Mintsombano Ya Miganga Ya “Rito Ra Xikwembu Ra Vuprofeta” Ya 1999
1 Loko Vaisrayele va ri kusuhi ni ku nghena eTikweni leri Tshembisiweke, Muxe u va khutaze ku yingisa swiletelo swa Xikwembu. U te: “A hi marito lama nga pfuniki nchumu eka n’wina, kambe ma vula vutomi bya n’wina.” (Det. 32:45-47) Xana a hi n’wi nkhensi Yehovha leswi vutomi bya hina byi nga bya nkoka eka yena lerova a hambeta a hi letela hi ku tirhisa Rito rakwe leri nga ringanisiwiki na nchumu? Hikwalaho hi wu langutele hi mahlo-ngati Ntsombano wa Muganga wa masiku manharhu wa “Rito Ra Xikwembu Ra Vuprofeta” kun’we ni leswi Yehovha a hi khomeleke swona.
2 Nan’waka ku kunguhatiwe leswaku mintsombano ya muganga yi khomiwa etindhawini leti faneleke ta tiko hinkwaro ra Afrika Dzonga ni matiko hinkwawo lama nga ehansi ka rhavi ra Afrika Dzonga. Handle ka nongonoko wa Xitsonga, nongonoko wa ntsombano wa muganga wu ta khomiwa hi Xibunu, Xinghezi, Xipedi, Xiputukezi, Xitswana, Xivhenda, Xixhosa, Xizulu ni Ririmi ra Mavoko etindhawini tinharhu.
3 A swi kanakanisi leswaku ana se u ma endlile malunghiselelo ya ku va kona siku rin’wana ni rin’wana ra ntsombano, hikuva wa swi tiva leswaku Yehovha u langutele leswaku u va kona. Tiyiseka leswaku wa ma vona matshalatshala ni ku tikarhata hinkwako loku endliwaka hi malandza yakwe leswaku ma va kona, naswona wa tsaka loko a tsundzuka malandza yakwe. (Hev. 6:10) Hi ku va kona siku rin’wana ni rin’wana ra ntsombano ku sukela loko ku yimbeleriwa risimu ro pfula ku ya exikhongelweni xo hetelela, hi swi kombisa eka Yehovha leswaku hi tlangela leswi a hi byelaka swona. (Det. 4:10) Nakambe hi kombisa leswaku hi tlangela ku tikarhata ka vamakwerhu vo tala lava hlanganyelaka eku lunghiseleleni ka ntsombano.
4 Ku lunghiselela vanhu va Xikwembu va magidi leswaku va hlengeletana endhawini ya ntsombano, swi lava ku kunguhata ka ha ri ni nkarhi ni ku hlela lokunene. Ku tiva leswaku hi endleriwe malunghiselelo ya ntsombano hi rirhandzu, swi fanele swi hi susumetela ku va ni ntirhisano, leswaku “swilo hinkwaswo . . . swi endliw[a] hi ku tenga ni hi ku hleleka.” (1 Kor. 14:40) Ku hleriwe rungula ni switsundzuxo leswi landzelaka leswaku u ta fika entsombanweni lowu u yaka eka wona u swi lungheke kahle ku ya tiphina hi swakudya swa moya ni xinakulobye xa Vukreste.
Emahlweni Ka Ntsombano
5 Xana lava u dyondzaka na vona Bibele ni lava tsakelaka va lava mpfuno eku endleni ka malunghiselelo ya munhu hi xiyexe leswaku va va kona entsombanweni? Leswi va swi vonaka ni ku swi twa loko va ri kona entsombanweni swi nga ha va susumetela ku va vagandzeri va Yehovha. (1 Kor. 14:25) Vakulu va fanele va vona loko ku ri ni munhu loyi a lavaka byetlelo kumbe xofamba, ngopfu-ngopfu swirho swa vandlha leswi dyuhaleke, hi rirhandzu va fanele va vona leswaku vanhu lava va pfuniwa.—Gal. 6:10.
