Mintsombano Ya Muganga—Nkarhi Wo Gandzela Hi Ntsako
1 Yosefa, Mariya, vana va vona swin’we ni vanhu van’wana, nkarhi na nkarhi a va ya eYerusalema leswaku va va kona eka minkhuvo ya lembe ni lembe. Loko va ri kwalaho, vona ni vagandzeri-kulobye a va rivala hi swiphiqo swa vona swa siku ni siku kutani va dzikisa mianakanyo ya vona eka swilo swa nkoka evuton’wini bya vona, ku nga swilo swa moya. Minkhuvo yoleyo a yi va nyika nkarhi wo anakanyisisa ni ku vulavula hi vunene bya Yehovha swin’we ni ku kambisisa Nawu wakwe. Mintsombano ya hina ya muganga leyi nga kwala nyongeni yi ta hi nyika nkarhi wo endla leswi fanaka, ku nga nkarhi wo gandzela Yehovha hi ntsako.
2 Tilunghiselele: Ndyangu wa ka va Yesu a wu fanele wu famba tikhilomitara ta kwalomu ka 200 ku ya ni ku vuya eNazareta. Hambileswi hi nga swi tiviki leswaku Yesu a a ri ni tindzisana tingani, hi nga swi vona leswaku Yosefa na Mariya a va fanele va ri lunghiselela riendzo leri. Xana na wena se u ma endlile malunghiselelo ya leswaku u va kona masiku hamanharhu entsombanweni wa muganga lowu se wu nga kwala nyongeni? Leswi swi nga ha katsa ku kombela masiku yo xwa entirhweni, ku vulavula ni muthori wa wena kumbe ku kombelela n’wana wa wena exikolweni. Loko ku ri leswaku u ta tshama ehotela, xana se u bukile? Xana u nga teka goza ro pfuna un’wana evandlheni leswaku a va kona entsombanweni?—1 Yoh. 3:17, 18.
3 Xinakulobye Lexi Akaka: Hakunene minkhuvo ya Vayuda a yi va nyika nkarhi wo tiphina hi xinakulobye lexi akaka ni vagandzeri-kulobye! Swi le rivaleni leswaku ndyangu wa ka va Yesu a wu swi langutele hi mahlo-ngati ku tlhela wu hlangana ni vanghana va wona lava a wu va hetelele khale. A wu tlhela wu kuma nkarhi wo endla vanghana exikarhi ka mintshungu yoleyo ya Vayuda ni vaproselita lava a va va kona emintsombanweni kumbe lava a wu hlangana na vona loko wu ya kumbe loko wu vuya eYerusalema.
4 Xivangelo xin’wana lexi endlaka leswaku hlonga ro tshembeka ni ro tlhariha ri endla malunghiselelo yo hi hlanganisa ndhawu yin’we leswaku hi ta yingisela tinkulumo emintsombanweni ya muganga ematshan’weni yo hi nyika rungula rero ri tsariwe ehansi, hileswaku hi khutazana. (Hev. 10:24, 25) Hikokwalaho, endla malunghiselelo yo fika hi nkarhi siku rin’wana ni rin’wana leswaku u ta tiphina hi xinakulobye ni van’wana loko mutshama-xitulu a nga si vula leswaku se ku ta tlanga vuyimbeleri lebyi sungulaka nongonoko lebyi hi tsundzuxaka leswaku hi tshama ehansi. Ematshan’weni yo siya xivandla xa ntsombano leswaku hi ya xava swakudya hi nkarhi wo wisa, hi khutaziwa ku titela na swona leswaku hi ta kota ku tivana ni lava hi tshameke ekusuhi na vona. Vamakwerhu va hina lava nga Vakreste naswona va nga ni vun’we i nyiko leyi humaka eka Yehovha leyi hi faneleke hi yi tlangela swinene.—Mik. 2:12.
5 Nkarhi Wo Dyondza: Loko Yesu a ha ritsongo, ku va kona ka yena eminkhubyeni a swi n’wi pfuna leswaku a dyondza hi Tata wakwe wa le tilweni. (Luka 2:41-49) I yini leswi nga ta pfuna hina swin’we ni mindyangu ya hina leswaku hi vuyeriwa hi xitalo eka leswi hi nga ta swi dyondza? Hi nkarhi wa xiyimiso, tshamiseka naswona papalata ku vulavula loko swi nga fanelanga. Tiyiseka leswaku selfoni ya wena, xiciyoti kumbe xitirhisiwa xin’wana xo fana na swona a xi ku kavanyeti kumbe ku kavanyeta van’wana. Languta xivulavuri u tlhela u tsala tinhla. Tshamani swin’we tanihi ndyangu, leswi swi ta pfuna vatswari ku vona loko vana va vona va yingisela. Nimadyambu tinyikeni nkarhi wo bula hi tinhla leti mi tiphineke ha tona.
