Langutelo Ra Bibele
Xana Swa Koteka Ku Va Mukondleteri Wa Ku Rhula?
EDYONDZWENI ya yena leyi dumeke swinene, Yesu Kreste u te: “Va tsaka lava kondletelaka ku rhula.” U tlhele a ku: “Va tsaka lava nga ni moya wo rhula, hikuva va ta dya ndzhaka ya misava.” (Matewu 5:5, 9) Ku va munhu la kondletelaka ku rhula swi katsa swo tala, ku nga ri ku va munhu wo rhula ntsena. Munhu la kondletelaka ku rhula u teka magoza yo endla xinghana naswona u hambeta a kondletela ku rhula.
Xana marito ya Yesu lama tshahiweke laha henhla ma tirha ni namuntlha? Van’wana va ehleketa leswaku, loko munhu swi ta n’wi fambela kahle eka minkarhi leyi hi hanyaka eka yona, u fanele ku va munhu la chavisaka van’wana, la nga ni tihanyi hambi ku ri madzolonga. Xana i vutlhari ku endla leswi van’wana va ku endlaka swona, ku va ni nkani loko va ri ni nkani? Kumbe, xana swa koteka ku kondletela ku rhula? A hi kambisiseni swivangelo swinharhu leswi kombaka leswaku hikwalaho ka yini hi fanele ku kambisisa marito ya Yesu lama nge: “Va tsaka lava kondletelaka ku rhula.”
◼ KU RHULA KA MBILU Swivuriso 14:30 yi ri: “Mbilu yo rhula i vutomi bya xivumbiwa xa nyama lexi hanyaka.” Swiviko swo tala swa ta rihanyo swi kombisa leswaku ku hlundzuka ni rivengo swi nga vanga mavabyi yo oma swirho ni mavabyi ya mbilu. Ku nga ri khale, magazini wun’wana wa ta rihanyo loko wu vulavula hi vanhu lava nga ni vuvabyi bya mbilu wu fanise ku hlundzuka ku tlula mpimo ni chefu. Magazini lowu wu tlhele wu vula leswaku “ku hlundzuka ngopfu swi nga ku vabyisa ngopfu.” Hikwalaho lava kondletelaka ku rhula va nga va ni “mbilu yo rhula” kutani va vuyeriwa.
Xikombiso xa leswi i Jim loyi a nga ni malembe ya 61 naswona sweswi a nga mudyondzisi wa Bibele eka vanhu lava vulavulaka Xivietnam le United States. Wa hlamusela: “Tanihi leswi ndzi heteke malembe ya tsevu ndzi ri evusocheni, ni ku hlasela kanharhu eVietnam, madzolonga, ku hlundzuka ni ku pfilunganyeka a ndzi swi tiva kahle. Leswi endlekeke enyimpini a swi tshamela ku ndzi karhata ni vurhongo byi nga phahi kahle. Ku nga ri kungani ntshikilelo, vuvabyi bya khwiri ni misiha swi endle leswaku vutomi bya mina byi nga ha tsakisi.” I yini leswi n’wi pfuneke? Wa hlamula: “Ku dyondza Bibele ni Timbhoni ta Yehovha swi ponise vutomi bya mina. Ku dyondza hi swikongomelo swa Xikwembu hi misava leyintshwa leyi nga ni ku rhula ni ndlela leyi ndzi nga ‘ambalaka vumunhu lebyintshwa’ ha yona swi ndzi rhulise mbilu. Hikwalaho ka sweswo rihanyo ra mina ra antswa swinene.” (Vaefesa 4:22-24; Esaya 65:17; Mikiya 4:1-4) Vanhu vo tala va swi vonile leswaku ku kondletela ku rhula swi nga antswisa vutomi bya hina hi tlhelo ra mintlhaveko ni ra moya.—Swivuriso 15:13.
