Landzela Kreste Hi Ku Va Ni Xindzhuti
1. Xana nhloko-mhaka ya ntsombano wa nan’waka yi fambisana njhani ni ku va ni xindzhuti?
1 Bibele yi hlamusela Yehovha, Hosi ya Vuako Hinkwabyo a ri loyi a ambaleke xindzhuti. (Ps. 104:1) Minkarhi hinkwayo Yesu a a vulavula ni ku hanya hi ndlela leyi xiximaka Tata wakwe ni malunghiselelo ya Yena. (Yoh. 17:4) Un’wana ni un’wana wa hina u ta va ni nkarhi wo tekelela Yesu kutani a dzunisa Yehovha eka Ntsombano wa hina wa Muganga lowu nga ni nhloko-mhaka leyi nge “Landzela Kreste!”
2. Xana ku tilunghiselela ku va kona eka xiyimiso ha xin’we swi komba ku xixima Yehovha hi ndlela yihi?
2 Vugandzeri Lebyi Nga Ni Xindzhuti: Hi nga xixima Yehovha hi ku hlela leswaku hi va kona enkhubyeni wa moya lowu a hi lunghiseleleke wona. Xana se u vulavule na yena muthori wa wena ni ku endla malunghiselelo leswaku u va kona entsombanweni siku rin’wana ni rin’wana ku katsa ni hi Ravuntlhanu? Xana se u ma endlile malunghiselelo lama faneleke leswaku u ta kuma ndhawu yo tshama ka ha ri ni nkarhi u tlhela u hlanganyela eka risimu ni xikhongelo xo pfula? Xana se u ma endlile malunghiselelo ya swakudya swa ninhlikanhi leswaku u ta kota ku va swin’we ni vamakwerhu laha ntsombano wu khomeriweke kona? Eku sunguleni ka xiyimiso ha xin’we, loko mutshama-xitulu a hi kombela leswaku hi tshama ehansi vuyimbeleri byi nga si sungula, hi fanele hi hatla hi tsema mabulo ya hina ivi hi tshamiseka leswaku nongonoko wu ta sungula.
3. Xana ku rhiya ndleve loko nongonoko wu ri karhi wu ya emahlweni ku pfuna njhani leswaku vugandzeri bya hina byi va ni xindzhuti?
3 Ku rhiya ndleve loko nongonoko wu ya emahlweni na swona i xikombiso xa ku xixima Tata wa hina la nga ematilweni. Endzhaku ka loko muviki un’wana wa mahungu a xiye ntsombano wa muganga wa le ndhawini leyi a tshamaka eka yona, u tsale leswaku vahlaleri va tsake ngopfu ku vona “ndlela leyinene leyi vatsombani a va tikhome ha yona, loko va ri karhi va rhiye ndleve hi xichavo, va miyerile naswona mianakanyo ya vona yi ri eka timhaka ta swa moya.” U tlhele a vula leswaku “u hlamarisiwe hi vana vo tala . . . , lava a va ri karhi va pfula matsalwa eBibeleni yo Kwetsima.” Loko nongonoko wu ri karhi wu ya emahlweni, a hi nkarhi wo dya mabulo, wo rhumelana marungula hi tiselfoni, wo dya kumbe wo ya hala ni hala. Vantshwa va fanele va tshama swin’we ni vatswari va vona leswaku va va pfuna leswaku va vuyeriwa enongonokweni. (Det. 31:12; Swiv. 29:15) Matshalatshala wolawo ma komba ku xixima van’wana ni ku tlangela swakudya swa nkoka swa moya leswi hi phameriwaka swona.
4. Ha yini hi fanele hi languteka hi ndlela leyi nga ni xindzhuti loko hi ri entsombanweni?
4 Ku Ambala Hi Ndlela Leyi Nga Ni Xindzhuti: Vo tala va phofule ku tlangela ka vona switsundzuxo swa nkulumo yin’wana n’wexemu entsombanweni wa muganga, leyi a yi ku “Vana Ni Xindzhuti Lexi Fanelaka Vakreste,” leyi a yi kandziyisa leswaku malandza ya Xikwembu ma fanele ma tikarhatela ku va ni xindzhuti lexi fanelaka Vakreste hi maambalelo ni hi ku tilunghisa ka wona. Ni nan’waka hi fanele hi ehleketisisa hi mhaka leyi. Ndlela leyi hi langutekaka ha yona yi komba leswi hi titwisaka xiswona ha Yehovha ni hi lunghelo leri hi nga na rona ro va Timbhoni ta yena. Minkarhi hinkwayo hi fanele hi ambala tanihi vanhu lava “vulaka leswaku va chava Xikwembu.”—1 Tim. 2:9, 10.
