Vongani Yehovha eNhlengeletanweni Leyikulu

1, 2. Xana ntsombano wa muganga wu hi nyika lunghelo ro endla yini, naswona hi nga swi endlisa ku yini sweswo?

¹ Lembe ni lembe mintsombano ya hina ya muganga yi hi nyika nkarhi lowunene wo dzunisa Yehovha. Ndlela leyi hi titwaka ha yona yi fana ni ya Davhida, loyi a yimbeleleke a ku: “Ndzi ta ku vonga enhlengeletanweni leyikulu; ndzi ta ku dzunisa exikarhi ka vanhu vo tala.” (Ps. 35:18) ENtsombanweni wa Muganga lowu taka wa “Ku Yingisa Xikwembu,” hi nga tiyiseka njhani leswaku hi dzunisa Yehovha hi vun’we?

² Ndlela yin’wana leyi hi nga n’wi dzunisaka ha yona i mahanyelo ya hina. Mulanguteri wa ndhawu yin’wana leyi ntsombano a wu khomeriwe eka yona u te: “Hi byele mintlawa ya vukhongeri lebyin’wana leyi lavaka ku tirhisa ndhawu leyi, leswaku yi ta vona ntsombano wa Timbhoni ta Yehovha hikuva ti hleleke ngopfu.” Ku languteka ka hina, ntirhisano wa hina ni ku tikhoma ka hina, swi hoxa xandla eka swidzuniso swoleswo leswinene, leswi fanelaka Xikwembu xa hina ntsena.—1 Pet. 2:12.

3, 4. Xana ku va ni xichavo swi ta hi pfuna njhani leswaku hi ambala hi ndlela leyi fanelaka vachumayeri lava nga Vakreste, loko hi ri entsombanweni ni loko se wu herile?

³ Ku Languteka Ka Munhu: Ku ambala ni ku tilunghisa hi ndlela leyi yisaka ku dzuneka eka Yehovha swi lava leswaku hi va ni xichavo. (1 Tim. 2:9) Buku leyi nge Xikolo Xa Vutirheli, eka tluka 132, yi ri: “Munhu loyi a nga ni xichavo u papalata ku khunguvanyisa van’wana naswona a nga endli swilo hi ku lava ku voniwa.” Ematikweni yo tala, ku ambala hi ndlela leyi nga xiximekiki se ko va tshamela-maxelo. Hambiswiritano, Yehovha wa ma tlangela matshalatshala ya hina ya ku n’wi yimela hi ndlela leyi faneleke. (Mint. 15:14) Hambiloko ntsombano wu khomeriwe endhawini ya mintlango kumbe ya vuhungasi, nhlangano wolowo wu va “vandlha lerikulu” eka masiku wolawo manharhu. Hikwalaho, loko hi hlengeletanile emahlweni ka Yehovha, hi fanele hi ambala hi ndlela leyi xiximekaka emahlweni ka Nkulukumba wa vuako hinkwabyo.—1 Tikr. 29:11.

⁴ Nakambe hi fanele hi ambala hi ndlela leyi xiximekaka endzhaku ka xiyimiso xa siku rin’wana ni rin’wana ra ntsombano. Hambileswi minkarhi yin’wana hi nga swi laviki ku chepa loko hi tiwiserile kumbe loko hi ri eku dyeni eswitolo swa swakudya, i swa nkoka leswaku maambalelo ni ku tilunghisa ka hina ku va loku fanelekaka eka vanhu lava “vulaka leswaku va chava Xikwembu.” (1 Tim. 2:10) Maambalelo lama amukelekaka a ma yi hi fexeni leyi tolovelekeke ya nkarhi wolowo. (1 Yoh. 2:16, 17) Tibuku ta hina ti ni swifaniso swa vavanuna ni vavasati lava ambaleke hi ndlela leyi xiximekaka, loko va ri etindhawini to hambana-hambana. Ku tshama hi vehele tibeji loko hi ri edorobeni leri ntsombano wu khomeriwaka eka rona swi ta hi pfuna ku tshama hi ri karhi hi tsundzuka leswaku hi vachumayeri lava nga Vakreste minkarhi hinkwayo.—2 Kor. 6:3, 4.

