Ku Endla Maendzo Yo Vuyela U Ri Ni Xikongomelo
1 Loko u endla riendzo ro vuyela, u fanele u tiyimisela ku tirhisa tsalwa leri nga ta engetela vutivi bya munhu emhakeni ya Bibele leyi mi buleke ha yona nkarhi lowu hundzeke.
2 Yin’wana ya tipakani to endla maendzo yo vuyelo laha u fambiseke timagazini i ku simeka ntila wa timagazini. Xingheniso xo olova xo fana na lexi xi nga tirha:
◼ “Ndza tshemba u tiphinile hi xihloko xa Xihondzo xo Rindza lexi ndzi ku siyeleke xona lexi hlamuselaka xivangelo xo va hi chava Xikwembu. Namuntlha ndzi te ni xihloko lexi nga eka magazini wa Xalamuka! lexi vutisaka xivutiso lexi nge, ‘Ha Yini Vutomi Byi Kome Swonghasi?’ I xivutiso lexinene, a swi tano ke?” U nga ha ya emahlweni u ku: “Marito ya Yesu lama tiviwaka swinene eka Yohane 3:16 ma nyika xitshembiso xa vutomi lebyi nga heriki. Ndzi kombela u teka magazini lowu leswaku u ta khutaziwa hi ntshembo lowu tiyeke lowu humaka eRitweni ra Xikwembu.” Kutani hlamusela leswaku u ta tlhela u tisa minkandziyiso leyi landzelaka ivi kumbexana mi yisa bulo emahlweni hi leswi Xikwembu xi swi tshembisaka eka vanhu lava yingisaka. Tsundzuka leswaku nkarhi wun’wana ni wun’wana lowu u yisaka timagazini ha wona, u nga wu vika wu ri riendzo ro vuyela.
3 Loko u fambise xihloko lexi nge “Misava Yo Pfumala Nyimpi—Rini?” u nga ha ku:
◼ “Xana vutomi a byi ta va njhani emisaveni leyi loko a ku nga ri na tinyimpi? [Yimela nhlamulo.] U nge ndzi ku komba leswi Xikwembu xi tshembisaka ku swi endla.” Hlaya Pisalema 37:10, 11, kutani u hlamusela ndlela leyi swilo swi nga ta va ha yona loko ku rhandza ka Xikwembu ku endliwa laha misaveni. Tsundzuxa munhu hi leswi Yesu a swi dyondziseke vadyondzisiwa va yena leswaku va swi khongelela hi laha swi tsariweke ha kona eka Matewu 6:9, 10. N’wi pfune ku anakanyisisa hi leswi marito ya Yesu ma vulaka swona. Fambisa xikhokhelo xa Xihondzo xo Rindza kumbe Xalamuka! kutani u endla malunghiselelo yo vuyela mi ta yisa bulo emahlweni.
4 Loko u vuyela ku ta yisa bulo emahlweni hi xihloko lexi nga exifunengetweni lexi nge “Ha Yini Vutomi Byi Kome Swonghasi?” u nga ha sungula hi ndlela leyi:
◼ “Nkarhi lowu nga hundza loko ndzi tile, hi vulavule hi ku hanya nkarhi wo leha. Tanihi leswi handle ko kanakana u swi xiyeke eswihlokweni swa Xalamuka!, vativi va sayense a va nyiki ntshembo wo hi pfuna ku hanya malembe yo tlula 70 na 80. Kambe xana u anakanya yini hi leswi Bibele yi swi tshembisaka? [Yimela nhlamulo.] Bibele yi kombisa leswaku Xikwembu xi anakanya swo antswa swinene hi munhu.” Kutani hlaya Yohane 17:3, kutani u hlamusela ndlela leyi ku nghenisa vutivi swi nga yisaka evuton’wini lebyi nga heriki ha yona. Enkarhini lowu u nga swi kota ku sungula dyondzo ya le kaya ya Bibele kumbe u endla lunghiselelo ra bulo rin’wana ra Bibele.
5 Ku sungula dyondzo ya Bibele i pakani ya nkoka evutirhelini bya hina. Kumbexana se u vuyele ko talanyana eka munhu loyi a amukeleke timagazini. Ha yini u nga ringeti xingheniso lexi enkarhini lowu landzelaka loko u tlhelela?:
◼ “Vanhu va na mianakanyo yo hambana swinene mayelana ni vukhongeri ni nkoka wa byona evuton’wini bya manguva lawa. Ku na tidyondzo leti lwisanaka mayelana ni xivangelo xo va Xikwembu xi pfumelele vubihi kumbe xivangelo xo va hi dyuhala ivi hi fa. Van’wana va nga ha tsakela ku tiva ndlela yo khongela leswaku va twiwa hi Xikwembu.” Pfula yin’wana ya tibuku ta hina to dyondza Bibele eka xihloko lexi u vonaka onge xi ta tsakisa n’wini wa muti, ivi hi ku komisa u kombisa ndlela leyi dyondzo yi fambisiwaka ha yona.
6 Yehovha i Xikwembu xa xikongomelo. A hi n’wi tekeleleni hi October hi ku endla maendzo yo vuyelo hi ri ni xikongomelo.