le hansi ka nhloko-mhaka leyi nge “Bulo Ro Gimeta Ni Lava Lavaka Ku Khuvuriwa,” leri kumekaka eka matluka 206-207. Loko loyi a lavaka ku khuvuriwa a nga si heta ku hlaya buku leyi nge Tiphine Hi Vutomi Hilaha Ku Nga Heriki! vakulu va fanele va n’wi khutaza ku yi hetisa endzhaku ko khuvuriwa. Byelani loyi a lavaka ku khuvuriwa leswaku siku ra yena ro khuvuriwa ri ta tsariwa eka Rhekhodo Ya Muhuweleri Ya Vandlha leyi tsariweke vito ra yena. N’wi tsundzuxe leswaku xikongomelo xa vakulu xo teka rungula leri eka yena hi leswaku nhlangano wu ta kota ku khathalela mitirho ya Timbhoni ta Yehovha emisaveni hinkwayo ni leswaku a ta kota ku endla mitirho ya moya a tlhela a seketeriwa hi tlhelo ra moya. Ku engetela kwalaho, vakulu va nga tsundzuxa vahuweleri lavantshwa leswaku rungula rihi na rihi ra munhu wo karhi ri hlayisiwa hi ku landza Global Data Protection Policy ya Timbhoni ta Yehovha leyi kumekaka eka jw.org. Bulo leri a ri fanelanga ri tlula timinete ta khume.

Endzhaku ka lembe muhuweleri a khuvuriwile, vakulu vambirhi va fanele va hlangana na yena leswaku va ta n’wi khutaza ni ku n’wi nyika swiringanyeto leswi pfunaka. Un’wana wa vakulu volavo u fanele a va mulanguteri wa ntlawa lowu muhuweleri yoloye a nga eka wona. Loko muhuweleri loyi lontshwa a ha ri n’wana lontsongo, (va-)mutswari wakwe loyi a nga Mbhoni u fanele a va a ri kona. Nhlengeletano yoleyo yi fanele yi va leyi khutazaka swinene. Vakulu va ta bula na yena hi nhluvuko lowu a wu endleke ni ku n’wi nyika swiringanyeto leswi pfunaka eka ndlela leyi ha yona a nga yaka emahlweni a va ni dyondzo ya munhu hi yexe ni ku hlaya Bibele siku ni siku, dyondzo ya ndyangu ya vhiki ni vhiki, ku va kona nkarhi ni nkarhi etinhlengeletanweni ta vandlha ni ku hoxa xandla eka tona ku katsa ni ku ya ensin’wini vhiki ni vhiki. (Efe. 5:15, 16) Loko a nga si heta ku hlaya buku leyi nge Tiphine Hi Vutomi Hilaha Ku Nga Heriki! vakulu va fanele va endla leswaku ku va ni munhu loyi a dyondzaka na yena. Vakulu va fanele va n’wi bumabumela swi huma embilwini. Hi ntolovelo, a nga ha nyikiwa ndzayo ni swiringanyeto eka timhaka ti nga ri tingani.