Ku Kamberiwa Hi Yehovha —Ha Yini Ku Vuyerisa?
1 Un’wana ni un’wana u navela rihanyo lerinene. Ri endla leswaku vutomi byi tsakisa swinene. Kambe, vo tala lava nga ni rihanyo lerinene va ha kamberiwa minkarhi yin’wana. Ha yini? Va lava ku vona swiphiqo swihi na swihi swa rihanyo leswi nga ha vaka kona leswaku va ta teka magoza yo swi tshungula. I swa nkoka swinene ku hlayisa rihanyo ra hina ra moya. Ku amukeriwa hi Yehovha swi titshege hi ku hambeta hi va ni “ku pfumela loku hanyaka.”—Tito 1:13.
2 Lowu i nkarhi lowu faneleke wo kamberiwa hi Yehovha. Ha yini swi ri tano? Hikuva Yehovha u le tempeleni ya yena leyo kwetsima, naswona u kambela timbilu ta vanhu hinkwavo. (Ps. 11:4, 5; Swiv. 17:3) Ku fana na Davhida, hi kombela Yehovha leswaku a hi kambela hi laha ku heleleke: “U nḍi kamba, Yehova, u nḍi lav̌isisa; u ringa šisuti ša mina ni mbilu ya mina.”—Ps. 26:2.
3 Hi fanele ku tivonela malunghana ni minxungeto ya rihanyo ra hina ra moya leyi nga ha humaka eka hina hikwalaho ka nyama ya hina leyi nga hetisekangiki. Swivuriso 4:23 ya tsundzuxa: “Hlayisa mbilu ya wena ku tlurisa le’ŝi hlayisiwaka, hikuv̌a i šihlov̌o ša v̌utomi.”
4 Nakambe rihanyo ra hina ra moya ri nga ha xungetiwa hi vanhu lava onhakeke va mahanyelo yo biha, lava hi rhendzeleke. Loko hi tipfumelela ku tolovelana ngopfu ni mafambiselo lawa yo homboloka, hi nga sungula ku anakanya ku fana na wona ni ku humesa malangutelo ya misava. Kumbexana hi nga ha amukela mahanyelo ya misava ivi hi hluriwa hi moya wa misava.—Ef. 2:2, 3.
5 Sathana a nga ha tirhisa nxaniso kumbe nkaneto lowukulu leswaku a hi onha hi tlhelo ra moya. Hambi swi ri tano, minkarhi yo tala hi vukanganyisi u tirhisa swilo swa misava leswi hi kokaka hi mano leswaku a hi hambukisa. Petro u hi khutaza ku ‘tikhoma ni ku hiteka,’ tanihi leswi Sathana a fanaka ni “nghala leyi bongaka, yi lava loyi yi nga n’wi dyaka.” Hi khutaziwa ku ‘lwisana na yena, hi yima hi tiyile eripfumelweni.’—1 Pet. 5:8, 9.
6 Ku ni xilaveko xo sirhelela rihanyo ra hina ra moya hi ku hlayisa ripfumelo ra hina ri tiyile ni ku ri tiyisa siku rin’wana ni rin’wana. Muapostola Pawulo u bumabumela leswaku hi kambela ripfumelo ra hina nkarhi na nkarhi. Tanihi leswi hi yingisaka xitsundzuxo lexi tirhaka lexi hi nyikiwaka xona hi dokodela la nga ni vutshila, hi tlhela hi yingisa Yehovha loko nkambisiso wa Yena wa moya wu paluxa xiphiqo lexi lavaka ku lulamisiwa. Leswi swi endla swi koteka leswaku hi “ringet[a] ku hetiseka.”—2 Kor. 13:5, 11.
7 Entiyisweni Yehovha i Mukamberi lonkulu. Tindlela takwe to kambela ti tshama ti hetisekile. U swi tiva kahle leswi hi swi lavaka. Hi ku tirhisa Rito rakwe ni ‘nandza wo tshembeka,’ u lunghiselela swakudya swa moya leswi nga ni rihanyo. (Mt. 24:45; 1 Tim. 4:6) Ku dya swakudya swa moya leswi nga ni rihanyo nkarhi na nkarhi ekaya ni le minhlanganweni ya vandlha swi hi pfuna ku hlayisa rihanyo ra moya. Vutiolori bya moya bya nkarhi na nkarhi evutirhelini bya nsimu ni le mintirhweni yin’wana ya Vukreste na swona swa vuyerisa. Hikwalaho, hi amukela ku kambisisiwa hi Yehovha nkarhi na nkarhi, hi ku tshemba leswaku u ta hi hlayisa hi ri exiyin’weni lexinene xa rihanyo ra moya.