6 Xana u hetile ku endla malunghiselelo ya byetlelo? Loko u lava ku ya etlela ehotela, xana se u tiyisekisiwile leswaku byetlelo u byi kumile? Sweswi, tifomo hinkwato ta Room Request leti pfumeleriweke hi Komiti ya Ntirho ya Vandlha ti fanele ku va ti rhumeriwile hi matsalana wa vandlha endhawini leyi faneleke ya ntsombano. Loko u kume ndhawu ehotela kumbe emutini wo karhi ivi swi endleka leswaku u nge he etleli kona, hi kombela u tivisa Ndzawulo ya Byetlelo hi ku hatlisa leswaku ndhawu yi ta nyikiwa un’wana. Adirese ni nomboro ya riqingho u nga swi kuma eka matsalana wa vandlha.
7 Loko u lava rungula ro karhi malunghana ni ntsombano, matsalana wa vandlha a nga ha ku nyika adirese ni ndhawu leyi faneleke. Wa komberiwa leswaku u nga tshuki u ba riqingho kumbe u tsalela valawuri va ndhawu leyi ntsombano wu nga ta khomeriwa eka yona.
8 Tanihi leswi Ndzawulo ya Xilamulela-mhangu ya le ntsombanweni yi endleriweke ku khathalela swiyimo swa xihatla ntsena, hi kombela leswaku u ta ni tiphilisi ta wena, tibandichi, mirhi yin’wana ya nkoka, leyi pfunaka mpfuvelo ni swin’wana leswi fanaka na swona loko u anakanya leswaku u nga ha swi tirhisa entsombanweni. Loko wena kumbe un’wana la rhandzekaka a ri ni vuvabyi lebyikulu, byo tanihi vuvabyi bya mbilu, vuvabyi bya chukele kumbe bya switshetshele, hi kombela mi ta ni mirhi leyi lavekaka entsombanweni leswaku mi ta yi tirhisela mavabyi lawa, ku fana ni loko mi ri emakaya kumbe loko mi teka riendzo. I vutlharhi ku va muvabyi a tshama ni xirho xa ndyangu kumbe munghana lonkulu la twisisaka xiyimo xa muvabyi, tanihi leswi munhu wo tano a nga exiyin’weni lexinene xo nyikela mpfuno lowu lavekaka.
9 Swi nga ha endleka leswaku u kuma minkarhi ya ku nyikela vumbhoni bya xitshuketa loko wa ha ya kumbe u vuya entsombanweni. Xana u ta va u lunghekele ku byela van’wana mahungu lamanene? Hinkwerhu, ku katsa ni vana hi nga hlanganyela eku fambiseni ka swiphephana eka vanhu lava tirhaka etindhawini to chela petirolo, lava tirhaka ku hakerisa van’wamimovha emagondzweni ni van’wana lava u hlanganaka na vona eku fambeni. U ta kuma minkarhi ya ku fambisa timagazini, tibroxara ni tibuku tin’wana eka vanhu lava tsakelaka. Lunghekela ku nyikela vumbhoni hi xitshuketa eka vanhu lava swi nga ha endlekaka va nga kumiwi hi ku tirhisa tindlela to chumayela leti tolovelekeke.
Hi Nkarhi Wa Ntsombano
10 Minyangwa yi ta pfuriwa hi 7:30 a.m. endhawini ya mitsombano siku rin’wana ni rin’wana. Switulu u nga swi hlayisela ntsena va ndyangu wa wena kumbe lava u fambaka na vona hi movha wa wena. Vutshamo lebyi faneleke byi ta hlayiseriwa vamakwerhu lava dyuhaleke, naswona ku ta va ni tindhawu leti hlayiseriweke lava lamaleke ni lava tirhisaka switulu swa swigulana. A swi koteki ku lunghiselela makamara yo hlawuleka entsombanweni ya lava va vabyaka loko va ri endhawini yo karhi kumbe lava nga ni rinyenyo. Tiyiseka leswaku siku rin’wana ni rin’wana u teka swilo swa wena hinkwaswo loko u suka laha a wu tshame kona.
11 Leswaku hi kota ku hlangana hi tele emintsombanweni ya hina ya muganga, swa laveka leswaku hi yingisa milawu ya ndhawu yoleyo, milawu leyi khumbaka timhaka ta ndzilo ni milawu yin’wana ya vuhlayiseki. Hikwalaho tipureme to chovha vana ni switulu swin’wana swa vana a swi fanelanga swi nghenisiwa emuakweni lowu hi nga ta va hi hlengeletane eka wona. Leswi swi nga vanga khombo hi ku wisa vanhu etindhawini leti va fambaka eka tona kumbe eswindledyanini leswi nga exikarhi ka switulu. Loko swi koteka, Komiti ya Ntsombano yi ta hlawula ndhawu leyi ku nga ta vekiwa eka yona tipureme ta vana. Hambiswiritano, switulu swa vuhlayiseki swa vana leswi nga bohiwaka ni switulu swa vatswari, swa pfumeleriwa. Loko varindzi va mi kombela leswaku mi nga pfali swindledyana leswi nga exikarhi ka switulu, hi kombela leswaku mi va yingisa.
