Hlayisa Ripfumelo Ra Wena Ni Ku Tenga Ka Moya
“Landza ntila wa marito lama tiyeke ya xiviri, lawa u ma tweke eka mina, eku pfumeleni ne rirhandzwini leri nga ka Kriste Yesu.”—2 TIMOTIYA 1:13.
1. Ha yini rihanyo lerinene ra miri ku ri rifuwo ra risima leri faneleke ku hlayisiwa?
RIHANYO lerinene ra miri i rifuwo ra risima. Loko hi hanye kahle, hi nga endla swilo swo tala ni ku tsakela vutomi hi laha ku engetelekeke. Kambe loko hi vabya hi nga holi kumbe hi tsanile, vutomi bya nonon’hwa swinene. Kavula, rihanyo lerinene ri fanele ku hlayisiwa. Vo tala va honisa rihanyo ra vona kumbe va endla swilo leswi vangaka mavabyi. Hambi swi ri tano, lava va tilangutelaka, hakanyingi va na mpimo wa rihanyo lerinene ni matimba exiphen’wini lexikulu xa vutomi bya vona.
2. (a) Ha yini rihanyo ra moya ri ri ra nkoka swinene ku tlula rihanyo ra miri? (b) Ku laveka yini leswaku hi tshama hi tengile eripfumelweni?
2 Rihanyo ra moya i ra nkoka swinene ku tlula rihanyo ra miri. Rihanyo lerinene ra miri ri nga ka ri nga tisi nyiko ya Xikwembu ya vutomi lebyi nga heriki. Rihanyo lerinene ra moya ri kumiwa evugandzerini lebyi tengeke ni ripfumelo leri sekeriweke evutivini lebyinene. (Yohane 17:3; Vaheveru 11:6; Yakobo 1:27) Muapostola Pawulo u te: “Byela vavanuna lava kuleke leswaku va fanele ku dya hi ku pima, va chaviseka, va kota ku tikhoma, va va ni ku hanya ka xiviri eku pfumeleni, ne rirhandzwini, ne ku chivirikeni.” (Tito 2:2) Un’wana ni un’wana loyi a navelaka ku va ni rihanyo eripfumelweni u fanele ku endla matshalatshala lamakulu kutani a hlayisa ku chivirika ka nkarhi na nkarhi. Minxungeto yo onha rihanyo ra moya yi nga huma endzeni ka hina kumbe ehandle. Hi fanele ku tivonela eka minxungeto leyi loko hi ta hlayisa ripfumelo ni rihanyo ra moya emisaveni leyi yi vabyaka.
Misava Leyi Yi Vabya Ku Fika Kwihi Ke?
3, 4. Vuvabyi bya mahanyelo byi kombisisiwa ku yini emisaveni leyi ni le swiendlweni swa vanhu?
3 A ku na ku kanakana leswaku misava ya vabya swinene hi tlhelo ra mahanyelo. Hi vona vuvabyi lebyi dlayaka “eswiyengeni” hinkwaswo swa misava leyi—vukhongeri bya yona, mafambiselo ya yona ya tipolitiki, miako ya yona ya swa mabindzu, ku tihungasa ka yona. I vantsongo lava xiximaka Xikwembu ni milawu leyi xi yi nyikeke leswaku yi hlayisa vanhu. Naswona tanihi laha matimu ma kombisaka ha kona, ku onhaka ka mahanyelo handle ko hundzuka ku yisa eku engetelekeni ka mavabyi ni mahlomulo ya nyama. Hi hala tlhelo, vo tala a va lavi ku endla nchumu ehenhleni ka ku tshungula xiyimo lexi xi nga ni mavabyi hi tlhelo ra mahanyelo hikuva va rhandza swilo leswi swi xi vangaka.
