Ku Va Ni Xivindzi, Kambe U Ri La Rhuleke
1 Vanhu vo tala lava hi va chumayelaka va vulavula hi tidyondzo leti va pfumelaka eka tona kambe ti nga pfumelelaniki ni ntiyiso wa Bibele. Hambileswi hi faneleke hi chumayela hi xivindzi, hi navela ku va “ni ku rhula ni vanhu hinkwavo,” ni ku papalata ku va khunguvanyisa swi nga fanelanga. (Rhom. 12:18; Mint. 4:29) Xana hi nga swi kotisa ku yini ku va ni xivindzi kambe hi ri ni ku rhula loko hi ri karhi hi chumayela rungula ra Mfumo?
2 Kuma Mhaka Leyi Mi Pfumelelanaka Ha Yona: Munhu lowo rhula u papalata timholovo. Ku kanetana ni n’wini wa muti swi nga fanelanga hi tidyondzo takwe leti a dzimeke timitsu eka tona a swi nge n’wi endli a tsakela rungula ra hina. Loko o vula mhaka leyi nga riki ntiyiso, kumbexana hi nga ta ni yinhla yin’wana hi vutlhari leyi hi nga ha pfumelelanaka ha yona. Loko ho dzika eka leswi hina na yena hi pfumelaka swona, hi nga ha kota ku tsuvula langutelo rihi na rihi ro biha eka yena kutani hi fikelela mbilu yakwe.
3 Loko hi honisa langutelo rihi na rihi leri hoxeke ra n’wini wa muti, xana hi va hi landzula ntiyiso? Doo! Xiavelo xa hina tanihi vachumayeri lava nga Vakreste, a hi ku kaneta dyondzo yin’wana ni yin’wana ya mavunwa leyi munhu a yi phofulaka, kambe i ku chumayela mahungu lamanene ya Mfumo wa Xikwembu. (Mat. 24:14) Ematshan’weni yo mpfhumpfha loko munhu a phofula langutelo leri hoxeke, hi ngo rhiya ndleve hi twa leswi nga emianakanyweni yakwe.—Swiv. 16:23.
4 Xixima N’wini Wa Muti: Minkarhi yin’wana hi fanele hi va ni xivindzi loko hi kaneta tidyondzo ta mavunwa. Kambe, tanihi vanhu lava nga ni ku rhula, hi papalata ku hlekula vanhu kun’we ni ku tirhisa marito yo poyila loko hi vulavula hi lava pfumelaka ni ku dyondzisa tidyondzo leti hoxeke. Moya wo titlakusa wu nga endla vanhu va nga tsakeli, kambe moya wo titsongahata ni wo rhula wu nga pfula mianakanyo ya lava rhandzaka ntiyiso. Ku xixima vayingiseri va hina kun’we ni leswi va swi pfumelaka swi va siya va ri ni xindzhuti, xisweswo swi endla leswaku swi va olovela ku amukela rungula ra hina.
5 Muapostola Pawulo a a nga ti tekeli hansi tidyondzo ta vanhu lava a a va chumayela kutani a a lava ndlela yo chumayela mahungu lamanene hi ndlela leyi nga ta va endla va ma tsakela. (Mint. 17:22-31) U tiendle “swilo hinkwaswo eka vanhu va mixaka hinkwayo,” leswaku a “ponisa van’wana hi tindlela hinkwato.” (1 Kor. 9:22) Na hina hi nga endla tano hi ku va lavo rhula loko hi ri karhi hi chumayela mahungu lamanene.