Xana U Swi Lunghekerile Ku Va Kona eNkhubyeni Lowu Nga Ta Tiyisa Vuxaka Bya Wena Na Yehovha?
1. I yini leswi katsekaka loko ku lunghiseleriwa swakudya swa nkhuvo?
1 Ku lunghiselela swakudya swa nkhuvo swi koxa swo tala. Swi lava leswaku u lava swakudya leswi u nga ta swi sweka u tlhela u swi sweka hi ndlela leyi phomisaka marha, ivi u swi phamela vanhu. Ku fanele ku hleriwa ni ndlela leyi swi nga ta phameriwa ha yona. Nakambe ku fanele ku lunghiseleriwa ni ndhawu leyi ku nga ta dyeriwa eka yona. Vaendzi na vona va fanele va tilunghiselela, ngopfu-ngopfu loko va huma ekule. Hambileswi ntirho wa kona wu nga tala, wa rivaleka loko vanghana swin’we ni swirho swa ndyangu va hlanganile va ri karhi va dya swakudya swo nandziha. Ku nga ri khale Timbhoni ta Yehovha emisaveni hinkwayo ti ta hlengeletana hi mintlawa leyikulu ni leyitsongo leswaku ti ta tiphina hi nkhuvo lowu nga ta tiyisa vuxaka bya tona na Yehovha eNtsombanweni wa Muganga lowu nge “Tshamani Mi Rindzile!” Ntirho wo tala se wu endliwile leswaku ku lunghiseleriwa nongonoko wa ntsombano lowu. Hinkwerhu ha rhambiwa. Un’wana ni un’wana wa hina u fanele a endla malunghiselelo leswaku a ta va kona nileswaku a ta vuyeriwa swinene.—Swiv. 21:5.
2. I yini leswi hi faneleke hi swi endla leswaku hi va kona eka nongonoko hinkwawo wa ntsombano?
2 Vuyeriwa Swinene: Xana se u ma endlile malunghiselelo ya leswaku u ta va kona enongonokweni hinkwawo wa ntsombano? Loko swi lava leswaku u kombela masiku yo ya entsombanweni eka muthori wa wena, endla tano leswaku u ta va kona eka nongonoko hinkwawo ku katsa ni hi siku ro sungula. Xana se u ma endlile malunghiselelo ya xo famba ha xona ni byetlelo? Vakulu va fanele va tiyiseka leswaku vanhu lava kuleke, lava lamaleke swin’we ni vanhu van’wana lava nga ta lava mpfuno va pfuniwa.—Yer. 23:4; Gal. 6:10.
3. Ha yini hi nga fanelanga hi ya entsombanweni wa matiko yo hambana-hambana loko hi nga rhambiwanga?
3 Etindhawini tin’wana ku ta va ku ri ni mintsombano ya matiko yo hambana-hambana. Tsundzuka leswaku emintsombanweni yoleyo ku rhambiwe mavandlha yo karhi ntsena swin’we ni vamakwerhu lava humaka ematikweni yo karhi. Rhavi ri hlele nhlayo ya vanhu lava ri nga ta va rhamba hi ku ya hi nhlayo ya switshamo ni tihotela leti nga ta kota ku amukela vaendzi. Loko vahuweleri vo ya entsombanweni wa matiko yo hambana-hambana va nga rhambiwanga, swi nga endla leswaku ku tala lerova ku pfumala ni vuphelo bya marha.
4. I yini leswi nga ta hi pfuna leswaku hi lunghekela ku sungula ka nongonoko siku rin’wana ni rin’wana?
4 Tiyimisele ku fika hi nkarhi siku ni siku leswaku u ta kuma ndhawu yo tshama nongonoko wu nga si sungula. Loko nongonoko wu nga si sungula, languta tinkulumo leti nga exiyimisweni xa wena. Sweswo swi ta ku pfuna leswaku u lunghiselela mbilu ya wena leswaku u ta vuyeriwa eka tinkulumo hinkwato. (Ezra 7:10) Loko mutshama-xitulu a vula leswaku se ku ta tlanga vuyimbeleri lebyi rhangelaka nongonoko, tshama ehansi u tiphina hi byona leswaku u lunghekela risimu ni xikhongelo xo pfula.