12 Xana u ta khuvuriwa entsombanweni wa muganga? Eka xiyimiso xa nimixo xa Mugqivela, xiyenge xo karhi xa switulu xi ta hlayiseriwa lava yaka eku khuvuriweni, naswona varindzi va ta ku komba ndhawu leyi. Loko swi koteka, wa komberiwa leswaku u va u tshame eswitulwini leswi xiyimiso xi nga si sungula. Yana ni Bibele, buku ya tinsimu, thawula ni swiambalo swa wena leswi xiximekaka swo nghena ha swona ematini. Tibokati to tsemiwa leti nga langutekiki, swikipa leswi tsala-tsariweke ni swin’wana leswi fanaka na swona a swi faneleki eka xiendlakalo xo tano xo xiximeka. Vakulu lava pfuxetaka swivutiso leswi nga ebukwini leyi nge Vutirheli Bya Hina ni lava yaka eku khuvuriweni, va fanele va tiyiseka leswaku un’wana ni un’wana wa ti twisisa tinhla leti. Tanihi leswi nkhuvulo wu nga xikombiso xa ku tinyiketela ka munhu hi yexe eka Yehovha Xikwembu, a swi fanelanga leswaku lava yaka eku khuvuriweni va khomana hi mavoko loko va ri karhi va khuvuriwa.
13 Tikhamera, tivhidiyo khamera ni michini yo rhekhoda u nga swi tirhisa entsombanweni. Hambiswiritano, a swi fanelanga swi vekiwa kumbe swi tirhisiwa laha swi nga ta pfala tindlela, swi sirha van’wana kumbe ku kavanyeta van’wana ku yingisela nongonoko. Swi fanele swi kota ku titirhela—handle ka ku va tintambhu ta swona ti tlhomiwa eka fambiselo ra gezi kumbe ra mpfumawulo. Timbhoni ti nga ri tingani ti ya emintsombanweni ti ri ni tikhamera kun’we ni tifilimi leswaku ti ta kuma mali hi ku teka swifaniso. A swi olovi ku tiva loyi a tirhisaka khamera yakwe hi xikongomelo xo lava ku kuma mali kumbe loyi a nga yi tirhisiki hi xikongomelo xolexo. Hikwalaho Sosayiti yi kombela lava va swi endleke eminkarhini leyi hundzeke leswaku va tshika mukhuva lowu. Tsundzuka leswaku ndhawu ya ntsombano i xivandla xa vugandzeri loko ha ha ri endhawini yoleyo hi nkarhi wa ntsombano, hikwalaho a ku fanelanga ku fambisiwa timhaka ta mabindzu endhawini ya ntsombano. Leswaku va pfuna ku herisa mukhuva lowu, varindzi va leteriwe ku veka ndzilakana ekusuhi ni xiteji.
14 Tanihi leswi ku tirhisiwa ka tinqingho ta selula ni swiciyoti ku yaka ku andza, hi kombela leswaku u va ni vukheta leswaku swilo leswi swi nga ku kavanyeti ku yingisela nongonoko kumbe ku kavanyeta nyingiso wa lava tshameke ekusuhi na wena. Swi fanele swi timiwa leswaku swi nga rili loko u tshame ni vayingiseri van’wana. Loko ku ri ni mhaka ya xihatla, hi ku hatlisa tivisa murindzi la nga ekusuhi na wena. Varindzi va leteriwe ndlela yo langutana ni swiyimo swa xihatla leswi nga ha vaka kona. Tinqingho hinkwato ta xihatla ti fanele ti endliwa hi ku pfumeleriwa hi vulawuri bya ntsombano, a ti fanelanga ti endliwa hi vanhu lava nga ni tingingho ta vona vini ta tiselula.
