Pfuna Lava Kombisaka Ku Tsakela Hi Rirhandzu
1 Loko a kongomisiwe hi ntsumi ya Yehovha eka Muetiyopiya loyi a kombiseke ku tsakela ka xiviri eRitweni ra Xikwembu ra ntiyiso, mudyondzisiwa Filipi u tinyiketele ku n’wi pfuna hi rirhandzu leswaku a twisisa leswi a a swi hlaya. (Mint. 8:26-39) Xana hi endla matshalatshala yo hlawuleka leswaku hi pfuna lava kombisaka ku tsakela? Hi fanele ku endla tano, tanihi leswi xileriso xa Xikwembu eka hina xi katsaka ku endla vanhu vadyondzisiwa. (Mt. 28:19, 20) Xana hi fanele ku endla yini leswaku hi va pfuna?
2 Vekela nkarhi wo endla maendzo yo vuyela etlhelo vhiki rin’wana ni rin’wana. Endla malunghiselelo yo vuyela eka lava kombiseke ku tsakela, kutani u ringeta ku yisa bulo ra Matsalwa emahlweni, leri sunguriweke eriendzweni ra wena ro sungula. Tshama u ri ni pakani yo sungula dyondzo ya Bibele emianakanyweni. Tlhelela nkarhi na nkarhi u ya fambisa timagazini ta sweswinyana ta Xihondzo xo Rindza ni Xalamuka! loko nyiko yo sungula ya xikhokhelo yi ariwile.
3 Loko mi bule hi nkoka wa Bibele eriendzweni ra wena ro sungula, u nga ha yisa bulo emahlweni, hi ku tirhisa xiringanyeto lexi nga eka tluka 66 ra buku leyi nge “Reasoning” kutani u vula swo fana na leswi:
◼ “Van’wana va vula leswaku nkongomiso wa Bibele a wu tirhi eka vanhu va manguva lawa. Xana u titwa njhani hi mhaka leyi? [Yimela nhlamulo.] Xana a wu nga ta pfumela leswaku buku leyi nyikelaka xitsundzuxo lexi tirhaka lexi nga hi pfunaka leswaku hi va ni vutomi bya ndyangu lebyi tsakeke ya tirha ke? [Yimela nhlamuselo.] Tidyondzo ni mikhuva leyi katsaka vutomi bya ndyangu yi cincile, naswona vuyelo lebyi hi byi vonaka namuntlha a hi byinene. Kambe mindyangu leyi tirhisaka leswi Bibele yi swi vulaka yi ni xisekelo lexi tiyeke naswona yi tsakile.” Hlaya Vakolosa 3:18-21. Fambisa xiphephana lexi nge Mhaka Leyi U Nga Tshembaka Bibele Ha Yona, kutani u hlamusela leswaku hi ni nongonoko wa dyondzo ya mahala ya Bibele.
4 U nga sungula bulo hi xiyimo xa vafi hi ndlela leyi:
◼ “Ku ni swo tala leswi ku vulavuriwaka ha swona malunghana ni xiyimo xa vafi. Xana u ehleketa leswaku ku humelela yini eka hina loko hi fa? [Yimela nhlamulo.] Vukhongeri byo tala byi dyondzisa leswaku hi hambeta hi hanya hi xivumbeko xin’wana. Vo tala va hlamarisiwe hi ku tiva leswi Bibele yi swi vulaka hi mhaka leyi. [Hlaya Eklesiasta 9:5.] Hambi loko vafi va nga twi nchumu, a va rivariwanga. Xikwembu xi tshembise ku va tlherisela evuton’wini ehansi ka vulawuri bya Mfumo wa xona.” Pfula Xihondzo xo Rindza xa October 15, 1994, kumbe tluka 162 ebukwini leyi nge Hanya Hi Masiku, kutani u hlamusela matsalwa ni swifaniso leswi nga kwalaho. Hlela riendzo rin’wana ro vuyela, hi xikongomelo xo sungula dyondzo ya Bibele.
5 Loko u lava ku nyikela nhlamuselo leyi engetelekeke mayelana ni langutelo ra Vukreste eka tinyimpi ta matiko, u nga ha lava ku vula swin’wana swo fana na leswi:
◼ “Van’wana va kholwa leswaku ku lwa hi yona ntsena ndlela yo ahlula timholovo. U ri yini hi mhaka leyi? [Yimela nhlamulo.] Bibele yi komba leswaku Xikwembu xi lava leswaku vanhu va tshama swin’we hi ku rhula. [Hlaya Varhoma 12:17, 18.] Sweswo swi ta va swa xiviri emisaveni hinkwayo ehansi ka Mfumo wa Xikwembu.” Kombetela eka broxara leyi nge Xana Xikwembu Xa Hi Khathalela Hakunene?, matluka 25-6. N’wi tshembise leswaku u ta tlhela u vuya u ta hlamusela xivangelo xa ku va Yesu a hi dyondzise ku khongelela leswaku ‘ku rhandza ka Xikwembu ku endliwa emisaveni tanihi le tilweni.’—Mt. 6:10.
6 Mutsheniwa wa Muetiyopiya u xiye ku tsandzeka kakwe ku twisisa handle ka un’wana la n’wi dyondzisaka. (Mint. 8:31) Filipi u n’wi nyike mpfuno lowu a wu lava hi rirhandzu. Hi nga kombisa rirhandzu ra xiviri eka van’wana hi ku va pfuna hi ndlela leyi fanaka.