4 Vona ndlela leyi misava leyi yi vabyaka ha yona! Hi ku lava minyanyuko kumbe hi ku ringeta ku balekela ntiyiso, vo tala va onhe vutomi bya vona hi ku tirhisa loko biha ka xihoko ni swidzidzirisi. Vukari byi kona hinkwako, vutomi a byi na nkoka, naswona makhotso ya tele hi swigevenga. Ematikweni yo tala, hafu ya vukati hinkwabyo yi hela hi ku dlaya vukati. Vana lava pfumalaka vulanguteri lebyi faneleke bya vutswari va kula tanihi swigevenga. Hikwalaho ka leswi rigangugangu ri nga lawulekiki, AIDS ni mavabyi man’wana lama tluletiwaka hi rimbewu ma andza hi xihatla.
5. Esaya u swi hlamusele njhani swiyimo eka Yuda wa khale?
5 Xikwembu xi swi kotile ku vula hi misava leyi yo vabya leswi xi huhuteleke Esaya ku swi twarisa ehenhleni ka Vayuda lava nga yingisiki a ku: “Yo! khombo ra tiko ra v̌adyohi, ra rišaka le’ri teleke ku homboloka, ra v̌anhu la’v̌o biha, ra v̌ana la’v̌o hunguka. V̌a fularele Yehova, v̌a sanḍile mukwetsimi wa Israel, v̌a tlhelele nḍaku. Mi ta biwa ku yisa kwihi, loko mi anḍisa ku tiarisa ka ṅwina šana? Nhloko hikwayo yi vabya, ni mbilu hikwayo yi twa ku v̌av̌iseka. Ku suka mikonḍweni, ku yisa nhlokweni, a ku na laha ku lulameke.”—Esaya 1:4-6.
6. EYuda wa khale ni le sikwini ra hina, i nhlamulo yihi leyi yi veke kona eka ku khongotela ka Yehova ka ku dyondza ku endla leswo lulama?
6 Ku khongotela ka Yehova leswaku va hundzuka ni ‘ku dyondza ku endla leswinene’ hakanyingi a ku yingisiwanga eYuda. (Esaya 1:16-20) Leswi eku heteleleni swi yise eku lovisiweni ka Yerusalema ni ku yisiwa ka Vayuda evuhlongeni eBabilona. I vanhu vantsongo lava tshembekaka ntsena lava tokoteke nkateko wa Xikwembu ni ku hlayiseka exikarhi ka tiko lero vabya. Hi ku fanana namuntlha, emisaveni leyi yi vabyaka ku sukela enhlokweni ku ya fika exikunwanini, i vanhu va nga ri vangani ntsena lava navelaka ku dyondza ku endla leswinene. Malandza lawa yo tshembeka ya Yehova ma endla matshalatshala lamakulu leswaku ma hlayisa ripfumelo ni rihanyo ra moya sweswi, hi ntshembo wo kuma rihanyo ra miri leri hetisekeke ni vutomi lebyi nga heriki emisaveni leyintshwa ya Xikwembu leyi tshembisiweke.—2 Petro 3:13; Nhlavutelo 21:1-4.
Makhombo Ya Moya eMisaveni Leyi Yo Vabya
7. (a) I makhombo wahi lama hlaselaka ripfumelo ra hina ni rihanyo ra moya? (b) Matsalwa ma vula yini ehenhleni ko hlangavetana ni swivumbeko swinharhu leswikulu leswi nghenisaka rihanyo ra moya ekhombyeni?
7 Ku hlayisa ripfumelo ni rihanyo ra moya i mphikamakaneta hikuva vuvabyi bya misava leyi bya mahanyelo bya tlulela swinene. Vakriste nakambe va fanele ku lwisana ni ku nga hetiseki ka vona vini loku kumiweke hi ndzhaka. (Varhoma 7:21-25) Ku tlula kwalaho, Sathana, “mufumi wa misava leyi,” wa ku tiva ku tsana ka nyama naswona i mutshila wa ndzingo. (Yohane 14:30; 1 Yohane 5:19) Makhombo lawa makulu manharhu lama hlaselaka ripfumelo ni rihanyo ra moya—nyama, misava na Diyavulosi—ma chavisa. Kambe swa koteka leswaku hi nga vi “va misava,” hambi loko hi hanya eka yona. Hi nga ‘hambeta hi famba ni moya wa Xikwembu ivi hi nga vi ni ku navela ka nyama.’ Naswona hi mpfuno wa Xikwembu hi nga ‘yima hi tiyile hi lwisana ni marhengu ya Diyavulosi.’ (Yohane 17:15, 16; Vagalatiya 5:16; Vaefesa 6:11; 2 Vakorinto 2:11) Kambe sweswi a hi voneni ndlela leyi ha yona hi nga hlangavetanaka ni swivumbeko leswi swinharhu leswikulu leswi nghenisaka ripfumelo ni rihanyo ra moya ekhombyeni.