15 Leswaku ku hlayisiwa nkarhi ni ku olovisa swilo, Sosayiti yi kombele leswaku hi ta ni timbuva ta hina entsombanweni siku rin’wana ni rin’wana. Vamakwerhu vo tala va landzele nkongomiso lowu naswona va kume leswaku endzhaku ka loko va hangalakile leswaku va ya eku wiseni ninhlikanhi, va tshama ehansi ni mindyangu ya vona va dya timbuva ta siku rero. Vo tala va vule leswaku hi nkarhi wa ku wisa ninhlikanhi va tiphina hi ku heta nkarhi lowu engetelekeke ni vamakwavo. Leswi swi lava leswaku u xava swakudya ni swakunwa ka ha ri ni nkarhi ni ku swi hlayisa kahle exibyeni lexitsongo kumbe xibya lexi hlayisaka swakudya swi titimela lexi nga ringanaka ku nghena ehansi ka xitulu. Hi kombela leswaku hinkwavo lava nga ta va kona va landzela nkongomiso lowu. Ku voniwe vamakwerhu van’wana va huma exivandleni xa ntsombano hi nkarhi wa xiyimiso va ya xava swakunwa ni ayisikhrimi eka vanhu lava xavisaka eswitarateni. Nyingiso wu fanele wu yisiwa eka ndzetelo wa swa moya. Nakambe endzhaku ka xiyimiso, tilayeni to leha ta lava va xavaka swilo eka vanhu lava xavisaka erivaleni ti endla leswaku vanhu va tlimbana eminyangweni. Hikwalaho, hi kombela leswaku un’wana ni un’wana a ringeta ku ta ni swakudya ni swakunwa swa yena siku rin’wana ni rin’wana ematshan’weni ya ku xava eka vaxavisi va le switarateni. Nakambe vanhu lava tsakelaka lava u nga ta famba na vona entsombanweni va fanele va ta ni timbuva ta vona. Swibya leswi fayekaka ni swakunwa leswi nga ni xihoko a swi laveki endhawini ya ntsombano.
16 Xana u nga pfuna hi ku tirhandzela eku basiseni endzhaku ka xiyimiso xa siku rin’wana ni rin’wana? Kumbe, xana u nga tirha eka yin’wana ya tindzawulo ta ntsombano? Loko u ta swi kota ku pfuna, hi kombela u ya eka Ndzawulo ya Ntirho wa ku Tirhandzela entsombanweni. Vana lava nga ehansi ka malembe ya 16 hi vukhale va pfumeleriwa ku tirha ni mutswari kumbe munhu un’wana lonkulu la nga ni vutihlamuleri. Ina, un’wana ni un’wana a nga basisa muako hi ku tiyiseka leswaku thyaka rin’wana ni rin’wana ra oleriwa ri tlhela ri cukumetiwa laha ku faneleke.
17 Hi kume nkongomiso lowunene malunghana ni leswi katsekaka eka maambalelo ni ku tilunghisa lokunene emintsombanweni ya hina. Hi xikombiso: Hi nyikiwe nkongomiso malunghana ni mhaka leyi eka swiengetelo swa Vutirheli Bya Hina Bya Mfumo, hi ni swifaniso etibukwini ta hina, nakambe ku tlula kwalaho, ha swi tiva leswi Yehovha a swi vulaka eBibeleni. (Rhom. 12:2; 1 Tim. 2:9, 10) Vanhu va hi tiva naswona va swi tiva leswaku ha yini hi hlengeletanile endhawini ya ka vona. Xisweswo, maambalelo ni ku tilunghisa ka hina swi nyikela vumbhoni lebyikulu. Vunyingi bya vanhu va Yehovha byi veka xikombiso lexinene emhakeni leyi. Hambiswiritano, nkarhi wun’wana hi vona moya wa misava eka maambalelo ni ku tilunghisa ka van’wana lava vaka kona emintsombanweni ya hina. Swiambalo swo vonikela, tirhoko to pfuleka ngopfu eswifuveni, tirhoko to koma ni swiketi swo koma ni swiambalo swo pfuleka ngopfu etlhelo, swi endla leswaku ku tivula ka munhu leswaku i munhu wa moya ku hundzuka swa hava. Swiambalo swo xiximeka, leswi baseke ni ku languteka hi swona swiambalo leswinene. Tinhloko ta mindyangu ti fanele ti tiyiseka leswaku i swiambalo swa njhani leswi swirho swa mindyangu ya tona swi kunguhataka ku swi ambala. Maambalelo lamanene i ya nkoka hambiloko hi humile exivandleni xa ntsombano. Lava nga ta hlanganyela eku nyikeleni ka tinkulumo va fanele va xalamukela mpimanyeto wa maambalelo lamanene. Ku tshama hi vehele tibeji ta hina emahlweni ni le ndzhaku ka nongonoko wa siku, swi endla leswaku swi tikomba leswaku hi vanhu va Yehovha nileswaku hi xiphemu xa vanhu vakwe lava baseke.—Ringanisa Marka 8:38.
