Pfuna Van’wana Leswaku Va Vuyeriwa
1 Yehovha u hi tshembisa ku hi dyondzisa leswi hi faneleke hi swi tiva. Wa hi tiyisekisa eka Pisalema 32:8: “Nḍi ta ku tlharihisa nḍi ku komba ndlela leyi u faneleke ku famba ha yona; nḍi ta ku letela, ni mahlo ya mina ma ta v̌a ka wena.” Xitiyisekiso lexi xa hi vuyerisa swinene. Handle ka vutianakanyi hi lava ku kombisa van’wana ndlela leyi va nga ta vuyeriwa ha yona hi ku yingisa ndzayo ya vutlhari leyi humaka eBibeleni. (Esa. 48:17) Leswi hi nga swi endla hi ku fambisa buku leyi nge Hanya Hi Masiku hi September. Loko hi endla swingheniso swa hina, ku ni tindlela to hambana-hambana leti hi nga kombisaka nkoka wa Bibele ha tona.
2 Hikwalaho ka ku andza ka swiphiqo swa vukati namuntlha, u nga ha hlawula ku vulavula hi mhaka leyi leyi nga ebukwini leyi nge “Hanya Hi Masiku”:
◼ “Vanhu vo tala lava ndzi vulavuleke na vona va karhateke ngopfu hi ku andza lokukulu ka ku pfumala ntsako evukatini ni ku dlaya vukati. Xana u titwa njhani hi xiphiqo lexi? [Yimela nhlamulo.] Vo tala va tsandzekile ku vona swivangelo swa xona. Loko yi endla matshalatshala lamakulu, mimpatswa a yi nge hlayisi vukati bya yona ntsena kambe yi nga tlhela yi kuma ni ntsako wa xiviri. Xilotlelo xa ku humelela xi titshege hi ku tirhisa ndzayo leyi kumekaka eBibeleni.” Hlaya Vaefesa 5:28, 29, 33. Pfula eka tluka 243, ivi u hlamusela tindzimana 16 na 17, kutani u fambisa buku.
3 Vana va lava nkarhi wa nkoka ni vuleteri lebyi humaka eka vatswari va vona. Loko u fambisa buku leyi nge “Hanya Hi Masiku,” u nga ha ku:
◼ “Hinkwerhu ka hina ha khumbeka hi vuhlayiseki bya vana va hina bya nkarhi lowu taka. Hi ku vona ka wena, hi yihi ndlela yo antswa leyi vatswari va nga pfunaka vana va vona leswaku va kuma vumundzuku lebyi sirhelelekeke? [Yimela nhlamulo.] Yingisela xitsundzuxo lexi lexi humaka eka xivuriso xa Bibele lexi tsariweke kwalomu ka malembe ya 3 000 lama hundzeke. [Hlaya Swivuriso 22:6.] Hambi leswi vana va hina va nga vuyeriwaka swinene eka vuleteri lebyi va byi kumaka exikolweni, ndzetelo wa vona wa nkoka swinene wu nyikeriwa ekaya hi vatswari va vona. Swi lava nkarhi, nyingiso ni rirhandzu, kambe swi lava matshalatshala lamakulu.” Pfula eka tluka 245, kutani u hlamusela tindzimana 20 na 21, u hlamusela ndlela leyi buku leyi yi nga tirhisiwaka ha yona tanihi xisekelo xa dyondzo ya ndyangu ya Bibele.
4 U nga ha tsakela ku fambisa buku leyi nge “Hanya Hi Masiku” hi ku kombisa ndlela leyi misava yi nga ta va paradeyisi ha yona:
◼ “Ndza tshemba leswaku wa karhateka hi ndlela leyi vutomi bya wena byi nga ta va xiswona enkarhini lowu taka. Exikhongelweni xa Hosi, Yesu u hi dyondzise ku khongelela ku rhandza ka Xikwembu leswaku ku endliwa emisaveni tanihi le tilweni. Xana misava yi ta va njhani loko ku rhandza koloko ku endleka? [Yimela nhlamulo.] Hi lexi xifaniso lexi dirohiweke xa mutshila xa misava ya paradeyisi. [Kombisa xifaniso lexi nga eka matluka 12 na 13. Kutani u hlaya Esaya 11:6-9, leyi katsiweke eka ndzimana 12.] Xana a swi nge hlamarisi ku hanya emisaveni yo tano? Buku leyi yi ta ku kombisa ndlela leyi wena ni ndyangu wa wena mi nga hanyaka ha yona eparadeyisini yo fana ni leyi.”
5 Ku lunghiselela xingheniso xa wena ka ha ri emahlweni i xisekelo xa nkoka xo kota ku vona ku humelela ka wena loko u ri emutini. U nga si ndzawuta, tiyiseka leswaku u ni swin’wana swo swi vula malunghana ni mhaka leyi humaka eMatsalweni. Nakambe, vana ni marito yo koma emianakanyweni yo ma vula malunghana ni xiyenge lexi tsakisaka xa magazini kumbe xiphephana lexi u kunguhataka ku xi fambisa loko buku yi nga tekiwi. Tirhisa nkarhi wihi na wihi lowu u nga na wona u byala timbewu ta ntiyiso wa Mfumo hi September. (Ekl. 11:6) U ta va u pfuna van’wana leswaku va vuyeriwa hi laha ku nga heriki.