5. Xana hi nga endla njhani leswaku hi tshama hi ambale hi ndlela leyi nga ni xindzhuti endzhaku ka nongonoko loko hi ri endhawini leyi ntsombano wu khomeriweke eka yona?
5 Xana hi fanele hi va ni xindzhuti ntsena loko hi ri erivaleni ra ntsombano? U nga rivali leswaku vanhu vo tala va ta hi vona hi vehele tibeji ta ntsombano loko hi ri endhawini leyi ntsombano wu khomeriwaka eka yona. Ndlela leyi hi ambalaka ha yona yi fanele yi swi veka erivaleni leswaku hi hambanile ni vanhu va le ndhawini yoleyo. Hikwalaho, hambiloko nongonoko wu herile, loko hi ya etikhefini hi fanele hi ambala hi ndlela leyi fanelaka vachumayeri lava teke endhawini yoleyo leswaku va ta hlanganyela entsombanweni wa Vakreste naswona a hi fanelanga hi ambala swiambalo swo tanihi tibokati, maburuku yo koma kumbe swikipa. Wa nga ehleketa leswi vanhu va ndhawu yoleyo va nga ta ehleketa swona hi hina! Yehovha wa tsaka loko maambalelo ya hina ma hi fanela tanihi vachumayeri.
6. Hi byihi vuyelo lebyinene bya ku va ni xindzhuti lexi fanelaka Vakreste?
6 Vuyelo Lebyi Tsakisaka: Ku va ni xindzhuti lexi fanelaka Vakreste loko hi ri entsombanweni swi hi nyika nkarhi wa kahle wo chumayela hi xitshuketa ni ku siya vahlaleri va tsakile. Loko ntsombano wun’wana wu herile, mutirhela-mfumo un’wana u hlamarile a ku: “A hi si tshama hi vona vanhu lava nga ni mahanyelo lamanene ku fana na n’wina. Mi hanyisa leswi Xikwembu xi swi lavisaka xiswona.” Ku va ni xindzhuti swi komba leswaku ha xiximana ni ku rhandzana naswona swi dzunisa Yehovha. (1 Pet. 2:12) Swi kombisa ku chava ka hina Xikwembu ni ku tlangela lunghelo leri hi nga na rona ra ku dyondzisiwa hi xona tanihi Tata wa hina. (Hev. 12:28) Onge hi nga tikarhatela ku tshama hi ri ni xindzhuti tanihi leswi hi languteleke Ntsombano wa Muganga wa nan’waka lowu nge “Landzela Kreste!”
[Bokisi eka tluka 5]
Switsundzuxo Swa Ntsombano Wa Muganga
◼ Minkarhi Ya Nongonoko: Nongonoko wu ta sungula hi 9:00 nimixo masiku hamanharhu. Timinete ti nga ri tingani xiyimiso xi nga si sungula, mutshama-xitulu u ta tshama eplatifomo loko ku ri karhi ku tlanga risimu ra Mfumo leri rhangelaka ku sungula ka nongonoko. Enkarhini wolowo hinkwerhu hi fanele hi tshamiseka leswaku nongonoko wu ta sungula hi ndlela leyi xiximekaka. Hi Ravuntlhanu ni hi Mugqivela nongonoko wu ta hela hi 4:15 nindzhenga kasi hi Sonto wu ta hela hi 3:20 nindzhenga.