6 Maambalelo Ni Ku Tilunghisa: Van’wamabindzu lava humaka ematikweni mambe lava a va famba egondzweni a swi va olovela ku vona ndyangu wa ka va Yesu ni vagandzeri van’wana va Vayuda lava a va ya ni ku vuya eminkhubyeni hikwalaho ka madziva emakumu ka tinguvu ta vona swin’we ni ngoti ya wasi emakumu ka dziva. (Tinhl. 15:37-41) Hambileswi hina Vakreste hi nga ambaliki swiambalo swo hlawuleka, hi tiveka hi ku ambala hi ndlela leyi xiximekaka, leyi hlelekeke ni leyi baseke. Hi fanele hi yi tekela enhlokweni ndlela leyi hi langutekaka ha yona loko hi ya ni loko hi vuya entsombanweni ni loko hi ri endhawini leyi ntsombano wu khomeriweke eka yona. Hambiloko swi ta lava leswaku hi cinca swiambalo endzhaku ka xiyimiso, hi fanele hi ambala hi ndlela leyi xiximekaka naswona hi vehela tibeji ta hina. Hi ndlela yoleyo, hi ta va hi hambanile ni vanhu lava nga riki Timbhoni naswona hi ta koka vanhu lava hi hlanganaka na vona rinoko.
7 Vatirhi Va Ku Tirhandzela: Ku laveka vatirhi vo tala va ku tirhandzela leswaku ntsombano wu ta famba kahle. Xana u nga pfuneta? (Ps. 110:3) Ntirho lowu endliwaka emintsombanweni i xiphemu xa ntirho wo kwetsima naswona wu nyikela vumbhoni lebyinene. Mininjhere wa ndhawu yin’wana leyi ntsombano a wu khomeriwe eka yona u tsakisiwe hi ndlela leyi vatirhi va ku tirhandzela va nga yi basisa ha yona miako yoleyo lerova a tsala a ku: “A ndzi si tshama ndzi vona nhlengeletano yo fana ni leyi mi nga va na yona. I khale ndzi swi twa leswaku i mukhuva wa Timbhoni ta Yehovha ku siya ndhawu yi base ku tlula ndlela leyi ti nga yi kuma yi ri xiswona. N’wina swin’we ni nhlengeletano ya n’wina mi endle leswaku vaaki va yi rhandza ndhawu leyi naswona leswi mi swi endle ni ntlawa wa vanhu lava hi nga kumangiki nkarhi wo va hi hlangana na vona.”
8 Nkarhi Wo Chumayela: Vanhu vo tala lava tshamaka endhawini leyi ntsombano wu khomeriweke eka yona va ta xiya ndlela leyi hi ambaleke ni ku tilunghisa ha yona swin’we ni tibeji leti hi ti veheleke. Leswi swi nga ha endla leswaku va hi vutisa swo karhi kutani hi pfulekeriwa hi nkarhi wo va byela hi ntsombano. Endzhaku ka xiyimiso, xifanyetana xa malembe ya mune xi ye ekhefini ni nkandziyiso wa xona lowu a wa ha ku humesiwa kutani xi fika xi wu komba wansati la tirhaka ku nyika vanhu swakudya kwalaho. Leswi swi nyike vatswari va xifanyetana lexi nkarhi wo rhamba wansati yoloye entsombanweni.
9 Vayuda lava lavaka ku dyondza swo tala hi Yehovha a va tshama va yi langutele hi mahlo-ngati minkhuvo leyi tsakisaka ya khale. (Det. 16:15) Ndyangu wa ka va Yesu a wu tiphina hi ku endla matshalatshala ya leswaku wu va kona naswona wu vuyeriwa hi xitalo. Na hina hi titwa hi ndlela leyi fanaka hi mintsombano ya hina ya muganga naswona hi yi teka yi ri nyiko leyi humaka eka Tata wa hina wa le tilweni la nga ni rirhandzu. (Yak. 1:17) Sweswi i nkarhi wo tilunghiselela ku va kona entsombanweni lowu nga ta hi nyika nkarhi wo gandzela Yehovha hi tsakile!