5. Xana ndyangu wa ka hina wu nga vuyeriwa njhani hi nkarhi wa nongonoko?
5 Loko swirho swa ndyangu swi tshama swin’we entsombanweni, vatswari va ta kota ku pfuna vana va vona leswaku va yingisela. (Det. 31:12) Hinkwerhu hi khutaziwa ku pfula Tibibele ta hina loko ku hlayiwa matsalwa. Ku tsala tinotsi to koma swi ta ku pfuna leswaku u tshama u rhiye ndleve. Hi ku famba ka nkarhi, tinotsi teto ti ta ku tsundzuxa tinhla-nkulu ta tinkulumo. Papalata ku vulavula kumbe ku famba-famba ku nga ri na xivangelo loko nongonoko wu ri karhi wu ya emahlweni. Loko u ri ni selfoni, endla leswaku yi nga ku kavanyeti kumbe yi kavanyeta vanhu van’wana hi nkarhi wa nongonoko. Endzhaku ka xiyimiso xa siku rin’wana ni rin’wana, bula ni vanhu van’wana hi tinkulumo leti ku khutazeke.
6. Hi wihi nchumu wun’wana lowu nga wa nkoka emintsombanweni ya hina, naswona hi nga endla yini leswaku hi vuyeriwa hi xitalo?
6 Loko hi ri entsombanweni wa muganga hi tsakela vuxaka lebyi tiyeke ni vamakwerhu, lebyi vanhu va misava leyi va nga riki na byona. (Ps. 133:1-3; Mar. 10:29, 30) Ti tivise eka vanhu lava nga tshama ekusuhi na wena kutani u yisa mabulo ya n’wina emahlweni hi nkarhi wo wisa. Leswaku u kota ku endla sweswo, tikhomele swakudya swa ninhlikanhi leswaku u nga yi u ya xava swakudya exitolo hi nkarhi wo wisa. Tiyiseka leswaku a wu hundziwi hi nkarhi lowu wa nkoka swinene wa ku khutazana ni vamakwerhu.—Rhom. 1:11, 12.
7. I yini leswi hi faneleke hi swi tsundzuka loko hi hlawula leswi hi nga ta swi ambala entsombanweni?
7 Swiambalo: Yehovha u byele Vaisrayele leswaku va fanele va tiendlela madziva emakumu ka tinguvu ta vona, naswona a va boheka ku tlhela va vehela ngoti ya wasi emakumu ka dziva. (Tinhl. 15:37-41) Leswi a swi ta va tsundzuxa leswaku Yehovha u va hlawurile leswaku va n’wi gandzela. Ndlela leyi xiximekaka leyi hi ambalaka ha yona loko hi ri entsombanweni yi hi hambanisa ni vanhu va misava. Yi endla leswaku vanhu lava hi hlanganaka na vona va navela ku tiva swo tala hi hina hambiloko hi ri eswitolo. Kutani i swa nkoka leswaku u ambala hi ndlela yo xiximeka.
8. Hi nga va chumayela njhani vanhu van’wana loko hi ri endhawini leyi ntsombano wu nga khomeriwa eka yona?
8 Chumayela: Loko ho lunghiselela ka ha ri ni nkarhi hi ta swi kota ku chumayela vanhu loko hi ri endhawini leyi ntsombano wu nga khomeriwa eka yona. Makwerhu un’wana loyi a nga ya endhawini yo dyela eka yona ni nsati wakwe endzhaku ka nongonoko, u kombe mutirhi wa le ndhawini yoleyo beji yakwe kutani a n’wi vutisa a ku: “Xana u va vonile vanhu vo tala lava ambaleke beji yo fana ni leyi?” Mutirhi yoloye u vule leswaku u va vonile naswona u tivutisile leswaku ha yini va ambale tibeji to fana. Leswi swi endle leswaku ku sungula bulo naswona makwerhu loyi u rhambe mutirhi yoloye entsombanweni.
