Nkarhi Wo Wundliwa Hi Yehovha Ni Ku Tsaka
1. Xana Yehovha u ma wundla njhani malandza ya yena?
1 Yehovha u wundla malandza ya yena hi rirhandzu leswaku ma tiyisa vuxaka bya wona na yena. Hambileswi vanhu vo tala va nga ni ndlala, hina hi dya hi xurha. (Esa. 65:13) Ndlela yin’wana leyi Yehovha a hi wundlaka ha yona i mintsombano leyi hi vaka na yona lembe ni lembe. Xana u karhi u endla malunghiselelo ya leswaku u va kona masiku hinkwawo ya Ntsombano wa Muganga lowu nge “Kongomisiwa Hi Moya Wa Xikwembu”? Ku lunghiseleriwe swakudya swo xawula.
2. Xana hi fanele hi endla yini leswaku hi ta va kona entsombanweni?
2 Kunguhata Ka Ha Ri Ni Nkarhi: “Makungu ya lava va gingiritekaka ma endla leswi pfunaka.” (Swiv. 21:5) Hikwalaho, loko u ri karhi u endla malunghiselelo yo va kona masiku hinkwawo entsombanweni, u nga rivali ku kombela nkarhi wo xwa entirhweni eka muthori wa wena. Loko swi lava leswaku u kuma byetlelo, xana se u ma endlile malunghiselelo ya kona? Nakambe, u fanele u endla malunghiselelo ya swakudya swa ninhlikanhi leswaku u ta dya ndhawu yin’we ni vamakwenu entsombanweni. Endla malunghiselelo ya ku fika ka ha ri ni nkarhi masiku hinkwawo ya ntsombano leswaku u ta kuma ndhawu yo tshama ni ku hlanganyela eka risimu ni xikhongelo xo pfula.
3. Hi fanele hi ambala njhani hi nkarhi wa ntsombano?
3 Swiambalo swa hina swi fanele swi xiximeka ni ku languteka. (1 Tim. 2:9, 10) Mintsombano ya muganga yi hi pfulela tindlela letinene to chumayela vanhu va ndhawu leyi ntsombano wu khomeriweke eka yona. Vanhu va swi vona leswaku hi Timbhoni loko hi ambale hi ndlela leyi xiximekaka niloko hi vehele tibeji ta hina loko hi ri endhawini leyi ntsombano wu khomeriweke eka yona naswona va ta bumabumela ndlela leyi hi langutekaka ha yona.
4. I yini lexi nga hi pfunaka leswaku hi vuyeriwa eka nongonoko wa ntsombano swin’we ni swirho swa mindyangu ya hina?
4 Rhiya Ndleve: A swi kanakanisi leswaku a hi lavi ku kayeriwa hi nchumu eka swakudya leswi hi lunghiseleriweke swona! (Swiv. 22:17, 18) Ku pfula Tibibele ta hina loko xivulavuri xi hlaya tindzimana to karhi ni ku tsala tinhla to koma, swi ta hi pfuna leswaku mianakanyo ya hina yi tshama yi dzikile eka leswi vuriwaka nileswaku hi nga kavanyetiwi. Kutani hi nga bula hi tinhla leti hi ti tsaleke loko hi ri karhi hi xuxa ni van’wana nimadyambu. Emalembeni lama ha ku hundzaka, ku xiyiwe leswaku vantshwa va tshama swin’we entsombanweni kutani va tidyela mabulo hi nkarhi wa nongonoko kumbe va tsalelana ti-sms. Loko hi ri ni vana lavatsongo, ku katsa ni lava sungulaka ku tlhariha, i swinene leswaku hi tshama na vona hi nkarhi wa nongonoko ku ri ni ku va tshika va titshamela voxe ni vantshwa van’wana.
