Bokisi Ra Swivutiso

◼ Xana ku fanele ku endliwa yini loko n’wini wa muti a sindzisa leswaku Timbhoni ta Yehovha ti nga ha tlheli ti endzela kaya rakwe?

 Loko hi vona mfungho lowu alaka hi ku helela maendzo lama endliwaka hi vanhu va vukhongeri kumbe wu vula Timbhoni ta Yehovha hi ku kongoma, swi ta va swinene loko hi xixima leswi laviwaka hi n’wini wa muti naswona hi nga gongondzi.

 Minkarhi yin’wana hi vona mfungho lowu alelaka vaxavisi kumbe lava yengaka vanhu. Tanihi leswi hi endlaka ntirho lowunene wa vukhongeri, sweswo a swi tirhi eka hina. Swi ta va swinene leswaku hi ya gongondza enyangweni wolowo. Loko n’wini wa muti a ala, hi nga ha hlamusela hi vutlharhi leswaku ha yini hi vona onge mimfungho yo tano a yi tirhi eka hina. Loko n’wini wa muti a swi veka erivaleni leswaku ku siveriwa koloko ku katsa ni Timbhoni ta Yehovha, hi ta xixima ku rhandza kakwe.

 Loko hi ri karhi hi tirha nsimu, n’wini wa muti a nga ha hlundzuka a kandziyisa leswaku hi nga ha tlheli hi vuya. Loko a ala ku vulavula hi mhaka leyi, hi fanele hi yingisa xikombelo xakwe. Tsalwa leri nga tsariwa siku ri fanele ri vekiwa eka mvhilopho ya nsimu leswaku vahuweleri lava nga ta tirha nsimu yoleyo enkarhini lowu taka, va nga wu endzeli muti wolowo.

 Makaya wolawo a ma fanelanga ma papalatiwa hi laha ku nga heriki. Vanhu lava tshamaka kwalaho hi nkarhi wolowo va nga ha rhurha. Hi nga kuma xirho xin’wana xa ndyangu lexi tsakelaka. Swi nga endleka leswaku n’wini wa muti loyi hi nga tshama hi vulavula na yena a cinca embilwini naswona a hi pfumelela leswaku hi n’wi endzela. Xisweswo, endzhaku ka nkarhi wo karhi, hi nga ha kambela vanhu lava tshamaka kwalaho hi vutlharhi leswaku hi vona ndlela leyi va titwaka ha yona hi nkarhi wolowo.

 Fayili ya nsimu yi fanele yi pfuxetiwa kan’we hi lembe, ku xaxametiwa makaya lawa hi nga byeriwa leswaku hi nga ma endzeli. Ehansi ka nkongomiso wa mulanguteri wa ntirho, vahuweleri lava nga ni vukheta ni ntokoto va nga ha averiwa ku endzela makaya wolawo. Ku nga ha hlamuseriwa leswaku hi endzela ku vona loko ka ha ri yena n’wini wa muti wo sungula loyi a tshamaka kwalaho. Muhuweleri u fanele a tolovelane kahle ni rungula leri nge bukwini leyi nge Reasoning, matluka 15-24, leri nge “Ndlela Leyi U Nga Angulaka Ha Yona Eka Lava Lavaka Ku Siva Bulo.” Loko a angula kahle, maendzo ya nkarhi lowu taka ma nga ha endliwa hi ndlela leyi tolovelekeke. Kasi loko n’wini wa muti a ya emahlweni a sihalala, a ku fanelanga ku endliwa maendzo man’wana ku fikela haxawa. Huvo ya vakulu va vandlha yi nga endla xiboho loko xiyimo emhakeni yo karhi xi endla leswaku swi va swinene ku tirha hi ndlela yin’wana.