◼ VUNGHANA LEBYI TSAKISAKA Vunghana bya hina ni van’wana byi nga kula loko hi ri ni moya wo kondletela ku rhula. Bibele yi vula leswaku “ku hlundzuka ni vukarhi ni huwa ni mavulavulelo ya nhlambha” a swi “susiwe . . . swin’we ni vubihi hinkwabyo.” (Vaefesa 4:31) Hi xitalo vanhu lava nga ni nkani va endla leswaku vanhu va va balekela kutani va tikuma va ri voxe, va ri hava vanghana lava nga tiseketelaka hi vona. Swivuriso 15:18 yi ri: “Munhu wo kariha u pfuxa mholovo, kambe loyi a hlwelaka ku hlundzuka u timela ku holova.”
Andy, nkulu la nga Mukreste wa malembe ya 42 le Dorobeni ra New York, u kulele laha a ku ri ni madzolonga. Wa hlamusela: “Ndzi dyondzisiwe ku ba xibakele ndza ha ri ni malembe ya nhungu. Loko ndzi langutane ni loyi ndzi lwaka na yena a ndzi nga n’wi teki a ri munhu. Ku ri ni sweswo, a ndzi ehleketa ntsena leswaku ‘loko ndzi nga n’wi bi u ta ba mina.’ Ku nga ri kungani ndzi sungule ku famba ni ntlawa lowu pfuxaka madzolonga. A hi famba hi vanga timholovo ni tinyimpi eswitarateni. Ndzi tshame ndzi kombeteriwa hi swibamu ni mikwana. Vanghana va mina vo tala a va karhata naswona a va hanya hi ku chava.”
I yini leswi endleke leswaku Andy a kondletela ku rhula? U ri: “Siku rin’wana ndzi ye etidyondzweni eHolweni ya Mfumo ya Timbhoni ta Yehovha, loko ndzi fika kwalaho, ndzi vhele ndzi swi vona leswaku vanhu lava va ni rirhandzu hakunene. Ku sukela kwalaho, ku va ka mina ni vanhu lava vo rhandza ku rhula swi ndzi pfunile ku hlakulela ku rhula, naswona hi ku famba ka nkarhi vumunhu bya mina bya khale byi nyamalarile. Ndzi sungule ku endla vanghana vo tala va xiviri.”
◼ NTSHEMBO HI VUMUNDZUKU Xivangelo xa nkoka swinene xo va hi kondletela ku rhula hi lexi: Hi kombisa xichavo ni ku xixima ku rhandza ka Muvumbi wa hina. Rito ra Xikwembu, ku nga Bibele, ra hi khutaza: “Lwelani ku kuma ku rhula, mi ku landzelela.” (Pisalema 34:14) Ku pfumela leswaku Yehovha Xikwembu u kona kutani hi dyondza ni ku hlayisa milawu yakwe leyi nyikaka vutomi swi hi pfulela ndlela yo va munghana wakwe. Loko hi ri ni vunghana lebyikulu na xona, hi ta kuma “ku rhula ka Xikwembu.” Loku i ku rhula ka xiviri ku nga khathariseki swihinga leswi tisiwaka hi vutomi.—Vafilipiya 4:6, 7.
Ku engetela kwalaho, loko hi kondletela ku rhula, hi komba Yehovha leswaku hi lava ku va vanhu va njhani. Hi nga tiyisekisa Xikwembu sweswi leswaku hi ta swi kota ku hanya emisaveni ya xona leyintshwa yo rhula leyi xi yi tshembiseke. Hi ta swi vona hi mahlo loko xi susa lavo homboloka naswona xi endla leswaku lava nga ni moya wo rhula ‘va dya ndzhaka ya misava’ hilaha Yesu a vuleke hakona. Mawaku lunghelo ro tano!—Pisalema 37:10, 11; Swivuriso 2:20-22.
Ina, nkoka wa marito ya Yesu lama nge, “va tsaka lava kondletelaka ku rhula” wu le rivaleni. Hi nga va ni mbilu yo rhula, vanghana va xiviri ni ntshembo lowunene hi vumundzuku. Hi ta yi kuma mikateko leyi loko hi endla hinkwaswo leswi hi nga swi kotaka leswaku hi va “ni ku rhula ni vanhu hinkwavo.”—Varhoma 12:18.
[Swifaniso leswi nga eka tluka 28]
“Rihanyo ra mina ra antswa swinene.”—Jim
[Swifaniso leswi nga eka tluka 29]
“Ndzi sungule ku endla vanghana vo tala va xiviri.”—Andy