Ku Hela Ka Mavabyi!

VANHU vo tala va tshemba leswaku a va nge he twi ku vava naswona a va nge he vabyi loko va ya etilweni endzhaku ka rifu. Kambe, ku hambana ni leswi vanhu vo tala va swi kholwaka, ntshembo lowu Bibele yi wu nyikaka vanhu hi ntolovelo i vutomi emisaveni leyi nga paradeyisi. (Pisalema 37:11; 115:16) Vumundzuku lebyi tshembisiweke byi katsa rihanyo lerinene, ntsako ni vutomi lebyi nga heriki.

Ha yini hi vabya hi tlhela hi fa? Naswona swi ta endlekisa ku yini leswaku hi hanya eka misava leyi nga riki na mavabyi? Bibele ya swi hlamula swivutiso sweswo.

◼ Leswi vangaka vuvabyi hakunene Adamu na Evha, vatswari va hina vo sungula va vumbiwe va hetisekile. (Genesa 1:31; Deteronoma 32:4) A va endleriwe ku hanya laha misaveni hilaha ku nga heriki. Va sungule ku hlaseriwa hi mavabyi loko va heta ku xandzukela Xikwembu. (Genesa 3:17-19) Hi ku ala ku lawuriwa hi Xikwembu, va onhe vuxaka bya vona ni Muvumbi wa vona, yena Xihlovo xa vutomi bya vona lebyi hetisekeke. Mimiri ya vona yi sungule ku tsana. Hikwalaho ka sweswo, va sungule ku vabya kutani va fa, hilaha Xikwembu xi va lemukiseke hakona.—Genesa 2:16, 17; 5:5.

Endzhaku ka loko Adamu na Evha va xandzukile, va tlulete vana va vona ku nga hetiseki ka vona. (Varhoma 5:12) Hilaha swi kombisiweke hakona exihlokweni lexi hundzeke, vativi va sayense va swi xiya leswaku ku ni ku nga hetiseki ko karhi loku hi ku kumeke tanihi ndzhaka loku endlaka leswaku hi vabya kutani hi fa. Endzhaku ko endla vulavisisi lebyikulu, ntlawa wa vativi va sayense wa ha ku gimetisa xileswi: “Swi le rivaleni leswaku loko vutomi byi sungula, miri wu namba wu sungula ku tiherisa hakatsongo-tsongo.”

◼ Ku nga ri hi matshalatshala ya vanhu Sayense ya pfuna swinene eku lweni ni mavabyi. Kambe, swilo leswi vangaka mavabyi swi rharhangane ngopfu lerova sayense ya tsandzeka ku swi twisisa kahle. Leswi a swi hlamarisi eka swidyondzi swa Bibele leswi toloveleke marito ya Bibele lama nge: “Mi nga tshembi vanhu va xiyimo xa le henhla, hambi ku ri n’wana wa munhu wa nyama, loyi a tsandzekaka ku ponisa.”—Pisalema 146:3.

Hambiswiritano, hilaha Bibele yi vulaka hakona, “Swilo leswi vanhu va nga swi kotiki Xikwembu xa swi kota.” (Luka 18:27) Yehovha Xikwembu a nga swi kota ku susa leswi vangaka mavabyi. U ta horisa mavabyi ya hina hinkwawo. (Pisalema 103:3) Rito ra yena leri huhuteriweke ra tshembisa: “Waswivo! Ntsonga wa Xikwembu wu le vanhwini, xi ta tshama na vona, naswona vona va ta va vanhu va xona. Xikwembu hi xiviri xi ta va na vona. Kutani xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.”—Nhlavutelo 21:3, 4.

◼ Leswi u faneleke u swi endla Yesu Kreste u swi hlamusele kahle leswi hi faneleke ku swi endla leswaku hi ta hanya emisaveni leyi taka leyi nga riki na mavabyi. U te: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.”—Yohane 17:3.

Vutivi bya Xikwembu ni tidyondzo ta N’wana wa yena Yesu, swi kumeka eBibeleni. Vutivi byolebyo byi katsa ndzayo leyi nga ku pfunaka leswaku u antswisa vutomi bya wena sweswi. Ku tlula kwalaho, Xikwembu xi tshembisa vagandzeri va xona lava yingisaka misava leyi nga hava swiphiqo. Ina, Xikwembu, xi tshembisa leswaku ku ta va ni misava leyi ‘nga hava munhu la tshamaka kona la nga ta ku: “Ndza vabya”’!—Esaya 33:24.

[Bokisi/Swifaniso leswi nga eka tluka 11]

Vonelo Lerinene Hi Rihanyo

Bibele yi khutaza vanhu leswaku va fanele va xixima vutomi. Timbhoni ta Yehovha ti xixima vutomi bya tona hi ku khathalela rihanyo ra tona. Ti papalata swilo leswi nga onhaka rihanyo ra tona swo kota, ku tirhisa swidzidzirisi ni ku dzaha fole. Xikwembu xi lava leswaku vagandzeri va xona va ringanisela eku nweni ka vona ni le ku dyeni. (Swivuriso 23:20; Tito 2:2, 3) Ku hanya hi ndlela leyi ku katsa ni ku tinyika nkarhi lowu ringaneke wo wisa ni ku endla vutiolori, sweswo swi nga sivela mavabyi yo tala. Lava va vabyaka va nga ha lava mpfuno wa madokodela lama tshembekaka.

Bibele yi khutaza ku anakanyela ni ku va ni “mianakanyo yo hluteka.” (Tito 2:12; Vafilipiya 4:5) Vanhu vo tala namuntlha va tsandzeka ku ringanisela kutani va tipeta eku laveni ka vona vutshunguri, hambiloko ku endla tano swi peta vumoya bya vona endzingweni. Van’wana va tirhisa tindlela tin’wana leti nga twisisekiki leti nga va vavisaka. Van’wana va tlanga hi mali va hakela vutshunguri lebyi nga tirhiki kumbe lebyi nga ni khombo.

Ntiyiso hileswaku rihanyo lerinene a ri si kumeka. Loko wa ha yimele nkarhi lowu vuvabyi hinkwabyo byi nga ta herisiwa ha wona, vutlhari ni ku anakanyela leswi kumekaka eBibeleni swi nga ku pfuna ku ringanisela loko u ri karhi u lava vutshunguri lebyinene.