8. Yesu u ma hlamuserisa ku yini matimba lama nga endzeni ka hina lama tirhaka ku lwisana ni rihanyo ra moya?
8 Endzeni ka ntumbuluko wa hina wa vumunhu lowu nga hetisekangiki ku ni matimba lama nga vangaka xidyoho ni lama nga hi vabyisaka hi tlhelo ra moya. (Yakobo 1:14, 15) Leswi swi tano ngopfu-ngopfu endzeni ka mbilu yo fanekisela. Yesu u te: “Hikuva endzeni, etimbilwini ta vanhu, hi kona ku humaka miehleketo leyo biha, ni vuphukuphuku, ni ku yiva, ni ku dlayana, ni vuoswi, ni ku navela rifuwo; hi kona ku humaka lunya, ni ku xisa, ni swa tingana, ni mavondzo, ni ku sandza, ni ku tikurisa, ni vuhunguki. Hinkwaswo leswo biha leswi swi huma endzeni ka mbilu, kutani hi swona leswi nyamisaka munhu.”—Marka 7:21-23.
9. (a) I ku navela kwihi loku mileke embilwini yo fanekisela? (b) Hi ku ya hi Swivuriso 4:20-23, hi nga yi sirhelela njhani mbilu?
9 Hambi leswi mbilu yi nga xihlovo xa ku navela loko biha, eka vanhu lava chavaka Xikwembu yi tlhela yi va xihlovo xa ku xixima Yehova ni ku rhandza leswi lulameke. (Matewu 22:37; Vaefesa 4:20-24) Hambi ku ta va ni leswinene kumbe leswo biha emhakeni ya hina swi titshege hi leswi hi swi nghenisaka etimbilwini ta hina. Rito ra Xikwembu ra tsundzuxa ri ku: “Ṅwana nga, yingisisa marito ya mina, u šiya timhaka ta mina. Ti nga suki mahlweni ya wena, u ti hlayisa embilwini ya wena; hikuv̌a i v̌utomi e ka hikwav̌o la’v̌a ti kumaka, i ku ṭaka ka mmiri hikwawo wa v̌ona. Hlayisa mbilu ya wena ku tlurisa le’ŝi hlayisiwaka, hikuv̌a i šihlov̌o ša v̌utomi.”—Swivuriso 4:20-23.
10. Ku tsana ka nyama ya hina ku khumba minsusumeto ni ku navela ka hina hi ndlela yihi?
10 Ku tsana ka hina ka le nyameni ku khumba minsusumeto ni ku navela ka hina. I mani loyi hakanyingi a nga karhatiwiki hi ku hela matimba, ku hela mbilu, ku karhateka? Loko hi lulamisa mimboyamelo leyi ya nyama hi ku hatlisa, rihanyo ra moya ri nga hlayisiwa. Kambe ku tikukumuxa ni ku tikurisa ku nga hatla ku mila embilwini. Makwanga ni ku navela mintsako leyi hundzeletiweke ni minkhuvo swi nga sungula. Naswona ku navela ka rimbewu, hambi loko ku ri ka ntumbuluko hikwalaho ka ndlela leyi Xikwembu xi hi endleke ha yona, ku nga hi hambukisa hi ku olova. Ku sivela mavabyi yo tano ya moya leswaku ma nga akeli endzeni ka hina, hi fanele ku hlakulela mihandzu ya moya wa Xikwembu evuton’wini bya hina siku rin’wana ni rin’wana, hi tidyondzisa ku ‘venga leswo biha’ ni ku “namarhela leswinene.”—Varhoma 12:9; Vagalatiya 5:22, 23.
