Tshama U Langutele Yehovha

1. Xi ri yini xihloko xa ntsombano naswona ha yini xi faneleka?

¹ Esaya u tsale a ku: “Yehovha i Xikwembu xa vuavanyisi. Va tsaka hinkwavo lava tshamaka va n’wi languterile.” (Esa. 30:18b) Bibele yi tamele marungula yo tala lama vulavulaka hi ku lovisiwa ka valala va Xikwembu ni ku ponisiwa ka malandza ya xona lama tshembekaka. Xana marungula yo tano ma hi dyondzisa yini namuntlha tanihi malandza ya Yehovha? Xana hi nga endla yini sweswi leswaku hi lunghekela “siku lerikulu ni leri chavisaka ra Yehovha”? (Yuw. 2:31, 32) Ntsombano wa hina wa Muganga lowu taka, lowu nge “Nkutsulo Wu Tshinele!” wu ta hi susumeta leswaku hi anakanyisisa hi swivutiso sweswo nileswaku hi tikambisisa. Wu ta hi pfuna leswaku hi tshama hi langutele Yehovha.

2. Hi nga kombisa hi ndlela yihi leswaku ha wu tlangela ntsombano wa hina wa muganga?

² Xana se u ma endlile malunghiselelo yo va kona masiku ha manharhu entsombanweni? Hi xikombiso, xana se u komberile eka muthori wa wena leswaku a ku nyika masiku yo ya entsombanweni? Tsundzuka leswaku xinamu xi dlele nkwahle. Namba u khongela hi mhaka leyi kutani u ya kombela nkarhi wo ya entsombanweni eka muthori wa wena. (Neh. 2:4, 5) Swi tano ni hi malunghiselelo ya swo famba, byetlelo ni timhaka tin’wana ta nkoka, a hi endleni malunghiselelo ka ha ri sweswi. Loko hi endla malunghiselelo lawa ka ha ri ni nkarhi, hi kombisa leswaku ha ri tlangela naswona ha ri xixima tafula ra Yehovha ra swakudya swa moya. Vakulu va fanele va xalamukela ku pfuna lava lavaka ku pfuniwa hi malunghiselelo ya ntsombano, ngopfu-ngopfu vadyuhari va le vandlheni.—Gal. 6:10.

3. Hi tihi timfanelo leti faneleke ti vonaka eka vanhu va Yehovha loko va ri emugangeni lowu ntsombano wu khomeriweke eka wona?

³ Ku Tikhoma Lokunene Ku Dzunisa Xikwembu: Swi nga khathariseki leswaku hi hlangane hi tele kumbe hi nga talanga emintsombanweni, ku tikhoma ka hina lokunene i ndlela yin’wana leyi hi va chumayelaka ha yona vanhu. Xana sweswo swi lava leswaku hi endla yini? Loko hi ri etihotela, eswitolo swo dyela eka swona ni le tindhawini tin’wana ta mabindzu emugangeni lowu ntsombano wu khomeriweke eka wona, vanhu lava hi vulavulaka na vona va fanele va tsaka hikwalaho ka timfanelo ta hina ta Vukreste, to tanihi ku va ni mbilu yo leha, ku olova, ku tikhoma ni ku va lava anakanyelaka. (Gal. 5:22, 23; Filp. 4:5) Hinkwerhu hi fanele hi va ni rirhandzu leri ku vuriwaka leswaku “a ri tikhomi hi ndlela leyi nga tengangiki, a ri lavi leswi vuyerisaka rona ntsena, a ri hlundzuki.” Hambiloko ku va ni swiyimo swo tika kumbe hi kavanyetiwa hi swo karhi, hi ta ‘endla hinkwaswo leswaku hi vangamisa Xikwembu.’—1 Kor. 10:31; 13:5.

4. Xana vatswari va nga va pfuna njhani vana va vona leswaku ndlela leyi va tikhomaka ha yona yi tisa ku dzuneka eka Yehovha?

