Vanhu Va Lava Rihanyo Lerinene!

EMALEMBENI lama tlulaka 2 700 lama hundzeke, ku ni muprofeta la vulavuleke hi nkarhi lowu taka, lowu mavabyi ma nga taka ma nga ha ri kona. Vuprofeta lebyi byi hlayisiwile ku ta fika enkarhini wa hina naswona byi kumeka eka matsalwa ya khale ya Esaya. U tsale leswaku ku ta va ni nkarhi lowu ku nga taka ku nga ri na “munhu la tshamaka kona la nga ta ku: ‘Ndza vabya,’” naswona u engetele a ku: “Hi nkarhi wolowo mahlo ya lava nga voniki ma ta pfuriwa, ni tindleve ta lava nga twiki ti ta pfuriwa. Hi nkarhi wolowo la khutaka u ta tlula kukota mhunti, ni ririmi ra la nga vulavuriki ri ta huwelela hi ku tsaka.” (Esaya 33:24; 35:5, 6) Byi kona vuprofeta byin’wana eBibeleni lebyi vulavulaka hi mhaka leyi. Hi xikombiso, buku yo hetelela eBibeleni, ku nga Nhlavutelo, yi vulavula hi nkarhi lowu Xikwembu xi nga ta herisa switlhavi ha wona.—Nhlavutelo 21:4.

Xana switshembiso leswi swi ta hetiseka? Xana wu ta kala wu va kona nkarhi lowu ha wona vanhu va nga ta va ni rihanyo lerinene naswona va nga ha vabyi? Phela, namuntlha vanhu vo tala va ni rihanyo ro antswa ku tlula ra switukulwana leswi hundzeke. Kambe ku va ni rihanyo ro antswa a swi vuli leswaku u ni rihanyo lerinene. Vuvabyi bya ha kayakayisa vanhu vo tala. Ku chava ku vabya swi endla leswaku hi tshama hi vilela. Ntiyiso wo vava hi lowu, hambileswi swilo swi hluvukeke masiku lawa, a nga kona la nga hlulaka mavabyi hambi ku ri mavabyi ya miehleketo.

Hakelo Ya Kona

Loko munhu a vabya kumbe a vabyeriwa u tala ku hlangana ni swiyimo swo hambana-hambana swo tika. Xin’wana lexi karhataka vanhu namuntlha i ku durha ka swa vutshunguri. Hi xikombiso, eka rin’wana ra malembe lama ha ku hundzaka, Yuropa ri lahlekeriwe hi kwalomu ka 500 wa timiliyoni ta masiku ya ntirho hikwalaho ka mavabyi. Xiyimo lexi xi tano ni le matikweni man’wana. Ku durha ka swa vutshunguri ni ku khekheleza ka vanhu swi endla leswaku hinkwerhu hi lahlekeriwa hi ndlela yo karhi. Mabindzu ni mfumo swa lahlekeriwa. Leswaku ma langutana ni swiyimo leswi swo tika, mabindzu ma tlakula nxavo wa leswi ma swi xavisaka kasi mfumo wu tlakula xibalo. I mani la hakelaka? A ku na un’wana handle ka wena!

Khombo ra kona, swa tika leswaku swisiwana swi kuma vutshunguri lebyinene, hambiloko byi ri kona. Leri i khombo leri vanhu vo tala ematikweni lama ha hluvukaka va langutanaka na rona, a va na tindhawu ta vutshunguri leti faneleke kumbe a ti kumeki hi ku helela. Hambi ku ri ematikweni lama fuweke, a swi olovi ku kuma vutshunguri lebyinene lebyi nga kona. Hakanyingi lexi i xiyimo lexi vanhu va kwalomu ka 46 wa timiliyoni va le United States lava nga riki na ndzindza-khombo wa vutshunguri va langutanaka na xona.

Vuvabyi a byi hi tikiseli hi tlhelo ra timali ntsena. Nchumu lowu karhataka ngopfu i gome leri hi vaka na rona loko hi ri ni vuvabyi lebyi nga tshungulekiki, maxangu lama hi vaka na wona loko hi vabya nkarhi wo leha, nhlomulo lowu hi vaka na wona loko hi vona van’wana lava vabyaka ngopfu, kumbe gome leri hi vaka na rona loko hi loveriwa hi munhu loyi hi n’wi rhandzaka.

Swa tsakisa hakunene ku tiva leswaku ku nga ri khale vuvabyi byi ta hela. Vanhu hinkwavo va lava rihanyo lerinene! Vo tala va tshemba leswaku leswi swi ta endleka, hambileswi swi twakalaka onge i norho. Ku ni van’wana lava tshembaka leswaku hi ku famba ka nkarhi, thekinoloji ya vanhu yi ta herisa mavabyi hinkwawo. Hi hala tlhelo, ku ni lava tshembaka leswaku Xikwembu xi ta endla leswaku byi hetiseka vuprofeta bya xona lebyi tshembisaka leswaku vuvabyi a byi nge he vi kona. Xana munhu u ta swi kota ku heta mavabyi? Xikwembu xona ke? Xana vumundzuku byi ta va njhani?