Swihlovo Swa Le Handle Swa Mavabyi Ya Moya
11. (a) I malangutelo ni swiendlo swihi swa misava leswi swi tlulelaka swinene? (b) Hi ku ya hi Yesu, hi le mhakeni yihi laha hi fanelaka ku yisa nyingiso eka timbilu ta hina?
11 Vuvabyi bya moya byi nga ta hi le swihlobyeni swa le handle. Byi nga hi tlulela byi huma eka lava va feke hi tlhelo ra moya. (Vaefesa 2:1-3) Loko hi ri kusuhi swinene na vona, hi nga tekelela malangutelo ni mahanyelo ya vona. Ku va emahlweni hi tlhelo ra swilo swa misava, ku rhandza mali, ku tiphina hi leswi antswaka eka swilo leswi vonakaka ni ku va ni nkarhi lowunene i swilo leswikulu evuton’wini bya vanhu va misava leyi. Kambe ku navela ka swilo swo tano ka tlulela swinene, naswona hambi ku ri ku paluxekanyana eka swona ku nga hi tsanisa emoyeni. Yesu u tsundzuxile a ku: “Tivoneleni leswaku timbilu ta n’wina ti nga tikeriwi hi makolo ni ku pyopya, ni ku vilela hi swa vutomi lebyi, ni leswaku siku rero ri nga mi tshuketi; hikuva, kukotisa xirimbani, ri ta wela hinkwavo lava akeke emisaveni hinkwayo.”—Luka 21:34, 35.
12. Mianakanyo ni tidyondzo leti hoxeke swi nga va khombo eka rihanyo ra moya hi ndlela yihi?
12 Mianakanyo ni tidyondzo leti hoxeke ta misava leyi naswona swi nga hi namarhela. Pawulo u tsundzuxile a ku: “Hikuva nkarhi wa ta, lowu vanhu va nga ta ka va nga amukeli dyondzo leyi nga yona ya xiviri; kambe leswi tindleve ta vona ti hlohlonyaka, va ta tihlengeletela vadyondzisi lava nga ta va dyondzisa leswi va swi tsakelaka. Kutani va ta fularhela ntiyiso kule, va nga ha wu yingisi, va pepetsekela emintsheketweni ya hava.” (2 Timotiya 4:3, 4) Tidyondzo ta mavunwa ti fana ni xilondza lexi pfundzelaka. (2 Timotiya 2:16, 17) Loko xi humelela, xiphemu xa nyama ya wena xa fa hikuva ngati leyi nyikaka vutomi yi siveriwile exiphen’wini xolexo xa miri.
13. Loko vuvabyi bya moya byi nghenile tanihi xilondza lexi pfundzelaka, ku fanele ku endliwa yini?
13 Vona ndlela leyi xilondza lexi pfundzelaka xi hangalakaka hi ku hatlisa ha yona! Ku sivela rifu, dokodela a nga ha boheka ku tsema xiphemu xa miri. Kutani ke, loko ku kanakana, ku vilela kumbe vugwinehi swi xungeta ku ku onha emoyeni, swi balekele hi ku hatlisa! (Ringanisa Matewu 5:29, 30.) Kuma mpfuno eka vakulu va bandlha. U nga fani ni lava Pawulo a va hlamuseleke tanihi lava “[navelaka] ku phikisana ni ku kanetana ehenhla ka marito” hikuva a va ‘twanananga ni marito layo tenga.’—1 Timotiya 6:3, 4.
