“Vutlhari Byi Kombisiwa Byi Ri Lebyi Lulameke Hi Mintirho Ya Byona”
1. Xana vanhu van’wana va wu languta njhani ntirho wa hina?
1 Minkarhi yin’wana hi nga ha hlamuriwa hi ndlela yo biha hi vini va miti lava nga hi twisisiki kumbe lava byeriweke mavunwa hi Timbhoni ta Yehovha. Kumbexana ndlela leyi va hi langutaka ha yona yi vangiwe hi ndlela leyi swihaxa-mahungu swi vulavulaka ha yona hi hina. Etindhawini tin’wana hi tekiwa hi ri mpambukwa lowu nga ni khombo. Xana hi fanele hi angula njhani loko hi hlangana ni vanhu vo tano?
2. I yini leswi nga ta hi pfuna ku papalata ku hetiwa matimba loko hi kanetiwa?
2 Vana Ni Langutelo Lerinene: Hi lembe-xidzana ro sungula, minkarhi yo tala vanhu a va nga n’wi twisisi Yesu ni malandza man’wana ya Yehovha naswona a va vulavula ku biha ha vona. (Mint. 28:22) Kambe a va pfumelanga leswaku sweswo swi va sivela ku ya emahlweni ni vutirheli bya vona. Yesu u te: “Vutlhari byi kombisiwa byi ri lebyi lulameke hi mintirho ya byona.” (Mat. 11:18, 19) U hambete a hisekela ku endla ku rhandza ka Tata wakwe, naswona a a tiyiseka leswaku lava hakunene va lavaka ntiyiso va ta wu vona nkoka wa mahungu lamanene. Hi nga papalata ku hetiwa matimba hi ku tsundzuka leswaku N’wana wa Xikwembu na yena u langutane ni xiyimo lexi fanaka.
3. Ha yini hi nga fanelanga hi hlamala loko vanhu va vulavula ku biha hi hina kumbe va hi kaneta?
3 Yesu u vule leswaku misava yi ta venga valandzeri vakwe hilaha yi n’wi vengeke hakona. (Yoh. 15:18-20) Kutani a hi fanelanga hi hlamala loko vanhu va vulavula ku biha hi hina kumbe va hi kaneta. Entiyisweni, hi fanele hi swi langutela swilo swo tano, ngopfu-ngopfu tanihi leswi masiku ya makumu ma nga ekusuhi ni ku hela. Leswi swi endla leswaku Sathana na yena a ya a hlundzuka swinene. (Nhlav. 12:12) Kambe hi nga chaveleleka hi ku tiva leswaku leswi swi kombisa leswaku misava ya Sathana yi ta lovisiwa ku nga ri khale.
4. Xana hi fanele hi angula njhani loko vanhu va hi hlamula hi ndlela yo biha?
4 Hlamula Hi Ndlela Yo Rhula: Loko vanhu va hi hlamula hi ndlela yo biha, minkarhi hinkwayo hi fanele hi hlamula hi ndlela yo rhula. (Swiv. 15:1; Kol. 4:5, 6) Loko xiyimo xi pfumela, hi nga ha hlamusela n’wini wa muti leswaku ku ni timhaka to tala ta mavunwa leti vanhu va tivulaka hi Timbhoni ta Yehovha kumbe hi n’wi vutisa leswaku ha yini a titwa hi ndlela yoleyo. Ku n’wi hlamula hi ndlela yo rhula swi nga ha n’wi endla a lava ku tiva swo tala hileswi a swi tweke hi Timbhoni ta Yehovha naswona a rhiya ndleve loko hi tlhela hi n’wi endzela. Kambe loko a hlundzukile, swi nga ha va swinene ku hambana na yena. Ku nga khathariseki ndlela leyi vanhu van’wana va hi langutaka ha yona, Yehovha u wu teka wu ri wa nkoka ntirho wa hina wo chumayela.—Esa. 52:7.