Vanhu Va Ta Va Ni Rihanyo Lerinene—Ku Nga Ri Khale!
“MHAKA ya leswaku vanhu va nga tshama va nga vabyi . . . yi dumile sweswi,” ku vika magazini wa le Jarimani lowu vuriwaka Focus. Kambe, mhaka leyi a yi sungulanga namuntlha. Loko vanhu va sungula ku va kona, a ku nga ri xikongomelo xa Muvumbi leswaku vanhu va vabya. Xikongomelo xakwe hi vanhu a ku ri “xa leswaku vanhu hinkwavo va va ni rihanyo lerinene emisaveni.” (Xiitaliki i xerhu.) Xikongomelo xa Muvumbi wa hina a ku ri leswaku vanhu hinkwavo va va ni rihanyo leri hetisekeke!
Kutani, ha yini hinkwerhu hi vabya naswona hi khomiwa hi swifo? Bibele yi hi byela leswaku Yehovha Xikwembu u endle vatswari va vanhu hinkwavo, ku nga Adamu na Evha, va hetisekile. Loko xi hetile ntirho wa xona wo tumbuluxa, “Xikwembu xi vona hinkwaswo leswi xi swi endleke, kutani waswivo, a swi ri swinene ngopfu.” A ku nga ri xikongomelo xa Muvumbi wa hina la nga ni rirhandzu leswaku vanhu va vabya kutani va fa. Kambe loko Adamu na Evha va hlawule ku fularhela ndlela ya vutomi leyi va hlamuseriweke yona, va dyohile. Vuyelo bya xidyoho xa Adamu a ku ri rifu, leri a ri hundziseleke eka vanhu hinkwavo.—Genesa 1:31; Varhoma 5:12.
Yehovha a nga va fularhelanga vanhu. Kumbe ku tshika xikongomelo xakwe xo sungula ha vona ni misava. EBibeleni hinkwayo, u hi tivisa xikongomelo xakwe xo tlherisela vanhu lava yingisaka exiyin’weni xa vona xo sungula xa rihanyo lerinene. Loko Yesu Kreste, N’wana wa Xikwembu a ri emisaveni, u kombise matimba ya Xikwembu ya ku tshungula mavabyi. Hi xikombiso, Yesu u tshungule vuvabyi byo fa mahlo, bya nhlokonho, bya ku fa tindleve, bya xirhumberhumbe, bya switshetshela ni bya ku oma swirho.—Matewu 4:23, 24; Luka 5:12, 13; 7:22; 14:1-4; Yohane 9:1-7.
Ku nga ri khale Xikwembu xi ta byela Yesu Kreste, Hosi leyi nga Mesiya, leswaku yi lawula leswi endlekaka eka vanhu emisaveni. Ehansi ka vulawuri byakwe, vuprofeta bya Esaya byi ta hetiseka: “Ku hava munhu la tshamaka kona la nga ta ku: ‘Ndza vabya.’ Vanhu lava tshamaka etikweni rero va ta va va rivaleriwe xidyoho xa vona.” (Esaya 33:24) Xana leswi swi ta endlekisa ku yini?
Hi lemuka leswaku muprofeta loyi u tsala hi vanhu lava ‘rivaleriweke swidyoho swa vona.’ Hikwalaho, nchumu lowu vangeke vuvabyi ro sungula—ku nga xidyoho lexi vanhu va tswariweke na xona—wu ta susiwa. Njhani? Nkoka wa xitlhavelo xa nkutsulo wa Yesu wu ta tirhisiwa eka vanhu lava yingisaka, kutani, wu susa rimitsu ra vuvabyi ni rifu. Misava hinkwayo yi ta va paradeyisi. Yohane, muapostola la nga Mukreste u tsarile: “[Xikwembu] xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.” Sweswo swi ta endleka ku nga ri khale!—Nhlavutelo 21:3, 4; Matewu ndzima 24; 2 Timotiya 3:1-5.
Ku Ringanisela
Sweswi, vanhu va timiliyoni va hanya ni mavabyi ni swifo. Kutani, i swa ntumbuluko leswaku vanhu va karhateka hi rihanyo ra vona ni rihanyo ra vanhu lava va va rhandzaka.
Namuntlha Vakreste va ma tlangela swinene matshalatshala ya vatshunguri. Va endla leswi va nga swi kotaka leswaku va va ni rihanyo lerinene kumbe va tshama va hanye kahle. Kambe, xitshembiso xa Bibele xa vumundzuku lebyi nga riki na vuvabyi xa hi pfuna leswaku hi ringanisela emhakeni leyi. Vanhu a va nge swi koti ku va ni rihanyo lerinene kukondza Hosi leyi nga Mesiya yi lawula misava. Hilaha hi swi voneke hakona, hambi ku ri vutshuburi lebyikulu ngopfu a byi va pfunanga vatshunguri ku endla leswaku vanhu hinkwavo va va ni rihanyo lerinene.
Pakani ya leswaku “vanhu hinkwavo va va ni rihanyo lerinene emisaveni hinkwayo” yi ta fikeleriwa ku nga ri khale. Kambe a yi nge tisiwi hi Nhlangano wa Matiko kumbe hi Nhlengeletano ya Rihanyo ya Misava Hinkwayo kumbe hi vapfuxeleri va timhaka ta vanhu kumbe madokodela. I Yesu Kreste ntsena la nga ta fikelela pakani yoleyo. Mawaku ntsako lowu nga ta va kona loko vanhu va hetelela va “ntshunxiwa evuhlongeni bya ku onhaka kutani [va] va ni ntshunxeko lowu vangamaka wa vana va Xikwembu”!—Varhoma 8:21.
[Swifaniso leswi nga eka tluka 10]
Vanhu hinkwavo va ta va ni rihanyo lerinene emisaveni leyintshwa ya Xikwembu