5. Hi tihi tindlela tin’wana leti nga hi pfunaka leswaku hi wu tsakela ngopfu ntsombano?
5 Tiphine Hi Vunakulobye: Swakudya swo xawula swi nandziha ngopfu loko u swi dya ni vanghana. (Swiv. 15:17) Hilaha ku fanaka, ku va swin’we ni vamakwerhu swi endla leswaku hi wu tsakela ngopfu ntsombano wa hina. Hikwalaho, i swinene ku famba u pfuxela vamakwerhu loko ntsombano wu nga si sungula niloko ku ri nkarhi wo wisa! (Ps. 133:1) Loko mutshama-xitulu a hi kombela leswaku hi tshama ehansi loko vuyimbeleri byi nga si sungula, hi fanele hi tsema mabulo ya hina kutani hi lunghekela ku sungula ka nongonoko hi ku tshama ehansi.
6. Rungula ntokoto wa wena n’wini, lowu kombisaka ndlela leyi hi nga chumayelaka ha yona loko hi ye entsombanweni.
6 Tshama U Lunghekele Ku Chumayela: Minkarhi yo tala mintsombano yi hi nyika nkarhi lowunene wo chumayela. Vamakwerhu vo tala lava yaka eku xaveni ka swakudya nimadyambu, va vutisiwa hi vaxavisi ni hi vanhu van’wana leswaku xihloko lexi tsariweke eka tibeji ta vona xi vula yini. Leswi swi endla leswaku va kota ku chumayela vanhu volavo. Van’wana lava vutiseke va rhambiwile leswaku va ta entsombanweni naswona va tile.
7. Ha yini hi fanele hi va kona eka ntsombano wa muganga lowu taka?
7 Vamakwerhu va heta nkarhi wo tala ngopfu va ri karhi va lunghiselela nongonoko, ndhawu leyi ntsombano wu nga ta khomeriwa eka yona, tindzawulo ta ntsombano ni ku lunghiselela tinkulumo. Ku tikarhata loku hinkwako ku kombisa leswaku Yehovha wa swi tsakela ku wundla vanhu va yena. Onge hinkwerhu hi nga va kona naswona hi tiphina hi swakudya leswi hi lunghiseleriweke swona. Sweswo swi ta endla leswaku hi hambana ni vanhu va misava hikuva hi ta “huwelela hi ku tsaka hikwalaho ka xiyimo lexinene xa mbilu.”—Esa. 65:14.
[Bokisi leri nga eka tluka 4]
Switsundzuxo Swa Ntsombano Wa Muganga
◼ Minkarhi Ya Nongonoko: Nongonoko wu ta sungula hi 9:00 nimixo masiku hamanharhu. Loko vuyimbeleri lebyi tlangaka nongonoko wu nga si sungula, hinkwerhu hi fanele hi tshamiseka leswaku nongonoko wu ta sungula hi ndlela leyi xiximekaka. Hi Ravuntlhanu ni hi Mugqivela nongonoko wu ta hela hi 4:15 nindzhenga kasi hi Sonto wu ta hela hi 3:20 nindzhenga.
◼ Ku Paka Timovha: Etindhawini hinkwato ta ntsombano laha ku nga ni tindhawu leti rindziweke, timovha ti ta paka handle ko hakerisiwa, ndhawu yo paka yi pfulekele mani na mani. Swithikithana swa ntsombano leswi nga ta namaketiwa etimovheni hi swona swi nga ta kombisa leswaku movha wolowo wu nga paka.
◼ Byetlelo: Tifomo leti nge Room Request ta kumeka loko vahuweleri va lava ku kombela byetlelo. Komiti ya Ntirho ya Vandlha yi fanele yi kambela timfanelo ta muhuweleri la endlaka xikombelo, yi tirhisa nkongomiso lowu tsariweke eka fomo leyi ni papila ra July 15, 2008, leri kongomisiweke eka tihuvo hinkwato ta vakulu. Lunghiselelo leri i ra vahuweleri lava tikhomeke kahle swin’we ni vana va vona.
