Xiviko Xa Vahuweleri Va Mfumo

Va Kume Xivangelo Xa Ku Hundzuka

XANA varhangeri va mintlawa ya swigevenga ni vanhu va vukari va nga ma hundzula mahanyelo ya vona? I yini leswi a swi ta va pfuna ku endla tano? Ku hundzuka loku xiyekaka emahanyelweni swa koteka hi laha swi voniwaka ha kona emhakeni ya Sawulo wa Tarso, loyi a hundzukeke eku xaniseni Vakriste a va Mukriste hi byakwe. Endzhaku ka kwalaho u tiviwe tanihi muapostola Pawulo. (Vagalatiya 1:13, 14; 1 Timotiya 1:13) Ku hundzuka loku fanaka loku xiyekaka ka vikiwa eKenya.

◻ Jaha rin’wana a ri ri xirho xa ntlawa lowu hlaselaka wa le xivandleni xa Nairobi naswona ri rhumeriwe evupela-dyambu ka Kenya ku ya lavisisa vutshila bya vukhamba bya le tibankini kwalaho. U rhurheriwe hi mukhalabye un’wana ivi a kuma xiputsa xa timagazini ta khale ta Awake! endlwini ya yena. Jaha leri ri sungule ku tinyiketela swinene eku hlayeni timagazini leti lerova ri rivala hi laha ku heleleke hi makungu ya rona ya vukhamba bya le tibankini. Loko ri hlaye hinkwato, ri kombele tin’wana, naswona mukhalabye u ri byele leswaku tin’wana a ti ri ku teni mavhiki man’wana ni man’wana mambirhi hi poso. Ku sukela kwalaho ku ya emahlweni jaha ri kombele muamukeri wa rona ku ya ehofisini ya poso siku rin’wana ni rin’wana ku ya kamba timagazini leti engetelekeke. Hi nkarhi lowu fanaka, u bohe makungu yo tshika tindlela ta yena leto biha, a landzelela leswi a swi dyondzeke eka timagazini, ni ku va Mbhoni ya Yehova. U tlhele a sungula ku byela vaakelani leswaku a a ri un’wana wa Timbhoni ta Yehova. Endzhakunyana, phayona leri hlawulekeke ri tirhe nsimu naswona ri hlamarile ku kuma jaha leri ri tivulaka Mbhoni. Dyondzo ya Bibele yi sunguriwile na yena, u vupfile, naswona namuntlha i phayona ra nkarhi hinkwawo. Vutivi lebyinene bya Bibele byi n’wi nyike xivangelo xo hundzula vutomi bya yena.

◻ Wanuna un’wana wa le Argentina na yena u kume xivangelo xo hundzula ndlela ya yena ya vutomi ya vukari. Hi malembe ya 20, u khome nsati wa yena loyi a a ri Mbhoni hi ndlela leyo biha swinene. Ku vuriwe leswaku u tlhele a cela khele ejarateni ra yena ri ri na xihambano ehenhla ka rona, hi mianakanyo yo dlaya munhu loyi a a yiva tihuku ta yena ivi a n’wi lahla kwalaho. Hikwalaho ka mahanyelo yo biha ya wanuna loyi, vaakelani hinkwavo va n’wi papalatile.

Mulanguteri wa xifundza u n’wi endzerile. Loko a ri kwalaho, mulanguteri wa xifundza u nyikele wanuna dyondzo ya Bibele naswona u hlamarile loko a vule leswaku a a ta tsakela ku dyondza Bibele. Makwerhu u dyondze broxara leyi nge Tsakela Vutomi eMisaveni hi Masiku! na yena. Wanuna u endle nhluvuko evutivini bya Bibele ni le ku twisiseni ka swilo swa moya. Sweswi u va kona eminhlanganweni hinkwayo. U rhandza minhlangano ni xinghana ni vamakwerhu swinene lerova u te, “Laha hi laha ndzi lavaka ku tshama kona.”

Ku hundzuka eka wanuna loyi a ku hlamarisa swinene lerova vaakelani va vutisa nsati wa yena leswaku i n’anga yihi leyi a yi n’wi tshungula. Loko a hlamusele leswaku ku hundzuka ku humelele hikwalaho ka leswi a a dyondza Bibele na Timbhoni ta Yehova, muakelani un’wana a a khumbekile swinene lerova a kombela Bibele. Muakelani un’wana u endle xikhokhelo xa yin’wana ya timagazini ta hina.

Vutivi lebyinene bya Bibele byi nyike vavanuna lava xivangelo xo hundzula mahanyelo ya vona. Byi nga pfuna un’wana ni un’wana loyi a navelaka vutomi bya nkoka swinene sweswi ni ntshembo wa vutomi lebyi nga heriki emisaveni leyintshwa ya Xikwembu leyi tshembisiweke.—Yohane 17:3.