Ku Cinca Loku Tsakisaka Eka Xihondzo xo Rindza!

¹ Eku sunguleni ka lembe leri, mavandlha ma kume xitiviso lexi tsakisaka xa leswaku: Ku sukela eka nkandziyiso wa January 2008, Xihondzo xo Rindza xi ta va ni minkandziyiso yimbirhi leyi hambaneke, wun’we wu ta va wa vanhu hinkwavo, lowun’wana wu ta va wu ri wa vamakwerhu lava nga Vakreste! Kumbexana u le ku tivutiseni leswi: ‘Xana timagazini letimbirhi ti ta va ti hambane njhani? Swi pfuna hi ndlela yihi ku va ni minkandziyiso yimbirhi leyi nga faniki? Xana ku ni swo karhi leswintshwa leswi hi nga swi langutelaka?’

² Ku Hambana Ka Kona: Nkandziyiso lowu humaka hi ti-1 ta n’hweti, wu ta tiviwa tanihi nkandziyiso wa vanhu hinkwavo. Swihloko swa wona hinkwaswo swi ta va swi tsaleriwe vanhu lava nga riki Timbhoni. Nkandziyiso wa ti-15 ta n’hweti wu ta tiviwa tanihi nkandziyiso wa swihloko leswi dyondziwaka evandlheni naswona a wu nge fambisiwi ensin’wini. Wu ta va ni swihloko leswi nga ta dyondziwa n’hweti hinkwayo ni swihloko swin’wana leswi fanelaka malandza ya Yehovha lama tinyiketeleke. Nkandziyiso wa vanhu hinkwavo wa Xihondzo xo Rindza a wu nge tsakisi Timbhoni ntsena kambe wu ta va tsakisa swinene ni lava nga riki Timbhoni lava va nga ha tsakelaka rungula ra Bibele. Kasi Xalamuka! yi ta hambeta yi vulavula hi rungula leri tsakisaka eka vanhu hinkwavo, ku katsa ni lava kanakanaka ntiyiso ni lava tivulaka leswaku a hi va vukhongeri bya Vukreste.

³ Mpfuno Wa Kona: Eka nkandziyiso lowu dyondziwaka evandlheni a swi nge he bohi ku hlamusela marito yo fana ni leri nge “phayona” leswaku vanhu lava nga riki Timbhoni va ma twisisa. Nkandziyiso lowu wu ta tamela ni rungula leri lunghiseleriweke Timbhoni ta Yehovha swin’we ni swichudeni swa Bibele leswi endlaka nhluvuko hi tlhelo ra moya. Xana nkandziyiso wa vanhu hinkwavo wu ta va wu tamele yini? Tanihi leswi rungula ra wona ni ndlela leyi ri tsariweke ha yona yi nga ta olovela vanhu hinkwavo, lava nga riki Timbhoni va ta tsakela ku hlaya magazini hinkwawo. Entiyisweni, un’wana ni un’wana la nga Mbhoni ya Yehovha u ta vuyeriwa hi ku hlaya nkandziyiso wa vanhu hinkwavo ni lowu nga ta dyondziwa eminhlanganweni. Leswi n’hweti ni n’hweti hi nga ta fambisa Xihondzo xo Rindza xin’we ni Xalamuka! yin’we ntsena, hi ta va hi ri ni nkarhi lowu ringaneke exikarhi ka n’hweti leswaku hi antswisa swingheniso swa hina.

⁴ Swihloko Leswintshwa: Ku hleriwe swihloko swin’wana leswintshwa swa magazini wa Xihondzo xo Rindza lowu nga ta hlayiwa hi vanhu hinkwavo. Xin’wana xi ta hlamusela tidyondzo ta xisekelo ta Matsalwa hi ndlela yo olova. Xin’wana xi ta kombisa ndlela leyi Bibele yi nga yi pfunaka ha yona mindyangu. Ku ta va ni rungula ro dyondzisa vana Bibele. Nkandziyiso ha wun’we wu ta va ni xihloko lexi kandziyisaka tindzima to karhi ta Bibele leti hi dyondzisaka hi timfanelo ta Yehovha.

⁵ Hi khongelela leswaku Yehovha a katekisa lunghiselelo leri lerintshwa ra Xihondzo xo Rindza. Onge magazini lowu swin’we ni wa Xalamuka! yi nga kumiwa hi vanhu vo tala lava faneriwaka hi mahungu lamanene.—Mat. 10:11.