[Swivutiso Swa Dyondzo]
1. Xana minkhuvo ya Vaisrayele a yi fana njhani ni mintsombano ya muganga ya manguva lawa?
2. I yini leswi hi faneleke hi swi endla leswaku hi lunghekela ku va kona entsombanweni wa muganga lowu nga kwala nyongeni?
3. Xana minkhuvo ya Vaisrayele a yi va nyika njhani nkarhi wo va ni xinakulobye lexi akaka?
4. Hi nga swi kombisa njhani leswaku ha va tlangela swinene vamakwerhu va hina lava nga Vakreste naswona va nga ni vun’we?
5. I yini leswi nga ta hi pfuna leswaku hi vuyeriwa hi xitalo hi nkarhi wa xiyimiso?
6. I yini leswi hi faneleke hi swi tsundzuka hi maambalelo ni ku tilunghisa ka hina?
7. Ha yini hi fanele hi hoxa xandla entirhweni wo basisa entsombanweni?
8. Loko hi ri endhawini leyi ntsombano wu khomeriweke eka yona, i yini leswi nga endlaka leswaku hi pfulekeriwa hi nkarhi wo chumayela?
9. Hi nga ri tekelela njhani langutelo leri ndyangu wa ka va Yesu a wu ri na rona hi lunghiselelo ra Yehovha ra swakudya swa moya?
[Bokisi leri nga eka tluka 6, 7]
Switsundzuxo Swa Ntsombano Wa Muganga
◼ Minkarhi Ya Nongonoko: Nongonoko wu ta sungula hi 9:00 nimixo masiku hamanharhu. Loko vuyimbeleri lebyi rhangelaka nongonoko byi sungula, hinkwerhu hi fanele hi tshamiseka leswaku nongonoko wu ta sungula hi ndlela leyi xiximekaka. Hi Ravuntlhanu nongonoko wu ta hela hi 4:15 nindzhenga, hi Mugqivela wu hela hi 4:30 nindzhenga kasi hi Sonto wu ta hela hi 3:20 nindzhenga.
◼ Ku Paka Timovha: Etindhawini hinkwato ta ntsombano leti rindziweke, timovha ti ta paka handle ko hakerisiwa naswona ndhawu yi ta kumiwa ntsena hi lava nga ta hatla va fika. Leswi hakanyingi ndhawu yo paka yi nga yitsongo, ematshan’weni ya leswaku munhu un’we kumbe vambirhi va famba hi movha va ri voxe, swa antswa leswaku va khandziyisana ni van’wana leswaku ku nga tali timovha.
◼ Byetlelo: Tifomo leti nge Special Needs Room Request (CO-5) ta kumeka loko vahuweleri va lava ku kombela byetlelo. Komiti ya Ntirho ya Vandlha yi fanele yi kambela timfanelo ta muhuweleri la endlaka xikombelo, yi tirhisa swiletelo leswi tsariweke eka fomo leyi ni le ka papila ra July 15, 2009, leri kongomisiweke eka tihuvo hinkwato ta vakulu. Lunghiselelo leri i ra vahuweleri lava tikhomeke kahle swin’we ni vana va vona.
◼ Ku Vekela Van’wana Vutshamo: Ndhawu yo tshama u nga yi vekela ntsena lava u fambaka na vona hi movha kumbe lava mi tshamaka muti wun’we swin’we ni lava u dyondzaka na vona Bibele.—1 Kor. 13:5.
◼ Swakudya Swa Ninhlikanhi: Hi kombela mi titela ni swakudya swa ninhlikanhi, ematshan’weni yo suka endhawini ya ntsombano mi ya xava swakudya hi nkarhi wo wisa. Mi nga ha tirhisa minkwama leyitsongo yo titimerisa swakudya leyi nga vekiwaka ehansi ka xitulu. Minkwama leyikulu yo titimerisa swakudya yo fana ni leyi rhwariwaka loko ku yiwa epikinikini, yi fanele yi vekiwa laha varindzi va nga ta vula leswaku yi vekiwa kona. Mabodlhela lama fayekaka ni swakunwa leswi nga ni xihoko, a swi pfumeleriwi endhawini ya ntsombano.