18 Hosi ya vutlharhi Solomoni, u huhuteriwe ku vula leswaku “vuphukuphuku byi tsimbiwe embilwini ya mufana” naswona “mufana la tshikiweke a ntshunxekile u ta n’wi khomisa tingana mana wakwe.” (Swiv. 22:15; 29:15) Hi nkarhi wa xiyimiso, vantshwa va Timbhoni lava a va nga vekiwanga tihlo hi vatswari va kavanyete vamakwerhu lava lavaka ku vuyeriwa hi nongonoko. Emintsombanweni ya n’wexemu, a swi xumbadza ku vona vanhu vo hlayanyana—lavakulu ni vana va kondlo-a-ndzi-dyi—va ri karhi va yingayinga ni ku gidela eswihambukelweni swi nga fanelanga loko nongonoko wu ri karhi wu ya emahlweni. Minkarhi yin’wana a va va ni nkani naswona a va honisa varindzi lava va va kombelaka ku tshama ehansi. Nakambe vamambuxu va nga ri vangani a va nga tshamiseki endhawini ya ntsombano naswona a va tlanga hi tiphayiphi to tima ndzilo ni tinsimbi leti tiphayiphi to tima ndzilo ti boheleriwaka eka tona. Mulawuri wa ndhawu leyi a yi tirhiseriwa ntsombano laha Afrika Dzonga u kombele Sosayiti leswaku yi lawula swinene vanhu lava vaka kona emintsombanweni ya muganga hikuva van’wana a va famba-famba etindhawini ta ntsombano leti Sosayiti yi nga ti hirhangiki. Xikombelo xa muxaka lowu i xo sungula naswona xi kombisa xiyimo lexi nga tsakisiki mayelana ni ku tikhoma ka Timbhoni ta Yehovha. Swi le rivaleni leswaku vantshwa lava a va nga vuyeriwi hi nongonoko wa swa moya lowu lunghiseriweke vona. Tanihi leswi vatswari va nga ta tihlamulela emahlweni ka Yehovha hikwalaho ka ku tikhoma ka vana va vona, manana kumbe tatana, a nga tiyiseka leswaku vana vakwe va tikhome kahle naswona va yingisela swiletelo swa Yehovha ntsena loko vana va tshame na yena. Hikwalaho, varindzi va ta vulavula ni munhu un’wana ni un’wana la kavanyetaka van’wana, la nga xiximiki nhundzu kumbe loyi a yingayingaka, va ta n’wi kombela leswaku a tshika leswi a swi endlaka, hi musa va ta n’wi kombela ku yingisela nongonoko.
19 Hikwalaho ka leswi hi rhambaka mani na mani leswaku a ta emintsombanweni ya hina, hi fanele hi tirhisa vutlharhi mayelana ni ku khathalela vana kun’we ni swilo swa hina. Vana va hina i nyiko ya risima leyi humaka eka Yehovha. Kambe ha swi tiva leswaku misava yi hlasela hi ndlela leyi tirhisiwaka hi Sathana. Hikwalaho ha ku kombela leswaku u tiva laha vana va wena va nga kona minkarhi hinkwayo. Nakambe, tikhamera, swipachi ni swilo swin’wana swa risima swi fanele swi tshama swi ri na wena minkarhi hinkwayo, u nga swi siyi exitulwini xa wena. Tiyiseka leswaku movha wa wena wa wu lotlela ivi u veka swilo swa wena endzhaku ka movha kumbe u swi teka u famba na swona. Leswi swi endla leswaku munhu a nga voni leswi a nga swi yivaka emovheni wa wena.
