Switsundzuxo Swa Nhlengeletano Ya Xifundzha
Minkarhi Ya Nongonoko: Tinyangwa ti ta pfuriwa kwalomu ka 7:00 nimixo. Vuyimbeleri lebyi tlangiwaka loko nongonoko wu nga si sungula byi ta sungula hi 9:00 nimixo masiku hamanharhu. Hinkwerhu hi fanele hi tshamiseka hi nkarhi wolowo leswaku nongonoko wu ta sungula hi ndlela leyi xiximekaka ni leyi hlelekeke. Risimu ro hetelela ni xikhongelo xo pfala swi ta va hi 4:35 nindzhenga hi Ravuntlhanu ni hi Mugqivela kasi hi Sonto swi ta va hi 3:25 nindzhenga.
‘Dzunisa Yehovha Hi Risimu’: Vanhu va Xikwembu va le minkarhini ya khale va dzunise Yehovha hi risimu naswona vuyimbeleri bya ha ri bya nkoka evugandzerini bya ntiyiso namuntlha. (Ps. 28:7) Loko xiyenge xin’wana ni xin’wana xa nhlengeletano ya hina ya xifundzha xi nga si sungula ku tlangiwa vuyimbeleri. Vuyimbeleri lebyi hi fanele hi byi tekela enhlokweni hikuva byi lunghiseleriwe leswaku hi dyondza hi Yehovha hi tlhela hi n’wi dzunisa. Xisweswo, loko mutshamaxitulu a tivisa leswaku vuyimbeleri se byi ta sungula, hi fanele hi tshamiseka kutani hi yingiserisisa vuyimbeleri byebyo. Loko hi endla tano hi ta va hi kombisa leswaku hi ma teka ma ri ya nkoka matshalatshala lama endliweke hi ntlawa wa vayimbeleri va Watchtower lava tirhisaka swichayachayana. Vamakwerhu volavo va hlangana le Patterson, eNew York kambirhi hi lembe, leswaku va ta chaya vuyimbeleri lebyi tsakisaka leswaku hi tiphina hi byona naswona loko va ya kona va tihakelela. Endzhaku ko yingisela vuyimbeleri byebyo hi vukheta, un’wana ni un’wana wa hina u fanele a hlanganyela eku dzuniseni ka Yehovha hi ku yimbelela tinsimu ta hina ta Mfumo.
Ndhawu Yo Paka Timovha: Etindhawini hinkwato leti tinhlengeletano ta xifundzha ti nga ta khomeriwa eka tona laha hi pfumeleriweke ku lawula ndhawu leyi timovha ti pakaka eka yona, ku ta va ni ndhawu yo paka timovha ya mahala naswona swi ta ya hileswaku i mani loyi a rhangeke a fika. Leswi hakanyingi ndhawu yo paka yi nga yitsongo, swa antswa leswaku lava fambaka hi timovha va khandziyisa ni van’wana loko swi koteka leswaku ku nga tali timovha.
Ku Vekela Van’wana Ndhawu Yo Tshama: Loko tinyangwa ta ndhawu ya nhlengeletano ti pfuriwa mixo wun’wana ni wun’wana, hi kombela leswaku mi nga tsutsumeli ku ya hlawula ndhawu leyi mi yi rhandzaka onge hi loko mi phikizana ni vanhu lavan’wana lava teke enhlengeletanweni. Hi kombela leswaku mi anakanyela van’wana, mi nga ha tshama ni le tindhawini leti a mi nga ta swi tsakela ku tshama eka tona leswaku mi siyela vamakwerhu ndhawu. Moya wo anakanyela van’wana wu kombisa leswaku hi Vakreste va ntiyiso naswona wu susumetela lava hi hlaleleke leswaku va dzunisa Xikwembu. (Yoh. 13:34, 35; 1 Kor. 13:5; 1 Pet. 2:12) Ndhawu yo tshama yi nga vekeriwa ntsena lava u fambaka na vona hi movha, lava u tshamaka na vona ekaya kumbe lava u dyondzaka na vona Bibele. Hi kombela leswaku mi nga veki swilo eswitulwini leswi nga ekusuhi na n’wina. Leswi swi ta pfuna van’wana ku vona leswaku switulu sweswo a swi na vanhu. Vadyuhari ni lava vabyaka va vekeriwe switulu swa vona. Leswi switulu swoleswo swi nga talangiki, munhu un’we kumbe vambirhi lava pfunaka mudyuhari kumbe munhu la vabyaka va nga tshama na yena.