14. I yini leswi vakulu va nga swi kumaka swi fanela ku swi endla leswaku va sirhelela rihanyo ra moya ra bandlha?
14 Leswaku va sirhelela rihanyo ra moya ra bandlha, vakulu va fanele “ku tiyisa van’wana hi dyondzo leyi nga yona ya xiviri, ni ku komba ku hoxa ka lava lwaka na yona.” (Tito 1:9, 13, 16; 2:1) Kumbexana vanhu vo tano va nga vuyiseriwa exiyin’weni lexi tengeke xa moya. (2 Timotiya 2:23-26) Kambe ku vuriwa yini hi loko va hlohlotela dyondzo ya mavunwa handle ko hundzuka? Kutani ke, entiyisweni ku fanele ku hambaniwa na vona. Va susiwa, kutani hi fambela kule na vona leswaku vuvabyi bya vona bya moya byi nga tluleli eka hina.—Varhoma 16:17, 18; 1 Vakorinto 5:9-13; Tito 3:9-11.
15. Leswaku a ringeta ku tsanisa rihanyo ra moya ra vanhu va Xikwembu, i ku tshinelela kwihi kumbirhi lokukulu loku Diyavulosi a ku tirhiseke?
15 Xihlovo ra vunharhu xa khombo ra ripfumelo ni rihanyo ra moya i Diyavulosi. (Vaefesa 6:11, 12) Eka rona siku ra hina, u ringetile ku tsanisa ripfumelo ra vanhu va Yehova hi nxaniso, ku katsa ni ku hlasela ka ntlawa, ku biwa, ku nghenisiwa emakhotsweni ni minxungeto ya rifu. (Nhlavutelo 2:10) Tanihi leswi Sathana hakanyingi a nga humeleriki hi marhengu lawa leswaku a tshova ku tshembeka ka un’wana wa malandza ya Xikwembu, u tirhisa swikoka-mahlo swa misava leyi, leyi a nga xikwembu xa yona, hi matshalatshala yo endla leswaku van’wana va wa.—2 Vakorinto 4:4; 11:3, 14.
16. I swisirhelelo swihi leswi hi nga na swona eku lwisaneni ni minhlaselo ya Diyavulosi eripfumelweni ra hina ni le rihanyweni ra moya?
16 Xana hi nga lwisana njhani ni minhlaselo ya Diyavulosi? Hi ku havaxela matlhari hinkwawo ya moya lama humaka eka Xikwembu. Ngopfu-ngopfu hi fanele ‘ku teka xitlhangu lexikulu xa ripfumelo, lexi hi nga sivelaka minseve hinkwayo leyi pfurhaka’ leyi Sathana a yi copaka eka hina ha xona. Hi fanele ku tlhela hi khongela hi ku pfumelelana ni marito ya Yesu lama nge: “U nga hi yisi emiringweni, kambe u hi ponisa eka Lowo biha.” (Vaefesa 6:11-18; Matewu 6:13) Loko hi khongela hi ndlela yoleyo ivi hi endla hi ku pfumelelana ni swikhongelo swa hina, hi nga langutela mpfuno wa Tata wa hina wa le tilweni eku siveleni miseve hinkwayo leyi pfurhaka ya Sathana.
Ku Tshama Hi Tengile eRipfumelweni
17. Leswaku hi hlayisa rihanyo ra moya, i swa nkoka ku fika kwihi ku dya “swakudya hi nkarhi wa kona” ni ku hlanganyela nkarhi na nkarhi emintirhweni ya Vukriste?
17 Ku sivela i mhaka leyikulu eku hlayiseni rihanyo lerinene ra miri. Swakudya leswinene, vutiolori lebyi faneleke ni nkhathalelo lowu tolovelekeke wa mianakanyo ni miri i swa nkoka. Swisirhelelo swa ntumbuluko eka mavabyi swi ni matimba emirini wa rihanyo lerinene. Hi ku fanana, leswaku hi hlayisa rihanyo ra moya, i swa nkoka ku landzela swakudya leswi Xikwembu xi swi nyikaka ni ku tlangela ‘swakudya leswi tiyisaka swa moya hi nkarhi wa swona’ leswi lunghiseleriwaka hi “nandza lowo tshembeka, lowa vutlhari.” Leswaku hi ala swakudya swa moya leswi boleke swa misava leyi, hi fanele ku dyondza Bibele ni tibuku ta Vukriste kutani hi hlangana ni vanhu va Xikwembu nkarhi na nkarhi. (Matewu 24:45-47; Vaheveru 10:24, 25) Nakambe hi fanele ku endla vutiolori hi ‘ku va ni swo tala swo swi endla entirhweni wa Hosi hi minkarhi hinkwayo’ evutirhelini ni le mintirhweni yin’wana ya Vukriste.—1 Vakorinto 15:58.