9. Leswi Yehovha a hi Rhambeke, hi nga swi kombisa njhani leswaku ha n’wi xixima?
9 Hambileswi tinkulumo hinkwato, mimbulavurisano ni minkombiso swi nyikeriwaka hi vamakwerhu, i Yehovha Tata wa hina wa le tilweni, loyi a hi lunghiselelaka swakudya leswi lembe na lembe, leswi hi pfunaka leswaku hi tiyisa vuxaka bya hina na yena. (Esa. 65:13, 14) Loko hi va kona siku rin’wana ni rin’wana naswona hi endla leswi nga ematimbeni ya hina leswaku hi nga lahlekeriwi nikatsongo, hi kombisa leswaku hi xixima loyi a hi Rhambeke. Xana se u hetile ku endla malunghiselelo ya leswaku u ta va kona?
[Bokisi leri nga eka tluka 6]
Switsundzuxo Swa Ntsombano Wa Muganga
◼ Minkarhi Ya Nongonoko: Minkarhi ya xiyimiso xa ntsombano wa muganga yi ta va yi yime hi ndlela leyi: Hi Ravuntlhanu wu ta sungula hi 9:00 nimixo ku ya eka 4:15 nindzhenga, hi Mugqivela 9:00 nimixo ku ya eka 4:30 nindzhenga, hi Sonto 9:00 nimixo ku ya eka 3:30 nindzhenga. Minkarhi ya xiyimiso xa ntsombano wa matiko yo hambana-hambana wu ta va wu yi yime hi ndlela leyi: Hi Ravumune yi ta sungula hi 1:20 nindzhenga ku ya eka 4:30 nindzhenga, hi Ravuntlhanu 9:00 nimixo ku ya eka 4:40 nindzhenga, hi Mugqivela 9:00 nimixo ku ya eka 4:15 nindzhenga, hi Sonto 9:00 nimixo ku ya eka 3:50 nindzhenga. Loko vuyimbeleri lebyi rhangelaka nongonoko byi sungula, hinkwerhu hi fanele hi tshamiseka leswaku nongonoko wu ta sungula hi ndlela leyi xiximekaka.
◼ Ku Paka Timovha: Etindhawini hinkwato ta ntsombano leti rindziweke, timovha ti ta paka handle ko hakerisiwa naswona ndhawu yi ta kumiwa ntsena hi lava nga ta hatla va fika. Leswi hakanyingi ndhawu yo paka yi nga yitsongo, ematshan’weni ya leswaku munhu un’we kumbe vambirhi va famba hi movha va ri voxe, swa antswa leswaku va khandziyisana ni van’wana leswaku ku nga tali timovha.
◼ Byetlelo: Tifomo leti nge Room Request ta kumeka loko vahuweleri va lava ku kombela byetlelo. Komiti ya Ntirho ya Vandlha yi fanele yi kambela timfanelo ta muhuweleri la endlaka xikombelo, yi tirhisa swiletelo leswi tsariweke eka fomo leyi ni le ka papila ra July 15, 2008, leri kongomisiweke eka tihuvo hinkwato ta vakulu. Lunghiselelo leri i ra vahuweleri lava tikhomeke kahle swin’we ni vana va vona.
◼ Ku Vekela Van’wana Vutshamo: Ndhawu yo tshama u nga yi vekela ntsena lava u fambaka swin’we na vona hi movha kumbe lava mi tshamaka muti wun’we.