5, 6. Xana hi nga ri xixima njhani tafula ra Yehovha ra moya?

⁵ Xixima Tafula Ra Yehovha: Hosi leyi Lawulaka ya vuako hinkwabyo yi hi lunghiselele nkhuvo. (Esa. 25:6; 1 Kor. 10:21) Loko hi swi tsakela hi mbilu hinkwayo ku dya etafuleni ra Yehovha ra moya, pakani ya hina ku ta va ku ya entsombanweni masiku ha manharhu. Xana se u byi lunghiselerile byetlelo, xo famba ni ku kombela masiku entirhweni? Xana u veke nkarhi lowu ringaneke wo lunghiselela ni wo famba leswaku u ya fika entsombanweni ka ha ri ni nkarhi, u kuma ndhawu yo tshama, u bula ni vamakwenu, ni ku dzunisa Yehovha swin’we na vona hi risimu ni xikhongelo xo pfula?—Ps. 147:1.

⁶ Ku xixima tafula ra Yehovha swi ta hi susumetela ku rhiya ndleve loko nongonoko wu ri karhi wu ya emahlweni, naswona hi ta papalata ku bula ni van’wana swi nga fanelanga, ni ku dya kumbe ku nga tshamiseki. Yehovha u tirhisa hlonga ro tshembeka ni ro tlhariha leswaku ri hi nyika swakudya swa moya leswi hi swi lavaka enkarhini lowu. (Mat. 24:45) A nga kona ni un’we wa hina la lavaka ku hundziwa hi swakudya leswi. Vatswari va fanele va tshama swin’we ni vana va vona, naswona va va pfuna leswaku va vuyeriwa swinene.—Det. 31:12.

7. Hi komberiwa ku endla yini hi nkarhi wo wisa ninhlikanhi, naswona ha yini?

⁷ Hi komberiwa ku titela ni swakudya, ematshan’weni yo suka entsombanweni hi nkarhi wo wisa hi ya lavana ni swakudya. Swa tsakisa leswi vamakwerhu vo tala va xi landzeleke kahle xileriso lexi entsombanweni wa n’wexemu. Swi ta va swinene loko hinkwerhu ho endla tano ni nan’waka! (Hev. 13:17) Lunghiselelo leri ri hi nyika nkarhi lowunene wo tiphina hi mabulo lama akaka swin’we ni vamakwerhu, naswona ri endla leswaku ku va ni moya wa vun’we ni ku rhula, leswi yisaka ku dzuneka eka Yehovha.—Ps. 133:1.

8, 9. Hi swihi swin’wana leswi ntsombano wu hi nyikaka nkarhi wo swi endla leswaku hi dzunisa Yehovha?

⁸ Ku Chumayela Hi Xitshuketa: Loko hi ri endleleni yo ya ni yo vuya entsombanweni, hi ni nkarhi wo tala wo dzunisa Yehovha hi milomu ya hina. (Hev. 13:15) Hambi hi le ku dyeni eswitolo swa swakudya kumbe hi le ku buleni ni vatirhi va le hotela, minkarhi hinkwayo a hi laveni ndlela yo va chumayela. Mianakanyo ni timbilu ta hina swi ta tala hi rifuwo ra moya ra swilo leswi hi swi kumeke entsombanweni. Swilo leswi leswinene a hi swi aveleni lava hi va chumayelaka hi xitshuketa.—1 Pet. 3:15.

⁹ Hi wu langutele hi mahlo-ngati nkarhi lowu wo dzunisa Yehovha “emintshungwini leyi hlengeletaneke.” (Ps. 26:12) Onge hi nga vonga Yehovha hi ri nyandza yin’we eNtsombanweni wa Muganga wa “Ku Yingisa Xikwembu.”