⁴ Endzhaku ka ntsombano wun’wana, mininjhere wa hotela yin’wana u tsakisiwe hi ku tikhoma ni ku languteka ka vantshwa lava nga Timbhoni lerova a vula leswaku u navela onge “vaendzi lava taka ehotela ya yena ku ngo va Timbhoni ta Yehovha minkarhi hinkwayo.” Marito wolawo ma tsakisa hakunene! Vatswari, ma bumabumeriwa hikwalaho ka ndzetelo ni nkongomiso wa n’wina. A hi swinene leswaku vatswari va tshika vana va vona va etlela ehotela va nga ri na munhu lonkulu loyi a va kongomisaka. Minkarhi hinkwayo vana va fanele va kongomisiwa hi mfanelo. (Swiv. 29:15) Onge ku tikhoma ka vona lokunene ku nga tisa ku dzuneka eka Yehovha ku tlhela ku n’wi tsakisa!—Swiv. 27:11.

5. Xana hi nga n’wi dzunisa njhani Yehovha hi maambalelo ni hi ku tilunghisa ka hina?

⁵ Ku Ambala Ni Ku Tisasekisa Hi Ndlela Leyi Xiximekaka: Hinkwerhu hi nga hoxa xandla leswaku vanhu lava teke entsombanweni va languteka va ri lava xiximekaka, hi ku papalata tifexeni leti hundzeletiweke, leti nga xiximekiki ni ta vudlakuta. Leswi swi tirha niloko hi ri endleleni yo ya entsombanweni niloko hi muka nimadyambu edorobeni leri ntsombano wu khomeriweke eka rona, loko hi ri karhi hi lunghiselela ndhawu ya ntsombano niloko hi tshamile hi yingisele xiyimiso. Tanihi malandza ya Xikwembu, nchumu lowu hi karhatekaka ha wona ngopfu i vito ra Yehovha ni ndlela leyi ri khumbekaka ha yona, ku nga ri leswi hina hi swi lavaka kumbe leswi swi hi tsakisaka. Tinhloko ta mindyangu ti fanele ti vona leswaku swirho swa mindyangu ya tona swi ambale hi ndlela leyi xiximekaka ni leswaku mianakanyo ya swona yi hlutekile minkarhi hinkwayo.—1 Tim. 2:9.

6. Ha yini hi fanele ku tshama hi ri karhi hi languteka hi ndlela leyi xiximekaka loko hi tiwiserile endzhaku ka ntsombano?

⁶ Nakambe i swa nkoka ku languteka hi ndlela leyi xiximekaka loko hi tiwiserile etihotela ni loko hi ri eku dyeni eswitolo. I swa nkoka leswaku hi nga cinci swiambalo swa hina endzhaku ka xiyimiso xa ntsombano loko hi ya eku dyeni eswitolo. Loko hi vehele tibeji ta hina, hi ta kota ku chumayela hi xitshuketa loko swiyimo swi pfumela.—2 Kor. 6:3, 4.

7. Xana hi nga hoxa xandla hi ndlela yihi leswaku ku va ni ntsako ni ku hleleka entsombanweni? (Vona bokisi leri nge “Switsundzuxo Swa Ntsombano Wa Muganga.”)

⁷ Esaya u profete a ku: “Yehovha u ta tshama a langutele ku mi komba tintswalo, kutani u ta suka a yima a mi komba tintswalo.” (Esa. 30:18a) Ku tlangela tintswalo ta Yehovha ni musa wa yena lowu nga faneriwiki, ku fanele ku hi susumetela ku n’wi dzunisa hi ndlela leyi hi tikhomaka ha yona ni ku languteka ka hina loko hi hlanganile emintsombanweni. Onge Ntsombano wa Muganga lowu nge “Nkutsulo Wu Tshinele!” wu nga dzunisa Xikwembu wu tlhela wu hi pfuna leswaku hi tshama hi ri karhi hi xi languterile!

[Bokisi leri nga eka tluka 5]

Switsundzuxo Swa Ntsombano Wa Muganga

◼ Minkarhi Ya Nongonoko: Siku rin’wana ni rin’wana nongonoko wa ntsombano wu ta sungula hi 9:00 nimixo. Timinete ti nga ri tingani xiyimiso xi nga si sungula, mutshama-xitulu u ta tshama eplatifomo loko ka ha tlanga tinsimu ta Mfumo. Enkarhini wolowo hinkwerhu ka hina hi fanele hi tshamiseka leswaku nongonoko wu ta sungula hi ndlela leyi xiximekaka. Hi Ravuntlhanu nongonoko wu ta hela hi 4:25 nindzhenga, hi Mugqivela wu ta hela hi 4:15 nindzhenga kasi hi Sonto wu ta hela hi 3:20 nindzhenga.