Maambalelo Lamanene: Ndlela leyi hi ambalaka ha yona hi nkarhi wa nhlengeletano ya xifundzha yi fanele yi va leyi fanelekaka, ku nga vi switayele leswi hundzeletiweke leswi tolovelekeke emisaveni. (1 Tim. 2:9) Loko hi fika ehotela niloko se hi famba niloko se hi tiwiserile kwalaho hi fanele hi va hi ambale hi ndlela leyi xiximekaka. Sweswo swi ta endla leswaku hi nga chavi ku vehela tibeji ta hina ta nhlengeletano naswona a hi nge vi na tingana to chumayela loko hi pfulekeriwa hi nkarhi. Loko hi ambala kahle ni ku tikhoma hi ndlela leyinene loko hi ri enhlengeletanweni leyi taka, sweswo swi ta koka vanhu va timbilu letinene leswaku va yingisela rungula ra Bibele leri ponisaka vutomi naswona swi ta tsakisa Yehovha.—Sof. 3:17.
Ku Kombisa Mahanyelo Lamanene Loko Hi Tirhisa Switirhisiwa Swa Elektroniki: Loko hi nga kavanyeti van’wana hi tiselfoni kumbe switirhisiwa swin’wana swa elektroniki hi nkarhi wa nongonoko hi va hi kombisa mahanyelo lamanene. Loko hi tirhisa khamera, muchini wo rhekhoda tivhidiyo, tablet kumbe switirhisiwa swin’wana swo fana ni sweswo, hi fanele hi anakanyela van’wana hi ku ka hi nga va kavanyeti kumbe ku va sirha. Nakambe hi va hi kombisa mahanyelo lamanene hi ku va hi nga rhumelani marungula hi nkarhi wa nongonoko ku nga ri na xivangelo.
Swakudya Swa Ninhlikanhi: Hi kombela mi ta ni swakudya ematshan’weni yo suka endhawini leyi nhlengeletano yi khomeriweke eka yona leswaku mi ya xava swakudya hi nkarhi wo wisa. Mi nga ha tirhisa nkwama lowutsongo wo titimerisa swilo lowu nga nghenaka ehansi ka xitulu. Minkwama leyikulu yo titimerisa swilo ni swibya leswi fayekaka a swi pfumeleriwi endhawini leyi nhlengeletano yi khomeriweke eka yona.
Minyikelo: Hi nga kombisa leswaku ha ma tlangela malunghiselelo ya nhlengeletano hi ku nyikela hi ku tirhandzela eka ntirho wa misava hinkwayo enhlengeletanweni. Loko u nyikela hi cheke u fanele u yi kongomisa eka “Christian Congregation of Jehovah’s Witnesses of South Africa.” Ku nga tlhela ku nyikeriwa hi ku tirhisa khadi ra le bangi kumbe ra xikweleti.
Vutshunguri: Loko u tirhisa vutshunguri byo karhi, hi kombela leswaku u ta na byona tanihi leswi enhlengeletanweni ku nga ta va ku nga ri na vutshunguri. Tineleta leti tirhisiwaka hi vanhu lava nga ni vuvabyi bya chukela a ti fanelanga ti cukumetiwa endhawini yo lahla thyaka laha nhlengeletano yi khomeriweke kona kumbe ehotela, ti fanele ti cukumetiwa endhawini leyi faneleke.
Switsundzuxo Swa Vuhlayiseki: Hi kombela leswaku mi tivonela swinene eka timhangu leti nga ha vaka kona leti nga vangiwaka hi ku rheta ni ku phijeka. Lembe ni lembe vanhu va vaviseka hikwalaho ka tintangu, ngopfungopfu leti nga ni swirhendze swo tlakuka swinene. I swinene ku hlawula tintangu letinene, leti ku ringanaka kahle leti nga ta endla leswaku u kota ku famba kahle etindhawini leti voyameke, eswitepisini ni le tindhawini tin’wana to fana ni teto.