[Bokisi eka tluka 4]

Switsundzuxo Swa Ntsombano Wa Muganga

◼ Minkarhi Ya Nongonoko: Masiku manharhu hinkwawo nongonoko wu ta sungula hi 9:00 nimixo. Timinete ti nga ri tingani xiyimiso xi nga si sungula, mutshama-xitulu u ta tshama eplatifomo loko ka ha tlanga tinsimu ta Mfumo leti rhangelaka ku sungula ka nongonoko. Enkarhini wolowo hinkwerhu ka hina hi fanele hi tshamiseka leswaku nongonoko wu ta sungula hi ndlela leyi xiximekaka. Hi Ravuntlhanu ni hi Mugqivela nongonoko wu ta gimeta hi 4:15 nindzhenga, kasi hi Sonto wu ta gimeta hi 3:20 nindzhenga.

◼ Laha Ku Pakiwaka Mimovha: Etindhawini hinkwato ta ntsombano laha ku nga ni tindhawu leti rindziweke, mimovha yi ta paka handle ko hakerisiwa, ndhawu yo paka yi pfulekele mani na mani. Mimovha hinkwayo leyi nga ta paka kwalaho yi fanele yi va ni mfungho wo paka, lowu kombisaka leswaku movha wolowo wu ni lunghelo ra paka kwalaho. Leswi hakanyingi ndhawu yo paka yi nga yitsongo, ematshan’weni ya leswaku munhu un’we kumbe vambirhi va famba hi movha swa antswa leswaku va khandziyisana ni van’wana leswaku ku nga vi ni mimovha yo tala entsombanweni.

◼ Ku Vekela Van’wana Ndhawu Yo Tshama: Ndhawu yi nga vekeriwa ntsena lava u fambaka swin’we na vona hi movha kumbe lava mi tshamaka muti wun’we.

◼ Minyikelo: Ku laveka timali to tala leswaku ku lunghiseleriwa ntsombano wa muganga. Hi nga kombisa ku tlangela ka hina hi ku nyikela eka ntirho wa misava hinkwayo entsombanweni. Loko u lava ku nyikela hi cheke, hi kombela leswaku u kuma vito ra akhawunti eka Komiti ya Ntsombano.

◼ Swakudya Swa Ninhlikanhi: Hi kombela mi titela ni swakudya swa ninhlikanhi, ematshan’weni yo suka endhawini ya ntsombano mi ya xava swakudya hi nkarhi wo wisa. Mi nga ha tirhisa minkwama yo titimerisa swakudya leyi nga vekiwaka ehansi ka xitulu. Minkwama leyikulu yo titimerisa swakudya yo fana ni leyi rhwariwaka loko ku yiwa epikinikini, mabodlhela lama fayekaka ni swakunwa leswi nga ni xihoko, a swi pfumeleriwanga endhawini ya ntsombano.

◼ Ku Rhekhoda: Michini yihi na yihi yo rhekhoda a yi fanelanga yi tlhomiwa eka fambiselo ra gezi kumbe ra mpfumawulo naswona loko yi tirhisiwa a yi fanelanga yi kavanyeta van’wana.

◼ Ku Teka Swifaniso: Loko u teka swifaniso, u nga tirhisi rivoni ra khamera hi nkarhi wa xiyimiso.

◼ Swiciyoti Ni Tiselfoni: A swi fanelanga swi kavanyeta van’wana.

◼ Timhangu Ni Vutshunguri Bya Xihatla: Loko swo endleka leswaku ku laveka vutshunguri bya xihatla entsombanweni, hi kombela mi tivisa murindzi la nga le kusuhi, loyi a nga ta tivisa Ndzawulo ya Xilamulela-mhangu hi xihatla leswaku lava va tirhaka kwalaho va ta kambisisa ku vona leswaku ku laveka mpfuno wa njhani.

◼ Switolo Swa Swakudya: Etindhawini to tala swi tolovelekile ku nkhensa vatirhi hi malinyana yo karhi, swi ta ya hi leswi u endleriweke swona.

◼ Tinsimu: Mavandlha ma nga ha lava ku praktisa tinsimu leti nga ta tirhisiwa entsombanweni.

Tinsimu ta Ravuntlhanu: 139, 38, 205, 174, 170 na 4.

Tinsimu ta Mugqivela: 158, 40, 13, 69, 8 na 192.

Tinsimu ta Sonto: 162, 123, 221, 207, 181 na 34.