◼ Laha Ku Pakiwaka Mimovha: Etindhawini hinkwato ta ntsombano laha ku nga ni tindhawu leti rindziweke, mimovha yi ta paka handle ko hakerisiwa, ndhawu yo paka yi pfulekele mani na mani. Tibeji ta ntsombano leti nga ta vekiwa emimovheni hi tona ti nga ta kombisa leswaku movha wolowo wu nga paka. Leswi hakanyingi ndhawu yo paka yi nga yitsongo, ematshan’weni ya leswaku munhu un’we kumbe vambirhi va famba hi movha, swa antswa leswaku va khandziyisana ni van’wana leswaku ku nga tali timovha entsombanweni.

◼ Ku Vekela Van’wana Ndhawu Yo Tshama: Ndhawu u nga yi vekela ntsena lava u fambaka swin’we na vona hi movha kumbe lava mi tshamaka muti wun’we.

◼ Swakudya Swa Ninhlikanhi: Hi kombela mi titela ni swakudya swa ninhlikanhi, ematshan’weni yo suka endhawini ya ntsombano, mi ya xava swakudya hi nkarhi wo wisa. Mi nga ha tirhisa minkwama yo titimerisa swakudya leyi nga vekiwaka ehansi ka xitulu. Minkwama leyikulu yo titimerisa swakudya yo fana ni leyi rhwariwaka loko ku yiwa epikinikini yi fanele yi vekiwa laha varindzi va nga ta vula leswaku yi vekiwa kona. Mabodlhela lama fayekaka ni swakunwa leswi nga ni xihoko, a swi pfumeleriwi endhawini ya ntsombano.

◼ Minyikelo: Ku laveka timali to tala leswaku ku lunghiseleriwa ntsombano wa muganga. Hi nga kombisa ku tlangela ka hina hi ku nyikela eka ntirho wa misava hinkwayo eHolweni ya hina ya Mfumo kumbe entsombanweni. Loko u lava ku nyikela hi cheke, kombela nomboro ya akhawunti eka Komiti ya Ntsombano.

◼ Timhangu Ni Swiyimo Swa Xihatla: Loko ku tshuka ku va ni xiyimo xa xihatla entsombanweni, hi kombela u tivisa murindzi la nga ekusuhi na wena, kutani yena u ta tivisa va Ndzawulo Ya Xilamulela-mhangu, leswaku vamakwerhu lava nga ni vuswikoti va vona leswi va nga swi endlaka hi xiyimo xexo.

◼ Ku Rhekhoda: Michini yihi na yihi yo rhekhoda a yi fanelanga yi tlhomiwa eka fambiselo ra gezi kumbe ra mpfumawulo, naswona loko u yi tirhisa u nga kavanyeti van’wana.

◼ Ku Teka Swifaniso: Loko u teka swifaniso hi nkarhi wa xiyimiso, u nga tirhisi rivoni ra khamera.

◼ Swiciyoti Ni Tiselfoni: A swi fanelanga swi kavanyeta van’wana.

◼ Fomo Leyi Nge Please Follow Up (S-43): Tifomo leti ti fanele ti tirhisiwa ku tsala rungula ra mani na mani la tsakelaka, loyi a kumiweke loko hi ri karhi hi chumayela hi xitshuketa kumbe hi nkarhi wa ntsombano. Vahuweleri va fanele va ta ni fomo yin’we kumbe timbirhi entsombanweni. Tifomo leti ti ta kumeka ni le ka Ndzawulo Ya Tibuku. Tifomo leti tsariweke rungula ra kona ti fanele ti yisiwa eka Ndzawulo Ya Tibuku kumbe ti nyikiwa matsalana wa vandlha ra ka n’wina loko mi vuya entsombanweni.—Vona Vutirheli Bya Hina Bya Mfumo bya April 2005, tl. 5.

◼ Tikhefi: Etindhawini to tala swi tolovelekile leswaku u nkhensa vatirhi hi mali leyi nga riki ehansi ka tiphesente ta 10 ku ya ka 15, hi ku ya hi leswi va ku endleleke swona.

◼ Tinsimu: Mavandlha ma nga ha tsakela ku praktisa tinsimu leti nga ta yimbeleriwa entsombanweni ka ha ri ni nkarhi.

Tinsimu ta Ravuntlhanu: 91, 40, 59, 38, 74 na 92.

Tinsimu ta Mugqivela: 71, 85, 204, 106, 43 na 195.

Tinsimu ta Sonto: 19, 207, 8, 14, 181 na 212.