Tipureme Ta Vana Ni Switulu Leswi Rhwalekaka: A swi fanelanga swi nghenisiwa eholweni ya nhlengeletano. Hambiswiritano, switulu swa vana swi nga pfumeleriwa ntsena loko swo boheleriwa exitulwini lexi nga ekusuhi ni xa vatswari va vona.
Tiphefumu: Tinhlengeletano tin’wana ti khomeriwa etindhawini leti pfalekeke, laha ku tirhisiwaka michini yo nghenisa moya. Hikwalaho, hi ta va hi kombisa rirhandzu loko hi nga ti cheli ngopfu tiphefumu kumbe hi nga ti cheli hi ku helela hikuva ti nga ha endla leswaku van’wana va tikeriwa hi ku hefemula.—1 Kor. 10:24.
Tirhesiturente: Xixima vito ra Yehovha hi ku tikhoma hi ndlela leyinene loko u ri etirhesiturente. Ambala hi ndlela leyi kombisaka leswaku u Mukreste. Nkhensa vatirhi hi mali yo karhi loko swi tolovelekile endhawini yoleyo.
Byetlelo: Loko u kunguhata ku etlela ehotela kumbe etindhawini tin’wana leti hakeleriwaka, hi kombela u xiya leswi landzelaka:
U nga buki makamara yo tala ku tlula lawa u nga ma tirhisaka, naswona a swi pfumeleriwi ku etlela mi tele ku tlula nhlayo leyi lavekaka eka kamara ha rin’we.
Loko u bukile u nga khanseli handle loko ku va ni mhaka yo karhi ya xihatla, naswona loko swi ri tano hatla u tivisa vini va ndhawu leyi u bukeke eka yona kumbe Ndzawulo ya Byetlelo leswaku loko ku ri ni van’wana lava lavaka ndhawu va ta nyikiwa yona. (Mat. 5:37)
Hi kombela u xiya leswaku loko u tirhisa khadi ra le bangi kumbe ra xikweleti loko u buka ndhawu yo etlela, tindhawu tin’wana swi nga endleka ti khoma mali yo karhi eka akhawunti ya wena leswaku yi ta hakelela leswi u nga ha tshukaka u swi onha loko u ri kwalaho. Mali yoleyo u ta yi kuma endzhaku ka masiku ma nga ri mangani loko ku tiyisekisiwile leswaku a ku na swo karhi leswi onhakeke ekamareni leri a wu tshama eka rona.
Loko swi tolovelekile etikweni ra ka n’wina, nyika vatirhi va le hotela lava ku rhwalelaka mindzhwalo ku katsa ni lava va ku basiselaka kamara, mali yo va khensa.
Sweka endhawini leyi swi pfumeleriweke ku swekela eka yona ntsena.
Loko ku ri ni swakudya swa nimixo, kofi kumbe tiayisi leti nyikiwaka vaendzi lava tshamaka eka ndhawu yoleyo, a swi fanelanga swi tirhisiwa hi ndlela ya futa.
Kombisa timfanelo ta moya minkarhi hinkwayo loko u tirhisana ni vatirhi va le ndhawini leyi u etlelaka eka yona. Va fanele va pfuna vaendzi vo tala swinene hikwalaho va tsaka swinene loko hi ri ni musa, hi va lehisela mbilu hi tlhela hi va anakanyela.
Minkarhi hinkwayo vatswari va fanele va tiyiseka leswaku vana va vona a va tlangeli laha va nga fanelangiki va tlanga kona ku fana ni le ka tikhexe (elevators), damu ro hlambela eka rona, laha vaendzi van’wana va rindzaka kona, ndhawu yo endla vutiolori ni tindhawu tin’wana.
Loko ku tshuka ku va ni xiphiqo endhawini leyi u etlelaka eka yona, tivisa va Ndzawulo ya Byetlelo loko wa ha ri endhawini leyi ku khomeriwaka nhlengeletano eka yona leswaku va ta ku pfuna.
Ntirho Wa Ku Tirhandzela: Munhu un’wana ni un’wana la tsakelaka ku pfuna u fanele a tivisa Ndzawulo ya Ntirho wa ku Tirhandzela enhlengeletanweni. Vana lava nga ehansi ka malembe ya 16 va nga tirha ni vatswari va vona kumbe muhlayisi wa vona kumbe munhu un’wana lonkulu loyi a komberiweke ku endla tano hi vatswari va vona kumbe muhlayisi wa vona.