◼ Minyikelo: Hi nga kombisa leswaku ha ma tlangela matshalatshala lama nga endliwa leswaku hi va ni ntsombano hi ku nyikela eka bokisi ra ntirho wa misava hinkwayo eHolweni ya hina ya Mfumo kumbe entsombanweni. Loko u lava ku nyikela hi cheke, hi kombela u vutisa nomboro ya akhawunti eka Komiti ya Ntsombano. Etindhawini tin’wana ta mintsombano ku ta va ku ri ni michini leyi nga ta endla leswaku lava nga ni makhadi ya le bangi va kota nyikela ha wona. Hi kombela u tihlanganisa ni Komiti ya Ntsombano loko u lava ku tiva laha muchini lowu wu vekiweke kona.
◼ Timhangu Ni Swiyimo Swa Xihatla: Loko ku tshuka ku va ni loyi a lavaka vutshunguri bya xihatla entsombanweni, hi kombela a tivisa murindzi la nga ekusuhi na yena, kutani murindzi yoloye u ta tivisa va Ndzawulo ya Xilamulela-mhangu, leswaku vamakwerhu lava nga ni vuswikoti va vona leswaku va nga n’wi pfunisa ku yini.
◼ Tintangu: Lembe rin’wana ni rin’wana ku va ni timhangu to tala leti vangiwaka hi tintangu leti ambariwaka. Kutani i swa nkoka ku ambala tintangu leti xiximekaka ni leti ku ringanaka kahle leswaku u kota ku famba kahle eswitepisini, endhawini leyi nga riki na switepisi ni le tindhawini tin’wana to fana ni teto.
◼ Ku Rhekhoda: Michini hinkwayo yo rhekhoda a yi fanelanga yi tlhomiwa eka fambiselo ra gezi kumbe ra mpfumawulo naswona loko u yi tirhisa u nga kavanyeti van’wana.
◼ Tipureme Ta Vana Ni Switulu Leswi Rhwalekaka: A swi fanelanga swi nghenisiwa eholweni leyi ntsombano wu nga ta khomeriwa eka yona. Kambe switulu swa vana leswi boheleriwaka ehenhla ka switulu leswi nga ekusuhi ni vatswari swa pfumeleriwa.
◼ Tiphefumu: Mintsombano yin’wana yi khomeriwa etindhawini leti pfalekeke, laha moya wa kona hi wu kumaka hi ti-aircondition ntsena. Kutani hi ta va hi kombisa musa loko hi papalata ku tirhisa tiphefumu leti nuhelaka ngopfu, leti nga ha endlaka leswaku van’wana swi va tikela ku hefemula.—1 Kor. 10:24.
◼ Fomo Leyi Nge Please Follow Up (S-43): Tifomo leti ti fanele ti tirhisiwa ku tsala rungula ra mani na mani la tsakelaka, loyi a kumiweke loko hi ri karhi hi chumayela hi xitshuketa kumbe hi nkarhi wa ntsombano. Vahuweleri va fanele va ta ni fomo yin’we kumbe timbirhi entsombanweni. Tifomo leti tsariweke vuxokoxoko bya kona ti fanele ti yisiwa eka Ndzawulo ya Tibuku kumbe mi ti nyika matsalana wa vandlha ra ka n’wina loko mi vuya entsombanweni.—Vona Vutirheli Bya Hina Bya Mfumo bya November 2009, tl. 4.
◼ Tikhefi: Xixima vito ra Yehovha hi ku tikhoma hi ndlela leyinene loko u ri etikhefini. Etindhawini to tala swi tolovelekile leswaku u nkhensa vatirhi hi mali leyi nga riki ehansi ka tiphesente ta khume ku ya ka 15, hi ku ya hi leswi va ku endleleke swona.
◼ Ntirho Wa Ku Tirhandzela: Ntsako lowu hi wu kumaka loko hi ri entsombanweni wu nga va wukulu loko ho tinyiketela ku pfuneta eka mintirho yin’wana. (Mint. 20:35) Un’wana ni un’wana la tsakelaka ku pfuna u komberiwa ku ya eka Ndzawulo ya Ntirho wa ku Tirhandzela entsombanweni. Vana lava nga ehansi ka malembe ya 16 na vona va nga hoxa xandla hi ku tirha swin’we ni mutswari kumbe munhu lonkulu la nga ni vutihlamuleri.
◼ Tinsimu: Mavandlha ma nga ha tsakela ku titoloveta tinsimu leti nga ta yimbeleriwa entsombanweni ka ha ri ni nkarhi. Tinsimu ta Ravuntlhanu: 118, 18, 113, 91, 88 na 75. Tinsimu ta Mugqivela: 92, 85, 60, 65, 69 na 48. Tinsimu ta Sonto: 51, 63, 106, 16, 49, na 2.