◼ Ku Vekela Van’wana Vutshamo: Ndhawu yo tshama u nga yi vekela ntsena lava u fambaka swin’we na vona hi movha kumbe lava mi tshamaka muti wun’we.
◼ Swakudya Swa Ninhlikanhi: Hi kombela mi titela ni swakudya swa ninhlikanhi ematshan’weni yo suka endhawini ya ntsombano mi ya xava swakudya hi nkarhi wo wisa. Mi nga ha tirhisa minkwama yo titimerisa swakudya leyi nga vekiwaka ehansi ka xitulu. Minkwama leyikulu yo titimerisa swakudya yo fana ni leyi rhwariwaka loko ku yiwa epikinikini yi fanele yi vekiwa laha varindzi va nga ta vula leswaku yi vekiwa kona. Mabodlhela lama fayekaka ni swakunwa leswi nga ni xihoko, a swi pfumeleriwi endhawini ya ntsombano.
◼ Minyikelo: Hi nga kombisa ku tlangela malunghiselelo ya ntsombano hi ku nyikela eka ntirho wa misava hinkwayo eHolweni ya hina ya Mfumo kumbe entsombanweni. Loko u lava ku nyikela hi cheke, hi kombela u vutisa nomboro ya akhawunti eka Komiti ya Ntsombano.
◼ Timhangu Ni Swiyimo Swa Xihatla: Loko ku tshuka ku va ni loyi a lavaka vutshunguri bya xihatla entsombanweni, hi kombela a tivisa murindzi la nga ekusuhi na yena, kutani murindzi yoloye u ta tivisa va Ndzawulo ya Xilamulela-mhangu, leswaku vamakwerhu lava nga ni vuswikoti va vona leswaku va nga n’wi pfunisa ku yini.
◼ Tipureme Ta Vana Ni Switulu Leswi Rhwalekaka: A swi fanelanga swi nghenisiwa eholweni ya nhlengeletano. Kambe switulu swa vana leswi boheleriwaka ehenhla ka switulu leswi nga ekusuhi ni vatswari swa pfumeleriwa.
◼ Tiphefumu: Mintsombano yin’wana ya muganga yi khomeriwa etindhawini leti pfalekeke, laha moya wa kona hi wu kumaka hi ti-air-condition ntsena. Kutani hi ta va hi kombisa musa loko hi papalata ku tirhisa tiphefumu leti nuhelaka ngopfu, leti nga ha endlaka leswaku van’wana swi va tikela ku hefemula.—1 Kor. 10:24.
◼ Fomo Leyi Nge Please Follow Up (S-43): Tifomo leti ti fanele ti tirhiseriwa ku tsala rungula ra mani na mani la tsakelaka, loyi hi n’wi kumeke loko hi chumayela hi xitshuketa kumbe hi nkarhi wa ntsombano. Vahuweleri va fanele va ta ni fomo yin’we kumbe timbirhi entsombanweni. Tifomo leti tsariweke rungula ra kona ti fanele ti yisiwa eka Ndzawulo Ya Tibuku kumbe ti nyikiwa matsalana wa vandlha ra ka n’wina loko mi vuya entsombanweni.—Vona Vutirheli Bya Hina Bya Mfumo bya April 2005, tl. 5.
◼ Tikhefi: Xixima vito ra Yehovha hi ku tikhoma hi ndlela leyinene loko u ri etikhefini. Etindhawini to tala swi tolovelekile leswaku u nkhensa vatirhi hi mali leyi nga riki ehansi ka tiphesente ta khume ku ya ka 15, hi ku ya hi leswi va ku endleleke swona.
◼ Tinsimu: Mavandlha ma nga ha tsakela ku titoloveta tinsimu leti nga ta yimbeleriwa entsombanweni ka ha ri ni nkarhi.
Tinsimu ta Ravuntlhanu: 190, 79, 42, 57, 157 na 191.
Tinsimu ta Mugqivela: 215, 123, 207, 46, 3 na 10.
Tinsimu ta Sonto: 163, 209, 4, 98, 8 na 212.