20 Ndzawulo ya Byetlelo yi swi lunghekerile ku ku pfuna loko ku tshuka ku pfuka xiphiqo malunghana ni ndhawu ya wena ya byetlelo ehotela kumbe ndhawu leyi u tivisiweke leswaku u ta etlela eka yona. Hi kombela u tivisa Ndzawulo ya Byetlelo mayelana ni swiphiqo swin’wana ni swin’wana leswi u langutanaka na swona loko wa ha ri entsombanweni. Vamakwerhu va ta swi tsakela ku ku pfuna ku lulamisa xiphiqo lexi leswaku u ta hambeta u tiphina hi ntsombano. Nakambe malunghana ni byetlelo, hi kombela u xiya leswi landzelaka:
▪ Hi kombela u tsundzuka minkarhi ya ku vika loko u fika ni loko u famba ehotela leyi u nga ta tshamaka eka yona. Loko u kombele ka ha ri ni nkarhi, hotela yi nga ha ku pfumelela ku tshama hambiloko u hatle u fika kumbe yi ku pfumelela ku famba hambiloko nkarhi lowu a wu vekeriwe wona wu hundzile.
▪ Hakanyingi tithelevhixini ni tivhidiyo leti nga kona etihotela ti ni minongonoko leyi kombisaka vanhu lava nga ambalangiki. Hakanyingi, loko u kombela tihotela to tala ta pfumela ku pfala minongonoko yo karhi eka leswi nga ta va swi ri ekamareni ra wena hi nkarhi lowu u nga ta va wa ha ri kona. Hilaha u endlaka hakona loko u ri ekaya, hi kombela u xiya ndlela leyi vana va wena va yi tirhisaka ha yona thelevhixini.
21 Swa khutaza ku vona vamakwerhu va tsala tinhla hi nkarhi wa nongonoko wa ntsombano. Ku tsala tinhla to koma swi ta ku pfuna leswaku u yingiserisisa ni ku tsundzuka tinhla-nkulu. Ku pfuxeta tinhla ni ndyangu kumbe vanghana swa ku pfuna leswaku u anakanyisisa hi tinhla-nkulu ta ntsombano leswaku u nga ti rivali.
22 Minkarhi hinkwayo vanhu va Yehovha va hanana hi ku humesa minyikelo leyi seketelaka mintirho ya swa le tilweni. (Eks. 36:5-7; 2 Tikr. 31:10; Rhom. 15:26, 27) Minyikelo ya wena ya ku tirhandzela yi tirhiseriwa ku hakelela miako leyikulu leyi mintsombano yi khomeriwaka eka yona. Loko u endla minyikelo hi ku tirhisa cheke, hi kombela u tsala leswaku i ya “Watch Tower Convention.” Tindhawu to tala ta ku paka mimovha ta kumeka hi minyikelo yo karhi. Vamakwerhu van’wana va sindzise leswaku thikithi ra ku paka movha ri fanele ri tirhiseriwa eka mintsombano yo hlayanyana. Swa vavisa ku vona van’wana va kombisa moya lowu wa misava. Hi kombela mi tsundzuka leswaku thikithi ra ku paka movha ri tirhiseriwa ntsena mahelo-vhiki lawa ri xaveriweke ku tirhisiwa eka wona hikwalaho a ri fanelanga ku tirhisiwa eka ntsombano wun’wana.
23 Hilaha ku tsariweke hakona eka Amosi 3:7, Yehovha u vule leswaku “a nge endli nchumu a nga si hlavutela mhaka ya yena leyi nga xihundla eka malandza ya yena ku nga vaprofeta.” Tanihi “Muhlavuteri wa swihundla,” Yehovha u hlayise vuprofeta bya madzana eBibeleni lebyi pakaniseke ni ku hetiseka hi ku helela. (Dan. 2:28, 47) Switshembiso swa nkoka swa ha ta hetiseka. Mintsombano ya Muganga ya “Rito Ra Xikwembu Ra Vuprofeta” ya 1999, yi ta tiyisa ripfumelo ra wena eswitshembisweni swa Xikwembu. Yingiserisisa leswi Yehovha a ku byelaka swona. Leswi u nga ta swi vona ni ku swi twa, swi tirhise—evutirhelini, evandlheni ni le vuton’wini bya wena. Hi ku navelela mikateko ya Yehovha leyi fuweke eka malunghiselelo hinkwawo lawa u nga ta ma endla leswaku u va kona siku rin’wana ni rin’wana eka nkhuvo lowu, lowu fuweke wa moya!
[Marito lama tshahiweke exihlokweni lama nga eka tluka 3]
Kunguhata ku va kona siku hinkwaro hi Ravuntlhanu, Mugqivela ni hi Sonto!