18. I yini “ntila wa marito lama tiyeke,” naswona ha yini hi fanele ku wu hlayisa embilwini ni le mianakanyweni?
18 Leswaku u tshama u tengile eripfumelweni, ma tirhise hi xitalo malunghiselelo ya Xikwembu ya moya. Hi laha Pawulo a byeleke Timotiya ha kona: “Landza ntila wa marito lama tiyeke ya xiviri, lawa u ma tweke eka mina, eku pfumeleni ne rirhandzwini leri nga ka Kriste Yesu. Hlayisa xuma lexinene lexi vekiweke emavokweni ya wena, hi ku pfuniwa hi Moya lowo Kwetsima lowu akeke exikarhi ka hina.” (2 Timotiya 1:13, 14) Ririmi ri ni ntila wa marito. Hi ku fanana, ‘ririmi leri tengeke’ ra ntiyiso wa Bibele ri ni ntila lowu sekeriweke ngopfu-ngopfu eka nhloko-mhaka ya ku hlula ka Yehova hi ku tirhisa Mfumo. (Sofonia 3:9) Hi fanele ku hlayisa ntila lowu wa marito layo tenga embilwini ni le mianakanyweni loko hi ta hlayisa ripfumelo ra hina ni rihanyo ra moya. Handle ka swona, ri ta tsana eka hina. Leswi entiyisweni swi humelerile ebandlheni ra le Korinto, laha van’wana a va ‘tsanile ni ku vabya’ hikwalaho ka leswi a va kayivela ku twisisa ka moya.—1 Vakorinto 11:29-32.
19. (a) Loko mavabyi ya moya ma hi khomile, ku fanele ku endliwa yini? (b) Vakulu va nga endla yini loko munhu a vabya hi tlhelo ra moya?
19 Ku fanele ku endliwa yini loko u khomiwe hi mavabyi ya moya? Ku rhandza mpfuno swa laveka hakunene naswona wu kona, hikuva Yakobo u ri: “Xana ku ni loyi a vabyaka exikarhi ka n’wina? A a vitane vakulukumba va [bandlha] leswaku va ta n’wi khongelela, va n’wi tota mafurha hi vito ra Hosi.” (Yakobo 5:14) Ina, vitana vakulu. Tanihi madokodela ya moya, va nga ku pfuna ku kuma xivangelo xa vuvabyi bya moya. Hi musa kambe hi ndlela leyi humelelaka va ta ku tota mafurha lama horisaka ya Rito ra Xikwembu. Loko u endle swidyoho kambe u hundzukile, tiyiseka leswaku Yehova wa rivalela hakunene. (Psalma 103:8-14) Loko vakulu va khongela na wena ni ku ku khongelela, i yini leswi nga languteriwaka ke? Yakobo wa hlamula a ku: “Xikhongelo lexi endliwaka hi ku pfumela xi ta hanyisa muvabyi; Hosi yi ta n’wi pfuxa emasangwini, kutani loko a ri ni swidyoho leswi a swi endleke, ú ta rivaleriwa swona.”—Yakobo 5:15.
Rihanyo Ra Moya Ri Yisa eVuton’wini Lebyi Nga Heriki
20. (a) I xitsundzuxo xihi lexi huvo leyi fumaka ya lembe xidzana ro sungula yi xi nyikeke ehenhleni ka ku hlayisa rihanyo ra moya? (b) I yini leswi nga ta hi pfuna ku rindzela mikateko ya misava leyintshwa?
