“Vanani Ni Ku Rhula Ni Vanhu Hinkwavo”

1. Hi yihi ndzayo ya le Bibeleni leyi hi faneleke hi yi landzela loko hi hlangana ni vini va miti lava kariheke?

¹ Vanhu va Yehovha va kondletela ku rhula naswona vutirheli bya hina byi tisa ku rhula. (Esa. 52:7) Hambiswiritano, minkarhi yin’wana hi hlangana ni vanhu lava hi karihelaka loko hi nghena emitini ya vona. I yini lexi nga hi pfunaka leswaku hi kondletela ku rhula eka xiyimo xo tano?—Rhom. 12:18.

2. Ha yini swi ri swa nkoka leswaku hi va ni ku twisisa?

² Vana Ni Ku Twisisa: Hambiloko van’wana va hi karihela hi leswi va kanetaka ntiyiso, van’wana va nga nyangatseka hikwalaho ka swivangelo swin’wana. Kumbexana hileswi hi nga fika hi nkarhi lowu nga riki wunene. N’wini wa muti a nga ha va a hlundzukisiwe hi swiphiqo swa yena n’wini. Hambiloko a hlundzukisiwe hi mahungu lamanene, hi fanele hi tsundzuka leswaku swi nga ha endleka a angula hi ndlela yoleyo hi leswi a xisiweke. (2 Kor. 4:4) Loko hi ri ni ku twisisa swi ta hi pfuna leswaku hi kondletela ku rhula naswona hi nga ku tekeli enhlokweni ku kariha kakwe.—Swiv. 19:11.

3. Hi nga kombisa ku xixima n’wini wa muti hi ndlela yihi?

³ Vana Ni Xichavo: Vanhu vo tala ensin’wini va ni tidyondzo leti va pfumelaka eka tona. (2 Kor. 10:4) Swi le ka vona leswaku va lava ku hi yingisa kumbe e-e. A hi lavi ku sola ripfumelo ra n’wini wa muti kumbe ku endla onge hi tiva Bibele ku n’wi tlula. Loko a hi kombela leswaku hi famba, hi fanele hi xixima leswi a swi vulaka.

4. Swi vula yini ku vulavula hi ndlela ya musa?

⁴ Vulavula Hi Ndlela Ya Musa: Hambiloko va hi nyefula, hi fanele hi va hlamula hi ndlela yo rhula ni ya musa. (Kol. 4:6; 1 Pet. 2:23) Handle ko va hi phikizana na vona, hi fanele hi ringeta ku bula na vona hi mhaka leyi va nga ta pfumelelana na yona. Kumbexana hi ku titsongahata hi nga ha vutisa n’wini wa muti xivangelo lexi endlaka leswaku a nga tsakeli. Hambiswiritano, leswaku hi papalata ku n’wi hlundzukisa ku tlula mpimo, minkarhi yin’wana i swinene ku namba hi tsema bulo.—Swiv. 9:7; 17:14.

5. Hi byihi vuyelo lebyi vaka kona loko hi kondletela ku rhula ensin’wini?

⁵ Loko hi ri lava rhuleke, n’wini wa muti a nga ha tsundzuka ndlela leyi hi n’wi angulaka ha yona kutani a yingisa loko un’wana a ringeta ku n’wi chumayela enkarhini lowu taka. (Rhom. 12:20, 21) Hambiloko a tiomisa nhloko, siku rin’wana a nga ha va makwerhu wa hina. (Ga 1:13, 14) Ku nga khathariseki leswaku wa wu tsakela ntiyiso kumbe e-e, hi ta va hi vangamisa Yehovha naswona hi ta va hi sasekisa dyondzo ya hina loko hi tikhoma hi tlhela hi kondletela ku rhula.—2 Kor. 6:3.