◼ Minkarhi Ya Nongonoko: Vuyimbeleri lebyi tlangiwaka loko nongonoko wu nga si sungula byi ta sungula hi 9:00 nimixo masiku hamanharhu. Hinkwerhu hi fanele hi tshamiseka hi nkarhi wolowo leswaku nongonoko wu ta sungula hi ndlela leyi xiximekaka ni leyi hlelekeke. Risimu ro hetelela ni xikhongelo xo pfala swi ta va hi 4:25 nindzhenga hi Ravuntlhanu ni hi Mugqivela kasi hi Sonto swi ta va hi 3:20 nindzhenga.
◼ Mintsombano Ya Matiko: Etindhawini tin’wana ku ta va ni mintsombano ya matiko. Tsundzuka leswaku hofisi ya rhavi yi rhambe mavandlha yo karhi ni vapfhumba lava humaka ematikweni man’wana endzhaku ko kambisisa hi vukheta nhlayo ya switulu leswi nga ta laveka, ndhawu yo paka timovha eka yona ni makamara ya le hotela lama nga ta va kona. Loko vahuweleri va ya entsombanweni wa matiko lowu va nga rhambiwangiki eka wona ku nga ha va ni ku tlimbana ka vanhu. Loko swiyimo swi ku boha ku ya entsombanweni wun’wana ematshan’weni ya lowu u averiweke eka wona, a wu fanelanga u hlawula ku ya entsombanweni wa matiko.
◼ Ndhawu Yo Paka Timovha: Etindhawini hinkwato leti mintsombano yi nga ta khomeriwa eka tona laha hi pfumeleriweke ku lawula ndhawu leyi timovha ti pakaka eka yona, ku ta va ni ndhawu yo paka timovha ya mahala naswona swi ta ya hileswaku i mani loyi a rhangeke a fika. Leswi hakanyingi ndhawu yo paka yi nga yitsongo, swa antswa leswaku lava fambaka hi timovha va khandziyisa ni van’wana loko swi koteka leswaku ku nga tali timovha.
◼ Byetlelo: Vahuweleri lava lavaka byetlelo va nga tata tifomo leti vuriwaka Special Needs Room Request (CO-5a). Komiti ya Ntirho ya Vandlha yi fanele yi kambisisa timfanelo ta muhuweleri yi tirhisa swiletelo leswi kumekaka eka fomo yoleyo ni papila ra December 14, 2010, leri tsaleriweke tihuvo hinkwato ta vakulu. Lunghiselelo leri i ra vahuweleri lava nga exiyin’weni lexinene swin’we ni vana va vona lava nga ni mahanyelo lamanene ntsena.
◼ Ku Vekela Van’wana Ndhawu Yo Tshama: Loko tinyangwa ta ndhawu leyi ntsombano wu nga ta va wu khomeriwe eka yona ti pfuriwa mixo wun’wana ni wun’wana, hi kombela leswaku mi nga tsutsumeli ku ya hlawula ndhawu leyi mi yi rhandzaka onge hi loko mi phikizana ni vanhu lavan’wana lava teke entsombanweni. Moya wa ku rhangisa swilaveko swa van’wana lowu hi susumetelaka ku lava leswaku van’wana va kuma leswinene hi wona wu hi hlawulaka tanihi Vakreste va ntiyiso naswona wu susumetela lava hi hlaleleke leswaku va dzunisa Xikwembu. (Yoh. 13:34, 35; 1 Kor. 13:4, 5; 1 Pet. 2:12) Ndhawu yo tshama yi nga vekeriwa ntsena lava u tshamaka na vona ekaya kumbe lava u fambaka na vona hi movha kumbe swichudeni leswi u dyondzaka na swona Bibele. Vadyuhari ni lava vabyaka va vekeriwe switulu swa vona. Leswi switulu swoleswo swi nga talangiki, munhu un’we kumbe vambirhi lava pfunaka mudyuhari kumbe la vabyaka va nga tshama na yena.