20 ‘Vanani ni rihanyo lerinene!’ Hi marito wolawo, huvo leyi fumaka ya lembe xidzana ro sungula ya vanhu va Yehova yi gimete papila ra yona leri boxaka “tifanelo” leti a ti laveka eka Vakriste. A va fanele ku “tshika tinyama leti tlhaveriweke swikwembu swa hava, [va] nga dyi ngati, ni leswi vanhu va swi dlayeke hi ku swi tlimba minkolo, [va] tshika ni vuoswi.” (Mintirho 15:28, 29) Mfungho wolowo wa rihanyo lerinene ra moya wa ha ri wa nkoka. Naswona leswi hi rindzeleke mikateko ya misava leyintshwa, hi nga hlayisa ripfumelo ra hina ni rihanyo ra moya loko hi ku gingiriteka hi hambeta hi chumayela mahungu lamanene ya Mfumo ni ku yimela vito ra Yehova emisaveni leyi yi vabyaka. Ku tshama hi khomekile hi ndlela leyi swi ta hi sivela ku hela mbilu hi mikateko ya misava leyintshwa leyi yi tshineleke swinene. I ntiyiso, “ku langutela loku hlwelaka ka v̌av̌isa timbilu, kambe ku nav̌ela, u v̌uya u ŝi kuma, i muri wa v̌utomi.”—Swivuriso 13:12.
21. I mikateko yihi leyi yi hlayiseriweke lava va hlayisaka ripfumelo ra vona ni rihanyo ra moya emisaveni leyi yi vabyaka hi laha ku humelelaka?
21 U nga kayeli mikateko leyikulu leyi Yehova a yi hlayiseleke lava va n’wi rhandzaka. Ku lwisana hinkwako ni minhlohlotelo ya misava, ku lwisana hinkwako ni ku tsana ka nyama ya wena ni ku sivela hinkwako ka miseve leyi pfurhaka ya Diyavulosi a ku nga vi swilo swa hava. Emisaveni ya Yehova leyintshwa, u ta wu vona hi mahlo ya wena nkarhi lowu “ku nga ta pfumaleka muaki loyi a nga ta ku: ‘Ndza vabya.’” (Esaya 33:24, NW) Leswi swi ta va ntiyiso hikwalaho ka lunghiselelo ra Xikwembu hi ku tirhisa gandzelo ra nkutsulo ra Yesu Kriste, loyi a “[tekeke] mahlomulo ya hina, a tirhwexa ni mavabyi ya hina.” (Matewu 8:17; Esaya 53:4) U ta swi kota ku nwa ‘enambyeni wo fanekisela wa mati ya vutomi’ ivi u dya eka “murhi wa vutomi” lowu nga ni matluka “yo tshungula vanhu va matiko hinkwawo.” (Nhlavutelo 22:1, 2) Vutomi lebyi nga heriki lebyi hetisekeke ni ntsako ku ta va hakelo ya wena yo hlayisa ripfumelo ra wena ni rihanyo ra moya emisaveni leyi yi vabyaka.
Wa Tsundzuka Xana?
◻ Ha yini ku va ni ripfumelo leri hanyeke swi ri swa nkoka swinene ku tlula rihanyo lerinene ra miri?
◻ Hi wahi makhombo manharhu lamakulu lama hlaselaka ripfumelo ni rihanyo ra moya?
◻ I vuxaka byihi lebyi rihanyo lerinene ra moya ri nga na byona ni mbilu yo fanekisela?
◻ Loko munhu a vabya hi tlhelo ra moya, ku fanele ku endliwa yini?
[Swifaniso leswi nga eka tluka 16]
Hambi u ri emisaveni leyi vabyaka, swa koteka ku va ni ripfumelo lero tiya ni rihanyo lerinene ra moya
[Swifaniso leswi nga eka tluka 18]
Rihanyo lerinene ra moya ri titshege entirhweni wa migingiriko wa Vukriste ni ku dya swakudya swa moya hi nkarhi wa kona nkarhi na nkarhi