Ku Antswisa Vutshila Bya Hina eNsin’wini—Ndlela Yo Hlamula N’wini Wa Muti La Hlundzukeke

Lexi Endlaka Swi Va Swa Nkoka: Vanhu vo tala lava hi va kumaka ensin’wini va ni vumunhu. Hambiswiritano, Yesu u profete leswaku vanhu van’wana va ta hi venga. (Yoh. 17:14) Hikwalaho, a hi fanelanga hi hlamala loko hi kuma n’wini wa muti la hlundzukeke. Loko hi n’wi kuma, hi fanele hi n’wi hlamula hi ndlela leyi nga ta tsakisa Yehovha, loyi hi yimelaka yena. (Rhom. 12:17-21; 1 Pet. 3:15) Sweswo swi ta sivela xiyimo leswaku xi nga nyanyi. Swi ta tlhela swi nyikela vumbhoni eka n’wini wa muti ni le ka vanhu lava nga ha vaka va hi hlalerile, swi va endla va tiyimisela ku yingisela loko Timbhoni ta Yehovha ti va endzela enkarhini lowu taka.—2 Kor. 6:3.

Ndlela Leyi U Nga Swi Endlaka Ha Yona:

Vana la rhuleke u tlhela u va ni xinghana. Sweswo swi nga antswisa xiyimo. U nga khunguvanyeki loko n’wini wa muti a hlundzukile. (Ekl. 7:9) A nga ha va a hlundzukisiwe hi swiphiqo swa yena n’wini kumbe hikwalaho ka leswi u fikeke hi nkarhi lowu nga fanelangiki eka yena. Hakanyingi a nga ha va a nyangatsiwa hi rungula ra hina hileswi a byeriweke mavunwa.—2 Kor. 4:4.
N’wi hlamule hi ndlela yo rhula ni ya musa. (Swiv. 15:1) Xana u n’wi pfuxe evurhongweni kumbe u n’wi kavanyetile? Hambileswi hi nga kombeliki ku khomeriwa hikwalaho ka ntirho wa hina, u nga ha kombela ku khomeriwa hileswi u n’wi endzeleke hi nkarhi lowu nga fanelangiki. Xana u hlundzukisiwe hileswi a tweke mavarivari lama nga riki ntiyiso malunghana na hina? Loko swi ri tano u nga ha ku: “Ndza swi twisisa leswaku ha yini sweswo swi ku hlundzukisa. Kambe, leswi u swi tweke malunghana na hina a hi ntiyiso. Xana ndzi nga ku hlamusela kahle?” Xana ku ni yin’wana ya tidyondzo ta hina leyi nga n’wi tsakisiki, yo tanihi mhaka ya ku susiwa evandlheni kumbe leyi khumbaka ngati? U nga ha ku: “Ndza ku twisisa. Van’wana na vona va karhateka ku fana na wena. Xana ndzi nga ku komba eBibeleni laha dyondzo yoleyo yi sekeriweke kona?”
Loko n’wini wa muti a hlundzuke ngopfu, swi nga va swinene ku namba mi famba, mi nga ringeti ku hlamulana na yena. Loko a kombela leswaku Timbhoni ta Yehovha ti nga ha n’wi endzeli, mi nga n’wi tiyisekisa leswaku a ti nge he n’wi endzeli.

Ringeta Ku Endla Leswi N’hweti Leyi:

Endlani minkombiso hi nkarhi wa vugandzeri bya n’wina bya ndyangu.
Loko mi huma endlwini ya n’wini wa muti la hlundzukeke, burisana ni loyi u fambaka na yena malunghana ni ndlela leyi a wu ta va u hlamule ha yona hi ndlela yo antswa.