◼ Swakudya Swa Ninhlikanhi: Hi kombela mi ta ni swakudya ematshan’weni yo suka endhawini leyi ntsombano wu khomeriweke eka yona leswaku mi ya xava swakudya hi nkarhi wo wisa. Mi nga ha tirhisa nkwama lowutsongo wo titimerisa swilo lowu nga nghenaka ehansi ka xitulu. Minkwama leyikulu yo titimerisa swilo yi fanele yi vekiwa laha varindzi va nga ta kongomisa leswaku yi vekiwa kona. Swibya leswi fayekaka ni swakunwa swa xihoko a swi pfumeleriwi endhawini leyi ntsombano wu khomeriweke eka yona.
◼ Minyikelo: Hi nga kombisa leswaku ha ma tlangela malunghiselelo ya ntsombano hi ku nyikela hi ku tirhandzela eka ntirho wa misava hinkwayo entsombanweni. Loko u nyikela hi cheke u fanele u yi kongomisa eka “Christian Congregation of Jehovah’s Witnesses of South Africa.” Emintsombanweni yo hlayanyana minyikelo yi nga endliwa hi ku tirhisa khadi ra le bangi kumbe ra xikweleti.
◼ Vutshunguri: Loko u tirhisa vutshunguri byo karhi, hi kombela leswaku u ta na byona tanihi leswi entsombanweni ku nga ta va ku nga ri na vutshunguri. Vanhu lava nga ni vuvabyi bya chukela lava tirhisaka tineleta, va fanele va ti cukumeta endhawini leyi faneleke tanihi thyaka leri nga ni khombo loko va heta ku ti tirhisa, ku nga ri endhawini yo lahla thyaka laha ntsombano wu khomeriweke kona kumbe ehotela.
◼ Switsundzuxo Swa Vuhlayiseki: Hi kombela leswaku mi tivonela swinene eka timhangu leti nga ha vaka kona leti nga vangiwaka hi ku rheta ni ku phijeka. Lembe ni lembe vanhu va vaviseka hikwalaho ka tintangu, ngopfu-ngopfu leti nga ni swirhendze swo tlakuka swinene. I swinene ku hlawula tintangu letinene, leti ku ringanaka kahle leti nga ta endla leswaku u kota ku famba kahle etindhawini leti voyameke, eswitepisini, etindhawini leti nga ni tinsimbi hala hansi ni le ka tin’wana to fana ni teto.
◼ Tipureme Ta Vana Ni Switulu Leswi Rhwalekaka: A swi fanelanga swi nghenisiwa eholweni ya ntsombano. Hambiswiritano, switulu swa vana swi nga pfumeleriwa ntsena loko swi ta va swi hlayisekile naswona swi vekiwe ekusuhi ni vatswari.
◼ Tiphefumu: Mintsombano yo tala yi khomeriwa etindhawini leti pfalekeke, laha moya wu kumekaka hi ku tirhisa michini ya moya. Hikwalaho, hi ta va hi kombisa rirhandzu loko hi nga ti cheli ngopfu tiphefumu leti nun’hwelaka ngopfu ni leti nga nun’hweliki ngopfu kumbe hi nga ti cheli hi ku helela hikuva ti nga ha endla leswaku van’wana swi va tikela ku hefemula kahle.—1 Kor. 10:24.
◼ Tifomo Leti Nge Please Follow Up (S-43): Tifomo leti ti fanele ti tirhisiwa ku tsala rungula ra munhu wihi na wihi la tsakelaka, loyi u n’wi kumeke loko u chumayela hi xitshuketa hi nkarhi wa ntsombano. Tifomo leti tatiweke ti fanele ti yisiwa eka Ndzawulo ya Tibuku kumbe u ti nyika matsalana wa vandlha ra n’wina loko u vuya entsombanweni.
◼ Tirhesiturente: Xixima vito ra Yehovha hi ku tikhoma hi ndlela leyinene loko u ri etirhesiturente. Ambala hi ndlela leyi kombisaka leswaku u Mukreste. Nkhensa vatirhi hi mali yo karhi loko swi tolovelekile endhawini yoleyo.
◼ Ntirho Wa Ku Tirhandzela: Munhu un’wana ni un’wana la tsakelaka ku pfuna u fanele a tivisa Ndzawulo ya Ntirho wa ku Tirhandzela entsombanweni. Vana lava nga ehansi ka malembe ya 16 va nga tirha ni vatswari va vona kumbe muhlayisi kumbe munhu un’wana lonkulu loyi a komberiweke ku endla tano hi vatswari kumbe muhlayisi wa vona.