◼ Swakudya Swa Ninhlikanhi: Hi kombela mi titela ni swakudya swa ninhlikanhi, ematshan’weni yo suka endhawini ya ntsombano mi ya xava swakudya hi nkarhi wo wisa. Mi nga ha tirhisa minkwama yo titimerisa swakudya leyi nga vekiwaka ehansi ka xitulu. Minkwama leyikulu yo titimerisa swakudya yo fana ni leyi rhwariwaka loko ku yiwa epikinikini, yi fanele yi vekiwa laha varindzi va nga ta vula leswaku yi vekiwa kona. Mabodlhela lama fayekaka ni swakunwa leswi nga ni xihoko, a swi pfumeleriwi endhawini ya ntsombano.
◼ Minyikelo: Hi nga kombisa leswaku ha ma tlangela matshalatshala lama nga endliwa leswaku hi va ni ntsombano hi ku nyikela eka ntirho wa misava hinkwayo eHolweni ya hina ya Mfumo kumbe entsombanweni. Loko u lava ku nyikela hi cheke, hi kombela u vutisa nomboro ya akhawunti eka Komiti ya Ntsombano.
◼ Timhangu Ni Swiyimo Swa Xihatla: Va swilamulela-mhangu va amukela tinqingho to tala ta swiyimo leswi nga nyawuriki. Loko ku tshuka ku va ni loyi a lavaka vutshunguri bya xihatla entsombanweni, hi kombela a tivisa murindzi la nga ekusuhi na yena, kutani murindzi yoloye u ta tivisa va Ndzawulo ya Xilamulela-mhangu, leswaku vamakwerhu lava nga ni vuswikoti va vona leswaku va nga n’wi pfunisa ku yini.
◼ Tintangu: Lembe rin’wana ni rin’wana ku va ni timhangu to tala leti vangiwaka hi tintangu leti ambariwaka. Kutani i swa nkoka ku ambala tintangu leti xiximekaka ni leti ku ringanaka kahle leswaku u kota ku famba kahle eswitepisini, endhawini leyi nga riki na switepisi ni le tindhawini tin’wana to fana ni teto.
◼ Ku Rhekhoda: Michini hinkwayo yo rhekhoda a yi fanelanga yi tlhomiwa eka fambiselo ra gezi kumbe ra mpfumawulo naswona loko u yi tirhisa u nga kavanyeti van’wana.
◼ Tipureme Ta Vana Ni Switulu Leswi Rhwalekaka: A swi fanelanga swi nghenisiwa exivandleni lexi ntsombano wu nga ta khomeriwa eka xona. Kambe switulu swa vana leswi boheleriwaka ehenhla ka switulu leswi nga ekusuhi ni vatswari swa pfumeleriwa.
◼ Tiphefumu: Mintsombano yin’wana ya muganga yi khomeriwa etindhawini leti pfalekeke, laha moya wa kona hi wu kumaka hi ti-aircondition ntsena. Kutani hi ta va hi kombisa musa loko hi papalata ku tirhisa tiphefumu leti nuhelaka ngopfu, leti nga ha endlaka leswaku van’wana swi va tikela ku hefemula.—1 Kor. 10:24.
◼ Tifomo Ta Vanhu Lava Kombiseke Ku Tsakela: Fomo leyi nge Please Follow Up (S-43) yi fanele yi tirhiseriwa ku tsala vuxokoxoko bya mani na mani la kombiseke ku tsakela, loyi hi n’wi kumeke loko hi chumayela hi xitshuketa hi nkarhi wa ntsombano. Vahuweleri va fanele va ta ni fomo yin’we kumbe timbirhi entsombanweni. Tifomo leti tsariweke vuxokoxoko bya kona ti fanele ti yisiwa eka Ndzawulo Ya Tibuku kumbe mi ti nyika matsalana wa vandlha ra ka n’wina loko mi vuya entsombanweni.—Vona Vutirheli Bya Hina Bya Mfumo bya February 2005, tl. 6.
◼ Tikhefi: Xixima vito ra Yehovha hi ku tikhoma hi ndlela leyinene loko u ri etikhefini. Etindhawini to tala swi tolovelekile leswaku u nkhensa vatirhi hi mali leyi nga riki ehansi ka tiphesente ta khume ku ya ka 15, hi ku ya hi leswi va ku endleleke swona.