Landzelela Ku Tsakela Hinkwako Leswaku U Vuyerisa Van’wana
1 Hinkwerhu hi fanele ku xalamukela ku landzelela ku tsakela hinkwako loku hi ku kumaka ensin’wini. Van’wana va vona onge i swa nkoka ku endla riendzo ro vuyela ntsena loko munhu a teke buku. Kambe, leswi swi hoxile. Hambi loko munhu a nga ri tsakeli ngopfu rungula ra Mfumo, hi lava ku endla leswi hi nga swi kotaka leswaku munhu yoloye a vuyeriwa. Hikwalaho hi endla maendzo yo vuyela hi xikongomelo xo hlakulela ku tsakela ka munhu ni ku sungula dyondzo ya le kaya ya Bibele. Leyi i pakani ya hina hambi loko hi nga siyi buku. Xana leswi swi nga endliwa njhani?
2 Loko bulo ra wena ra nkarhi lowu hundzeke a ri ri mayelana ni ku andza ka swiphiqo swa vukati namuntlha naswona u siye buku leyi nge “Hanya Hi Masiku,” u nga ha sungula bulo ra wena hi ndlela leyi:
◼ “Eriendzweni ra mina ra nkarhi lowu hundzeke, hi vulavule hi vukati ni ndzayo leyi tirhaka ya Bibele leyi nga hi pfunaka ku kuma ntsako lowukulu. Xana a hi ntiyiso leswaku hambi ku ri emindyangwini leyinene, ku va ni swiphiqo nkarhi na nkarhi? [Yimela nhlamulo.] Bibele yi hi nyika ndzayo leyinene leyi nga hi pfunaka ku tlhantlha swiphiqo evuxakeni bya ndyangu. Ndyangu wu nga ha katekisiwa hi ku dyondza Bibele swin’we.” Pfula eka tluka 246, kutani u hlamusela ndzimana 23. Hlaya Yohane 17:3, kutani u pfuna ndyangu leswaku wu sungula ku dyondza Bibele ekaya.
3 Loko u vulavule hi vana ni xilaveko xa vona xo leteriwa, u nga ha yisa bulo emahlweni hi mukhuva lowu:
◼ “Enkarhini lowu hundzeke hi vulavule hi ndzetelo wa moya lowu vana va wu lavaka ni ndlela leyi vatswari va nga va pfunaka ha yona. Vatswari vo tala lava ndzi vulavuleke na vona va hlamarisiwa hi mahanyelo yo biha ya vantshwa vo tala namuntlha. Xana u anakanya yini ha swona . . . ? [Boxa xikombiso xa mahanyelo yo biha ya vantshwa lama hakanyingi ma voniwaka endhawini ya ka n’wina. Yimela nhlamulo.] U nge ndzi ku kombisa ndzayo yin’wana leyi tirhaka leyi nyikeriweke eBibeleni.” Pfula eka ndzimana 22 eka tluka 246 ebukwini leyi nge Hanya Hi Masiku, kutani u hlamusela yinhla-nkulu, ivi u hlaya Vaefesa 6:4. Kombisa leswaku entiyisweni vana vo tala va lava ndzayo ni nkongomiso. Loko vatswari va tikarhatela ku yi nyikela, vana va tsaka naswona va tikhoma hi ndlela leyi xiximekaka. Hlamusela ndlela leyi hi dyondzaka Bibele ni vana va hina ha yona.
4 Loko nhloko-mhaka ya bulo ra n’wina a ku ri misava ya Paradeyisi, kutani u nga ha vula leswi leswaku u pfuxeta ku tsakela:
◼ “Hi langute eka swifaniso swin’wana ebukwini leyi leswi hi kombiseke leswi misava yi nga ta va xiswona loko Xikwembu xi yi endla paradeyisi. A swi nge vuli nchumu eka hina loko hi nga ta swi kota ku yi tsakela ni varhandziwa va hina. Xana a swi tano ke?” Yimela nhlamulo. Kutani pfula eka tluka 162 ebukwini leyi nge Hanya Hi Masiku. Hlaya Nhlavutelo 21:3, 4, kutani u hlamusela ndlela leyi varhandziwa va hina va nga ta tshama va ri na hina ha yona. Loko ku ri ni n’wangulo lowunene, hlaya Yohane 5:28, 29 ku kombisa leswaku vafi va ta tlhelela evuton’wini. Kombisa xifunengeto xa buku kutani u ku: “I ntiyiso hakunene—hi nga hanya hi masiku aParadeyisini emisaveni!” N’wi byele leswaku u ta tlhela u vuya leswaku mi ta bula hi mhaka leyi endlaka hi swi tiva leswaku yi le kusuhi ha yona.
5 Xikongomelo-nkulu xa riendzo ro vuyela i ku pfuna vanhu lava tsakelaka leswaku va vuyeriwa hi rungula ra Mfumo. Vanhu vo tala va lava nchumu lowu nga ta pfuxa ku navela ka vona ka swilo swa moya. Va kombise tinhla to karhi leti nga ta nkoka ebukwini, u kandziyisa ndlela leyi ti nga va pfunaka ku twisisa Bibele ku antswa ha yona. Maendzo yo vuyela lama hetisisaka tipakani leti ma ta pfuna van’wana leswaku va vuyeriwa hi ndlela leyinene leyi kotekaka.