◼ Ku Paka Timovha: Etindhawini hinkwato ta ntsombano laha ku nga ni tindhawu leti rindziweke, timovha ti ta paka handle ko hakerisiwa, ndhawu yo paka yi pfulekele mani na mani. Swithikithana swa ntsombano leswi nga ta namaketiwa etimovheni hi swona swi nga ta kombisa leswaku movha wolowo wu nga paka. Leswi hakanyingi ndhawu yo paka yi nga yitsongo, ematshan’weni ya leswaku munhu un’we kumbe vambirhi va famba hi movha va ri voxe swa antswa leswaku va khandziyisana ni van’wana leswaku ku nga tali timovha.
◼ Ku Vekela Van’wana Vutshamo: Ndhawu yo tshama u nga yi vekela ntsena lava u fambaka swin’we na vona hi movha kumbe lava mi tshamaka muti wun’we.
◼ Swakudya Swa Ninhlikanhi: Hi kombela mi titela ni swakudya swa ninhlikanhi, ematshan’weni yo suka endhawini ya ntsombano, mi ya xava swakudya hi nkarhi wo wisa. Mi nga ha tirhisa minkwama yo titimerisa swakudya leyi nga vekiwaka ehansi ka xitulu. Minkwama leyikulu yo titimerisa swakudya yo fana ni leyi rhwariwaka loko ku yiwa epikinikini yi fanele yi vekiwa laha varindzi va nga ta vula leswaku yi vekiwa kona. Mabodlhela lama fayekaka ni swakunwa leswi nga ni xihoko, a swi pfumeleriwi endhawini ya ntsombano.
◼ Minyikelo: Ku laveka timali to tala leswaku ku lunghiseleriwa ntsombano wa muganga. Hi nga tlangela lunghiselelo leri hi ku nyikela eka ntirho wa misava hinkwayo eHolweni ya hina ya Mfumo kumbe entsombanweni. Loko u lava ku nyikela hi cheke, hi kombela u vutisa nomboro ya akhawunti eka Komiti ya Ntsombano.
◼ Timhangu Ni Swiyimo Swa Xihatla: Loko ku tshuka ku va ni loyi a lavaka vutshunguri bya xihatla entsombanweni, hi kombela u tivisa murindzi la nga ekusuhi na wena, kutani yena u ta tivisa va Ndzawulo Ya Xilamulela-mhangu, leswaku vamakwerhu lava nga ni vuswikoti va vona leswi va nga swi endlaka hi yena.
◼ Ku Rhekhoda: Michini yihi na yihi yo rhekhoda a yi fanelanga yi tlhomiwa eka fambiselo ra gezi kumbe ra mpfumawulo naswona loko u yi tirhisa u nga kavanyeti van’wana.
◼ Ku Teka Swifaniso: Loko u teka swifaniso hi nkarhi wa xiyimiso, u nga tirhisi rivoni ra khamera.
◼ Swiciyoti Ni Tiselfoni: A swi fanelanga swi kavanyeta van’wana.
◼ Fomo Leyi Nge Please Follow Up (S-43): Tifomo leti ti fanele ti tirhisiwa ku tsala rungula ra mani na mani la tsakelaka, loyi a kumiweke loko hi ri karhi hi chumayela hi xitshuketa kumbe hi nkarhi wa ntsombano. Vahuweleri va fanele va ta ni fomo yin’we kumbe timbirhi entsombanweni. Tifomo leti ti ta kumeka ni le ka Ndzawulo Ya Tibuku. Tifomo leti tsariweke rungula ra kona ti fanele ti yisiwa eka Ndzawulo Ya Tibuku kumbe ti nyikiwa matsalana wa vandlha ra ka n’wina loko mi vuya entsombanweni.—Vona Vutirheli Bya Hina Bya Mfumo bya April 2005, tl. 5.
◼ Tikhefi: Etindhawini to tala swi tolovelekile leswaku u nkhensa vatirhi hi mali leyi nga riki ehansi ka tiphesente ta khume ku ya ka 15, hi ku ya hi leswi va ku endleleke swona.
◼ Tinsimu: Mavandlha ma nga ha tsakela ku praktisa tinsimu leti nga ta yimbeleriwa entsombanweni ka ha ri ni nkarhi.
Tinsimu ta Ravuntlhanu: 105, 91, 168, 205, 150 na 11.
Tinsimu ta Mugqivela: 181, 31, 42, 191, 38 na 34.
Tinsimu ta Sonto: 160, 207, 200, 224, 209 na 4.